29 Apr 2015
المملكة السعودية والتغيير الكبير .. !!!
—————————————
شوفو بقى ..
علشان الهرى الكتير اللى شغال من صباحية ربنا ، سواءً على الفضائيات أو المواقع الإخبارية ، وطبعاً على الفيسبوك ، بخصوص القرارات الملكية اللى أصدرها الملك سلمان بإجراء تغيرات داخل بيت الحكم السعودى .. وعلشان صفحتنا ما تسقطش فى نفس الفخ اللى سقط فيه اللى عاملين فيها خبراء إستراتيجيين مع كل إحترامنا وإجلالنا للساسة الكبار والسياسيين المحترفين .. فــ إحنا هــ نقول كلمتين ورد غطاهم ..
– من الأخر كدة .. العلاقة بين مصر والسعودية علاقة توأمة وشراكة إستراتيجية .. فلا السعودية هــ تستغنى عن مصر ، ولا مصر ممكن تستغنى عن السعودية .
– التغييرات اللى حاصلة دى كلها موجهة لإيران فى المقام الأول .. والشخصيات اللى تم إقالتهم دوول سواءً كان بناءً على طلبهم ، أو لأى سبب تانى .. فــ اللى تم توليتهم بعدهم ، هم كوادر على أعلى مستوى ، وتاريخهم يشهد بكدة ، وخصوصاً ولى العهد الأمير محمد بن نايف ، أو عادل الجبير فى منصب وزير الخارجية خلفا للأمير سعود الفيصل .. ودول معروف عنهم عداءهم الشديد لإيران لدرجة تعرض عادل الجبير لمحاولة إغتيال إيرانية فاشلة لما كان سفير السعودية فى أميريكا !!
تجديد البيت الحاكم السعودى وإعادة الهيكلة وضخ دماء شابة جديدة ، كان كدة كدة هــ يتم ، وكان المتوقع إنه يحصل فى خلال سنة ونصف .. لكن كان لازم التعجيل بــ ده وخصوصاً بعد التصريحات السخيفة المستفزة اللى قالها أوباما بعد توقيع الإتفاقية مع إيران بمغازلة شباب الدول الخليجية !!
أما بقى اللى خايفين من التغييرات دى ، وإنها هــ تأثر على علاقة السعودية بمصر ، فلازم تعرفوا إن سياسات الدول مش بــ تدار بالشكل ده ، وفيه ثوابت إستراتيجية مش ممكن تجاوزها مهما حصل
ياريت بلاش النغمة الإعتمادية اللى شغالة على طول ، وإييه اللى هــ يحصل لمصر .. ومصر هــ تعمل إييه !! .. لأن مصر مش هــ تفضل واقفة طول الوقت وفيه حد ساندها علشان ما تقعش .. !! .. إحنا لازم نشتغل شوية .. ولازم نبنى بلدنا بإيدينا ..
بإيدين المصريين ..
كل الإحترام والتبجيل لفخامة الملك سلمان و لقراراته ، ولا عزاء لخبراء الفيسبوك 🙂 🙂 🙂