16 May 2015
كامب ديفيد الخليجية .. يافرحة ماتمت
—————————————-
حالة من القلق إنتابت كثير من اصدقائنا بمجرد الاعلان عن دعوة الرئيس الاميريكى باراك أوباما عن قمة خليجية برعاية اميريكية فى منتجع كامب ديفيد ، بخصوص وضعية المنطقة من الناحية الامنية ، بعد الاتفاق النووى الاميريكى الايرانى .. والتهديات الايرانية الموجهة لدول الخليج ، وخصوصا السعودية ، من خلال المد الشيعى اللى وصل للحدود الجنوبية للملكة عن طريق اليمن ، وما استتبعه من عملية عاصفة الحزم ، واللى كنا أفردنا لها 4 مقالات كاملة بكل تفاصيلها !
طبعا موضوع الدعوة دى كانت أهدافه باينة من الاول ، لكن حالة الضباب ونشر القلق بممارسة الحرب النفسية على كل شعوب المنطقة ، خلت الرؤية متعثرة عند البعض .. بالرغم من ان الاهداف كانت فعلا واضحة ..
الهدف الأول .. كان شق الحلف العربى الخليجى المصرى عن طريق توجيه الدعوة لدول الخليج واستثناء مصر من الدعوة دى ، بالرغم من ان مصر طرف أصيل فى الجبهة العربية .. وخصوصا بتحركاتها الاقليمية والدولية فى جميع الملفات سواء كان بالنسبة للملف اليمنى او السورى او حتى الملف الايرانى … وكانت اللعبة هنا هى إستخدام المبدأ الإستعمارى البغيض “فرق تسد” 😊
الهدف الثانى .. هو استغلال العاطفة باللعب على حالة الخوف الخليجية من البعبع الإيرانى والمد الشيعى فى المنطقة والايحاء بمدى خوف أميريكا أم قلب طيب على دول الخليج من اي خطر ممكن يهددهم … و ده بيفكرنى بفيلم المولد ، لما عادل إمام راح لنور الدمرداش وقال له انا مخضوض .. ف رد نور الدمرداش صاحب الملعوب كله ، وقال له “بعد الشر عليك من الخضة ياحبيبى” 😃😃
الهدف الثالث .. كان تقديم أميريكا تأكيدات لدول الخليج بضمان أمن المنطقة ، وإنه اذا كان ولابد يبقى فيه مبدأ إسمه “مسافة السكة”. . ف لازم يبقى من أميريكا مش من مصر .. وطبعا الدرع الصاروخى جاهز .. وتبقى مليارات تدفعها دول الخليج كإتاوة علشان تشترى بيها حماية البلطجي الاميريكى .. والمليارات تشغل مصانع السلاح .. والعداد يعد .. وعجز الموازنة الأميريكى يقل .. وأهو كله على حساب صاحب المحل 😊 …
ياترى فهمنا بقى المسلسل الحمضان اللى اتعمل بتاع خطف الباخرة فى مضيق هرمز واللى كان من تنفيذ ايران .. وسيناريو واخراج العم سام :😊 !!
طبعا أكيد كان فيه هدف رابع وهو اعادة النفوذ الأميريكى لمنطقة الخليج العربى بعد ما ضعف ووصل الى ادنى مستوياته .. وبكدة تبقى اميريكا ردت القلم لروسيا بالنسبة لترسيخ تواجدها فى مصر وسوريا .. وتمددها فى البحر المتوسط !!
لكن الهدف الأهم كان الرد على دعوة الرئيس السيسى بتأسيس القوة العربية المشتركة واللى النجاح فى تأسيسها ممكن يقلب موازين القوى الاقليمية فى الشرق الأوسط ويقلب المخطط الصهيونى _على طريق اسرائيل الكبرى_ .. وخصوصا لو اضفنا لكدة التحركات المصرية اللى بترسخ لعلاقات عسكرية وسياسية مع قوى دولية .. وبالتالى كان لازم يتم فركشة الموضوع ده علشان تفضل أميريكا بال 35 الف جندى المنتشرين فى المنطقة ، هم درع العرب التابعين للبلطجى اللى يقدر يفرض شروطه فى اى وقت !!
الدول الخليجية استوعبت الدرس كويس .. وفهمت اللعبة واعلنت موقفها .. مش من دلوقتى بس .. لكن من 30 يونيو 2013 لما قامت بتدعيم مصر بصورة لا محدودة ووقفت حائط صد ضد كل محاولات إسقاط مصر …. وبعدين تيجى الدعوة الأميريكية لملوك وأمراء الخليج لحضور قمة كامب ديفيد مع رئيس الدولة الأكبر والاعظم على مستوى العالم .. علشان يتخلى معظم ملوك وأمراء الخليج عن الحضور ماعدى الكويت و … و قطر طبعا .. ويبعتوا رجالات الصف الثانى عندهم .. لدرجة ان ملك البحرين فضل انه يحضر مشاركة سباق خيل فى انجلترا عن حضور القمة !!
وطبعا مش محتاجين نقول إنه فى عرف السياسة الدولية ودعوة على مستوى رئيس الولايات المتحدة لما يتخلى الملوك والأمراء وعلى رأسهم ملك السعودية عن الحضور .. يبقى تفتكروا ده معناه اييه 😊😊
ملوك وأمراء العرب بيوجهوا رسالة شديدة اللهجة لأميريكا ، وبيعاقبوا أوباما على دعمه لإيران بتهديد دول الخليج ، وخصوصا فى الملف اليمنى …. واللى حصل ده مالوش غير معنى واحد فقط .. وهو تقزم الدور الأميريكى فى المنطقة العربية ، مع تنامى فكرة التقارب العربى ، وتعاظم الدور المصرى فى المنطقة !!
عرفتوا بقى يامصريين 30 يونيو عملت اييه !!؟؟ 😊😊
ربنا يحمى مصر بلدنا ، و أمتنا العربية من كل شر .. ويحفظنا كلنا من التشرذم والتشتت والصراعات .. ويحفظ شعوب بلادنا من مخططات التفتيت والتقسيم .. ومن كل الفتن ما ظهر منها وما بطن