23 May 2015
تفجيرات شرق السعودية بين الرأى والحقيقة .. !!
————————————————–
النهاردة هــ نتكلم عن تفجير المسجد الشيعى اللى حصل فى شرق السعودية لكن هــ نلعب لعبة فيها شئ من فتح الافاق أمام العقول علشان نقول إزاى ممكن نفكر فى أى حادثة من كل الاحداث اللى بتحصل حوالينا .. وعلشان كدة احنا النهاردة مش هانقول اى تحليلات ولا هانصدر حكم .. أو حتى نحاول نصيغ كلامنا فى صورة توجه معين .. لكننا هنثير شوية نقط تساعد الجميع على التفكير من منطلق المبدأ اللى إحنا دايما بنقوله وهو “فتش عن المستفيد” .. 😊
طيب .. تعالوا نشوف كدة … واحد انتحارى فجر نفسه في مسجد يرتاده الشيعة فى بلدة القديح بمحافظة القطيف فى منطقة شرق السعودية !!
– ممكن ببساطة يكون اللى عمل كدة شخص عادى .. مؤمن بإنه كدة بيجاهد فى سبيل الله وبيقتل الشيعة الكفرة .. و ده ممكن يكون نتاج التطرف الفكرى اللى احنا بنشوفه حوالينا فى كل حتة .. لدرجة ان السلفيين على سبيل المثال بيشوفوا ان الشيعة خطر على الإسلام اكتر من الكيان الصهيونى نفسه ! 😊
– التفجير اللى حصل ممكن يكون أسلوب إيرانى رخيص عن طريق دفع احد الموتورين لتفجير نفسة فى وسط الشيعة فى السعودية .. اللى يترتب عليها تصريحات إيرانية هجومية ، ووضع السعودية فى موقف المدافع عن النفس .. و ممكن كمان يكون حجة لزيادة تدخل ايران فى مناطق اخرى ردا على اللى حصل بإعتبار انه موجه لإيران ..
– ممكن تكون عملية خسيسة موجهة ضد السعودية من قوى دولية أو اجهزة استخبارات لإشعال فتيل حرب طائفية (سنة/شيعة ) بهدف ضرب الاستقرار داخل المملكة عقابا لها على دعمها لمصر او كجزء من المخطط لإشعال المنطقة ..
– ممكن تكون التفجيرات رسالة أميريكية مباشرة للسعودية بعد فشل مباحثات كامب ديفيد-2 والاستمرار فى إجراءات تشكيل القوة العربية المشتركة .. والرسالة دى مؤداها “احنا نقدر نشعل الموقف عندكم لو ماسمعتوش الكلام .. وخلوا مصر تبقى تنفعكم” 😊 .. وعلشان كدة مصر بتتحرك بقوة فى الملف السورى والليبى لتخفيف الضغط على السعودية
– اعلان داعش مسؤوليتها عن التفجيرات بالتزامن مع التحركات الداعشية فى العراق وسوريا ، هو اسلوب ضغط على السعودية ومصر من اللى بيحركوا داعش .. انه لو مشروع القوة العربية المشتركة استمر واكتمل فى اخر يونيو او يوليو القادم .. هايبقى فيه عدو جاهز وموجود لمواجهة الجيش العربى فى حرب استنزاف طويلة الأمد .. و ده اللى بيفسر التسارع المفاجئ للتحركات الداعشية فى سوريا والعراق بعد فترة كمون طويلة !!
– التفجيرات دى معناها ان أميريكا بتضغط فى المنطقة وخصوصا على دول الخليج عن طريق البعبع الإيرانى .. علشان يبقى التوجه العربى كله فى اتجاه العدو الشيعى الإيرانى .. وتشتعل حرب طائفية تأكل الأخضر واليابس فى الوقت اللى فيه إسرائيل تكون فى أمان بعيدة عن كل ده .. وفى نفس الوقت تكون مستعدة بمخطط اسرائيل الكبرى علشان تقوم على انقاض الشرق الاوسط الجديد .. وسلملى على ثورات الربيع العبرى 😊
– التفجيرات هى بداية لتغيير الاستراتيجية الغربية بعكس المخطط بالكامل .. يعنى بدل ما كان المخطط اولا هو اسقاط مصر قوة الردع العسكرى وحائط الصد للمنطقة .. والحائل أمام اى تهديد للعرب والخليج وبعدين نبقى نستفرد بالخليج على نار هادئة .. فيبقى المخطط هو اسقاط الدول الخليجية وعلى رأسها السعودية اللى هم حائط الصد الاقتصادى والداعم السياسى لمصر .. وبعد ما يسقط الخليج ، نبقى نستفرد بمصر بقى على رواقة !! 😊
يا ترى رأى اصدقائنا اييه !!؟؟
احنا مش هانقول احنا مع أى سناريو من كل السيناريوهات دى .. وهــ نسيبكم تفكروا .. لأن الهدف زى ما قلنا مش اننا نوجه تفكيركم الى اتجاه معين .. ولكن هى رسالة بإن الموضوع معقد جداً .. وكل الخيوط فيه بتتشابك .. ولو انتم فاكرين مقالنا بعنوان “أرنبنا فى منور أنور” .. واللى بالرغم من إنه أثار حالة من الجدل على الصفحة .. إلا انه خلى جميع اصدقائنا يفكروا بأسلوب مختلف !!
لكن فى النهاية عايز أقول لكم ان كل السيناريوهات أصبحت مكشوفة أمام الصقور .. وكل سيناريو وله الرد المناسب .. وأهم حاجة ان مصر وحلفائها مكملين فى نفس الطريق وبمنتهى الثبات .. وهو ده اللى مجنن الغرب 😊 .. وخصوصاً انه فيه كروت عندنا لسة ماتمش إستخدامها 😊 😊