الرقم الصعب فى المعادلة الروسية .. وكلمة السر مصر 1

20 Jun 2015

الرقم الصعب فى المعادلة الروسية .. وكلمة السر مصر 1

———————————————————————

أجمل حاجة لما تبقى شايف عدوك بيتحرك على رقعة الشطرنج ، وانت شايفه وعارف هو بيخطط لإييه ، وسايبه يعمل اللى هو عايزه ، لإنك بتتحرك بالطابية بتاعتك علشان تعمل ضربة غير متوقعة ، تربك كل حساباته وتضرب كل المخططات بتاعته وتقلب الموقف رأسا على عقب . وهو ده اللى حصل فى 30 يونيو .. وهو ده اللى بيحصل دلوقتى ، سواء من مصر أو من روسيا أو من السعودية اللى أصبحوا رأس الحربة فى خط المواجة الأول فى النظام العالمى الجديد اللى بيتشكل .. !!

طبعا معركة تكسير العظام شغالة بقالها كثير .. والمكسب ماشى فى إتجاه واحد ، برغم تحركات الغرب المفاجئة والعشوائية اللى بتربك المشهد فى بعض الأحيان ، لكن ترجع الصورة تنتظم تانى وتمشى فى الإتجاه المخطط له .. 🙂

الموضوع انتقل من مجرد تصريحات كلامية وحروب مخابرات ، لــ عملية فرض إرادة على الأرض بالفعل .. والمسرح الحالى هو البحر المتوسط .. وطبعاً إحنا اتكلمنا قبل كدة إن القصة بدأت من سنتين لما ظهرت الغواصة الروسية فجأة أمام السواحل الروسية مخترقة بكدة كل قوات و رادارات البحرية الأميريكية فى المتوسط فى خطوة أربكت المشهد الأميريكى بشدة لكن بعدها بدأ الصراع الروسى الغربى ياخد منحنى مختلف وأخطر ..

التحركات الأمريكية الأطلسية بدأت تتزايد على عدة محاور، أهمها البحر الأبيض المتوسط بحجج كتيرة منها تفاقم الأوضاع في الشرق الأوسط وشمال أفريقيا، وإمكانية الرد السريع على روسيا في حال قيامها بخطوات ضد حلف الناتو .. وعلشان كدة قررت الولايات المتحدة نشر عدد من مشاة البحرية الأمريكية في البحر الأبيض المتوسط كقوات للرد السريع على متن سفن دول أوروبية من حلف الناتو في البحر المتوسط

وبما إن مصر هى الصخرة اللى تحطمت عليها كل مخططات الربيع العبرى ، فكان لازم تقوم مصر بالتنسيق مع روسيا .. وفى نفس الوقت بدأت مصر تتحرك بقوة علشان تفرض نفسها على الساحة بالتواصل مع كل دول المتوسط زى إيطاليا وفرنسا وقبرص واليونان ، وأخيراً إسبانيا .. أولاً كجزء من عملية تأمين المضايق المؤدية من و إلى قناة السويس واللى أشرنا إليها فى مقالنا عن زيارة السيسى لأسبانيا ، .. وفى نفس الوقت تفعيل دور مصر فى قضية أبار غاز شرق المتوسط ، واللى إتكلمنا عنها بالتفصيل الممل فى وقتها .. 🙂

الشىء الملفت إن مصر تعاقدت على شراء الفرقاطة الفرنسية فرام .. وبعدين مؤخراً تم إجراء مناورات جسر الصداقة 2015 بين مصر وروسيا واللى كان جزء كبير منها منصب على عمليات تأمين المضايق .. ولما نتكلم عن المضايق ، يبقى مش قناة السويس بس .. لكن البحر الأسود كمان .. يعنى الموضوع فيه رسائل موجهة وواضحة .. 

طبعا كان فيه سيل من التصريحات النارية مؤخراً .. والمتبادلة بين البنتاجون ، والبحرية البريطانية ، والقسم الإعلامى في أسطول البحر الأسود الروسي عن التحركات الخاصة بكل جبهة من قوات بحرية ، لــ حاملات طائرات ، لــ مدمرات صاروخية بحرية ، لــ طرّادات صاروخية داخل البحر المتوسط .. أخرها كان تحرك المدمرة الصاروخية “ميراج” التابعة لأسطول البحر الأسود الروسى اللى انطلقت  يوم 17 يونيو ، من ميناء سيفاستوبول لتنفيذ عدد من المهام القتالية مع المجموعة الدائمة للقوات البحرية الروسية في البحر المتوسط ، .. و ده طبعا غير التحضير لتدريبات حلف الناتو فى الخريف القادم واللى هــ تكون  بمشاركة 25 ألف عسكري.

كل التحركات اللى بتحصل دى .. مع تأكيد جميع الأطراف على إنهم مش هــ يدخلوا فى سباق تسلح ضد بعض ، والتحذير فى نفس الوقت إن كل الأطراف جاهزة لو لزم الأمر للرد بقوة فى حالة حدوث أى هجوم .. لكن أخطر التصريحات دى كانت من موسكو اللى قالت إن حلف شمال الأطلسى بــ يسعى لإستفزاز الدب الروسى ، وبــ يقرب من الحدود الروسية ، وبالتالي، ستضطر موسكو لاتخاذ إجراءات لتأمين مصالحها وضمان أمنها للحفاظ على التوازن فى المنطقة 🙂 .. وخصوصاً بعد التلويح الغربى بتمديد العقوبات على روسيا لمدة 6 شهور كمان ..

طبعا زى ما قولنا .. إن كل الأطراف بتسعى لتجنب الصراع المباشر .. وخصوصاً الدول الأوروبية اللى عانت من ويلات الحربين العالميتين الأولى والتانية وماعندهمش إستعداد لتكرار السيناريو ده للمرة الثالثة .. لكنهم عندهم إحساس إن أميريكا عايزة تحطهم فى المواجهة مع روسيا اللى هم قلقانين منها فعلا بسبب تنامى قوة روسيا العسكرية ، و فى نفس الوقت عايزين يتحرروا من السيطرة الأميريكية على سياستهم الخارجية .. وعلشان كدة تلاقوا أوروبا بتتواصل مع مصر وبتوطد علاقتها معاها نظراً للشراكة الإستراتيجية الروسية المصرية مع وضعية مصر كدولة محورية عائدة بقوة وبتتحرك فى كل الإتجاهات !!

السعودية بقا هى الشريك اللى بــ يمثل مشكلة بالنسبة للكريملين ، فى الوقت اللى بــ تحاول فيه السعودية إنها تتحرر من السيطرة الأميريكية بعد ما انكشفت كل مخططاتها بالنسبة للمنطقة .. وبما إن مصر هى حلقة الوصل بعلاقتها القوية بين كل الأطراف ، فــ كان لازم يحصل تواصل بين السعودية وروسيا ..

طب إزاى !؟ .. و إييه الى جاب روسيا للسعودية .. أو إييه الى جاب القلعة جنب البحر !!؟؟ =D .. ده يرجعنا تانى للمقدمة اللى قولناها فى بداية المقال عن الضربات الغير متوقعة و التحرك على رقعة الشطرنج بشكل يربك حسابات الخصوم .. و علشان ما نطوّلش عليكم ، ده اللى هــ نتكلم عنه فى المقال اللى جاى 🙂  

لمتابعة تعليقاتكم