20 Jul 2015
هى الناس لييه مابتتعلمش !!؟؟ .. خليك تقيل !!
—————————————————
الدنيا قامت بقالها كام يوم ولسة وماقعدتش بسبب الكلام والهرى الكتير عن لقاء خالد مشعل مع الملك سلمان ، بالرغم من إن الخارجية السعودية نفت تماماً إن الزيارة كانت فى إطار رسمى ، وإن ده كان على هامش قدوم الوفد الحمساوى لغرض العمرة مش أكثر !!
و السؤال المهم بقى .. هو لو خالد مشعل طلب ييجى مصر للقاء الرئيس السيسى ، مش كان الرئيس هــ يقابله !!؟؟ ..طب هل ده معناه إن فيه أى موائمات مصرية إخوانية !!؟؟ .. طب إييه بقى حالة الذعر دى اللى صابت الجميع ، لمجرد الإعلان عن لقاء مشعل والملك سلمان .. !!؟؟ .. وياترى لييه ماحدش سأل نفسه عن السبب فى تضخيم الموضوع بالشكل ده ، والإعلان عنه فى جميع المصادر والمواقع والقنوات الإخوانية بالكيفية دى !!؟؟
لكن السؤال الأهم .. هل حصل لقاء فعلا بين الملك سلمان وخالد مشعل !؟ 😊 .. وفين البيان الرسمى السعودى عن تفاصيل اللقاء !!؟؟ .. وهل الــ 700 حمساوى اللى إتقال إنهم هــ يروحوا اليمن ، هم بقى اللى هــ يخلصوا الليلة كلها فى اليمن .. على أساس إن حماس دى هى المارينز العربى يعنى !!؟؟ .. ولو هم كدة فعلا .. طب كانوا عملوا إييه مع إسرائيل طول السنين اللى فاتت !!؟؟ 😊 .. ومع فرض إن اللقاء ده تم .. طب لييه مايكونش علشان طلب حماس وساطة سعودية إن الجيش المصرى يوقف المفرمة اللى حاصلة فى سيناء للعشيرة وكمان طلب فتح المعابر !!؟؟ .. مش ممكن ده يكون هو الهدف !!؟؟ .. وإلا إحنا مش بنشوف غير بعيونهم من خلال الصورة اللى هم عايزيننا نشوفها وبس !؟ 😊
وعلشان كدة .. هــ نقول كمان ..
الحرب الإعلامية اللى هى أساس حروب الجيل الرابع بــ تعتمد أكثر ما تعتمد على بث الشائعات عن طريق القنوات الإعلامية لخلق حالة من البلبلة والتوجس عند الشعوب من كل شئ .. وبالتالى يصبح المجتمع سهل الإختراق وجاهز لإستقبال أى فكرة يتم تعظيمها عن طريق العملاء والخلاية النائمة المندسين وسط الشعوب دى ، .. ولو إحنا بصينا للحالة بتاعتنا .. هــ نلاقى الإخوان بيقوموا بالدور ده بكل إجتهاد .. وإحنا للأسف بنصدق !! .. وياريت تفتكروا مقالاتنا عن الحرب النفسية والشائعات ودورها وتأثيرها فى المجتمعات !!
وعلشان كدة كمان مرة ، إحنا بــ نؤكد إن القيادات فى مصر والسعودية على تفاهم تام ، وبينهم تنسيق على أعلى مستوي ، .. وأى كلام عن خلافات مصرية سعودية هو مجرد وهمٌ كبير، و هري إخواني، بالإضافة لخيالات صحفية مريضة أو مغرضة هدفها إن الوهم ده يتحول لحقيقة فعلية .. وانت بكل أسف بتقع في الفخ ده بمزاجك ، و بتشتم في السعودية ، و … و بدافع وطنى 😊
الحرب الإعلامية والسياسة الموجهة لغسيل العقول بتدّيك بس الخيط .. وإنت بعد كدة بتفضل تكر الخيط وتعمل من الحبة قبة ، وتؤدى الدور اللى مطلوب منك إنك تؤديه من أعداء بلدك ، بدل ما تكون حائط صد ، يصد عن مصر وعن المنطقة العربية كل السهام الموجهة لها !! ..
ولو إحنا بصينا بنظرة متأنية للصورة الكلية ، هــ نلاقى إن معظم اللى خافوا وقلقوا على مصر (أكيد بدافع وطنى) من اللقاء الحمساوى السعودى ، ومصدقين الأبواق المغرضة اللى بتقول إن الملك سلمان بيشتغل ضد مصلحة مصر ، نسيوا حاجات مهمة جداً .. منها إن الملك سلمان هو أول رئيس وملك عربى هنّئ الرئيس السيسى برئاسة مصر .. وإنه لسة حاطط جماعة الإخوان لغاية دلوقتى على لائحة الجماعات الإرهابية فى السعودية .. وإن السعودية بين كل وقت والثانى بــ تصدر بيان يؤكد دعمها الكامل لمصر فى مواقفها السياسية والملك سلمان كان أول من إستنكر الاعمال الارهابية الأخيرة اللى استهدفت الجيش المصري في سيناء وقال قولاً واحداً أن السعودية تقف مع مصر ضد كل ما يهدد أمنها القومي !!
ياريت بس نفتكر ترويج الإخوان لزيارة أردوغان للسعودية وأنها بداية لحلف تركى سعودى على حساب الإينكيلاب فى مصر 😊 .. وبعدين إييه اللى حصل !!؟؟ ولا حاجة !! .. بل بالعكس كلنا شوفنا تقارب تركى إيرانى ، وتوقيع إتفاقيات إقتصادية مع إيران ، مش ممكن تتماشى بأى حال من الأحوال مع أى تقارب تركى سعودى لأن الإخوان والشيعة الإيرانيين بيتغذوا على نفس البرسيم ، وبينهلوا من نفس المنبع الفكرى مع شوية تعديلات ، .. والسعودية عارفة كدة كويس جداً !! .. بل وعلى قناعة شديدة بإن الإخوان بفكرهم وتوجهاتهم هم أكبر خطر على النظام الملكى السعودى أكثر من أى حد تانى .. وأى حد مقتنع إن السعودية ممكن تآمن للإخوان يبقى _ولامؤاخذة يعنى_ …. وإلا بلاش 😊😊
وإفتكروا كمان إنه فى عز ما الألة الإعلامية الإخوانية روجت لقرب سقوط الإينكيلاب بعد وفاة الملك عبدالله ، وسحب دول الخليج لجميع إستثماراتهم من مصر ، وإن مصر خلاص ظهرها إتكسر ، شاركت جميع دول الخليج فى المؤتمر الإقتصادى وعلى رأسهم السعودية ، وكمان منحوا مصر 12 مليار دولار 😊 .. فاكرين !!؟؟
أصدقاؤنا ..
المنطقة زى ما قولنا قبل كدة بــ تخوض حرب وجود .. واللحظات اللى بتمر بيها دول المواجهة دلوقتى وخصوصا بعد الإتفاق النووى الإيرانى واللى هــ نتكلم عنه قريّب ، هى لحظات مفصلية وفارقة فى تاريخ الدول دى على طريق صراع البقاء ، .. و واجب على الجميع إنهم ياخدوا بالهم ومايبصوش على العصفورة اللى الإخوان وأذرعهم الإعلامية طول الوقت عايزيننا نفضل باصّيين عليها .. لأن أكبر خطأ ممكن كلنا نقع فيه ، إننا نعتقد إن سياسات الدول ومصائر شعوب الدول دى ، ممكن تتحدد عن طريق الصور الظاهرية اللى بــ يروج لها الإعلام فى حروب الجيل الرابع والخامس ..
اللى ظاهر للناس حمادة .. لكن المستخبى حمادة تانى خالص 😊 .. لأننا كلنا مش شايفيين غير قمة جبل الثلج ، واللى هو بيمثل ربع الحقيقة فقط ! .. ده إذا كانت حقيقة أصلا 😃😃😃 .. ولازم نكون متأكدين إن اللى بيحكم علاقات الدول هو سياسة المصالح مش سياسة الفيسبوك 😃