09 Aug 2015
كلمة السر .. الظهير الشعبى .. !!
———————————
أصبح من الواضح جداً ومن فترة طويلة ، لأى حد عنده شوية عقل إن قطر هى الراعى الرسمى للتنظيم الإرهابى اللى إسمه “تنظيم الإخوان الإرهابيين” ، وبلاش الله يخليكم حد يحط النص التانى من الإسم ، لإنهم اثبتو بما لا يدع مجال للشك سواء بافعالهم الإجرامية الإرهابية ، أو بإعتراف شيخهم ومؤسس الجماعة إنهم “ليسوا إخواناً وليسوا مسلمون” !! لأننا كلنا بــ ننأى بالدين الإسلامى عن إن ينتمى له ناس زى دوول …… لكن ما علينا ومش هو ده موضوعنا !!
وزير خارجية قطر صرّح إمبارح إن الحكومة القطرية على استعداد للتفاوض مع مصر حول تنظيم الإخوان والوصول لنوع من المصالحة لتهدئة الأوضاع وتحقيق الإستقرار فى مصر !! .. لأ كتّر خيركم فعلا !!
بجد شئ مثير للسخرية ..
لحظ واحدة .. إنتوا فهمتوا غلط ..
مش التصريح اللى مثير للسخرية .. لكن قطر نفسها بحكومتها وحاكمها وتوجهاتهم السياسية أصبحوا شئ مثير للسخرية 🙂 …
حكومة قطر وحاكمها واللى وراهم معتقدين بعد كل اللى بيحصل ده ، وبعد كل أعمال العنف اللى تمت فى الفترة اللى فاتت ، إن مصر هــ تبقى مستعدة إنها تركع وتهادن مع أول مبادرة تتم بإسم الصلح علشان نقعد كلنا على ترابيزة واحدة .. أسرة مع بعتشينا ، ويبقى فيه شروط ، وخد وهات ، وسيب و انا أسيب .. وعلى فكرة .. هو ده اللى كان متخطط له من الأول يعنى و …. وكدزة !
لكن فاتهم حاجة مهمة جداً .. إن مصر ما بتتهددش .. وإن الدولة المصرية مش ممكن أبداً توافق تقعد على ترابيزة واحدة مع شوية إرهابيين ، علشان يبقى الكلام من الند للند … وعلشان كدة كان الرد الحاسم والقاطع من الخارجية المصرية وهو إن القاهرة ترفض كافة أشكال التدخل في شأنها الداخلي ، وإنه مافيش مجال للتفاوض أو القبول بوساطة خارجية للحوار مع التنظيم .. ومش كدة وبس .. لكن المستشار أحمد أبو زيد المتحدث الرسمي باسم الخارجية المصرية أكد رفض مصر لكافة أشكال التدخل الخارجي في شئونها الداخلية، معتبراً تصريحات وزير الخارجية القطري غير مقبولة، واعتراض على أحكام القضاء المصري وقرارات الحكومة المصرية وإقرار جموع الشعب المصري بأن تنظيم الاخوان تنظيماً إرهابيًا.
رد الخارجية المصرية بجد كان شئ يفرح ويشرّف أى مصرى صحيح .. وكمان بيوصّل رسالة لكل الأطراف إن اللى كان بيحصل زمان حمادة ، واللى بيحصل دلوقتى وهــ يحصل بعد كدة حمادة تانى خالص .. لييه بقى !!؟؟
الإخوان المجرمين واللى وراهم ، طول الوقت عندهم عشم إن اللى بيحصل ده شئ مؤقت ، وإن لعبة القط والفار دى هم متعودين عليها ، من أيام نشأة الجماعة ، أيام الملكية ، وبعدين عبد الناصر ، و وراه السادات ، ومن بعديه مبارك ، .. وإن الدولة كدة كدة هــ تتصالح مع الإخوان علشان هدف أى نظام فى الأول والأخر هو الإستقرار وضمان أمن المواطن ، .. وعلشان كدة هم مستمرين فى الضغط علشان متأكدين إن الدولة هــ ترضخ فى النهاية … لكن فاتهم حاجة مهم جداً تخلى الحسبة بتاعتهم تبوظ من أولها لأخرها ، وعشمهم ده يبقى عامل كدة زى عشم إبليس فى الجنة ..
هم مش فاهمين او مش عايزين يفهوا إن الأنظمة السابقة كانت بتطبطب عليهم ، وتشد شوية وترخى حبة ، .. وشوية يمارسوا الحياة السياسية وشوية يبقوا جماعة محظورة ، وشوية برلمان وشوية برة البرلمان .. لأن الجماعة فى كل السنين اللى فاتت ومن أول نشأتها كان دايما لها الظهير الشعبى اللى ممكن تستخبى فى حضنه وقت اللزوم … ليييه !!؟؟ … لأنها فى كل السنين اللى فاتت ماكانتش كشفت عن وجهها الإرهابى الإنتهازى الحقير الطامع فى الوصول للسلطة حتى ولو كان الطريق للسلطة مفروش بالدماء ..
وصول الإخوان للسلطة على قد ما اضر بمصر لكنه افاد مصر ، لأنه كان نقمة على الإخوان بعد ما إتكشفوا على حقيقتهم أمام الناس والبكابورت بتاعهم طفح فى كل شوارع وميادين وإعلام مصر ، واصبح اللى ما يشترى يتفرج .. وبدل ما كانوا بيقولوا إنهم جم مصر علشان يحكموها 500 سنة ، أصبحوا دلوقتى من غير اى ظهير شعبى وهــ يستمروا كدة يمكن لمدة 500 سنة 🙂
الناس خلاص فاقت ، وفهمت ، وعرفت .. وخدعة 80 سنة إتكشفت كلها فى سنة ، وقدامهم 500 سنة علشان يصلّحوا صورتهم .. ده إذا فضلوا موجودين 500 سنة ..
لعبة القط والفار والمهادنة اللى كانت دايما بتعملها الدولة علشان خاطر الناس .. هــ تبطل خلاص تعملها تانى برضوا علشان خاطر الناس .. وإذا كان الإخوان وصلوا للحكم فى غفلة من الزمن وبسبب بعض الموائمات علشان الموجة العاتية تعدى ويتم الحفاظ على الدولة من التفكك والإنهيار .. فــ دلوقتى وبعد كل اللى مصر شافته فى الــ 5 سنين اللى فاتوا ، اصبح من غير المقبول ، لا من الدولة ، ولا من الجيش والشرطة ، ولا من الشعب ، إنه يبقى فيه مجرد إحتمال لتكرار التجربة دى تانى أو السماح بالتعايش السلمى مع مجموعة من الحيوانات المفترسة اللى مستنية الفرصة علشان تغرس أظفارها فى قلب وروح الشعب المصرى .. على الأقل مش فى الجيل ده ولا الجيلين اللى جايين كمان 🙂
فــ ياريت بقى قطر تريح نفسها من اللى هى بتعمله ده .. وياريت كل شممامين الكة ، والسوراجية ، وكل نوشاتااااء السبوبة فى الداخل اللى لسة عايمين فى مية اللفت على عوم الإخوان ، وعايشين فى كذبة المصالحة وفكرة “الفسيل الوتنى” إنهم يريحوا نفسهم هم كمان لأن الإخوان خلااااااص فقدوا الظهير الشعبى
يعنى باي باي إخوان .. موبايلات بأى =D =D
الظهير الشعبى دلوقتى مع الدولة ومع الجيش علشان نبنى البلد .. فشكراً جيش وشعب مصر .. ولازم كلنا نفضل فاكرين إن اللى حمى مصر ، ووقف أمام العالم كله مش الجيش بس .. لكن الظهير الشعبى .. اللى هم المصريين