31 Aug 2015
القوة العربية المشتركة بين اليأس والرجاء .. !!
————————————————-
من ساعة ما تم تأجيل إجتماع القوة العربية المشتركة ، وناس كتير أوى قلقانة ، وناس تانية جالهم إحباط ، والنسبة الأكبر من الناس تجاوزت مرحلة القلق والإحباط ، لمرحلة إطلاق الأحكام والوصول لنتيجة إن العرب وبالذات السعودية خلاص باعوا مصر وخصوصاً مع إعلان البيت الأبيض عن زيارة الملك سلمان لواشنطن .. !! .. لكن اللى وصلوا للنتيجة دى نسيوا حاجة مهمة جداً جداً .. وهى إن العرب كان إييه اللى خلاهم يدعموا مصر ويقفوا أمام العالم ، لو هم ممكن يبيعوها عند أول ملف .. !!
وياريت ماحدش يقوللى أصل الملك عبدالله رحمة الله عليه كان مختلف .. لأن الخطوط العريضة لسياسات الدول وخصوصاً فى التوجهات المصيرية اللى بتمس أمن وإستقرار الدول والشعوب مش بتتغير بتغيّر الأفراد .. و ده غير حقيقة مهمة جدا وهى إن اللى كان مسئول عن سياسات السعودية فى اخر سنتين من حكم الملك عبدالله نظرا لمرضه الشديد ، كان هو الملك سلمان ولى العهد وقتها !!! 🙂
السعودية هى كانت أول دولة فى العالم أيدت الثورة المصرية فى ٦/٣٠ وبعدين وراها الإمارات والكويت !؟ .. و هم ماعملوش كدة من فراغ .. لكن لإيمانهم إن المصير واحد والتحديات واحدة ، وإن اللى يمس الأمن القومى المصرى ، يمس أمنهم القومى فى العمق ..
عايز بس أفكر الجميع ، إن ولى ولى العهد ووزير الدفاع السعودى سافر روسيا للقاء بوتين .. و وزير خارجية السعودية راح روسيا للاعداد لزيارة الملك سلمان ، وبعدها تم الإعلان عن التعاون السعودى الروسى فى كافه المجالات العسكرية والسياسية والاقتصادية .. و زيارة الرئيس السيسي من كام يوم لروسيا والوفد السعودى والشيخ محمد بن زايد وملك الاردن وكمان وفد كويتى .. ودلوقتى فيه تنسيق كبير بين روسيا ومصر والسعودية فيما يخص الشأن السورى .. ولسة أمير الكويت هــ يزور روسيا للإعلان عن التعاون فى كافة المجالات الإقتصادية والسياسية و العسكرية … 🙂
وبعد كل ده .. وبعد مساندتهم لمصر فى أحلك ظروفها الاقتصادية برغم الضغوط الامريكية الرهيبة عليهم للتخلى عن مصر واللى مازالت مستمرة وهــ تفضل مستمرة لفترة طويلة .. وبعد الدور السياسى الرائع اللى لعبته مصر فى المنطقة .. وبعد التضامن العربى الكامل للقضاء على النفوذ الصهيو-أميريكى وتحجيم دور قطر وتركيا .. عايزينهم يضيعوا كل ده … !!!؟؟
يا سادة .. مصر بالتنسيق مع روسيا أبلغت السعودية إن فيه معلومات إستخباراتية توافرت عن تعرض السعودية لعدة ضربات إرهابية فى أماكن متفرقة فى المملكة من جماعات إرهابية مدعومة من دول غربية .. فقامت السعودية بضربات إستباقية لو انتم فاكرين وأعلنت القبض على 441 إرهابى .. يعنى المعلومات كانت صحيحة .. طب يبقى إزاى بقى السعودية بعد كل ده ، ممكن تسلم ذقنها لأميريكا تانى !!؟؟ 🙂 🙂
إحنا عارفين إن القوة العربية المشتركة دى حلم كل العرب والمصريين .. لكن لازم نفهم إن الموضوع مش سهل .. وفيه تفاصيل هيكلية لازم يتم حسمها زى مقر القولات مثلاً ، وهل هــ تبقى فى دولها وإلا فى دولة المقر ، والقيادة هــ تبقى إزاى ، وهل سوريا هــ تبقى مشاركة وإلا لأ .. ده غير إن فيه إختلاف فى مفهوم الإرهاب والفصائل افرهابية بالنسبة لبعض الدول .. و … و … و …. و حاجات كتيرة أوى مافيش داعى للخوض فيها .. وخصوصاً إنه بمجرد الإعلان عن تشكيل القوة دى ، هــ تتخلق لها تحديات بالجملة بهدف إفشالها ، .. والسعودية لسة مغروزة فى اليمن لحد دلوقتى .. !!
وعلشان كدة ، أى حد هــ يتكلم عن إن تأجيل إعلان القوة العربية اللى هو إتأجل 4 أسابيع فقط ، إن ده معناه إن العرب باعوا مصر ، وكل الكلام اللى من النوع ده ، .. ده يبقى إسمه كلام جنرالات قهاوى وشغل مصاطب ومالوش علاقة بالواقع فى شئ لأن وجود الأمير محمد بن سلمان في روسيا ، وبعده الرئيس السيسي، والوفود العربية كل دي أوراق ضغط على أميريكا علشان ماتحاولش تلعب بورقة تركيا أو إيران ، .. و الملك سلمان رايح أمريكا وهو واقف على أرض صلبة فى الوقت اللى هــ يكون فيه الرئيس السيسى والرئيس بوتين فى الصين بيحضروا عرض عسكرى فى غياب تام لكل القوى وممثلين الدول الغربية وأولهم أميريكا .. يعنى الموضوع فيه شئ من إستعراض القوة ورسالة موجهة للأميريكان … و ده بالإضافة لإن الملك سلمان هــ يزور مصر بعد الإنتهاء من زيارة أميريكا ، وإنتهاء الرئيس السيسى من جولته الأسياوية .. يعنى الملك سلمان هــ يخلص على أوباما وبعدين هــ ييجى مصر 🙂
وحتى لو لم يتم تشكيل القوة العربية ، فالتعاون العسكرى مش هــ يقف ، و هــ تتخلق أليات عسكرية بديلة وكمان فى وجود أطراف أخرى .. ومش عايزكم تنسوا فى ظل كل التقارب العسكرى والإقتصادى والإستراتيجى العربى المصرى الروسى ، إن دخول الرئيس السيسى غرفة العمليات الروسية دى حاجة مش سهلة ، ماتستهونوش بيها .. لإن دى فى حد ذاتها رسالة حرب .. أو رسالة تحدى .. 🙂 🙂 🙂