01 Oct 2015
سوريا الحبيبة .. واللعب على المكشوف !!!
——————————————–
المواجهة إبتدت .. وبوتين برّ بوعده لما قال إن المرور على أشلاء سوريا ينبغى أن يمر من خلال الكريملين 😉 .. وطلقة البداية كانت الفيلم الهابط بتاع اللاجئين الى عملوه الغرب فى إستغلال قذر لمعاناة شعب بأكمله علشان عشرة خماشر واحد راحوا عندهم ، وكانت المتاجرة بصورة الطفل البرئ لتوجيه ضربة معنوية لدول المواجهة بالنسبة لهم ، وكمان إشعال معركة رأى عام من الشعوب ضد حكومات الدول دى .. وللأسف كذابين الزفة ، ونوشاتاااء الغبرة ، و وراهم قططهم وكلابهم وخرفانهم ، زيّطوا كما ينبغى أن يكون ….. لكن الشعوب ، وبالذات الشعب المصرى كانوا أوعى من إنهم يسقطوا مرة تانية فى الفخ ده 🙂
رد الفعل الروسى ماكانش مجرد كلام .. لكن كان على شكل قوات عسكرية فعلية دخلت سوريا لدعم بقاء الدولة السورية والمحافظة عليها من التفكك .. وكمان على شكل خطاب شديد اللهجة ألقاه بوتين أمام كل رؤساء وزعماء دول العالم فى الجمعية العامة للأمم المتحدة .. مع تأييد صينى كامل وإعلان صريح للمواجهة !
وزارة الدفاع الروسية أعلنت بدء الضربات الجوية الروسية ضد مواقع داعش في سوريا .. وبمجرد بدأ العمليات ، أعلنت داعش إن روسيا عدو لها .. يااااسلاااام .. شوووووف إزااااااى .. !!!! … يعنى أول إمبارح تعلن روسيا عن بدأ العمليات ، فتقوم داعش تعلن إمبارح عن إن روسيا أصبحت عدو لها !! .. طب وأميريكا وقوات التحالف اللى بيضربوا فى داعش بقالهم 3 سنين .. كانوا بيضربوكم بالبونبونى !!؟؟ .. لأ وكمان أميريكا تعلن إن قوات المعارضة اللى كانوا بيدربوها ، إنضمت بأسلحتها لداعش !!
مفضوحين أوى يا ولاد المفضوحة =D =D
الجميل بقى إن اللى عمله بوتين (رجل المخابرات) ، وضع كل الدول الغربية وخصوصاً أميريكا فى مأزق شديد ، لأنه ببساطة خالص ، لو أميريكا عارضت الضربات ، يبقى بتقول لكل شعوب العالم إنها بتدعم الإرهاب الداعشى ، ولو سكتت وأيّدت ، يبقى بــ تتخلى عن رجالتها ، إللى هــ يتقلبوا عليها .. مع الوضع فى الإعتبار .. إن الموضوع لا داعش ولا غيره لأنهم فعلياً أضعف بكتير من إنهم يواجهوا جيش نظامى .. وإفتكروا اللى مصر عملته فى ليبيا ….. لكن القصة كلها هى مليشيات مدربة ومنظمة من المتأسلمين من كافة الأطياف والتوجهات ، صنعتهم أميريكا تدمير المنطقة .. وعلشان كدة ، كل الدول الغربية تراجعت فجأة عن فكرة رحيل بشار الأسد ، وكلها إبتدت تتكلم عن أهمية بقائه لمرحلة إنتقالية ، وخلوا الدلدول التركى بتاعهم ، وإله العجوة بتاع الإخوان ، يطلع ويقول كدة صراحةً ، ويثمن بقاء بشار فى الحكم لمرحلة إنتقالية طالت أو قصرت !! .. يا سلام 🙂
لكن الأجمل هو إن الضربات الروسية كانت ضربات حقيقية وموجهة للتنظيم الإرهابى ، مش مجرد فيلم سنيمائى من بطولة قوات التحالف ، اللى بقالها 3 سنين بتضرب فى تنظيم إرهابى ، والتنظيم بيكبر وبيتمدد وبيكسب أرض وبترول !!
وعلشان كدة ، قررت وزارة الدفاع الروسية نقلا عن وكالة “إنترفاكس” الروسية ، إشراك سفن الإنزال البحري للرد السريع المنتشرة في مياه المتوسط في العملية الجوية الروسية في سوريا، لحماية المنشآت العسكرية الروسية في طرطوس واللاذقية .. وقالت الوكالة إن قوات أسطول البحر الأسود هــ تكون في مقدمة القوات المشاركة في هذه العملية بعد ما أعلنت عن تنفيذ 20 غارة جوية روسية استهدفت 8 مواقع لـ”داعش” في سوريا تكللت كلها بالنجاح
وزى ما قولنا .. لأنهم كانوا عارفين إن روسيا مش بتمثل ولا بتهزر .. وإن الضربات هــ تكون موجعة وحقيقية .. وهو ده اللى حصل فعلاً .. فــ على طول بدأت أبواق الإخوان وكل الجماعات الإرهابية فيلم التباكى ومسلسل الكربلائيات الحديث عن قتل مدنيين أبرياء عزّل فى الغارات الروسية من قبل حتى الغارات ماتبتدى ، برغم إن نفس الناس دى مافتحتش بقها لما كانت داعش بتقتل وتحرق وتعدم المدنيين الأبرياء ، وتغتصب النساء السوريات … !!! .. يعنى فعلا قمة العهر السياسى والفجر الدينى !!
وهو ده اللى خلّى لافروف وزير الخارجية الروسيى ، يطلع في مؤتمر صحفي علي قناة Rt الروسية ويقول إن المعلومات عن سقوط مدنيين فى سوريا ، قالها الإعلام قبل الضربات ماتبتدي أصلا .. وقال إن روسيا مستعدة للحرب الاعلامية دى ….. وإن الضربات الجوية ، علي داعش وكل التنظيمات التي تحمل السلاح ضد دولة سوريا ، كلها بالتنسيق الكامل مع الجيش السوري …..
فلما نسمع تركيا النهاردة بتعرب عن قلقها من الضربات الروسية فى سوريا .. وتلاقى الشيخ العريفى بــ يقول ان ملائكة على خيول بيض ، تقاتل في درعا .. ولما يقول إن السماء بتمطر بدعاء المجاهدين .. زى ما كان بيتقال إن سيدنا جبريل نزل ميدان رابعة ، وإن سيدنا الخضر بيصلى القيام مع المعتصمين ، ويطلع حد يقول إنه شاف رؤيا إن “مرسى” صلّى إمام بالرسول عليه أفضل الصلاة والسلام .. تعرفوا على طول إنهم وصلوا لمرحلة إستنهاض الهمم بالخزعبلات واللعب على الوتر الدينى ، و ده معناه إنهم بيعانوا ، ومافيش فى إيديهم حاجة تتعمل خلاص ! .. وقريّب أوى هــ نشوف فيلم روسيا بــ ترمي البراميل المتفجرة و تستخدم الغاز السام وبتقتل الأطفال و …. و كدزة !!! 🙂
اللى بيحصل النهاردة فى سوريا بــ يؤكد إن مشروع مستر أوباما اللى جاء للسلطة من أجل تنفيذه .. وإقامة شرق أوسط جديد مفتت ومتناحر على نواة فاشية دينية وعرقية خلاص بــ ينهار … لأن حجر الزاوية فى المنطقة وهى مصر فلتت من إيديهم بفضل ربنا أولاً ، ثم بفضل 30 يونيو ثانياً … بعد ما شعب مصر كشف وفهم المؤامرة ، وإحتذت به كل الشعوب اللى إبتدت تفوق من الغيبوبة … وطبعاً بالإضافة إننا زى ما قولنا فى الأول ، إن أميريكا مش هــ تقدر تتدخل عسكرياً ضد روسيا ، لأن ده هــ يكون بمثابة اعتراف أن أمريكا دولة داعمة للإرهاب
الموضوع مش عمليات عسكرية وفرد عضلات فى المنطقة ، لكنه لعبة ذكاء وفرض إرادة ، وتحريك بيادق فوق رقة الشطرنج ، .. وخصوصاً إن بوتين مش هــ يتراجع عن ضرب داعش حماية لمصالحه ومصالح التحالف الشرقى وضرب للهيمنة الأميريكية فى المنطقة ، وكمان مصر بقيادة الرئيس السيسى مش هــ تتراجع زى ما قال الرئيس فى الأمم المتحدة عن ضرب الإرهاب في سيناء ، وحتى فى الحدود الغربية وما وراءها حماية للأمن القومى المصرى وأمن المنطقة ..
“كش ملك” بتقرب بإذن الله .. بس لازم نخلى بالنا جداً من الحرب النفسية وحرب الشائعات واللعب على المشاعر ، لأن ده هــ يبقى منتشر على أعلى مستوى فى الفترة اللى جاية .. وخبراء وجنرالات الفيسبوك هــ يلعبوا على وتر القلق الطبيعى عند الشعوب كويس جداً ..
وبكرة نقول: “إنفض المولد يا روح (…….) انت وهو” .. بصوت الفنان عادل أدهم