29 Nov 2015
مصر فى القلب .. ياولاد ستين …. سلامة .. !!!
————————————————–
روسيا قلبت على مصر !!
روسيا أصبحت ضد مصر !!
روسيا سحبت رعاياها من مصر !!
روسيا هــ تعلن الحرب على مصر بسبب موضوع الطائرة اللى سقطت فى سيناء
بوتين يستبق التحقيقات ويعلن إن السبب فى تفجير الطائرة فى سيناء كانت قنبلة .. و روسيا تدرس خطوات تصعيدية ضد مصر
بوتين قلب على السيسى وطلب الجاكت بتاعه !!
و … و … و … كلام كتير أوى من كذابين الزفة وخصوصاً بتوع مرسى راجع ويسقط حكم العسكر ، اللى بصراحة مش عارف هم إزاى مصدقين نفسهم ، وهم كل مرة يطلعوا يهروا و يمأمأوا وراء الصفحات بتاعتهم ومصادرهم المخابراتية اللى عمرها ماصدقت ولا مرة .. والغريب إنهم برضوا لسة مصدقين ..
قووووووم إيييييه …
روسيا تفتتح قنصلية فى الغردقة .. وتوقع إتفاق نووى مع مصر .. وترفع مستوى العلاقات بين البلدين لمستوى التوأمة الإستراتيجية !!
ماحدش شافكم من زمان لييه !!!؟؟ =D =D =D
طب نتكلم بقى شوية جد ..
أظن صفحة كلام فى الصميم كانت من أوائل الصفحات اللى إتكلمت ، وأكدت ، وحذرت ، وشرحت ، وإستفاضت فى الشرح عن موضوع تفجير الطائرة الروسية فى سيناء بدون الإنسياق وراء المطبلاتية والمهللاتية ، .. أو إصدار أحكام وإتهامات مسبقة فى صيغة (كلّة مُعلّبة) 🙂 ….. وكمان كنا أول من لفت النظر بعقلانية شديدة لتصريحات الرئيس الروسى فلاديمير بوتين .. وحللناها ، وقولنا إنه برغم الغضب الشديد وعنف التصريحات ضد من كانوا السبب فى تفجير الطائرة ، إلا إنه لم يشر بإصبع الإتهام إلى مصر من قريب أو بعيد .. بل بالعكس .. كانت كل التحركات الروسية فى الأزمة بتدعم العلاقات المصرية الروسية بشكل كبير .. و ده ناتج عن فهم مطلق لطبيعة المؤامرة والمخطط المرسوم ضد مصر والمنطقة .. بل وضد روسيا نفسها .. !
وبرغم كل التأكيدات من الأميريكان والإنجليز بصورة مبالغ فيها ، إن الحادث هو حاث إرهابى بناء على تقارير أجهزة إستخباراتهم ، .. و قبل ما أى جهة تصدر بيان رسمى عن الموضوع ، لدرجة إن ديفيد كاميرون رئيس الوزراء البريطانى من كُتر ما هو عايز يثبت الموضوع ، كان فاضل شوية ويقول إحنا اللى عملناها 🙂 .. لكن الغريب بقى إنه بمجرد ما بوتين أعلن إن سقوط الطائرة ناتج عن وجود قنبلة وإنه مش هــ يسكت .. وهــ يصعد إجراءاته ضد الإرهاب وخصوصاً فى سوريا …. يقوم يصدر بيان غريب بإسم الخارجية الأميريكية يقول إن اميريكا ترى أنه من السابق لأوانه الحكم على ماحدث بإنه نتيجة زرع قنبلة !! … ماعرفتكش أنا كدة =D !!! .. وكأن لسان حالهم بيقول بصوت الفنان سعيد صالح الأجش فى مسرحية العيال كبرت “هو اللى بنعمله فى الناس هــ يطلع علينا وإلّا إييييييه !!” =D =D =D
مش كدة وبس .. لكن إنجلترا قامت بعتت لجنة أمنية لقياس إجراءات التأمين فى مصر .. وطلعت تصريحات رسمية من عندهم بتقول بما معناه .. إننا حبايب حبايب والسائح الإنجليزى مشتاق لمصر ، وإحنا من غيركم ولا حاجة .. وناقصنا كام مليون حاجة 🙂 .. وبالفعل أعلنت شركة طيران Easy-Jet العالمية للنقل الخاص على موقعها ، عن فتح باب الحجز لشرم الشيخ فى 2 ديسمبر .. وبعدين رجعوا تانى أخروا الميعاد لغاية 7 يناير لحين صدور قرار رسمى من الحكومة الإنجليزية بالسماح لرعاياها بالسفر لشرم الشيخ !!
وبغض النظر عن إن التقرير الفنى حول اسباب سقوط الطائرة لسة لحد النهاردة ماصدرش ، وممكن مايصدرش قبل شهور .. لكن أهي إبتدت تندع .. وإبتدت تطلع أخبار طايرة .. زى بعض التسريبات اللى تم تناولها على موقع صحيفة ( Mirror ) الإنجليزى وصحيفة RT الروسية ، واللى قالوا إن التحقيقات اللى قام بها جهاز الخدمة السرية الروسية (يعنى المخابرات الروسية) .. أسفرت عن إن القنبلة التي أصابت الطائرة الروسية كانت داخل سترة النجاة أو أسفلها أو كان مكانها أسفل أحد المقاعد في الصف 30 أو 31 من الطائرة … وإن أول الضحايا كانت بنت عندها 15 سنة ..
وبما إن المسئول عن تزويد الطائرة بسترات النجاة و وضعها في أماكنها هو “الناقل”.. مش صاحب المطار .. وبما إنه مستحيل يصعد حد من بلد المطار ، و يعبث بسترات و أقنعة النجاة تحت المقاعد و فوقها.. إلا لو كان متفق مع الطاقم الروسي بالكامل بالإضافة إلي أفراد الأمن المتواجدين علي الطائرة .. و دا طبعاً شئ مستحيل .. فــ ده يستبعد تماماً فرضية إن القنبلة “دخلت في شنطة” ..
– يعنى القنبلة ماكانتش فى بطن الطيارة
– يعنى الموضوع مش إهمال ، أو واحد إتكرمشله عشرة خماشر جنيه علشان يحط القنبلة مع الشنط فى قلب الطيارة .. والنقطة دى إحنا شرحناها فنيا قبل كدة فى فى مقالنا عن الحادث !!
– يعنى ضباط المطار مش بياخدوا فلوس و يعدوا قنابل و صواريخ”..
والكلام ده يعزز بشدة فرضية إن الطيارة وصلت و القنبلة عليها من البداية … و ده اللى إحنا قولناه وكان لنا السبق فيه فى ردودنا على بعض التعليقات من أصدقاء الصفحة ، أو حتى من بعض المتطفلين من خارجها .. وكان رد الفعل العام هو عدم الإقتناع بالرأى ده .. أو رفض الفكرة تماماً وإعتبارنا مطبلاتية !! 🙂
وبرضوا كل ده مجرد تبادل افكار من جانبنا مع اصدقاء الصفحة .. لأنه إلى الأن لم يصدر التقرير الرسمى عن الحادث !!
الجديد بقى .. واللى ضرب كرسى فى الكلوب إن رئيس معهد الشرق الأوسط يفجينى ساتانوفسكى قال فى تصريح رسمى لصحيفة البرافدا الروسية وفى إتهام واضح وصريح ، إن واحدة من منظمى الهجوم على سيناء هى قطر، فهى من المنظمين والرعاة وإذا لزم الأمر، يمكن لروسيا القيام بعملية عسكرية فى هذه الدولة.
وأشار يفجينى إلى أن روسيا على طريق الحرب، ولا يمكن لروسيا أن تسمح للإرهابيين بقتل مواطنيها والإفلات من العقاب. ومن الضرورى لفت الانتباه إلى حقيقة أن قطر هى مركز تنسيق العمليات الجوية للولايات المتحدة، وحان الوقت لرفع القضية فى الأمم المتحدة لتنظيم محكمة دولية لحكومات تركيا وقطر لتورطهم فى الإرهاب ..
بس خلاص ..
طب فين بقى مصر فى الموضوع !!؟؟ .. ياريت ترجعوا لعنوان المقال !! 🙂
ولسة الحدوتة ماخلصتش .. واللعبة على رقعة الشطرنج شغالة و … وبشدة