03 Jan 2016
المملكة السعودية تدفع الثمن !
——————————
مافيش أدنى شك عند ذى عقل يعقل وعيون تنظر و ترى إن المملكة العربية السعودية فى خطر .. ومافيش شك إن السعودية بتدفع ثمن غالى جداً نتيجة وقوفها بجانب مصر ، من 30 يونيو 2013 لحد النهاردة !! … وأحب بس أفكر أصدقائنا بمقال قصير يمكن كان بعد تدشين صفحة كلام فى الصميم بــ ثلاثة أيام لما نشرنا الموقف اللى وقفته المملكة السعودية والعاهل السعودى فى 2013 !!
https://web.facebook.com/kalamfelsamim/photos/pb.1410289749182782.-2207520000.1451841119./1412212732323817/?type=3&theater
وبغض النظر عن رأى البعض فى سبب وقوف المملكة السعودية وكل دول الخليج بجوار مصر ،… منهم اللى بيقول إن ده كان علشان مصلحتهم ، ومنهم اللى بيقول بيستقووا بالجيش المصرى ، ومنهم اللى بيقول إن دى علاقات إستراتيجية .. أو أيّاً كانت الأسباب .. المهم إن السعودية أخدت الخطوة بدون أى تردد ، وكان تدخلها هو عامل الحسم اللى أنقذ مصر من مؤامرة رهيبة كانت ممكن تصل لحد التدخل العسكرى فى مصر
وعلشان ما نبعدش عن الموضوع الأساسى ، فلازم نكون متأكدين إن السعودية ، إذا ما كانتش على رأس ، فهى من ضمن الدول المستهدفة فى مخطط الفوضى وتفتيت المنطقة ، وضعاً فى الإعتبار إن العراق وسوريا والسعودية ومصر هم الأهداف التكتيكية والإستراتيجية والجائزة الكبرى للمخطط اللى هدفه السيطرة على كل موارد الثروة فى المنطقة ، وتفتيت الجيوش العربية وهدم الأنظمة والدول تمهيداً لقيام إسرائيل الكبرى !!
وعلى فكرة .. ولأول مرة تحصل منذ نشاة دولة إسرائيل ، أعلنت إذاعة صوت إسرائيل النهاردة _قال إييييه_ عن القبض على تنظيم يهودى يسعى لهدم النظام ، وإقامة مملكة إسرائيل على إعتبار أنه لم يعد هناك ما يبرر وجود دولة تدعى إسرائيل بشكلها الحالى وأنه يجب إقامة مملكة إسرائيل !!!! .. يا حلاوة يا ولااااااد 🙂 ..
تعالوا بقى نشوف الخطر اللى بيواجه السعودية ..
السعودية دولة كبيرة ، سر قوتها هو الثروة الكبرى اللى منحها لها ربنا مصداقاً لدعاء أبو الأنبياء إبراهيم عليه السلام بأن يرزق أهلها من الثمرات .. لكن فى نفس الوقت ، السعودية بها شرائح دينية وطائفية متضادة من السنة والشيعة ، وهــ نلاقى إن الشمال الشرقى للسعودية فيه تجمع كبير من الشيعة ، وتصل نسبة الشيعة السعوديين إلى ما يتجاوز الــ 15% من تعداد السكان !!! .. بمعنى إن فرص إندلاع فتنة طائفية شئ مش صعب على أجهزة الخابرات الغربية ، والشئ الوحيد اللى مانعهم هو التدرج التصاعدى فى مخطط الضغط على السعودية للمحافظة على وضعية الإقتصاد المستقرة فى الدول اللى إقتصادها بيعتمد بشكل كبير على الإستثمارات السعودية ، وشراء أذون الخزانة .. و أول الدول دى هى الولايات المتحدة الأميريكية !
ولو إحنا اخدنا بالنا ، هــ نلاقى إن السعودية بتتعرض من 2013 لإبتزاز سياسى وإقتصادى من أول الضغوط الدولية عليها للتخلى عن مصر ، للسعى لإستنزاف الإقتصاد السعودى وهدم منظمة أوبك عن طريق بيع داعش للبترول العراقى والليبى والسورى برخص التراب .. إلى الإتفاق النووى الإيرانى اللى وقعته دول الغرب مع إيران واللى ترتّب عليه تعليق العقوبات وبدا التعامل مع البترول والغاز الإيرانى .. إلى توريط السعودية فى حرب اليمن بعد تهديد حدودها الجنوبية فى اليمن .. لى بعض العمليات الإستشهادية اللى تمت بالفعل فى بعض المساجد الشيعية بهدف إشعال الفتنة الداخلية .. إلى الحديث عن تدويل الإشراف على مناسك الحج والعمرة … إلى الإنتشار الغير طبيعى للخلايا الإرهابية والإخوانية واللى تم القبض على الكثير منه بتنسيق أمنى تام مع الأجهزة الأمنية المصرية … إلى التهديد المزدوج اللى بيحاصر الحدود الشمالية السعودية فى العراق وسوريا عن طريق داعش والحرس الثورى الإيرانى .. ألخ ألخ
وأخيراً .. الدنيا اللى قامت وماقعدتش بعد أحكام الإعدام اللى نفذتها السعودية فى بعض الإرهابيين ، واللى كان من ضمنهم رجل الدين الشيع “نمر النمر” .. وبالرغم من إن كل من تم إعدامهم كانوا من المذهب السنى ، إلا إنه فيه حالة من التصعيد الغير مبررة من ناحية إيران .. واللى وصل لدرجة التهديد الصريح من المرشد الأعلى للثورة الإسلامية بإيران “على خامنئى” ، اللى توعد السعودية بالتصعيد والرد على مافعلته .. ووصل الأمر لإقتحام القنصلية السعودية فى مدينة مشهد الإيرانية وحرقها بالكامل ، و ده معناه وضع السعودية فى مواجهة مباشرة مع إيران !!
كل اللى بيحصل ده هدفه توجيه رسائل خفية للسعودية من الثعبان الغربى ، ومحاولة إشغال السعودية بالملف الشيعى ، أو إنها تنشغل بنفسها بعيداً عن الملف المصرى والتقارب الروسى .. وطبعاً أى حد بيراقب المشهد ده ، هــ يقلق على إعتبار إن دى بوادر حرب فى المنطقة وعنوانها الفتنة الطائفية ، وهو ده هدف الغرب الأساسى .. مستغلين فى ده أطماع إيران فى إستعادة مجدهم التاريخى .. لكن أحب بس أطمن الجميع ، إن كل ده للإستهلاك الإعلامى ، لأن إيران عمرها ما تفكر إنها تدخل فى صدام مباشر مع السعودية لسببين ..
الأول .. التقارب السعودى الروسى ، لأن روسيا تمتلك من الأليات اللى يخليها تقدر تسيطر على التوجهات الإيرانية ، وفى نفس الوقت ، روسيا هــ تستخدم ده لمزيد من التقارب الروسى السعودى ، وخصوصا بعد الإتفاقيات النووية وإتفاقيات السلاح !
والثانى .. إن إيران متأكدة إن مصر فى الخلفية السعودية .. ووجود مصر بــ يبقى دايما هو الرقم الصعب اللى بيتحط فى أى معادلة تخص السعودية ودول الخليج بشكل خاص .. ومنطقة الشرق الأوسط بشكل عام .. بالإضافة لإن السعودية مش هــ تخلى اللى حصل ده يمر مرور الكرام ، بل ستتجه للتصعيد السياسى ، ومعها بالتبعية كل دول الخليج وبالتضامن المصرى مع الجميع ، واللى يخلينا نجزم بإن إيران هــ تميل للتهدئة.
نحن ندعم المملكة العربية السعودية مش مجرد رد للجميل ولكن لأن أمن السعودية هو أمن مصر ، واى صدام إقليمى بتخطيط غربى ، هــ يكون هدفه مصر والسعودية مش السعودية لواحدها