18 Oct 2016
الإنسحاب الغامض ومسرحية التحرير
—————————————
مافيش حديث من امبارح على معظم المواقع الاخبارية وصحف العالم وطبعا الفيسبوك ، غير عن عماية تحرير مدينة الموصل وإعلان داعش الإنسحاب بدون قتال … وإحنا ماكنّاش عايزين نتكلم فى الموضوع ده لأن المسرحية واضحة أكثر من اللازم .. لكننا استلمنا اكثر من 15 رسالة من اصدقائنا اللى بــ يستفسروا عن اللى بــ يحصل ، وعلشان كدة قررنا نعلق باقتضاب عن الموضوع ده ..
طبعاً عملية التحرير بــ تتم بأسلوب الفنان محمد صبحى فى مسرحية الهمجى لما قال للطلاب بتوعه انهم عندهم امتحان على غفلة يوم السبت الجاى 🙂 !! … لأن الاعلان عن العملية والاستعدادات تمت من فترة طويلة .. وطول الوقت هناك تحذيرات بإن خلاص دخول الموصل اصبح وشيك للقضاء على داعش 😊 .. طب هو احنا بنحذرهم ، والا خايفين منهم ، والا عايزين نخش ، والا مستنيين الإذن ، والا مستنيينهم يخرجوا ، والا اييييه بالضبط !؟
وبعد ما خلاص اصبحت عملية الدخول امر واقع وعلى وشك التنفيذ .. فــ تقوم مليشيات داعش تعلن فجأة انها هــ تقوم بالانسحاب والخروج من المدينة … تقوم قوات التحالف اللى بقالها 3 سنين يتضرب فى داعش بحجة محاربة الارهاب .. واللى اصلا بتساعد الجيش العراقى علشان يدخل يقضى على الارهابيين .. يشوفوا أرتال القوات الداعشية بتخرج من المدينة هرباً باتجاه الحدود السورية ، ويسيبوهم عادى كدة بدون مايطلقوا عليهم رصاصة واحد ، وكانهم مجرد مجموعة من الاشباح ماحدش شايفهم !
داعش أعلنت انها هــ تخرج من الموصل بدون قتال .. او جاءت لهم الاوامر بالخروج علشان يحافظوا على القوام التنظيمى بتاعهم .. وعلشان فيه أماكن تانية على الخريطة لسة محتاجة مجهوداتهم وأولهم سوريا وبعدها ليبيا ..
المليشيات اللى خرجت من الموصل هدفها الوصول لحلب لتدعيم موقف التنظيم الارهابى هناك ، ومحاولة ترجيح كفة الميزان بالدعم الغربى الهائل لمليشيات داعش والنصرة وكل كلاب النار الموجودين فى سوريا فى مواجهة الجيش السورى المدعوم بالقوات الروسية فى محاولة لتوريط الروس والجيش السورى داخل مستنقع يستنزف الاثنين عسكرياً واقتصادياً كاستنساخ لأفغانستان الثمانينات، بس المرة دى على الاراضى السورية … بس كان غيرهم اشطر 😊 .. لأن داعش أصلا بتحتضر خلاص فى حلب .. والروس والجيش السورى عاملين معاهم السليمة .. وبوتين قرر عمل هدنة يوم 20 أكتوبر علشان يلقوا أسلحتهم ويخرجوا ، يا إما هــ يقوم معاهم بالواجب .. وعلشان كدة قال إنه مش هــ يعلن عن خططه 🙂
وفى نفس الوقت لسة فيه مهام تانية للدواعش فى ليبيا ، لأن الغرب مش هايسمح للجيش الليبى بفرض سيطرته على الهلال الخصيب للبترول الليبى .. ولا هــ يسيب مصر فى حالها علشان تستقر وتهدأ … بس برضوا كان غيرهم أشطر 😊 … وبعد كل ده تلاقى حتة مراهق سياسى او واحد من نخبة النكبة المثقفة ، أو اعلامى مهيصاتى من اعلام السبوبة ، أو حتى عيل من العيال اللى مسقطين بنطلوناتهم ، يسألوا “هو الجيش المصرى بيتسلح لييه !!؟؟” ..
وعلى الجانب السياسى .. هــ نلاقى ان عملية تحرير الموصل هو نصر معنوى مش أكثر وعملية كرتونية من الحزب الديموقراطى اللى هو حزب اوباما وكلينتون فى مواجهة الحزب الجمهورى ومرشحه دونالد ترامب ، كرد على اتهامات ترامب لأوباما وكلينتون بخلق داعش ودعم الارهاب … علشان يبقى أمام العالم إن إحنا أهو بنحارب الارهاب وحررنا الموصل .. وبكدة تكون إدارة أوباما عملت أى حاجة تبرر بيها كل المليارات اللى اتصرفت على عملية الربيع العربى والحرب الإسمية على الارهاب .. وخصوصاً انهم خسروا فى كل الملفات المفتوحة لحد النهاردة ..
ايوة بالنظرة الموضوعية للأمور طبعا خسروا ، لأنهم فشلوا فى إسقاط مصر أو اخضاعها أو حتى توريطها فى أى صراعات فى المنطقة .. وفشلوا فى اسقاط الأسد وتقسيم سوريا على الاقل لحد النهاردة .. وخسروا نفوذهم السياسى فى المنطقة فى مقابل زيادة النفوذ الروسى .. وخسروا رداء البعبع أو بلطجى القطب الأوحد بعد تنامى القوة الروسية والصينية ، وأصبح التحدى سافر ومعلن .. وخسروا تركيا كحليف إخوانى متواطى بعد ما ارتمى فى حضن روسيا ، مع العلم إن اردوغان بيلعب دور العاهرة باقتدار لأنه بيلعب على كل الحبال لتحقيق اى مكاسب تصب فى مصلحته الشخصية ومصلحة جماعته …. لكن أهم خسارة كانت انكشاف الوجه البغيض لأميريكا والغرب فيما يخص مخططاتهم للمنطقة بعد سقوط كل الاقنعة امام كل الاطراف 🙂
خروج داعش من الموصل هــ يبقى خطوة كويسة لو الجيش العراقى والحكومة العراقية قدروا يسيطروا فعلياً على الموقف هناك .. وخصوصاً إن التنظيم الإرهابى فعلا بيعانى فى كل حتة النهاردة نتيجة الضربات المتلاحقة وتغير السياسة الدولية بعد دخول أطراف جادة فى دائرة الصراع .. لكن فى نفس الوقت لازم نبقى فاهمين إن خروج الدواعش من الموصل هو محاولة لتنمية قوتهم فى سوريا وليبيا .. ومحاولة زيادة الضغط على مصر … واوعوا تفتكروا ان عملية التصعيد الداخلى فى مصر ودعاوى ثورة الفشنك فى 11/11 .. بالإضافة للى حصل فى سيناء اليومين اللى فاتوا ومازال بيحصل .. إوعوا تفتكرو إن كل ده بعيد عن الاحداث دى .. لكنه محاولة لإشعال بؤر صراع بإكمال اشعال المنطقة وانهاك مصر بالرغم من انهم متأكدين ان مصر الامس غير مصر اليوم خالص .. والشعب المصرى فهم اللعبة .. والجيش المصرى جاهز لهم تماماً وبيشكرهم على كمية الأسلحة ومخازن الذخيرة اللى بيتم إكتشافها كل يوم .. لكن ده مش مهم بالنسبة لهم لأنهم بيشتغلوا بمبدأ العيار اللى مايصببش يدوش بعد ما فقدوا بالفعل قدرتم على إدارة قواعد اللعبة ، .. وعلشان كدة بيتبعوا سياسة التلطيش فى كل حتة .. أما بالنسبة للإرهابيين اللى بيموتوا من رجالتهم على إيدين الجيش المصرى كل يوم ، فهم بالنسبة لهم مجرد كلاب ماتسواش حتى ثمن الرصاصة اللى ماتوا بيها !
وفى النهاية خلينا نقول إن الوضع هــ يفضل مشتعل كدة .. والتصعيد السياسى هــ يفضل زى ما بيقولوا باللغة الإنجليزية (On Edge) سواء خارجياً على مستوى العالم والقوى الكبرى ، أو داخلياً بالنسبة لمصر .. وحالة المواجهة هـ تفضل بالشكل ده لحد 20 يناير 2017 وهو موعد تسليم وتسلم السلطة فى أميريكا بين الإدارة الحالية والإدارة القادمة .. وبعدها هــ يكون فيه فرصة لإلتقاط الأنفاس بغض النظر عن المرشح الفائز … وساعتها هــ يكون لكل حادث حديث ..