إياد مدنى .. والغضب المصرى

29 Oct 2016

إياد مدنى .. والغضب المصرى

—————————–

بنفس المبدأ الذى ساقه الله عز وجل فى الأية الكريمة “وعسى أن تكرهوا شيئا وهو خير لكم” .. … تابعنا اللى قاله “إياد مدنى” وغضبنا زى كل المصريين الغيورين على بلدهم .. لكن فى نفس الوقت كنا متأكدين إن الرد المصرى هــ يكون فى محله …. وفعلا جاء الرد المصرى فى خليط من الهدوء والشياكة والرصانة والقوة فى نفس الوقت .. واللى هو سمة الدبلوماسية المصرية على مر العصور .. واللينك ده من الصفحة الرسمية لوزارة الخارجية المصرية لرد مصر على اللى حصل واللى كان بجد فيه الشفا بصوت زئير أسد مكتوم .. 🙂

وبعدها كان رد أسد الخارجية المصرى الشديد اللهجة فى اللينك ده ، تجاه الشخص نفسه ومن خلال منصبه وليس من خلال جنسيته .. لأن “إياد مدنى” باللى عمله بيمثل نفسه .. وهــ يتحاسب لأن مصر مابتهزرش

لكن الأجمل والأقوى والملفت هو حالة الغضب والإستياء الشعبى الحاد والحملة اللى شنها المصريين على المدعو “إياد مدنى” .. واللى تضامن معها مواطنون ونشطاء سعوديون ، واللى أجبر إياد مدنى على الإعتذار وخصوصاً بعد الكلمة اللى وجهها له وزير التربية والتعليم المصرى اللى كان حاضر مؤتمر الإيسيسكو ممثلا لمصر.

طبعاً الإعتذار غير مقبول لأن التطاول أصلا ماكانش عفوى ، وإنما كان مقصود ، وبالتالى فالإعتذار مش هــ يقدم ولا هــ يأخر فى شئ …. لكن اللى يهمنا فى الموضوع إن الجيش الإجتماعى لمصر ، اللى هم المصريين الوطنيين المؤيدين للدولة المصرية اصبح لهم صوت قوى ودور فعّال على مواقع التواصل الإجتماعى ، وأصبحت ضرباتهم موجعة ومؤثرة ، وماتقلّش فى تأثيرها عن تأثير ضربات الجيش المصرى والأجهزة الأمنية للإرهابيين ، وحتى تأثير فريق الديبلوماسية المصرية فى السياسة العالمية … وهو ده اللى حاولنا نوضحه ونؤكده فى مقالنا اللى نشرناه من فترة بعنوان “إنت جيش بلدك النهاردة” 🙂

أيوة يامصريين .. إنتم جامدين أوى .. واصبح وجودكم على الفيسبوك امر واقع .. وأصبح كلامكم وتحركاتكم على مواقع التواصل والسوشيال ميديا من خلال صفحاتكم الشخصية والصفحات العامة والجروبات أمر واقع وبــ يتعمل له حساب كبير … و زى ما قولنا قبل كدة إن كلامكم وهجومكم المتواصل على نوووشتااااء الغبرة والكولجية والإخوان بلجانهم الأليكترونية من خلال أسلوبكم العقلانى المنهجى المحترم والمدعوم بالأدلة والمنطق ، فرض عليهم حصار ، وخلاهم يتحركوا فى صفحاتهم بس ، زى المدمن اللى كل ما يخرج من جو الكلة ، مايقدرش يستحمل ويرجع علشان ياخد شمة =D =D 

تحية لكل مصري تحرك على فيسبوك وتويتر وكل مواقع السوشيال ميديا للدفاع عن بلده ، ممثلة فى رئيس مصر علشان يجيب حق مصر والمصريين بعد اقل من ساعتين .. زى بالضبط ما حصل فى موضوع شركة بيريل لما المصريين أجبروا الشركة إنها تنزل أكثر من إعتذار رسمى عن سخريتها من الجيش المصرى بعد ساعات من نشر الإعلانات المسيئة للجيش 🙂

بس لازم ناخد بالنا من نقطة مهمة جداً .. وهى اننا لازم يكون عندنا النضج و الوعى الكافى واحنا بنحمى بلدنا .. إننا لا نقع في الفخ ، بإننا لا نسيء لاى دوله مهما كانت لأن هو ده المطلوب بالضبط … أيوة المطلوب إننا نشتم في الدول و نعمل زي ما عمل النوشتاء و المأجورين لما بوظوا علاقاتنا بأثيوبيا و السودان وإيطاليا ، ولازم نبقى فاهمين إن زي ما عندنا مصريين سواء كانوا إخوان أو خونة أو مغرضين أو مغيبين ، لا يشرفنا مصريتهم و لا يعبرون عنا .. برضوا الدول اللى جنبنا عندهم إخوان و لا يعبرون عن الدول و لا يشرفهم وجودهم بينهم .. لأن الإثنين سواء اللى عندنا أو اللى عندهم ، من مصلحتهم إن العلاقات تفسد وتبوظ لغرض فى نفس يعقوب 😉 .. وخصوصاً إن اللى قال التصريحات دى مش مسؤول رسمى .. و حتي لو رسمي .. إحنا برضوا كبار و هــ ناخد حقنا بالادب ..

يعنى لازم نبقى فاهمين إن الحاجات اللى من النوع ده بــ تبقى فى معظم الأحيان بالونات إختبار لها شقين .. الأول هو الصيد فى الماء العكر ومحاولة ضرب العلاقات بين مصر والدول الأخرى .. والثانى هو قياس ردود الأفعال الشعبية ، واللى بيتم من خلالها تحديد توجهات الشارع المصرى ، ومدى الرضا وعدم الرضا ومستوى الوعى السياسى عند المصريين .. وبصراحة النتيجة كانت مبهرة 🙂 😉

المصريين إنتفضوا ضد إهانة بلدهم ورئيسهم .. و ده رد على بتوع طقطوقة شعبية الرئيس إنخفضت والبلد بتدشييييع يا وديع 🙂  اللى بــ يتم كل شوية إعادة تاليفها وتلحينها من الإخوان وبعض النشطاء ورموز النكبة .. وبــ يتم تسويقها ونشرها من خلال الإعلاميين وعلى رأسهم اللى تم التلاعب بيه وكسر شوكته وفضح غروره فى مؤتمر الشباب فى شرم الشيخ على إيديين المصريين برضوا ..

المجد للثابتين المدافعين عن بلدهم .. إستمروا يا مصريين 🙂 🙂 🙂

لمتابعة تعليقاتكم