10 Dec 2016
الخليج العربى ، وعودة الصراع إلى اللاعبين الأساسيين
————————————————————-
أصدقاؤنا أصدقاء صفحة كلام في الصميم …. عشرات الرسايل و التعليقات اللى كان بعضها حاد و منفعل و البعض الاخر ملىء بالتسؤلات عن ما يحدث الان بالمنطقه و خاصه توجهات بريطانيا في المنطقة و الدعم الكامل من دول الخليج لهذه التوجهات و خاصة بعض تطور الاحداث على الارض في سوريا و ليبيا و ما يستتبع ذلك على مصرنا الحبيبه .
وزي ما اتعودنا على تأصيل الامور بدون اي انفعالات …. هــ نتكلم في نقاط محددة و هــ نختصر على قد ما نقدر عشان المقال مايكونش طويل وممل.
في الاول … و لما تيجي تتكلم في السياسة الدولية ، لازم يكون اطار تفكيرك محدد بشوية ثوابت … أهمها إن السياسه الدوليه مبنية فقط على المصالح و ليس شىء آخر … فكل دولة من حقها انها تدوّر على مصالحها و ما تراه انه يحقق مصالح شعوبها و أنظمتها …. و أن الخلاف الوحيد في ذلك هو الاسلوب …. فمثلا دول الغرب و التى تديرها بريطانيا و تابعتها امريكا …. ترى ان مصالح شعوبها تتحقق بالسيطره على الاخر و استنزاف كل مقدراته بعد محو اي قدرة له على المقاومة بمحو و سرقة تاريخه و افساد ايدولوجيته … ثم تدميره تماما …. في حين ان دول المشرق ترى انه ممكن ان تحقق مصالحها من خلال تواجد قوى و فعال لها داخل الدول الاخرى بإحتواء الانظمة و الدول و السيطرة عليها بتبادل المصالح ….. و لكن لا تدمرها … و انه اذا رأت دولة قوية ولا تستسلم لها تماما … فإنه ممكن ان تحتويها و لا تتصادم معها … و أن يقتسموا المصالح فيما بينهم بحجم المصالح المشتركه … زي ما كان حاصل معنا في الستينات … و زي ماهو حاصل الان.
و ان الدول اللى في المنصف كانت بتتشعلق يا إما مع التوجه الغربي ، او الشرقي و كان لازم تدفع التمن عشان تحقق مصالحا … و ده حقها على فكرة 🙂 … لكن كان دايما فيه مشكلة في الاسلوب …. فــ فيه دول كانت بتحقق مصالحها بالتآمر و تدمير الاخر عشان تنول الرضا … و دول اخرى بــ تخسر مكاسب سريعة و تتحمل عواقب قراراتها الرافضة على التآمر … و لكنها كانت بــ تكسب مكاسب كبيره في الآخر ، لان فيه قاعده و مثل شعبي بيقول … إن دائما و ابداً … طباخ السم بــ يدوقه.
و اللى متابعنا من زمان هــ يلاقي كل الكلام اللى فات و الكلام جاي و اللى بيتكلم على ما يحدث الان في المنطقة مكرر و مش جديد …. و اتكلمنا عليه بالتفصيل في مقالات سابقة … لكن في الاعادة افادة …. و تعالو نتكلم في نقاط محدده.
* من اكتر من ثلاث سنوات فاتوا و خلالهم … و من خلال عشرات المقالات ….. اتكلمنا بالتفصيل ان العالم و مقدرات شعوبه تدار فعليا من لندن …. و ان بريطانيا قبل ان تخرج من المنطقه و تسلمها للبلطجي التابع لها (امريكا) ، قد مهدت المنطقة تماما للمشهد الحالي بعد ان زرعت اساس التناحر الديني و المذهبي و الطائفي بالمنطقه سواء في صوره افكار يعتنقها جماعات و مليشيات …. او في صورة انظمة حكم شرعيه …. بعد ما زرعت الاخوان و الخوميني و السلفيه التكفيريه و الذين يدينون لها جميعا بالولاء و الطاعة …. فهى من زرعتهم و تمولهم من اموال دولهم و تسلحهم و تحركهم بما يتوافق لتحقيق مصالحها في تحقيق الأيدولوجية الغربيه الماسونيه للتحكم في ثروات العالم و تدمير الاخر.
* و اتكلمنا ان المشهد كان على وشك النهاية بتفتيت دول المنطقه بالكامل بعد ان نجح في تفتيت اقوى الدول في المنطقه من العراق ثم سوريا ثم اليمن و ليبيا ليتم الالتفاف على الجائزة الكبرى مصر …. و التى كادت أن تسقط من وجهة نظرهم لان كل عوامل السقوط كانت مواتيه لذلك …. فإن جميع الدول بالمنطقه كانت تنتظر دورها في رعب و خاصة دول الخليج ، واللى بالبلدي ماكانوش هــ ياخدوا في إديهم غلوه …. و ان طريقة تفكيك الدول دي بحروب الجيل الرابع …. لم تستطع ان تقف امامه !!
حتي الاتحاد السوفيتي بجلالة قدره اللى مأخدش في إدين الثورات الملونة غلوه …. و تبعها كل مناطق نفوذه لاحقا و لم يسلم من ذلك الا الصين اللى كان نظامها قوى ، واتعلم من درس السوفيت ، ولحق نفسه من الاول و نزل داس على بداية الثورات الملونه بالدبابات ….. و اللى خاللى الغرب يعيد تكوين الحرب الفعاله دي من تاني و ينزل بيها المنطقه بعد ادماج العديد من التعديلات باستغلال نظم الاتصال الحديثه و بتمويل مفتوح من بعض الدول العربيه اللى فتحت خزائنها لتنفيذ هذا المخطط املا في نيل الرضا و انهم يقوموا بدور “خولي الجنينة” اللى هــ يدير على الارض مسارات انابيب الغاز اللى هــ يطلع من اراضيها عبر السعودية و العراق و سوريا ثم ايران “خط غاز نابكو” و اللى شرحنا بالتفصيل الممل في مقالات سابقة.
* الانفجار النووى اللى حصل في مصر و وقوف الشعب المصرى في ضهر جيشه في 30 يونيو …. هو اللى وقف المخطط الشيطاني ده و اللى اتكلم عنه الرئيس السيسي قبل كده و قال اننا بــ نواجه اخطر تنظيم ارهابي اتوجد على الارض في اخر 200 سنة …. و كان قصده بيت الحكم في لندن و اللى بيدير العالم كله … و اللى كان نتيجته ضياع مئات المليارات من الدولارات اللى اتصرفت من فلوس دول المنطقه لتنفيذ المخطط الشيطاني ده …. و اللى كان ليه اسباب كارثية عليهم … زي مثلا أٌفول نجم البلطجي الامريكي في المنطقه على يد صلابة موقف الشعب المصري …. و اللى طلعها تماما من المنطقه بعد ما بقاش ليها هيبة و لا كلمة على المنطقة.
* ولأن دول الخليج كانت مرعوبة من مصيرها المحتوم و بخاصه استنزافها من خلال عفريت العلبه الفارسي اللى كل شويه يخوفوهم بيه … كان الدعم الخليجي لمصر منقطع النظير و بخاصة بعد حصار مصر الشرس سياسياً و اقتصادياً و الدعم الدولي المطلق لكل و اي فعل يتم به خنق مصر …. من الاشراف على ، ودعم وتمويل الجماعات الارهابيه و شركات الصف الاول لتوريد المرتزقة المدربين بواسطة كونصولتو من اكبر اجهزة المخابرات العالميه و اللى كانت بتدير حملة اعلامية منظمة على مصر و شعبها سواء في الخارج او الداخل …. فــ مصر منفرده … كانت بتواجه منتخب العالم اللى تكالب عليها بعد ما أوقفت مخطط عالمي … وللأاسف كتييييير من الشعب المصرى مايعرفش قيمة اللى عمله و اللى لسه بيعمله من يوم 30 يوينو 2013 و لحد النهاردة.
* وعشان مانطوّلش عليكم … و بعد ما فشلت كل المخططات و اللى كان بــ ينفذها و بيخدّم عليها للاسف ناس من جوانا بمنتهي الحماس زي الاخوان و النوووشتاااااء و طابور الاعلام الخامس و بتمويلات عربيه سواء من ارصدة بيعها للغاز او من تبرعات مسلمين و مصريين بدعوى الجهاد …. و اللى اتصرفت على مخططات ارهابية و تخريبية و محاصرة مصر اقتصادياً …. فــ كان لازم الدور يتعاد من جديد و بالذات ان البلطجي الامريكي بتاعهم هيبته راحت في داهيه و مبقاش يخوف و بالذات بعد ما الروس شموا نفسهم بعد الضغط الرهيب اللى كان عليهم و بخاصة وصول امريكا على حدودهم الغربيه على حدود اوكرانيا …. فــ 30 يونيو كان بالنسبة لهم هدنة مع الغرب و اعادة ترتيب اوراق و تغيرها من الدفاع الى الهجوم و اللى انتهي بيه الحال بالتواجد العسكرى المكثف و المريح ليهم في الشرق الاوسط لاول مره سواء في سوريا او تركيا و مستقبلا في ليبيا بعد فشل كل ضغوطها على مصر في التواجد العسكرى على الاراضي المصرية …. و القصة دي برضوا شرحناها بالتفصيل الممل في مقالات سابقه طوال العام الماضي.
* و لأن اللى عشناه خلال العام الماضي كان الحرب العالمية الثالثة …. و اللى كانت بــ تتصارع فيه القوى العظمي على أراضينا … و بــ إنتهاء الحرب بهزيمة مخطط الغرب بالاستيلاء على مقدرات و ثروات المنطقه بعد تفتيت دولها تماماً …. أصبحت المنطقة بالظبط زي اوروبا في عام 1945 …. و كل قوة عالمية تريد انها تسيطر على اكبر قطعة من التورتة في تكوين نظام عالمي جديد متعدد الاقطاب بعد هزيمة نظام القطب الامريكي الواحد …. !!!
شوفتوا بقي قيمة 30 يونيو اللى كانت حاسمه في تكوين نظام عالمى جديد ازاي 🙂 …. و بعد ما دول انهارت و دول اتفككت و محاولات اعادة بعض الدول …. و بقاء البعض الاخر و اللى بدأ يشم نفسه بعد مفرمة الحرب اللى كانت بــ تدار رحاها إما على ارضه او على حدوده …. الكل الان دخل في معادلة صراعات مصالح سياسية عشان يكون له مكان مع الكبار … إما بالاستقواء بقوتهم بالتحالف معاهم ، لانه عارف انه لا يمتلك القوه الكافيه لتحقيق ده بمفرده ….. و إما زي مصر اللى وقفت امام الجميع و تستطيع بمخزونها الحضارى و الثقافي و عناصر قوتها التاريخيه انها تكون لها مصالحها و ان تجبر القوى العظمي ان توائم مصالحها معها كـ ند في المنطقه .
* و زي ما شرحنا من زمان ان الامريكان خلاص باي باى …. و انه تم اتخاذ القرار بإنكفائها على نفسها … و زي ما نشرنا من اكتر من عام و نصف ان المعلم هــ ينزل بنفسه الساحة ، وإن بريطانيا ستخرج من الاتحاد الاوروبي لتقود هي العالم منفردة … لان المعلم لا يجوز ان يقتسم مع صبيانه التورتة …. و شرحنا بالتفصيل لييه فرنسا كانت بتدعم مصر نكاية في بريطانيا و اللى بدأت في ضرب مصالح اوروبا و مصالح الفرنسيين في الشرق الاوسط و غرب افريقيا …. فكان الاعلان الرسمي عن اول ظهور التواجد البريطاني في المنطقة مع اجتماع دول التعاون الخليجي 🙂
* وبصراحة …. اننا اتفاجئنا ان معظم الناس متفاجئين بحضور رئيسة وزراء بريطانيا اجتماع مجلس التعاون الخليجي …. بالرغم من ان الموضوع معروف من زماااان …. و التنسيق لحضور رئيسة وزراء بريطانيا لاجتماعات مجلس العاون الخليجي قد تم التنسيق له من خلال بريطانيا و مجلس التعاون قبل الاستفتاء على خروج بريطانيا ذات نفسها من الاتحاد الاوروبي و قبل استقالة ديفد كاميرون …. و انه تم الاعلان عن الزياره من اكتر من شهرين في زياره ملك البحرين لبريطانا ….. و قبل انتخاب دونالد ترامب … و اللى لازم كان ييجي عشان تنكفىء امريكا على شئونها و تفسح المجال للمعلم اللى نازل بذات نفسه يدير شئونه و اللى فشل في تنفيذها الصبيان … عشان كده هيلارى قالولها وقتك انتهي … و مش هــ نضيع وقتنا تاني معاكي بعد ما اوراقك من النوووشتااااء و الاخوان و غيرهم اصبحوا كروت محروقه و مايجيش منهم رجاء. 😉
* و للعلم بس …. محدش كان عارف السيناريو ده خالص …. و ده اللى كان باين من ردود افعال جميع الدول قبل و بعد الاعلان عن فوز ترامب … و اللى كان رؤساء و ملوك العالم كله كان فاضل انهم ينزلوا يصوتوا لهيلارى في الانتخابات الامريكية بنفسهم …. ماعدا رئيسين اتنين فقط …. هم بوتين و عبد الفتاح السيسي 🙂 🙂 …. و اللى صرح تصريح غريب ضد التيار العالمى بالكامل قبل الانتخابات الامريكيه بشهور انه سيصبح رئيس قوى 🙂 …. يعني اللى فات و اللى جاي … معروف … و عاملين حسابه كويس …. و احنا مستنيينكم.
* المهم ان مفيش جديد يخلّي الناس تقلق القلق الكبير اللى شوفناه في تعليقات و رسايل الفانز بتوعنا ….. ده خط مرسوم و معروف ….. القصة و ما فيها إن الخليج رحّب جداً بالمعلم اللى حل محل الصبي بتاعه لانه شايف ان مصالحه معاه …. قواعد هــ تحل محل قواعد … و استثمارات هــ تحل محل اسثمارات ، و بالذات بعد التلويح لهم بقانون جاستا و عفريت العلبه الفارسي …. يعني اللى شايف ان اللى حصل ده حاجة جديده على الخليج ، و موجه ضد مصر يبقي غلطان ….. الموضوع موضوع مصالح مش اكتر قائم على معرفة كل دوله بحجمها و احتياجتها لتأمين نفسها 🙂 …. و ده كان واضح جداً في الرشه الجامدة اللى رشها الخليج لشراء ود امريكا و بريطانيا بعد صفقة سلاح الـ 7 مليار دولار الامريكيه و الـ 3 مليار دولار البريطانية ، و تدعيم القواعد البريطانية في الخليج و منها اكبر قاعدة بحرية بريطانية في الخارج في البحرين و اللى اسمها ” شرق السويس” 🙂 🙂
* أما الخلاف المصري السعودي … فلازم نعرف ان في السياسه مفيش حاجه اسمها تطابق في الرؤى بين الدول … فــ من الاخر كدة … هدف الدولتين واحد … لكن فيه اختلاف و تباين في اسلوب التنفيذ …. فكان الخليج يري ان أمنه يبدأ من اسقاط دمشق كعاصمه ثانيه لايران بكل الطرق و الوسائل … و كانت مصر رافضه لذلك … لانها ترفض التدخل الايراني في سوريا و لكن بمواجهته سياسيا و ليس باسقاط الدولة السورية … لان اسقاطها يعني عراق جديده و استتباب رجل ايران فيها و ليس العكس …. فسوريا الدولة ممكن احتوائها زي ما كان بيتم في الماضي … أما احتواء ميليشات مسلحة … فــ ده امر مستحيل تماما.
* فالخليج كان بــ يتعامل في هذا الموضوع بحساسيه مفرطه و بالذات ان كل ملفاته قد خسر فيها … فــ دعم الميليشات السنه في العراق لم يشفع لايران في السيطره على العراق … فكانت خسارتهم كبيره بالعراق … ثم توالت الخسائر الجيوسياسية في سوريا و اليمن و حتي في لبنان بعد فرض ايران لمرشحها على الرئاسه في لبنان …. بعكس كل الخيارات المصرية اللى كانت ناجحة دوليا على الارض و اثبتت مصر صحة توجهها ….. و اللى ظهرت جليا في كلمة الرئيس السيسي من شهور في كلمته في الامم المتحده و اللى استغرب منها ناس كتييييير و اللى قال فيها بالنص …
” نعم لا مجال للإرهاب فى سوريا ولا مجال لأى محاولة لتجميل صور التنظيمات الإرهابية .. ولذلك نرفض أى محاولات إلتفاف على قرارات مجلس الأمن التى صنّفت تلك التنظيمات كمنظمات إرهابية ..”
” دعونى أقولها صراحةً .. إن كل من يراهن على حسم عسكرى يقضى بغلبة فريق واحد فى سوريا ، خاسر .. كما أن كل من يراهن على أن تلعب التنظيمات الإرهابية دوراً فى مستقبل سوريا ، واهم …”
فكانت صدمتهم كبيره في الامم المتحده لان حتي حفظ ماء الوجه كان خاسراً ، بعد تصويت مصر علي القرار الروسي و الفرنسي في نفس الوقت….. فالقرار السياسي المصري قرار مستقل تماما ….
* ولأن الموضوع حساس جداً ، و الكلام فيه في هذا الوقت يضر بمصلحة مصر قبل الخليج … و هو ما يهمنا … فــ برجاء ، وفضلاً و ليس أمراً … فكّروا في الكلام ده كويس :-
– الاختلاف السياسي وارد جداً و بالذات في هذا الوقت و الذي تتشكل فيه شبكة مصالح قوى و نظام عالمى جديد يتشكل.
– المشتمة و المسببة و الانتقاد اللاذع الان يضر مصر و امنها القومي حتي و لو على مواقع التواصل الاجتماعي …. و دورك الان انك تتخذ موقف الدولة الرسمي و اللى اذاعه السيد/ سامح شكرى .. واللى قال ان التنسيق المصرى السعودي على اعلي مستوى و ان العلاقات المصرية السعودية في اقوى حالاتها …. وغير كده ، يبقى انت بــ تضر بلدك.
– مصر لا تحتاج الان الى أحد … و لن تبيع قراراها لاحد مهما كان … فــ دورك هو دعم وطنك و ليس كره و سب الاخر.
– لا تقلق على مصر … فمن يديرون الوطن مواطنون مصريون شرفاء … و هم اساتذة و معلمين … و دائما و ابداً إفتكر ان منتخب العالم أجمع ماعرفش يعمل معاهم حاجه … و لو تعرفوا شكل الحرب الخفيه خلف الابواب المغلقه لن تصدقوا … و ان المنتخب ده لسه بــ يجرى وراهم و بــ يلهث و مش عارف يحصلهم … وعلشان كدة ثق في بلدك و في قيادتك
دورك الحقيقي في دعم بلدك بالعمل … فقط العمل …. ماحدش هــ يقف معاك غير علمك و دراعك … وهو ده اللى قاله طارق عامر النهاردة ، إنه كان بــ يجيلنا 10مليار دولار ودائع عربية ، لكن ماجوش السنة دي .. وبالتالى فــ لازم نعتمد علي نفسنا ..
يعنى من الأخر كدة يامصريين .. حرية القرار الاقتصادي والسياسي مش ببلاش
و هــ يحصل ….. بإيدينا مش بإيدين حد تانى