14 Dec 2016
سوريا إلى أين
—————
اتكلمنا كتير قبل كدة عن الوضع المعقد فى سوريا سواء من خلال مقالات ، أو من خلال ردودنا على رسائل وتعليقات كتير من الأصدقاء…. وكان دايما تركيزنا على النقطة اللى الجميع مركزين عليها وهى حلب … لان فى حلب حل المشكلة .. واللى يمتلك حلب ويسيطر عليها يبقى كسب 95% من المعركة … وكنا نشرنا زمان مقال بعنوان “لماذا حلب” بنوضح فيه ليه حلب هى المشكلة ..
طبعا عايزين نفكركم بشوية مواقف وإفيهات حلوة من اللى بتعمل معدلات عالية من الشير واللايكات ، زى هاشتاج حلب تحترق .. و بشار بيقتل شعبه .. والجيش السورى بيستخدم صواريخ مكتوب عليها القوات المسلحة المصرية واللى شافوا الكلام ده شافوه والصواريخ طايرة فى الجو 😊 .. ونحط عليهم شوية تحاليل بقى من بوستات وصور اللاجئين .. وكلام عن المعارضة المسلحة المعتدلة اللى مليشيات بشار بيقتلوهم .. واللى يا سبحان الله 85% من قوامهم من جنسيات اخرى غير الجنسية السورية .. وبصراحة مش عارف ازاى دوول يبقوا معارضة !!
و زوّد كمان اليومين دول نغمة المحن الثورى وجو الصعبانيان والكربلائيات عن الأبرياء المدنيين فى حلب واللى بيحصل لهم .. ونشر صور كتيرة متفبركة ، ومعظمها من أفعال المعارضة السورية المعتدلة المسلحة على إنها من أفعال الجيش السورى اللى إسمهم مليشيات بشار !! .. وتصل الصفاقة بالإخوانى المدعو أحمد منصور إنه يشبه عملية إسترجاع حلب على إيدين الجيش السورى من قاذورات داعش وأصياف التأسلم السياسى ، بإنه يماثل سقوط مدن الأندلس وسقوط دولة الخلافة فى أسبانيا !!!
المهم .. ماعلينا … نيجى بقى لحلب …
دلوقتى حلب تقريبا خلاص بتخلص .. والجيش السورى بيسيطر على معظم مساحتها .. و لاحظوا أن الحديث الفترة اللى فاتت سواء فى الاعلام الغربى أو إعلام العهر العربى زى الجزيرة والقنوات التركية وشركاه كان بيستخدم مصطلح “سقوط حلب” .. علشان يحاول يمرر لك فكرة ان استرداد الجيش الوطنى السورى من شوية مليشيات متعددة الجنسيات وبعض حثالة الأوطان هو الوضع الغلط مش الصح … وخصوصاً بعد لما المليشيات دى بدأت تتهاوى زى اوراق الخريف نتيجة رفع الدعم السياسى واللوجيستى من عليهم .. بعد ماقامت روسيا بتحييد نظام اردوغان .. ودخول اميريكا فى نفق انتقال السلطة بعد الانتخابات .. و دى الفترة اللى بتكون فيها اميريكا خارج نطاق التأثير …. والجيش السورى استغل الموقف تماما وكسب مساحات أرض كبيرة بدعم جوى وصاروخى من الروس ، وعلشان كدة ارتفع العويل لأن المليشيات أصبحت مكشوفة بالكامل وبيتم محاصرين واصطيادهم …
أوروبا حبت تلعب دور وبدأت تضغط .. لكن الضغط الأوروبى ماجابش نتيجة .. ولما فشلوا تماما ، قلبهم الحنين خلاهم يقدموا مقترح بدعم سوريا ماديا وتقديم مبالغ ضخمة سواء للمعارضة أو لنظام بشار الشرير تحت توصيف «كيس أموال ضخم» بشرط موافقة كافة الأطراف سواء كان النظام اوالمعارضة او التنظيمات مسلحة على الالتزام بما يريده الاتحاد الأوروبى .. و ده يخلينا نحس ان اللى بيحصل هو محاولة أخيرة لإعادة توزيع السلطة فى المحافظات السورية، بهدف تمكين «المجموعات المسلحة» التابعة للمعارضة «المعتدلة الكيوت» من الاندماج فى السلطة .. و ده كان معناه انهم فقدوا اى أمل فى السيطرة على الموقف وبيحاولوا إنقاذ مايمكن انقاذه … و الطريف انه ماعادش حد لا فى أوروبا ولا أميريكا بيتكلم عن رحيل بشار خلاص .. لأن بشار بالنسبة لهم أصبح أمر واقع .. وكلهم النهاردة بيتكلموا على أنه أصبح جزء من الحل وأنه باقى فى المرحلة الانتقالية .. بس المهم نلحق نعمل حاجة قبل ما حلب تضيع 😊
طبعا الموقف المصرى واضح فى الموضوع ده.. واحنا كنا اتكلمنا فى أكثر من مقال سابق عن دعم مصر لوحدة سوريا بغض النظر عن خلافنا الأيديولوجي مع حزب البعث السورى … و نشرنا فيديو عن الموقف المصرى فى الأمم المتحدة فيما يخص المدنيين وتصويت مصر لمشروعات القرارات الفرنسى والروسى ، واللى ماعجبش ناس كتير وطلع بعض المصريين من إعلاميين ونشطاء وبعض أذنابهم ومغيّبيهم الاوفياء ، يهاجموا مصر ويهرتلوا بكلام هم مش فاهمينه…. وفى النهاية طلع الرئيس السيسى فى حديثه الإعلامى فى أثناء زيارته للبرتغال ، لما أكد الكلام اللى بقالنا سنتين بتقوله وأعلنوا صراحة أن مصر بتدعمه الجيش الوطنى السورى وتدعم بقاء ووحدة الدولة السورية
الموقف الروسى بقى ده اللى الكلام عنه يطول شرحه لكننا هــ نختصره بقدر الإمكان.. وخصوصاً ان جزء منه ، احنا قولناه قبل كدة وشرحناه بالتفصيل .. ووضّحنا أن سوريا بالنسبة للروس تعتبر مسألة حياة أو موت سواء من الناحية الاقتصادية بسبب موضوع الغاز .. أو على الصعيد الاستراتيجى العسكرى بالتواجد فى المنطقة كأمر واقع لمواجهة الهيمنة الغربية وحلف الناتو .. ونشر منظومة الدفاع الصاروخية الروسية لحماية روسيا من اى محاولات لتهديد أمنها القومى … وافتكروا لما بوتين قال من 3 سنوات أن اللى عايز يسقط دمشق ، لازم يمر من خلال الكريملين اولا
اختارت روسيا يوم 15 نوفمبر، علشان يكون تاريخ بدء التحرك لتوجيه القوات المسلحة الروسية ضربات واسعة النطاق ضد مواقع «داعش» و «جبهة النصرة» في سوريا، واللى وصفته صحيفة التايمز البريطانية بإنه تحرك عسكرى روسى غير مسبوق فى تاريخ منطقة شرق المتوسط .. وخصوصاً انه تم تنفيذ معظم الضربات دى من البحر عن طريق أسلحة صاروخية على متن الفرقاطة «الأدميرال جريجوروفتش” وحاملة الطائرات “الأدميرال كوزنتسوف”، والقطعتين دوول لم يتم استخدامهم في اى عمليات عسكرية فى شرق المتوسط قبل كدة !! ..
طبعا تواجد القوة البحرية الروسية أحدثت تغيير جذري في الموازين الاستراتيجية والعسكرية فى مسرح عمليات شرق المتوسط .. واستخدام طائرات (سو-٣٣) وصواريخ كاليبر المجنحة ، ساعدت فى توسيع رقعة العمليات ودعم استمرارها لضرب الهيكل التنظيمى الرئيسى لمليشيات الإرهابية المسلحة ومساعدة الجيش السورى فى السيطرة على حلب بشكل شبه كامل … وفى نفس الوقت أجهضت عمليتين حاولت تقوم بيها وحدات بحرية تابعة لحلف شمال الأطلنطي، وإجبرتها على مغادرة منطقة عمل القطع الروسية، واستطاعت القوة البحرية الروسية ، الاحتفاظ بما يسمى بالنطاق الآمن لقواتها في المساحات البحرية اللي حددتها للتواجد أو للمشاركة في عمليات الحرب على الإرهاب التي تقوم بها على الأراضي السورية
وأكيد كلنا فاكرين من كام يوم لما مصر قدمت مشروع فى مجلس الأمن لوقف العمليات فى حلب بهدف إدخال مساعدات واللى اكيد كانت هــ تدافع عليه أميريكا والغرب .. لكن الروس والصينيين استخدموا حق الفيتو لاجهاض المشروع .. و ده فى عرف السياسات الدولية شئ متوقع .. ومالوش أى علاقة باللى بيقوله اراجوزات الفتاوى السياسية والخبراء الهري الاستراتيجى على الفيسبوك أن ده معناه سوء العلاقة بين مصر وروسيا …. لييه بقى !!؟؟ … لأن مصر بتتحرك من خلال التزام انسانى وادبى تجاه المدنيين … والروس شايفين ان دى فرصة لضرب التنظيمات الإرهابية فى اشد لحظات الضعف بعد تحييد تركيا وخروج اميريكا من الصورة مؤقتا وعجز أوروبا عن المواجهة.
روسيا بتشتغل على قدم وساق لخلق وضع عسكرى وامنى استراتيجى على الارض فى سوريا ، مستغلة المرحلة الانتقالية وانعدام التأثير فى الساحة العالمية وتغيير الجلد والقيادات بالنسبة لأمريكا قبل بدأ الرئيس الأميركي الجديد دونالد ترامب ممارسة مهامه بشكل رسمى فى 20 يناير القادم … و الطريف لما يطلع خبر ان وزراء الخارجية سيرجى لافروف و جون كيري اقتربا من التوصل لاتفاق حول هدنة في حلب تضمن خروج المسلحين من المدينة … يعنى اميريكا أوباما لحد اخر وقت بتحاول تحمى رجالتها وبيحاولوا كيرى عمل اى شئ لإنقاذ مايمكن انقاذه .. و ده معناه ان الدفة بالفعل أصبحت فى ايديين الجيش السورى بمساعدة القوات الروسية ..
واللى يؤكد الكلام ده هو اللى قاله الرئيس بشار الأسد في حديثه لصحيفة الوطن أن حلب ستغير تماما مسار المعركة في سوريا بالكامل .. وإنه بعد فشل المسلحين في معركتي دمشق وحمص فإن حلب كانت آخر أمل لهم، .. وأكد أن قرار تحرير سوريا بالكامل اتخذ وحلب جزء منه … واعتبر ان حسم معركة حلب سيشكل “محطة كبيرة” باتجاه نهاية الحرب التي تشهدها سوريا منذ أكثر من خمس سنوات …
وفى ذروة التفوق الروسى ، كل اللى الغرب قدر يعمله إنه يعقد إتفاق مع الروس لضمان الخروج الأمن للمعارضة الكيوت من حلب .. يعنى بيعترفوا بالهزيمة ، ومش عايزين أكثر من إنهم ينقذوا رجالتهم اللى صرفوا عليهم ملايين علشان يستخدموهم فى هدم سوريا .. والنهاردة بيحاولوا ينتشلوهم من عملية إصطيادهم زى الفئران ، يمكن يقدروا يستخدموهم فى حتة تانية .. مع العلم إن 85% من المعارضة دى زى ما ذكرنا فى بداية المقال من جنسيات مختلفة .. يعنى مرتزقة مدربين …
المنطقة خلاص بتشهد وضع الرتوش الأخيرة للشكل النهائى فى إعادة تقسيم مناطق النفوذ وصياغة مراكز القوى وتأثير التحالفات الدولية وصولا لتشكيل النظام العالمى الجديد بعد 6 سنوات من حرب عالمية مستعرة … وأن الاوان انها تهدأ بقى بشكل تدريجي لأن الأسس الجديدة خلاص تم صياغتها.. أو بالأصح تم فرضها … وخلاص فشلت خطة خط الغاز القطرى اللى كان هــ يمر من قطر لأوروبا عبر الأراضى السورية .. وفشلت خطت الهلال السنى لمواجهة الشيعة .. وفشلت خطة إسقاط سوريا .. وفشلت خطة محاصرة الروس من الجنوب وضرب إقتصادهم فى مقتل .. وفشلت خطة ترسيخ الصراعات الطائفية لــ 100 سنة كمان ، وتقسيم المتقسم .. وفشلت فكرة الإنفراد بالنفوذ فى المنطقة والسيطرة على الثروات .. وفشلت خطة إسقاط سوريا والجيش السورى .. ومن قبلها (((مصر)))
عرفنا بقى لييه بقالنا سنتين بنقول أن عام 2016 هو عام الحسم
وأكيد هــ يبقى للحديث بقية .. لأن الخيوط كتيرة ومتشابكة