08 Apr 2017
سوريا الجريحة .. سوريا المكلومة
————————————-
بعد تصاعد الأحداث المفاجئ فى سوريا ، وحالة الغضب وعدم الفهم اللى إنتابت الجميع .. وحالة الهرى والفتاوى اللى انتشرت على الفيسبوك .. وبعد تواصل العديد من الأصدقاء معانا نشرنا إمبارح مقال بعنوان “اللعبة والهدف والمشروع القديم” .. حاولنا بيه نشرح اللى حصل والخلفية العامة اللى وراء الأحداث … لأننا زى ما عودناكم إن فهم ما وراء الحدث ، أهم كثييييير من فهم الحدث نفسه .. لأن احيانا زى ما قولنا إمبارح إن الصورة ممكن تكون خادعة … وخصوصا لو إحنا متفقين إننا فى حالة حرب … حيل رابع بقى أو ثالث أو جيل تمنتاشر .. المهم إنها حرب بقاء .. وبالتالى فممكن ببساطة جدا يتم توجيه النظر لشئ ، ويكون الهدف شئ تانى خالص !!
إحنا مش هــ نعيد تحليل الصورة لأننا شرحنا الموضوع بإستفاضة إمبارح .. وجاوبنا على كل تساؤلات الأصدقاء فى تعليقاتهم .. لكن بس عايزين نلفت النظر لحاجة مهمة جدا وهى شغلانة الخبير الإستراتيجى اللى اصبحت منتشرة واصبح اللى بيمتهنوها أكثر من من الهم على القلب ، بل اصبحت مهنة من لا مهنة له …. وفى نفس الوقت كل واحد فيه طالع يتكلم ، ويصر ، ويؤكد ، حقائق ، ويبنى عليها أراء وفرضيات فى حدود ما يتوافر له من معلومات .. بالرغم من إن زميله اللى قاعد جنبه فى الفصل وفى نفس التختة ، ممكن يكون عنده معلومة صغننة خااااالص ، تقلب التحليل والحقيقة اللى صاحبنا مقتنع إنها حقيقة رأسا على عقب !!!
ما يحدث فى سوريا منذ سنوات شئ مؤسف ومخجل بكل المقاييس .. ودليل واضح لا يقبل الجدل على إنعدام الإنسانية والتدنى الأخلاقى البشرى فى أقصى بل اقذر معانيه .. واللى بيروح ضحيته أرواح اطفال ونساء وشيوخ .. بل ملايين من الأبرياء … ويتم تشريد ملايين اخرين لا لشئ ، إلا الصراع على النفوذ والثروة ، والمكاسب السياسية ، وأحلام السيطرة وتدمير الأخر .. والضحية الرئيسية هو مقدرات شعب كامل ، وإنهيار دولة بأكملها ، كانت فى يوم من الأيام حاضنة الحضارة فى الشرق !!
اللعبة كلها لعبة سياسية .. وتوائمات بين قوى عالمية … وكل الى بيحصل ده ليس إنسانية ولا خوفا على الأبرياء .. وإلا كان المفروض زى ما قولنا إمبارح إن العالم كله كان ينتفض لما تم إنتشال جثث لـ 500 مدني من تحت الركام بمدينة الموصل بعد قصف جوي لقوات التحالف .. أيوة .. قوات التحالف الدولي من كام اسبوين قصفت حي في مدينة الموصل العراقية فقتلت 500 شخص مدني ( أغلبهم نساء وأطفال) في غارة واحدة .. وبعدين قالو “سورى” كانت غلطة
وعلشان نلم الموضوع فى نقاط محدد .. وتأكيدا لمقال الأمس .. هــ نقول الأتى:
* الضربة الأميريكية لسوريا كانت بدون أى إذن من مجلس الأمن ، و بتنسيق تام بين أميريكا وروسيا … يعنى الحاج ترامب ، كلم الحاج بوتين وقال له ، أنا هــ أضرب .. فــ لم انت الليلة وقدامك من دلوقتى للصبح علشان مايبقاش فيه خسائر كبيرة
* ترامب عنده مشاكل كبيرة داخلية ، وبيحارب الصحافة والإعلام والدولة العميقة ، وبعض قطاعات الأجهزة الأمنية ، وبعض اصحاب المصالح فى الكونجرس ، و ده غير يتامى هيلارى وأوباما .. بالإضافة للإتهامات بدعم المخابرات الروسية له فى الإنتخابات … ومع الضغوط فى الشارع الداخلى ، كان لازم ترامب ياخد موقف قوى جداً علشان يكسب تعاطف الشارع ، ويوجه رسالة للعالم إن أميريكا لسة موجودة وممكن تتحرك ، ومافيش اى مشكلة إنها تدخل فى صدام حتى مع روسيا .. داخل سوريا نفسها .. وطبعا ناهينا عن إنه فى نفس اليوم كان هناك غجتماع مع الرئيس الصينى .. وترامب عايز يدخل الإجتماع وهو فى أوج قوته
* أميريكا اطلقت 59 صاروخ “توماهوك” تكلفتهم بتتراوح من حوالى 15مليون الى 88 مليون دولار حسب انواعها، واللى وصل منهم للمطار 23 صاروخ فقط … و إختفى او تم اسقاط او اعطاب 36 صاروخ فى السكة زى ما شرحنا إمبارح 🙂 .. لمعاقبة النظام السورى على حد قولهم على إستخدامه السلحة الكيماوية .. بدون ما يكون فيه اى دليل أو إثبات أو حتى صور اقمار صناعية .. علشان فى الأخر الصواريخ دى تموت 5 مدننين ، وتدمر 5 طائرات تحت الإصلاح .. بس الهدف مش ده ، لكن الهدف كان بعض انظمة الرادارات وأجهزة الدفاع الجوى السورية ، واللى كانت سبب فى إسقاط الطائرة الإسرائيلية اللى دخلت الأجواء السورية من كام اسبوع ….. وصلت !؟ … و على فكره … المطار طارت منه طيارات بالامس بعد الضرب بعدة ساعات و كأن محصلش حاجه .
* روسيا مسيطرة على الأرض .. وتركيا مرمية فى عب روسيا ، وخلاص قواتها إنسحبت من سوريا واعلنت من كام يوم إن القوات التركية خلاص أنهت أهدافها … وحلب تم إستعادتها بنسبة 95% .. والإرهابيين محاصرين فى مناطق كتيرة فى سوريا .. وموضوع رحيل بشار اصبح فى خبر كان ، والكل بيتكلم دلوقتى عن حل سياسي فى وجود بشار الأسد بما فيها حتى السعودية والكويت وتركيا
* مشروع خط نابكو اللى إتكلمنا عنه كتير قبل كدة وشرحناه بإستفاضة ، واللى قطر والغرب صرفوا عليه تريليونات علشان يتنفذ ، ماحصلش بسبب سوريا ، وبسبب التدخل الروسى .. ومن غير الخط ده ، وبعد المصاريف دى كلها ن قطر هــ تفلس وتروح فى ستين داهية وخصوصا يعد ظهور منافسين جداد لإنتاج الغاز منهم مصر … ، وتركيا هــ تتركن على جنب لأن الخط لا هــ يمر من أرضها ، ولا هــ تدخل الإتحاد الأوروبى . ده اذا فضل الاتحاد الأوروبى موجود كمان .. وبالتالى كان لازم يتم إعادة القضية كلها للمربع صفر بموضوع الصاروخ الكيماوى ده .. علشان نقعد بقى كدة إسرة مع بعدشينا ، 😉 ونقسم المتقسم ، ونشوف مين اللى له مناطق نفوذ أكثر .. وثبّتنى واثبتك يا باشا !!! …
وخليكم فاكرين إن تدمير العراق كانت بدايته كدبة اسلحة الدمار شامل .. وإفتكروا إن حالة الترصد لليبيا كانت الحجة فيها اسلحة الدمار الشامل ، واللى القذافى الله يرحمه قراها صح ، وطلع وأعلن إنه قام بتدمير كل أسلحة الدمار الشامل بإشراف الغرب .. وبرضوا ليبيا لم تسلم من التدمير بعد ما إنتهوا من العراق .. وإفتكروا إن بداية الهجمات العسكرية على سوريا وبداية تدمير الدولة السورية كانت برضوا بكذبة اسلحة الدمار الشامل اللى الجيش السورى بيستخدمه ضد المدنيين ، واللى ثبت كذبها بعد كدة … وأدينا تانى بنعيده من الأول .. وللأسف .. فيه شوية جرابيع من شعوبنا العربية فرحانين وبيهللوا للى حصل 🙁
لحد النهاردة لسة فيه ناس بتتخانق مع بعض وبتقول مؤامرة وإلا ثورة
هو انت بجد لسة بتسأل !!؟؟ … إنت أعمى القلب والبصر والبصيرة للدرجة دى !!؟؟ ..
الحقيرة توكل كرمان من كام شهر قالت على تويتر إنه يمر اليوم ذكرى 6 سنوات على نجاح الثورة اليمنية .. الثورة فعلا نجحت .. واليمن خربت .. والأخت كرمان قاعدة فى تركيا واخدت الجنسية
المعارضة الليبية واصدقائهم الإرهابيين اللى جايين لهم من كل أطراف الأرض بيفتخروا بإنهم قتلوا الطاغية وإن ثورتهم نجحت …. طب وهى ليبا كدة بالوضع اللى هى فيه تبقى الثورة نجحت !؟
مليشيات المعارضة السورية السلمية المسلحة هللت للضربات الأميريكية ضد جيش بلدهم .. وبيقولوا إن ده نجاح للثورة السورية بعد ما حاولوا من كام يوم يهاجموا دمشق نفسها وفشلوا !!
طب ده مش بيفكركم باللى سجدوا فى رابعة فرحاً لما طلعت شائعة إن الأسطول الأميريكى دخل البحر الأحمر … مش فاكرين لما الحاجة الطاهرة أم أيمن ، والحاجة اللى أطهر منها أيات عرابى دعوا حلف الناتو للتدخل فى مصر لضرب الجيش المصرى !!؟؟ …. طب حد فاكر متظاهرين التحرير لما كانوا بيقولوا إن الشرطة والجيش بيضربوا على المتظاهرين كيماوى .. وكانوا بيجيبوا ناس تمثل إنها عندها تشنجات وقئ !!؟؟ .. عرفتوا بقى إن السيناريوهات واحدة !!؟؟ .. عرفتوا إييه اللى كان مطلوب يحصل عندنا هنا !!؟؟ 🙂
عرفتوا بقى إييه المصير اللى كان مستنى مصر !؟ … عرفت يا بتاع “هى مصر بتشترى سلاح ليه ؟؟” .. مصر بتشترى سلاح لييه !!؟؟ … ومن غير ما جيشك يكلفك ولا يكلف ميزانية الدولة مليم واحد ؟؟ …. جيش المكرونة اللى انت بتسخر منه ، بيسلح نفسه وبيبنى قوته وبيصنع اسلحة ، وبيعمل صفقات سلاح غير مسبوقة ، وبيسيطر على المجال الحيوى المصرى جويا وبحريا من المكرونة اللى مش عاجباك …. ياترى انت بقى تقدر تعمل كيس مكرونة واحد علشان تأكل بيه نفسك !؟
وخلّو بالكم .. الدول دى ماسقطتش غير لما إتقسمت داخليا على مستوى الشعب والجيش .. يعنى ياباشا فتت المجتمع الأول ، وفتت الجيش (اللى هى كانو بيسموها إعادة هيكلة 🙂 ) هــ تلاقى الدولة سقطت لواحدها …. وهو ده سر إن الرئيس السيسى دايما بــ يؤكد فى كل خطاباته وهو بيضم قبضة إيديه الإثتنين على إن وحدة الشعب المصرى مع جيشه ومؤسساته هو الضمان الوحيد لإستمرار هذا البلد … وهو ده برضوا السر فى إن النشطاء واللإخوان والمعارضة الحلوة الجميلة بتاعتنا بيسخروا من الكلمة دى ، ومن الحركة اللى بيعملها الرئيس بإيده … لأنهم عارفين معناها كويس .. وعايزينها ترتبط دايما فى ذهنك بحالة السخرية .. لأن هو دى اللوغاريتم المصرى اللى ماحدش قادر يحله لحد النهاردة .. وبإذن الله مش هــ يقدروا !!
وأخيرا … عايز افكركم إن رئيس وزراء إسرائيل ديفيد بن غوريون قال من سنين طويلة مقولة شهيرة جدا ، يمكن معظمكم سمعها قبل كدة ..
المقولة دى بتقول: “قوتنا ليست في سلاحنا النووي بل في تدمير وتفتيت ثلاث دول كبرى حولنا (العراق – سوريا – مصر) إلى دويلات متناحرة على أسس دينية وطائفية، ونجاحنا لا يعتمد على ذكائنا بقدر ما يعتمد على غباء الطرف الآخر” …. ولاحظوا حضراتكم الترتيب فى ذكر الدول اللى قالها بن جوريون … وعلشان كدة الأغبياء اللى عندنا فى مصر بينفذوا الكلام ده بحذافيره وهم بيهاجموا الجيش المصرى وبيحاولوا تفتيته .. من غير ما يفهموا إنهم مجرد أداة فى ايدين غيرهم
إدعوا لسوريا وللأبرياء من الشعب السورى بإن ربنا يرفع عنهم المعانة … وماتنساقوش وراء كل ما يقال فى الإعلام .. ولا وراء الصورة الواضحة .. لأن خلف الصورة الخارجية تكمن حقيقة تانية خاااااااالص …… و بالنسبه لصوره المقال فهى لطفله من العراق …. نظرتها تكفى ما تريد قوله لنا ….. فالالم واحد و الوجع واحد ..
والأهم … خلو بالكم من بلدكم … (((مـــصـــر)))