21 May 2017
القمة الإسلامية الأميركية (الجزء الثانى)
—————————————-
إمبارح بدأنا أول جزء من مقال المؤتمر الامريكي الاسلامى بالرياض …. و بدأنا نحط النقط على الحروف بالنسبه للاعداء اللى تم حشد ٥٥ دولة لمواجهتهم 😊 ….. و علشان مانستبقش الاحداث …. و عشان نبعد عن المزايدات و نركز على المفيد ….. فإحنا هنتكلم في نقاط محددة و مركزة.
أولا …. في السياسة و مصائر الدول و الشعوب …. لا يوجد لغه معترف بيها غير لغتين …. هما لغة القوة و لغة المصالح …. و كل دولة لها الحق انها تستخدم اللغتين دول حسب أدواتها المتاحة …. فياريت الناس ماتستغربش من مئات المليارات اللى اتدفعت لأن دى هى أدوات بعض الدول للمحافظو على وجودهم …. و الخليج بوجه عام ….. يعتبر الاداه الوحيدة له بين دول العالم هى قوه الكاش اللى بيستخدمه للحفاظ على وجوده ….. فماينفعش حد ييجي يحاسبهم و يقولهم دفعتوا ليه و عشان ايه ….. دى مصلحتهم و هم أدرى بيها … !!!
فاحنا مثلا عندنا ادوات تانية ….. و دفعنا تمن كبير جدا عشان نقدر نحط رجلنا على الارض و نحجز مكاننا …. و ماحدش يجي يفرض علينا سياسة او مواقف تتفرض علينا …. فمصر بثقلها السياسي و العمق الثقافي و وعى اكبر و اقدم شعوب المنطقه و التاريخ و الجغرافيا …. و بعد ما دفعنا مئات المليارات من خسائر اقتصادية و تدمير للسياحة و الاقتصاد و حرب على الارهاب و حصار اقتصادى و حصار مالى لتدمير البنيه المصرفية المصرية و ترك مصر بمفردها بدون دولار واحد معونه من اكتر من ثلاث سنوات … قدرت مصر توصل لبر الامان بشعبها و تحافظ على بلدها و شعبها ومؤسساتها ….. و قدرت تفرض على الكبار انه يرتبط مصالحهم بيها …. و بدات تفرض أجنحتها في مجالها الحيوى …. و الشغل المصرى و فرض الارادة المصرية واضح تماما في ليبيا و تشاد و دول حوض النيل و العراق و حاليا بنحاول في سوريا ….. و ده اللى حنتكلم عنه … فياريت وماحدش يطلع يزايد على مصر .. او يقوللى مصر التنازل عن الريادة فى المنطقة والكلام المنمق الجميل ده .. لأن العبرة باللى على أرض الواقع مش من خلال رؤى مضللة وتمنيات مغرضة 😉😊 ..
عشان كده قلنا امبارح ان مصر خلصت خلاص …. و الموجة الحالية تخطتنا من زمان. ….. و الدور على الباقى….. و اللى ليهم كل الحق في استعمال كل الادوات المتاحه لهم للحفاظ على شعوبهم.
ثانيا ….. ليه المؤتمر مش في مصر ….. الجواب ببساطة …. و احنا مالنا ….. فحنقول تانى …. احنا خلصنا من زمان …. و عشان نكون مختصرين …. و مع اننا بقالنا اربع سنين بنتكلم بالتفصيل في اللى حنقوله ….. لكن اللى عمالين نقوله بقالنا سنين ….. وضح دلوقتى زى الشمس و بنتفرج عليه لايف في التليفزيون ….. لان القصة هنا مش المليارات و لا الاتفاقيات و لا مين سلم على مين و الكلام الهايف ده ….. لكن الخلاصة هنا و السؤال المهم يتلخص في كلمه واحده ….
هى الكلاب السعرانه و اللى اتعودت على شرب الدم فى المنطقة …. حتروح فين ؟؟؟؟ 😊😊
يعنى ايه !!!!؟؟ ….. احنا حنتكلم باختصار شديد لاننا نزلنا عشرات المقالات المفصله عن اللى حنقوله ده ….. و اللى عايز يستزيد يبقي يرجع للمقالات القديمة ….. اهل الشر بتخطيط الانجليز و اداره امريكا اوباما …. نشروا مئات الالاف من المسلحين لتدمير دول المنطقة …. باستخدام الاخوان و ايران ….. بتمويل قطرى و اداره تركية …. عشان يستولوا على مصادر الطاقة و الغاز في المنطقة.
و بعدين لما يخلصوا …. الكلاب السعرانه دى حتروح فين و تنهش في مين ….. المفروض انهم كانوا حيروحوا يحاربوا روسيا الكافرة و الصين الكافرة …. لتحرير مسلمي بورما ونصرة مسلمة الشيشان و القضاء على الكفر الصينى والروسي …. و عشان كده روسيا اخدت اقليم القرم عشان تقضى على مشروع غاز نابكو و دخلت سوريا و حطت رجلها …. و دخلت على اردوغان و عصرت على نفسها لمونه و احتوته عشان يحاصر الكلاب السعرانه دى 😊😊
و لما الشعب المصرى اجهض الخطة دى تماما … اردوغان بدأ يلاعب اوروبا بمئات الالاف من المسلحين اللى دخلهم الى العراق و سوريا …. و طاح فيهم لانهم بدأوا يرجعوا عليه …. فحط وجوده في السلطه في كفه …. او انه يفتح حدوده عليهم و يطلق عليهم الكلاب السعرانه دى ….. لان الخطة فشلت و مش حينفع يروحوا على روسيا و الصين….. لان اللى حضر العفريت …. مش عارف يصرفه و يوديه فين.
و باختصار شديد ….. كان لازم مجلس اداره تدمير العالم بعد فشله الذريع ده يقال ، و يتم تعيين مجلس جديد بخطه جديدة …. فنجح ترامب و تريزا ماي …. و بدانا الجولة التانية.
و ترامب قالها صراحه …. احنا لينا مصلحتنا …. و اللى عايز يصرف العفريت و مايجيش عليه ….. يدفع …. و ده اللى قاله لميركل في المانيا من شهر ….. ان على المانيا و اوروبا دفع فاتوره حماية امريكا لهم .. 😊
اما مصر …. فاحنا عشنا مع العفريت …. و طلعنا على جتته الدبان الازرق …. و بعتنالهم رسائل واضحة .. أخرها كان فى خطاب السيسى النهارظة فى القمة …. وهى لو عندكم عفاريت تانيه ابقوا ابعتوها 😊…. و حتى الحصار الاقتصادى و السياسي مانفعش …. و بدأنا نفرض ارادتنا في افريقيا …. عشان كده فرنسا اتاكدت ان بوابه مصالحا في افريقيا عبر القاهرة .. واحنا كان لنا مقالات سابقة فيما يخص فرنسا ….. أما انجلترا و امريكا و ايطاليا و روسيا….. بعد ما كانوا حيدخلوا يحطوا اديهم على الغاز بلطجه ….. رمينالهم عضمه يعضعضوا فيها و اجبرناهم يحطوا فلوسهم معانا و نشتغل مع بعض راس براس ….. فبريطانيا مثلا في عام ٢٠١٦….. دفعت استثمارات في الغاز اكتر من ٢٥ مليار دولار …… و نفع واستنفع 😃😃
و ليبيا مصر بتخلص فيها ….. و عشان تبقوا عارفين و بدون تفاصيل ….. اللى مصر بتعمله في ليبيا حماده …. و اللى مصر عملته في العراق حماده تانى خااااااالص 😊 و اخواتنا العراقيين عارفين كده كويس.
سعنى من الأخر كدة .. خلاصة المؤتمر ده .. هى فض الاشتباك و السبوبة اللى خرجت عن نطاق السيطرة …. و محدش عارف يلمها …. و لا حد عارف يصرف العفريت و لا الكلاب السعرانة ….. و كلها اسابيع و حنعرف العفريت ده حيطلع على فين 😊 … واللى سمع خطبة الرئيس السيسى النهاردة بتمعن ، هيلاقيها فعلا خطبة تدرس !! .. وكل كلمة فيها تحمل معناها .. وتحمل فى كلمات واضحة و مركزة، كل إللى ذكرناه فى مقال النهاردة … للى عايز يشوف ويفهم بعيد عن أى أيديولوجية دينية أو فكرية .. أو اغراض شخصية او أمراض نفسية ….
اليمن و سوريا و العراق و اسرائيل و المشكلة الفلسطينية …. سيتم حل قضاياهم بالاتفاق بين الجميع …. و لكن يتوقف على عاملين.
اولا …. كل برغوت على قد دمه …. يعنى كله بثمنه .. !! … وثانيا … هل شعب كل دولة هيغلب مصالح دولته و كيانه وبقائه ، على مصالحه الشخصية ، او مصالح اللى بيدفعله ، و لا لأ …… وهو ده مربط الفرس .. وهو ده إللى احنا بنشوفه فى مصر ، واللى بيعمله المصريين فى مواجهة شلة السبوبجية وأصحاب المصالح إللى عايزين يشعلوها بأى شكل ومش قادرين ..
صدقونى …. ياريتنا نعرف قيمة نفسنا .. وياريت العالم كله يتفرج و يتعلم و يعرف قيمة اقدم شعوب الارض ، و جيشها ، و من يدير الامور فيها …
نعم .. فنحن من يدير معركة البقاء منذ ٣٠ يونيو .. ونحن بإذن الله الدولة الناجية 😊😊