09 Jun 2017
الأحداث بين الهري …. والوعى
———————————–
شوفو بقى …
احنا عودناكم منذ نشأة الصفحة على صدق الكلمة .. واننا مش بنقول أى حاجة على الصفحة غير بناء على تحليل مبنى على معلومات صحيحة .. ويمكن هو ده إللى ساعدنا ان تحليلاتنا تبقى سليمة وتتسم بالمصداقية فى خلال ال ٣ سنين إللى فاتوا …… طب لييه احنا بنقول كدة !؟ .. لأن كمية الهري على معظم الأحداث فى خلال ال ٣ سنين إللى فاتوا كوووم .. واللى بنسمعه النهاردة واللى لسة هــ نسمعه فيما هو قادم كوووم تانى خالص 😊
وعلشان وماحدش يقلق .. اطمئنوا على مصر ..
مصر قاعدة فى الرووف بتشرب شيشة وبتدير ضرباتها بمنتهى الحرفية والقوة والجرأة وبوجه مكشوف وكفائة عالية … والأجهزة الأمنية المصرية وعلى راسها جهاز المخابرات المصرى بــ يسطر ملحمة أمنية معلوماتية على اعلى مستوى .. أخرها توثيق إجتماع بتاريخ 21 مايو فى جينيف بالصوت والصورة لشفيق الجراية رجل الأعمال التونسى مع عدد من قيادات الجماعة الإرهابية فى ليبيا ، وبعض الناشطاء التونسيين ، و أحد تجار الأسلحة للعمل على إدخال صفقة سلاح كبرى عن طريق أحد الموانئ التونسية ثم نقلها لليبيا .. وطبعا المعلومت دى تم إيصالها لتونس وليبيا في حينها !!
طب إييه بقى موضوع قطر واللى بيحصل فيها .. واللى لسة هــ يحصل ؟؟
بص ياسيسى .. 🙂 🙂
اللى انتم بتسمعوه ، وبتقرأوه على مواقع التواصل الإجتماعى والصفحات والأكونتات الشخصية وخصوصاً اللى بيتكلموا بصيغة العالم ببواطن الأمور .. كل ده بلح .. سواء كان اللى بــ يتكلم عن تطورات الموقف .. أو حتى اللى بيتكلم عن الأحداث الحالية .. علشان كدة إحنا بــ نخاطب الوعى عند جميع المصريين .. ياريت ماحدش ينساق وراء أى اخبار غير بعد التنأكد من صحتها مليون فى المائة … حتى لو كانت الأخبار دى فى ظاهرها ، مؤيدة لمصر …
الموضوع مش سهل .. والمنطقة كلها على صفيح ساخن .. وكل القوى متربصة ببعضها .. والتحركات والصراع خلف الستار على أشده .. واللى ظاهر من جبل الثلج مش اكثر من 10% منه .. ده إذا وصلت النسبة لــ 10% .. وحتى الــ 10% اللى ظاهرة دى ، ومع الوضع الملتهب .. محتاجة قدرة من نوع خاص على التحليل وفهم الأمور .. و ده مش متوفر غير عند الخبراء والمتخصصين فى اللعبة الأمنية والسياسات الدولية .. لأن إدارة حلبة صراع دولية والتعامل مع كيانات إرهاب دولى تختلف كتيييير عن إدارة محل بقالة 😉 🙂 .. وعلشان كدة إحنا مش هــ نتكلم فى النقطة دى ولا ننقاشها حتى إشعار اخر .. لأنه فى وقت الحروب ، الكلمة لازم تكون بحساب … 🙂
الخلاصة إن قطر دلوقتى أصبحت حلبة صراع .. تتصارع فيها كل القوى الدولية من أول دول الخليج لأطراف أوروبية ، لأميريكا ، لإيران ، لتركيا ، لروسيا ، للصين ، لباكستان .. وجزء كبير من خيوط تحريك الأحداث فى إيدين مصر .. و ده مش مبالغة ولا تطبيل ولا إخراج الأحداث من سياقها ، أو حتى إدعاء بطولة زائفة .. لكن ده حقيقة واقعة قالها الرئيس السيسى فى خطابه الشهير بعد حادثة شهداء المنيا لما طلع واعلن إن مصر بتضرب بالفعل بالطيران المصرى كل معسكرات الإرهاب فى ليبيا .. وإن مصر لن تتوانى عن ضرب الإرهاب فى اى حتة خارج مصر وداخلها .. وبعدين فجر القنبلة بقوله إن مصر بتحارب الإرهاب نيابة عن العالم !!
التحركات المصرية نقسها بتقول كدة ..
– إعتماد خطاب الرئيس السيسى فى قمة الرياض كوثيقة رسمية وبرنامج عمل لمجلس الأمن والأمم المتحدة فى مكافحة الإرهاب بيقول كدة …
– إعلان مصر قرار المقاطعة مع قطر بيقول كدة …
– تقديم مصر دلائل إتهامات ومطالبة المجتمع الدولى بالتحقيق مع قطر على خلفية الفدية المليارية اللى دفعتها قطر لتنظيم داعش فيما يتعارض مع القانون الدولى بيقول كدة …
وأخيراً قائمة المطلوبين اللى أعلنها البيان الرباعى واللى شملت 59 إسم و12 كيان إرهابى يضافوا إلى جماعة الإخوان اللى تم إعلانها كجماعة إرهابية من 3 سنوات .. وإفتكروا إن مصر اعلنت الإخوان جماعة إرهابية ، وبعدها السعودية والإمارات .. يعنى مصر مش تابع اهو يا ولاد التوابع 😉 =D
خطوة البيان الرباعى باسماء الإرهابيين دى معناها إنه مافيش رجوع للوراء لأن البيانات الدولية اللى زى دى مش بتطلع كدة إعتباطاً لكن بتكون مدروسة بشكل كامل ومتحضر لها كويس جداً .. لأن البيان مش هو النهاية .. لكنه بداية لخطوات سيتم إتخاذها بشكل رسمى وتحرك أممى يترتب عليها إجراءات تتبع وملاحقة دولية للأسماء والكيانات دى .. يعقبها عقوبات وتعويضات .. لأن الموضوع مابقاش مجرد كلام جرايد .. لأ .. ده بقى رسمى فهمى نظمى 🙂 .. وخصوصاً إن الأسماء الـ 59 اللى شملهم البيان شاركوا برعاية قطرية فى كل أعمال الإرهاب فى الوطن العربى سواء فى الحرب السورية ، أو فى ليبيا ، أو فى مصر، وعلى رأسهم يوسف القرضاوى، ووجدى غنيم ، اللى ساهموا فى إضفاء الشرعية الدينية على كل العمليات الإرهابية اللى حصلت فى المنطقة كلها ..
الخطوة دى بــ تنسف كل الإدعائات القطرية بأنها تواجه الإرهاب، وتقف ضده من الأساس، وبتضع قطر فى مواجهة مباشرة مع المجتمع الدولى .. لإنه إذا كنت انت بتحارب الإرهاب .. طب الناس دى بتعمل عندك إييه !!؟؟ …. وفى الحالة دى .. كل اللى كان بيدعم قطر هــ يتراجع .. لأن البيان ده بــ يضع المجتمع الدولى أمام واجباته ومسؤولياته ، فى تطبيق القانون الدولى ، وبالتالى فــ الدول اللى هــ تؤوى الإرهابيين دول فى حالة خروجهم من قطر .. ستوصم بإنها من الدول الداعمة للإرهاب !!
النظام القطرى النهاردة وصل لمرحلة اللاعودة .. لأنه بعد اللى حصل .. ودخول الحرس الثورى الإيرانى على الخط بتواجده فى الأراضى القطرية .. ويضاف إليهم القوات اللى هــ تيجى من تركيا لدعم النظام القطرى .. هــ يكون امام النظام القطرى سكتين مالهمش ثالث … إما إنه يكمل فى اللى هو ماشى فيه ده إستنادا على دعم إيران وتركيا .. و ده هــ ينقل الإجراءت الى المستوى الأعلى من التصعيد وهــ تزيد عمليات المقاطعة الدولية لحد ماتبقى عزلة .. أو إن النظام القطرى يتراجع ، وبالتالى يسقط فريسة للفرس والعثمانيين .. يعنى على رأى الفنان عبد المنعم مدبولى فى مسرحية هالو شلبى “ماقدرش أمشى وماقدرش أستنى” =D =D =D
الأيام والأسابيع والشهور القادمة هــ تجاوب على كل الأسئلة .. وخليكم فاكرين ، إن التصعيد من كل الأطراف وارد .. والعمليات الإرهابية اليائسة واردة .. وكل ردود الأفعال متوقعة .. وكونوا على يقين إن ما يتم خلف الكواليس أكبر بكتير من حجم توقعاتنا ، ويخرج عن نطاق إدراك المواطن العادى اللى زينا .. لأنها حرب عقول وصراعات قوة ونفوذ وكسر إرادة ، مع كيانات وتنظيمات دولية ممولة يتم الأن تضييق الخناق عليها حتى الموت ..
تحياتنا للجميع