16 Jul 2017
النخّاس الغربى … يعظ
—————————
بإختصار … فيه حاجتين حصلوا اليومين اللى فاتوا فيما يتعلق بموضوع أزمة بئر الإرهاب “قطر” ، بــ يأكدوا الكلام اللى إحنا نشرناه على مدار أسبوعين لحد النهاردة !!
الحاجة الأولى … إن أميريكا لسة بتلعب نفس اللعبة … لعبة الشد والجذب لتحقيق اقصى إستفادة .. وأدينا شوفنا كلنا بعد اللى عمله وزير خارجيتها ريكس تيلرسون ، وزياراته المكوكية لدول الخليج .. وتوقيعه لمذكرة تفاهم لمكافحة الإرهاب مع قطر ، ومحاولة إقناع دول الخليج بيها … طلع الرئيس الأميريكى تانى فى حوار على إحدى القنوات الفضائية ، وقال إن قطر بتدعم الإرهاب .. وإنها لازم تتوقف عن ده تماماً ، .. لأ وإييه .. ده كمان بيقول إن أميريكا ممكن تنقل قاعدة العديد ، وإنه فيه على الأقل 10 دول فى المنطقة مستعدين لإستضافة القاعدة الأميريكية 🙂 ….. طب بالذمة ده كلام !!؟؟ …. يعنى وزير الخارجية يوقع مذكرة تفاهم لمكافحة الإرهاب مع قطر ، والرئيس يطلع يقول إن قطر بتدعم الإرهاب !؟ 🙂
النخّاس الأميريكى هدفه هو إطالة الأزمة إلى اقصى درجة ممكنة لتحقيق اقصى إستفادة مادية وإستراتيجية .. لأن خلاص قطر بالفعل أصبحت كارت محروق ومفضوح .. وفضيحتها بقت بجلاجل .. والكل عمّال يقطع فيها بمشرط تلم من غير ما يدبح .. لأن الفلوس اللى مالهاش صاحب دى ، لازم يتم الإستفادة منها وحلبها لحد الأخر ، حتى من الحلفاء نفسهم زيى إيران وتركيا .. وقطر بدأت بالفعل تقوم بتسييل بعض أصولها ..
الحاجة الثانية …. هو المؤتمر الصحفى اللى أعقب زيارة وزير الخارجية الفرنسى جان إيف لودريان ، واللى تم بينه وبين وزير خارجية السعودية عادل الجبير .. والكلام اللى قاله الوزير الفرنسى عن ضرورة وقف تمويل الإرهاب .. وإن فرنسا مش وسيط بديل لحد فى حل الأزمة … (نفس الكلام اللى قاله وزير خارجية أميريكا) .. لكن رغم كدة ، أكد الوزير الفرنسى على عمق العلاقات بين السعودية وفرنسا .. وأشاد بدور المملكة في مكافحة الإرهاب والتطرف …. وفى المقابل ، أهم ما قاله الوزير عادل الجبير إن الرياض هــ تقدم لباريس ملف كامل عن دعم قطر للإرهاب والتجاوزات التي ارتكبتها 🙂 …. وطبعا ده نفس اللى بتعمله الإمارات فى إعداد ملف كامل عن قطر .. و ده غير تصريح عبد الله بن زايد لصحف الامارات بإنه هــ تزيد العقوبات على قطر ولن يتحملها المواطن القطرى ولا النظام القطرى 🙂
الموضوع كدة اصبح له شقين:
الشق الأول .. هو إنهاك قطر إقتصادياً ، وقطع أهم خطوط الإمداد المادى عن الجماعات الإرهابية ……. والشق الثانى .. هو تدويل القضية القطرية .. والعمل على حصد رأى عام دولى .. مش من الحكومات والدول فقط .. ولكن من الشعوب كمان … زى بالضبط اللى حصل مع عراق صدّام 🙂 … ولو حصل أى تغييرات فى السيناريو ده .. هــ يكون بموافقة الأطراف المشاركة .. ولهدف أكيد إحنا مش شايفينه …
وأخيراً … قامت القوات الجوية المصرية بــ تدمير 15 عربة محملة بالذخيرة فى الاتجاة الغربى أثناء محاولتهم عبور الحدود الغربية .. وتم كمان إستهداف عربة محملة بالذخيرة فى سيناء والقضاء على 6 عناصر إرهابية أثناء تجمعهم 🙂 …. يعنى المحاولات مستمرة .. والإستهداف مستمر .. والترفيس فى كل حتة مستمر .. لأنهم أصبحوا ماعندهمش خيار تانى غير إنهم يعملوا كدة ..
وإحنا كمان جاهزين ..
ومازال الفرم مستمراً ..