05 Jul 2017
البيان الختامى .. وعلامات الإستفهام .. !!
—————————————
ناس كتيرة اوى منزعجة ومحبطة من البيان الختامى لدول المقاطعة الخاص بالإجراءات حيال تأديب قطر ووقف تمويل الإرهاب … والحقيقة كل الغاضبين معاهم حق .. وما معاهمش حق فى نفس الوقت 🙂 … و دى مش فزورة … لكن كلام محتاج تفسير .. وعلشان كدة خلونى فقط أفكركم بحاجة .. إن الرسول عليه أفضل الصلاة والسلام فى خطبة حجة الوداع ، كان كل شوية وهو بيخطب فى الناس وقبل كل جملة يقولها كان بيقول لهم “أيها الناس ، إسمعوا قولى واعقلوه” .. يعنى الرسول اللى مش بــينطق عن الهوى ، كان بيطلب من الناس إنها تسمع منه الكلام وتعقله !! .. يعنى عايز الناس تفكر فى كلامه بعقلها !! .. وتفهم من منطلق أوسع من الكلام نفسه
الغاضبين والمحبطين معاهم حق لأنهم عايزين يخلصوا .. ونفسهم يشفوا غليلهم … لكن فى نفس الوقت السياسة مش بتمشى كدة … وبعدين حضرتك كنت مستنى إييه !!؟؟ .. إن وزراء الخارجية يطلعوا يعلنوا الحرب على قطر وضربها بالرافال مثلا !؟ .. أكيد ده مش هــ يحصل .. و ده يرجعنا للمقال اللى نشرناه يوم 2 يوليو بعنوان “قطر والعد التنازلى” .. واللى إقتطعنا منه جزء عملناها صورة المقال النهاردة .. ووضعنا مربعين بالأحمر ، أهمهم المربع الثانى .. واللى فيه كلام يشرح اللى حصل النهاردة ، بإختصار و ببساطة خالصة 🙂 … واللى عايز يتأكد ممكن يرجع للمقال نفسه على الصفحة .. ويراجع كمان ردودنا على تعليقات الأصدقاء بتوقع تحرك عسكرى .. ونفينا التام إن ده ممكن يحصل ..
حصيلة الييان الختامى النهاردة إضافة لتصريحات سامح شكرى ووزير خارجية البحرين والسعودية فى إجاباتهم على اسئلة الصحفيين فى المؤتمر الصحفى .. يؤكد ما ذكرناه فى المقال السابق ..
وإحنا هــ نختصر الكلام كله فى 6 نقط محددة:
– هذا المؤتمر هو مؤتمر تنسيقى للتشاور والإتفاق على الإجراءات المقترحة رداً على الرد القطرى فيما يخص مطالب دول المقاطعة .. (يعنى ده مش مجلس غعلان حرب لأن الحرب معلنة بالفعل)
– لا تراجع عن معاقبه قطر .. والإجراءات الحالية مستمرة ويستتبعها إجراءات اخرى توقيتية تتماشى مع ماتم الإتفاق عليه فى مؤتمر الرياض الأخير … (يعنى كل شئ بوقته)
– توصيف ما يحدث بإنه إتهامات يخرج الحدث من سياقه .. لأن الموضوع يتجاوز مجرد الإتهامات إلى ادلة موثقة وواضحة (يعنى الأدلة موجودة وموثقة و هــ يتم إستخدامها فى الوقت المناسب)
– إى إجراءات سيتم إتخاذها تتعلق بمجلس التعاون الخليجى سيتم مناقشتها فى إجتماع المجلس القادم (يعنى تعليق العضوية القطرية بيتم التحضير له فى وقته)
– الخطوات الديبلوماسية فشلت فى حل الأزمة .. ويبقى التنسيق المخابراتى بين دول المقاطعة والمجتمع الدولى .. وعلى المجتمع الدولى أن يتحمل مسئوليته أمام نفسه لحل هذه الأزمة بما يرضى دول المقاطعة .. (يعنى إحنا مش هــ نتراجع .. و هــ نصعّد .. فــ شوفوا بقى هــ تعملوا إييه).
– أى مزيد من الإجراءات سيتم إتخاذها ستتماشى مع الأعراف والقوانين الدولية .. (يعنى إحنا مش بلطجية ولا هى عركة فى خمارة على زجاجة ويسكى مغشوشة .. لكن ده صراع دولى وبقرارات سيادية .. وإحنا بــ نعرف نجيب حقنا بالقانون .. وهــ نجيبه).
دى أهم النقاط من وجهة نظرنا واللى بتتماشى مع كل اللى قولناه قبل كدة
يعنى الغلط مش فى البيان .. لكن ماينفعش نرفع سقف التوقعات بتاعتنا من منطلق ردود افعال طبيعية ممكن تحصل بين إتنين بيتخانقوا مع بعض .. وبعدين نطالب الساسة بما يتماشى مع توقعاتنا …. لأن العلاقات الدولية .. أو إن شئنا الدقة الصراعات الدولية وخصوصا لما بتكون ازمات سياسية قانونية .. بتاخد منحى تانى خالص غير مجال تصورنا فى علاقاتنا ببعضنا البعض .. لأن كل كلمة بتتقال ممكن تكون قرينة إدانة أو براءة .. زى ما حدث فى كلمة وزير خارجية قطر كدة لما أدان دولته بدعم الإرهاب … وأحب أفكركم إن ناس كتير بقالها 3 سنين او اكثر غاضبة وبتقول لييه مش بيتم عقاب قطر .. ورد الصاع صاعين .. وإحنا كنا بنقول كل شئ فى وقته .. وفى يوم نمنا بالليل وصحينا الصبح لاقينا الدنيا مقلوبة ببيان رباعى قلب العالم كله رأسا على عقب … 😉 🙂
وإوعوا تنسو إن قطر بتعانى دلوقتى .. وبتعانى بشدة كمان من اول تراجع العملة والسيولة وإرتفاع تكاليف النقل والشحن والسفر .. وتكاليف المعيشة .. ووصولا لوقف التعامل بالعملة القطرية ، وتوقع تخفيض مؤسسة موديز للتصنيف الإئتمانى لقطر لنظرة مستقبلية سلبية بسبب قرارات المقاطعة
وفى النهاية .. الإجتماع كان فى مصر .. والبيان الختامى طلع من مصر .. واللى ألقاه وزير الخارجية المصرى .. وخليكم فاكرين إن مصر فى العصر الحديث ، عمرها ما حاربت حروب مباشرة لعدو صريح .. يعنى لما حاربت الدولة العثمانية كانت بالفعل بتحارب فرنسا وإنجلترا .. ولما حاربت إسرائيل كانت بالفعل بتحارب اميريكا .. ولما قررت تحارب الإرهاب كانت عارفة إنها بكدة بتعلن الحرب على من قاموا بخلق ودعم وتمويل الإرهاب مادياً و لوجيستياً .. والقائمة فى الحالة الأخيرة دى تطوووول جداً 😉 🙂
أقرءوا المكتوب فى صورة المقال ده .. ولو حبيتوا إبقوا إرجعول للمقال السابق
تحياتنا لكل الغاضبين .. ونحن نشاركهم الغضب ..
وتحياتنا لكل من كان على قدر إستيعاب الأحداث ..
لأن أخذ الحق حرفة .. وإحنا بنلعب بشرف .. فى زمن عز فيه الشرف !!