09 May 2018
أمريكا/إيران .. الإنسحاب والتأثير !
———————————–
اللى عمله دونالد ترامب الرئيس الأميريكى مافيهوش اى جديد .. بالعكس .. كان شئ متوقع لأى مراقب ومتابع للى بيقوم بيه ترامب من يوم ما مسك رئاسة الولايات المتحدة الأميريكية !! … الراجل ماشى خطوة خطوة ، وبــ ينفذ وعوده اللى قالها فى الحملة الإنتخابية بتاعته بالحرف !! … تخفيض نسب البطالة .. تدعيم الإقتصاد الأميريكى .. إسقاط رجالات أوباما/كلينتون من المؤسسات السيادية الأميريكية … الضرب العلنى فى وسائل الإعلام الأميريكية .. إجبار دول الخليج على دفع فاتورة تواجد القوات الأميريكية فى الشرق الأوسط ، وحلب أموال الدول العربية تحت كل المسميات والحجج .. نقل السفارة الأميريكية إلى القدس .. تقليم اظافر كوريا الشمالية … والضغط على إيران بالإنسحاب من الإتفاق النووى وتوقيع عقوبات إقتصادية عليها … يعنى من الأخر .. كل اللى بيحصل المفروض يكون مش مفاجئ لينا .. لكن ساعات كتير إحنا كلنا بتنسى 😊
المشكلة إن الميديا الأميريكية ومنها إلى الميديا العالمية نجحوا فى تسويق فكرة إن ترامب ده راجل مجنون واهطل .. و ده كان علشان يصب فى صالح حزب اوباما/كلينتون أيام المعركة الإنتخابية .. ولأن الراجل ده تصادمى بشكل كبير ، فالموضوع إستمر حتى بعد فوزه بالرئاسة و لحد النهاردة .. وكالعادة الناس مش عندنا فقط فى مصر ، ولكن فى العالم كله بــ يبلعوا الطعم اللى بــ يتم دسه فى وسائل الإعلام ويهضموه ويصدقوه لحد مايتحول مع الوقت لقناعة غير قابلة للنقض (بالضاد) أو للتغيير .. والكلام ده ليس مدحاً أو ذماً فى ترامب ، لأن مصر عندها مايكفيها من الخلافات مع الإدارة الأميريكية على قضايا المنطقة والقضايا الدولية اللى مصر أكيد بوضعها الإقليمى والدولى جزء فاعل فيها .. لكن اللى بنقوله ده إقرار واقع علشان بس ماحدش فينا ينساق وراء اى خزعبلات إعلامية .. وخصوصاً إن ترامب مش هو موضوعنا النهاردة ، لكن المهم بالنسبة لنا هو محاولة فهم وتأثير القرار الأميريكى بالإنسحاب من الإتفاق النووى الإيرانى (5+1) .. فيما يعرف بالــ “Domino Effect” .. سواء كان على المستوى الدولى أو على مصر.
أولاً .. التأثير الداخلى فى إيران:
إيران عندها مشكلة داخلية ومنقسمة على نفسها فيما يخص الإتفاق النووى ، لأنه إذا كان حسن روحانى مع هذا الإتفاق ويؤيده بشدة برغم المعارضة الشديدة داخل مؤسسات ولاية الفقيه والحرس الثورى الإيرانى .. فـالإنسحاب الأميريكى هــ يرجع الكرة تانى لملعب التيار المتشدد والحرس الثورى .. وهــ يطلق إيديهم أكثر فى مفاصل الإقتصاد الإيرانى بحجة تكوين الإقتصاد المقاوم واللى هــ يتم تفعيل ألياته بمجرد بدأ تنفيذ العقوبات الإقتصادية من الجانب الأميريكى .. مع الوضع فى الإعتبار إن النظام الإيرانى هــ يلعب على الخلاف القائم بين الإتحاد الأوروبى وأميريكا بسبب الإتفاق النووى ، وهــ يستغل الخلاف ده لمصلحته بشدة لتخفيف وطأة أى عقوبات إقتصادية محتملة
ثانياً .. التأثير على أميريكا:
الإنسحاب الأميريكى من الإتفاق النووى الإيرانى ، هــ يوسع هوة الخلاف بين أميريكا والإتحاد الأوروبى .. وخصوصاً إن الدول الأوروبية لها مصالح إقتصادية مع إيران ، ودولة زى ألمانيا مثلا ، جزء كبير من الميزان التجارى بتاعها نتيجة علاقات تجارية مع النظام الإيرانى … و ده ظهر واضح جداً فى تصريحات فيدريكا موجيريني مسؤولة السياسة الخارجية بالاتحاد الأوروبي اللى قالت إن المجتمع الدولي يجب عليه الالتزام بالاتفاق النووي مع إيران .. وقالت موجيريني “إنني قلقة بشكل خاص بشأن الإعلان بفرض عقوبات جديدة” .. وأضافت .. “إن الاتحاد الأوروبي عازم على الحفاظ على الاتفاق النووي مع إيران بالتعاون مع بقية المجتمع الدولي”… فى الوقت اللى هاجمت فيه فرنسا الإنسحاب الأميريكى وقال الرئيس الفرنسي إيمانويل ماكرون إن بلاده ستعمل على إبرام اتفاق أوسع يغطي ما تقوم به إيران من أنشطة نووية .. لكن لهجة وزير الاقتصاد الفرنسى برونو لومير كانت أكثر حدة لما قال إنه من “غير المقبول” أن تضع الولايات المتحدة نفسها فى مكانة “شرطى اقتصادى للعالم”.
ثالثاً .. التأثير على دول الخليج:
السعودية والإمارات والبحرين رحبوا بالقرار الأميريكى ، لأنهم شايفين إن ده يصب فى مصلحتهم .. أولاً لأنه بيضع أميريكا فى مواجهة مع إيران .. وثانياً لأن العقوبات الإقتصادية هــ تأثر على تصدير البترول الإيرانى ، و ده هــ يكون سبب من اسباب رفع سعر برميل البترول عالمياً ، واللى بدأ بالفعل بمجرد إعلان أميريكا الإنسحاب من الإتفاق .. و ده هــ يصب فى مصلحة الدول دى إقتصاديا ، وهــ يظبط الموازنة العامة بتاعتهم ، وهــ يزود التدفقات النقدية لخزينة الدولة .. فى الوقت اللى هــ نلاقى إن حالة الحصار أو العقوبات الإقتصادية المتوقعة ، هــ تخلى إيران تتشغل بمشكلتها الإقتصادية ، و ده غير إن تلويح إيران بإنها مش هــ تسكت ، هــ يضعها فى حالة شبه مواجهة عسكرية مع أميريكا وإسرائيل .. و ده هــ يخلى التواجد الإيرانى يقل تاثيره فى مناطق نفوذها زى سوريا والعراق واليمن .. ويحد من تاثيرها فى ليبيا .. ويضع حزب الله فى لبنان فى حالة إنعدام وزن … وأكثر الخاسرين بالقطع هــ يكون تنظيم الحمدين القطرى ، واللى اصبح فعلا ظهره مكشوف بعد ما خسر دول الخليج .. ودلوقتى هــ يخسر إيران كداعم إقليمى ورئة بيتنفس منها لتخفيف حدة الحصار اللى فرضه رباعى المقاطعة (السعودية والبحرين والإمارات ومصر).
رابعاً .. التأثير على مصر:
إقتصاديا ، مصر طبعا هــ تتأثر فى حالة إرتفاع أسعار البترول عالمياً لأن مصر لحد النهاردة بتستورد 35% من إحتياجاتها البترولية ، والحكومة المصرية عاملة حسابها فى الموازنة العامة للدولة على سعر برميل البترول 67 دولار .. وكل دولار زيادة عن الرقم ده ، هــ يكلف خزينة مصر 4 مليار جنيه سنوياً زيادة فى عجز الموازنة .. لكن فى المقابل هــ يحصل تأثير إيجابى على قطاع الغاز المصرى ، لأن العقوبات الإقتصادية هــ تحد من عمليات إكتشافات الغاز و تصدير الغاز الإيرانى للخارج ، وإتمام تعاقدات دولية ، و ده هــ يسمح لمصر بالتحرك لملئ الفراغ ده بشكل أو بأخر.
أمنياً .. هــ نلاقى إن البيان الصادر عن وزارة الخارجية المصرية ، ماكانش حاد بالمعنى الواضح .. بل كان فيه مطالبة بالمحافظة على الإتفاقيات الدولية وفى نفس الوقت مطالبة واضحة لإيران بالمحافظة على تعهداتها فى الإتفاق النووى .. يعنى مصر ماسكة العصايا من المنتصف .. و ده يوحى إن مصر مش رافضة موضوع إنسحاب أميريكا من الإتفاق النووى ، إذا كان ده هــ يؤثر بشكل سلبى على أنشطة إيران النووية وتمددها العسكرى والأمنى فى المنطقة ، واللى بيهدد الأمن القومى المصرى .. وخلينا نقول إن تراجع النفوذ الإيرانى فى دول المنطقة زى سوريا والعراق واليمن يصب بشكل مباشر فى مصلحة الأمن القومى المصرى
خامساً .. بالنسبة لروسيا :
.. فــ من الطبيعى إنها تنتقد بشدة وبلهجة حادة ، قرار ترامب بالإنسحاب من الإتفاق النووى .. و ده ظهر بوضوح فى بيان وزارة الخارجية الروسية اللى قالت إن “خروج الولايات المتحدة من الاتفاق النووي الإيراني تهديد للأمن الدولي” .. وخصوصاً إن إيران هى موطئ قدم هام لروسيا فى المنطقة ، وخيال المأتة اللى بتحاول تحتويه وتستغله فى نفس الوقت .. وكمان مش من مصلحة روسيا إهتزاز وضعية النظام الإيرانى فى الوقت الحالى ، لأنه صمام أمان للحدود الجنوبية الروسية وبحر قزوين أمام جماعات التأسلم السياسى والتنظيمات الإرهابية فى نفس الوقت اللى بتحاول روسيا فيه إحتواء النظام التركى مرحلياً لنفس السبب.
طب لييه حالة الهلع اللى حاصلة دى !!؟
و لييه اسرائيل اعلنت استدعاء الاحتياطى و نشر منصات الدرع الصاروخية على حدودها الشمالية !؟
و لييه السعودية بكرة هــ تنفذ في الرياض تجربة اطلاق صافرات الانذار لمواطنيها !!؟
و لييه إسرائيل أعلنت على لسان الإعلام الإسرائيلى إن مصر أدخلت حشود عسكرية مهولة لسيناء الاسبوع الماضي على الشريط الحدودى الشرقي فى محاولة لطمأنة اسرائيل لمواطنيها في الجنوب إنهم مايترعبوش من أصوات العمليات التى قد تصلهم من عمليات الجيش المصرى !!؟؟
و إزاى أميريكا و إسرائيل هــ يحاربوا ايران اللى هى أصلا تابعة ليهم في الكواليس الخلفية .. !!؟؟ و إييه الهدف من كل ده !!؟؟
ده اللى هــ نتكلم عنه في المقال القادم
حضروا كوباية الشاى 😉😊