10 Jan 2020
الحنجورية الأيديولوجية .. الشيطان يعظ .. !
“ولا عــزاء للـمـغـيـّبـيـن”
——————————
قولنالكم إن إيران مش هــ يكون لها رد فعل على مقتل سليمانى .. و لو هتقوم برد فعل ، هيكون مجرد شو إعلامى .. و حصل … و أهو الصواريخ الإيرانية كانت شغالة زى الشماريخ فى ماتشات الكورة على القواعد الأميريكية فى العراق .. ومافيش صرصار أميريكى مات .. والمضحك إن إيران طلعت بيان تعلن فيه انهاء عملياتها الانتقامية ضد الولايات المتحدة رداً على مقتل سليماني واللى ما إتقتلش فيها غير الأبرياء اللى كانوا فى الطيارة الأوكرانية إن صح التوقع إن صاروخ إيرانى كان هو السبب .. وبالخطأ كمان .. والمثير أكثر للضحك ، إن قاعدة العديد اللى فى قطر ، واللى على بعد 2 متر ونص من إيران ، واللى إنطلقت منها الطائرة اللى قتلت سليمانى بالفعل .. ما إنضربتش بنبلة حتى !! 🙃
قولنالكم إن تركيا مش هــ تحارب ولا هــ ترسل قوات إلى ليبيا .. وإن مصر عملت “الهوم وورك” من بدرى ، وقفلت عليها الزمبيل فى البحر المتوسط ، سياسياً وعسكرياً .. وإن كل اللى بتعمله تركيا ده ، هو ممارسة سياسة حافة الهاوية .. و حصل … و أهو الأخ “جَرَبْ أحمق بغبغان” بعد ما قال هــ يبعث قوات .. وبعدين أعلن إن القوات بدأت التحرك بالفعل .. وبعدين قال دول على مشارف الوصول إلى ليبيا ، وإن ليبيا دى حقنا ، و إرث ابائنا وأجدادنا …. و بعد كل ده طلع يقولك .. يا كماحة .. مين بس قال إننا هــ نبعث جيش .. دوول هم كلهم على بعض شاكب راكب 35 ضابط هنبعثهم للدعم ، و مش هــ يشاركوا فى العمليات العسكرية .. إحنا بس عايزين نمنع الإقتال فى ليبيا ! 😁
و بعدين طلع مع بوتين فى مؤتمر صحفى يستجدى العالم بالتدخل لوقف إطلاق النار فى ليبيا …. وأخيرا ذكرت قناة العربية من شوية ، نقلا عن صحيفة أحوال التركية ، إن فيه 3 جنود أتراك إتقتلوا فى ليبيا ، وإصابة 6 أخرين … يعنى ربع الجيش العرمرم اللى هو بعته ، خلصوا فى أول يوم مواجهة … وعقبال الباقى 🙂
للأسف الشديد إن هو ده دَيدن وأسلوب كل تيارات التأسلم السياسى ، وكل الجماعات المؤدلجة اللى فى منطقتنا … إستخدام الحنجوريات ، والكلام المجعلص الكبير .. والعبارات الرنانة .. اللى تخليك تشعر إن المجموعة الشمسية هــ تتقلب زى فردة الشراب ، أول ما يتحركوا … لكن الحقيقة بتبقى مجرد صفر .. و صفر على الشمال كمان … و لييه لأ .. و هم بيلعبوا فقط على تغييب عقول متابيعهم و مؤيديهم من مغيبى العقول ، اللى أدمنوا إحساس الإستمناء الثورى و اللعب على الأيديولوجية الدينية .. و تلاقى الواحد منهم مش بيقدر يخش ينام بالليل ، غير بعد ما ياخد الجرعة اليومية الكافية من عبارات الشحن الدينى والمعنوى ، علشان يقعد يجعر ويهتف مع نفسه ، وجسمه يقشعر ، وشعره يقف .. وبعدين يخش ينام وهو مرتاح الضمير .. أو إن شئنا الدقة .. مغيب الضمير والعقل .. برغم إن المحصلة النهائية صفر .. !
و وقت اللزوم .. بــ تلاقى إن الوقود الحقيقى لكل الدعاوى الحنجورية دى .. هم شوية المغيبين ، اللى بــ يتم إستخدامهم (نساء ورجال) .. كأعواد كبريت تحترق .. علشان الحنجوريين يتصفّق لهم و يتهتف بحياتهم … فــ تلاقى من المغيبين اللى بــ يفجر نفسه ، واللى بــ تمارس جهاد النكاح ، واللى بــ يحرق ويكسر ويدمر فى مؤسسات بلده ، واللى بــ يتخابر مع أجهزة وجماعات وكيانات ومنظمات وهيئات معادية لبلده ، واللى بــ يمارس الجهاد الأليكترونى المقدس … و كل ده تحت دعاوى .. إما الحرية والديموقراطية أو الجهاد
الأستاذ المجاهد إسماعيل هنية رئيس المكتب السياسي لحركة سماح .. أووبس .. قصدى حماس ..، راح حضر جنازة قاسم سليمانى فى إيران ، و خطب فى الجموع .. وقال ضمن خطبته العصماء .. إن سليمانى كان سند للقضية الفلسطينية ، وإنه شهيد القدس … يارااااجل … شهيد القدس .. إنت بتتكلم جد !؟ .. ياراجل ده الأستاذ السند بتاعك ده ، و شهيد القدس … ماضربش رصاصة واحدة على إسرائيل !! .. إنتوا إزاى كدة !؟ .. إزاى تمتلكوا كل هذا القدر من الصفاقة … وتلاقى الجاسوس العلنى بتاع قناة الشرق “مذلول مطر” طالع يقولك قال إييه .. اصل إسماعيل هنية مالاقاش حد يسنده غير إيران ، بعد ما كل العرب قفلوا أبوابهم فى وشه … هو إنت بجد !!؟ … إنت كدة فعلا من زمان !!؟ .. طب بالنسبة لأردوغان اللى طلع يتشحتف على سليمانى ، ويترحم على المأسوف على شبابه ، ياترى أخباره إييه …. ياراجل ده إنتم بجد “فــ…توا المنطق”
للأسف .. هم عارفين إن جمهورهم من المغيبين ، مش بيفهم غير اللغة دى .. لغة الحنجوريات .. مهما كان فيه تناقض فيها بين اللحظة والتانية .. وتلاقى الأستاذ المغيب اللى زعلان على قاسم سليمانى ، ومصدق إنه لازم يدعم إيران ويجاهد معاها فى مواجهة الشيطان الأكبر … هو نفس المغيب اللى مصدق إنه لازم يجاهد ضد إيران فى سوريا لأن الشيعة ضد الإسلام !! … ماهو اصل كل المغيبين بيتحركوا بالصفارة .. و هم مغمضين عيونهم و أذانهم … لكن فقط بــ ينفذوا المطلوب منهم بدون تفكير .. و فى التوقيت المحدد ..
ياترى راح فين شعار “لبيكى يا سوريا” .. طب راح فين “ع القدس رايحين شهداء بالملايين” .. أاااه صحيح نسيت .. اصل مفتى الإخوان الأخ القرضاوى طلع قبل كدة وقال إنهم مش مأمورين بمحاربة إسرائيل … طب ولما إنتم مش مامورين بمحاربة إسرائيل .. أومّال حماس فصيل مقاومة ضد مين يا عم الحاج !!؟؟ … 🤔
طب ياترى أخبار مسلمى بورما إييه !؟ … طب الإيجور خلاص .. مشكلتهم إتحلت ، والصين بطلت تعذب وتسحل المسلمين ، وبقت بــ تجيبلهم سنداوتشات حلاوة بالقشطة !؟ … طب بالنسبة للتطهير العرقى اللى بتمارسه تركيا فى حق الأكراد فى الشمال السورى ده نظامه إييه !؟ … وإلا الأكراد دوول مجوس !؟
و النكتة اللى بيقنعوا نفسهم بيها ، ومش عارف بجد مصدقين نفسهم إزاى …، تلاقيهم طول الوقت بيشتموا فى إسرائيل وأميريكا ليل ونهار برغم التبادل التجارى والعسكرى اللى بينهم ، وبيتوعدوهم بالدمار ، والويل والثبور وعظائم الأمور … وقبائل الزومبى من المغيبين بــ تهتف وراهم وتصفق لهم .. وشوية شوية هنطلع كلنا كدة بربطة المعلم على تل أبيب ندكها ونرجع .. وأول ما إسرائيل تضرب رصاصة ، أو تمارس أى إجراءات قمعية ، أو أميريكا تاخد أى خطوة داعمة لإسرائيل .. تلاقيهم كلهم بيشتموا فى مصر و بــ يتهموها بالخيانة ، ويقولك فين الجيش المصرى علشان يحارب العدو الصهيونى .. وبرضوا المغيبين وراهم و بــ يصفقوا لهم .. ويشتموا فى مصر .. من غير ما يسألوهم سؤال واحد واضح وصريح .. طب إنتم مابتحاربوهمش لييه !!؟؟
بكل أسف .. اللغة الحنجورية … هى البنج الشعبوي ، اللى بيستخدمه الكذابين لحصد الهتافات والشعبية الزائفة ، واالفوز بالمناصب والأموال .. على حساب المغيبين ، من مدمنى الشعارات الرنانة .. واللى تم اللعب على عقولهم وايديولوجياتهم السياسية والدينية على مدى سنوات .. لحد ما أصبحوا مجرد مجموعات من الزومبى .. لاتصدق غير الشيطان .. عندما يقف بينهم خطيباً لــ …. ليعظ !!
تحياتنا للجميع .. و حفظ الله مصر