24 Aug 2018
أخبار ع الطاير .. !!
——————
أخبار كتير كل يوم وحاجات كتير حلوة بتحصل برغم كل الصعوبات والتحديات .. لكن فيه ناس ما وراهمش غير السلبية .. ومش معنى كدة إنه مافيش سلبيات .. لكن مش لازم طول الوقت نمارس جلد الذات وكأن البعض مننا مصابين بسادية حب تعذيب الأخرين والعكننة عليهم طول الوقت !
وبرغم كل التحديات .. لكن تلاقى ربنا بيطبطب عليك ، ويقولك ماتخافش .. أنا معاك .. طول ما إنت بتشتغل انا معاك .. طول ما إنت صاحب قضية عادلة انا معاك .. طول ما إنت هدفك نبيل أنا معاك .. وشوف بقى لما يكون معاك من لا يغفل ولا ينام 😊
- أولاً ..
للعام التالى على التوالى .. نهر النيل يسجل أعلى منسوب له منذ 100 عام .. ونقلاً عن وزارة الموارد المائية والري والكهرباء بالسودان ، أن النيل الأزرق (الرافد الرئيسي للنيل)، سجَّل حاليا أعلى منسوب خلال المائة عام الماضية، متجاوزاً فيضان عام 1946، موضحة أن مناسيب النيل بلغت في الخرطوم 17.14 متر وهو مستوى قياسى بسبب هطول أمطار غزيرة فى إثيوبيا .. وتوقعت الوزارة فى بيانها يوم الإثنين الماضى وصول أمواج عالية خلال الأيام القادمة مع هطول أمطار كثيفة فى عدد من الولايات ….
- تعليق:
طبعاً مش محتاجين نقول إن ده هــ يصب فى مصلحة مخزون المياه خلف السد العالى فى بحيرة ناصر .. والزيادة هــ تصب فى مفيض توشكى .. أو هــ يشوفولها أى صرفة تانية علشان يستخدموها فى الزراعة … يعنى سنتين وراء بعض ربنا واقف معاك بظواهر طبيعية .. طب تخاف وتقلق إزاى بس !؟ 😊
- ثُانياً ..
صرح الدكتور مصطفى مدبولى، وزير الإسكان والمرافق والمجتمعات العمرانية، بأنه تم سحب 23768 كراسة شروط، فى 3 أيام، لحجز 40 ألف وحدة سكنية بالمرحلة الأولى بمشروع “سكن مصر” بمدن (القاهرة الجديدة – 6 أكتوبر – العبور – بدر – دمياط الجديدة – المنيا الجديدة)، من فروع بنك التعمير والإسكان الـ 8 التي تم الإعلان عنها …
وأكد الوزير أنه لا داعي للتزاحم على فروع البنك، وكراسات الشروط متوافرة لآخر يوم، من أيام الحجز، وهو 5 أكتوبر المقبل، وكل من سيطلب شراء كراسة شروط للتقدم للحجز سيحصل عليها، ولا مميزات مطلقاً لسحب كراسات الشروط أو التقديم ودفع مقدمات الحجز مبكراً، حيث إنه سيتم إجراء قرعة علنية يدوية بين المتقدمين لتحديد من سيحصل على الوحدات …
- تعليق:
يعنى الناس بدل ما كانت زمان بتقف طوابير على البنزين والعيش وأنبوبة البوتاجاز .. النهاردة بتقف طوابير على حجز شقق .. والبقية تأتى فى المراحل اللاحقة .. بس قولوا يارب
- ثالثاً ..
صرح اللواء محمد يوسف رئيس مجلس إدارة الشركة القابضة للنقل البحري والبري “إنه تم دخول 300 أتوبيس جديد الخدمة، وذلك في إطار استراتيجية الشركة القابضة بدعم شركات نقل الركاب الثلاثة التابعة للشركة القابضة ( شرق الدلتا للنقل والسياحة، غرب ووسط الدلتا للنقل والسياحة ، الصعيد للنقل والسياحة ) طبقا لمخطط الخطة الاستثمارية للشركة القابضة خلال العام المالي الحالي 2017/ 2018 …. وقال يوسف فى بيان يوم الإثنين الماضى أن الاتوبيسات من أحدث الطرازات بواقع 100 أتوبيس لكل شركة نقل ركاب .. وأن دخول الأتوبيسات الجديدة يأتي تزامنا مع حلول عيد الاضحي المبارك لنقل أكبر عدد من الجمهور لمواجهة ضغط الركاب خلال اجازة العيد
- تعليق:
مصر النهاردة بتدعم أتوبيسات النقل للشركات التابعة للشركة القابضة علشان الناس تقدر تطلع تتفسح بدون مشاكل زحام فى الحجز .. طب ده نسميه إييه !!؟ .. حد من المزايدين صاحى وإلا عاملين من بنها !؟
- رابعاً ..
نقلا عن مركز المعلومات ودعم إتخاذ القرار وفى إطار تطوير منظومة الشكاوى … أصدر رئيس مجلس الوزراء القرار رقم 1855 لسنة 2017 بشأن منظومة الشكاوى الحكومية الموحدة وإعادة تنظيم مكاتب خدمة المواطنين وربطها بالمنظومة … و يمكنك تبليغ شكواك من خلال:
الرقم الساخن 16528
الموقع الإلكتروني http://www.shakwa.eg
او من خلال تحميل تطبيق ايجابي على هاتفك المحمول من على …
Google play store: https://goo.gl/qxCrfV
App Store: https://goo.gl/0r9MWK
- تعليق:
إتكلمنا عن الموضوع ده قبل كدة .. وناس كتير من اصقائنا اكدوا إنهم عندهم تجارب إيجابية جداً مع بوابة الشكاوى …. بس مش معنى كلامنا إن كل حاجة تمام بنسبة 100% أكيد فيه سلبيات لأن العامل البشرى لسة موجود .. وجارى التطوير .. المهم إننا بــ نتطور للأحسن .. على الأقل زمان ما كنّاش بنسمع عن حاجة إسمها بوابة الشكاوى خالص 🙂
- خامساً ..
أعلن وسام فتوح، الأمين العام لاتحاد المصارف العربية عن دخول 4 بنوك مصرية ضمن أكبر 1000 بنك على مستوى العالم وهى بالترتيب: “البنك الأهلى المصرى”، “بنك مصر”، “البنك العربى الأفريقى الدولى”، و”البنك التجارى الدولى مصر”، وبلغ مجموع رأس المال الأساسى فى هذه المصارف الأربعة حوالى 7.4 مليار دولار، كما تدير أصول تقدّر بحوالى 152.7 مليار دولار
- تعليق:
بس إوعوا تنسوا إن الإقتصاد المصرى يوم بعد يوم بينهار .. ومصر هــ تفلس .. والدولة مش بتدفع عوائد شهادات قناة السويس 😊😊
- سادساً ..
إيرادات قناة السويس عن الفترة الزمنية حتى نهاية يوليو 2017 نشرنا عنها مقال من يومين اسمه “قناة السويس بين هري الماضى وحقائق الحاضر“
- سابعاً ..
أعلنت شركة “مروحيات روسيا” أنها هــ تقوم بتوريد 15 مروحية كا-52 “تمساح” إلى مصر فى العام الحالى ، مؤكدة أن الصفقة الإجمالية تشمل 46 مروحية .. مع الوضع فى الإعتبار إن أول دفعة تشمل 3 مروحيات قد تم تسليمها بالفعل ، وجارى تسليم باقى الدفعات فى المواعيد المقررة
- تعليق:
ياترى أخبار العلاقات المصرية الروسية إييه !؟ ..
ياترى فاكرين لما قولنا إن مصر مهما تم الضغط عليها لتحقيق مكاسب سياسية أو إستراتيجية .. ماحدش هــ يقدر يعمل غير اللى مصر عايزاه .. لأنه فى النهاية مافيش بديل إقليمى لمصر .. و ده غير إن مصر بتتعامل من منطلق الند للند حتى مع القوى العظمى 😉
- ثامناً وأخيرا ..
موضوع تقليل المعونة العسكرية والإقتصادية لمصر .. ياترى اصدقائنا بــ يحطوا الخبر ده ضمن الأخبار السيئة وإلا الكويسة !!؟؟ .. وياترى إحنا شايفبن الخبر ده إزاى .. بس قبل ما نقول لكم إحنا شايفين الخبر إزاى .. لازم الأول نعرض بيان وزارة الخارجية المصرية نقلا عن الصفحة الرسمية مش عن أى مصدر أخر:
بيان صادر عن وزارة الخارجية
الأربعاء ٢٣ أغسطس ٢٠١٧
تعرب جمهورية مصر العربية عن أسفها لقرار الولايات المتحدة الامريكية تخفيض بعض المبالغ المخصصة فى اطار برنامج المساعدات الامريكية لمصر، سواء من خلال التخفيض المباشر لبعض مكونات الشق الاقتصادى من البرنامج، او تأجيل صرف بعض مكونات الشق العسكرى.
و تعتبر مصر ان هذا الإجراء يعكس سوء تقدير لطبيعة العلاقة الاستراتيجية التى تربط البلدين على مدار عقود طويلة، واتباع نهج يفتقر للفهم الدقيق لأهمية دعم استقرار مصر ونجاح تجربتها، وحجم وطبيعة التحديات الاقتصادية والامنية التى تواجه الشعب المصرى، وخلط للأوراق بشكل قد تكون له تداعياته السلبية على تحقيق المصالح المشتركة المصرية الامريكية .
وإذ تقدر جمهورية مصر العربية أهمية الخطوة التى تم اتخاذها بالتصديق على الإطار العام لبرنامج المساعدات لعام ٢٠١٧، فإنها تتطلع لتعامل الإدارة الأمريكية مع البرنامج من منطلق الإدراك الكامل والتقدير للأهمية الحيوية التى يمثلها البرنامج لتحقيق مصالح الدولتين، والحفاظ على قوة العلاقة فيما بينهما، والتى تأسست دوما علي المبادئ المستقرة فى العلاقات الدولية والاحترام المتبادل.
————
إنتهى البيان …
بيان الخارجية المصرية بيان قوى وشديد اللهجة .. ولاحظوا إنه مافيهوش اى إشارة لشائعة إلغاء اللقاء بين سامح شكرى و جاريد كوشنر، مستشار الرئيس الأمريكي دونالد ترامب اللى تم بالفعل وكمان بعدها الرئيس السيسى إستقبل الوفد الأميريكى .. وعلشان كدة دايما بنقول ونؤكد إننا لازم ناخد الأخبار من مصادرها .. مش مجرد أخبار على النت ومن المواقع الإخبارية اللى بتنقل من بعضها .. وخصوصاً فيما يتعلق بالعلاقات الدولية وبالذات الإستراتيجية منها … و زى ما قولنا إن البيان شديد اللهجة وبيرمى من بعيد لبعيد كدة على إن إستخدام المساعدات كورقة ضغط على مصر بحجة حقوق الإنسان كان زمان وجبر .. وماعادش بيجيب نتيجة .. وإن ده ممكن يؤثر على العلاقات مع مصر 😉😊
المساعدات دى جزء من إتفاقية كامب ديفيد .. ودايما كانوا بيستخدموها كورقة ضغط على مصر لما مصر ماتسمعش الكلام وكان مجرد التلويح بيها كفيل بتغيير حاجات كتير .. لكن مصر خلاص ، ماعادش بيفرق معاها .. ولما عملوها قبل كدة أيام أوباما ، وكمان إحتجزوا طائرات الــ F16 اللى كانت تحت الصيانة للضغط على مصر فى 2015 ..، مصر قالت لهم طز .. مايفرقش معانا .. وفضل الموضوع متعلق لمدة سنة وكام شهر .. وبعدين طلعوا بيان إعتذار ورجعوا الطائرات ، وأعادوا المعونة تانى … لكن اللى بيحصل النهاردة ، هو نتاج صراع القوة مع الدولة العميقة فى الداخل الأميريكى .. لأن اللى خفض المعونة مش الإدارة الأميريكية ، لكن الكونجرس هو اللى عمل كدة بكل من فيه من المواليين للنظام السابق واللى بيضربوا فى النظام الحالى بالإضافة لأصحاب المصالح مع التنظيم الدولى وداعميه .. !!
لكن بيان الخارجية المصرية بــ يثبت إن ورقة الضغط دى خلاص فقدت قوتها .. ومصر مابيتلويش ذراعها .. وأى حد زعلان علشان المعونة الأميريكية .. إحنا بنقول له ، ياريت تتلغى خالص .. وخلّوا بالكوا إن فيه ناس وجهات قاعدة بتراقب ردود الأفعال على الفيسبوك .. وعلشان كدة إحنا بنقول لهم .. ماتنسوش تشربوها مع ينسون بالنعناع علشان تهدّى صدركم .. لأن تانى وتالت ورابع .. مصر مابيتلويش ذراعها ..
وعلشان كدة ، فــ الخبر ده بالنسبة لصفحة كلام فى الصميم يعتبر خبر سعيد عكس ما يتصوره البعض .. وكان لازم يحصل ، علشان يعرفوا رد الفعل ويختبروه بنفسهم .. سواء على مستوى الدولة .. أو حتى على المستوى الشعبى 🙂