21 Aug 2017
قناة السويس بين هري الماضى وحقائق الحاضر
———————————————
يوم بعد يوم بتشهد قناة السويس نمو مضطرد فى حركة السفن فيها وفى الدخل اللى بيصب فى مصلحة الموقف الإقتصادى للدولة .. وإحنا هنا بنتكلم عن دخل قناة السويس بالدولار وليس بالجنيه .. علشان بس ماحدش يقول إننا بنستخدم فرق العملة بعد تعويم الجنيه علشان نوحى للناس بتنامى إقتصادى وهمى .. 😉
ومن بداية 2017 .. والأرقام فى تنامى برغم حركة الركود التجارى على مستوى العالم .. ودخل القناة بيحقق أرقام قياسية يوم بعد يوم سواء على مستوى الإيراد الشهرى زى ما حصل فى شهر مارس ومايو ويوليو الماضيين .. وبإذن الله اغسطس كمان .. أو حتى على مستوى حركة العبور اليومية .. و ده يمكن اللى حصل يوم الأحد 20 أغسطس اللى هو إمبارح ، لما سجلت قناة السويس رقماً قياسياً بعبور 63 سفينة من الإتجاهين بحمولات 3 ملايين و800 ألف طن ..
وأفاد مميش رئيس هيئة قناة السويس في بيان صادر عن الهيئة نشرته بوابة الأهرام نقلا عن وكالة انباء الشرق الأوسط ، بإن عدد السفن اللي عبرت القناة ضمن قافلة الشمال بلغت 37 سفينة بحمولات مليونين و400 ألف طن وتصدرتها سفينة الحاويات الدنماركية (EDITH MAERSK ) بحمولة 173 ألف طن قادمة من المغرب ومتجهة إلى عمان فيما بلغ عدد السفن العابرة ضمن قافلة الجنوب 26 سفينة بإجمالي حمولات مليون و400 ألف طن تصدرتها سفينة الحاويات الليبيرية (MSC FILLIPPA ) بحمولة 147 ألف طن وهي قادمة من السعودية ومتجهة إلى اليونان.
وأكد البيان إن الزيادة المتنامية في أعداد وحمولات السفن العابرة للقناة منذ مطلع العام الجاري تعكس بدء تعافي حركة التجارة العالمية..مشددًا على قدرة القناة على مواكبة النمو المتوقع في حركة التجارة العالمية مستقبلا لا سيما بعد افتتاح مشروع قناة السويس الجديدة الذي أسهم في رفع تصنيف القناة بتقليل زمن العبور والانتظار وزيادة طاقتها الاستيعابية لتكون قادرة على استقبال أحدث وأكبر السفن العملاقة ذات الغواطس الكبيرة التي استحدثتها ترسانات السفن العالمية.
البوست أو المقال بتاع النهاردة مش علشان نقول إن الحساب الختامى للقناة حتى يوليو 2017 بــ يقول إن مدخلات قناة السويس حققت زيادة عن نفس الفترة من سنة 2016 بنسبة 19 مليون دولار يعنى الزيادة بالدولار مش بالجنيه .. وطبعا ً لو قيمّنا الرقم بإجمالى الدخل بالجنيه يبقى إحنا بنتكلم عن حوالى 53 مليار جنيه فى 2017 مقابل حوالى 26 مليار جنيه فى 2016 عن نفس الفترة ..
البوست أو المقال بتاع النهاردة مش علشان نقول إن القناة حققت طفرة فى حجم العبور اليومى فى شهور مارس ومايو ويوليو .. وأهو دخل معانا أغسطس كمان ، واللى تحدثت عن الطفرة دى كتير من الصحف والمواقع العالمية زى RT الروسية ، و رويترز ، وسكاى نيوز ..
لكن إحنا نشرنا المقال بتاع النهاردة علشان بس نسألكم .. ياترى فاكرين لما الدنيا إتقلبت .. وإتقال إنه خلاص قناة السويس هــ تقفل علشان حركة التجارة العالمية بتغير مساراتها من قناة السويس لرأس الرجاء الصالح !!؟؟ … ياترى فاكرين حالة الهري والسعار اللى إنتابت كل المغرضين اللى نفسهم البلد تقع .. وحالة القلق والحزن اللى إنتابت كل اللى بيحبوا بلدهم !؟
إحنا نشرنا مقال النهاردة علشان بس نفكركم بمقال قديم نشرناه فى شهر مارس سنة 2016 ، وكان بعنوان “قناة السويس ورأس الرجاء الصالح”
المقال ده نشرناه والشائعة كانت فى عز قوتها .. وبعد ما اصدقاء كتير بعتولنا على الخاص يطلبوا مننا إننا نتكلم فى الموضوع ده بسبب حالة القلق اللى كانت عند الجميع .. والشماتة اللى كان فيها كل من هم ضد الدولة … وخصوصاً بعد اللى عمله الإعلام وقتها فى المصريين .. وطبعاً ماننساش الإعلامى المعروف اللى طلع وقتها يجعّر ويزعق فى البرنامج اليومى بتاعه ، ويندب حظ البلد ، ويبكى على اللبن المسكوب ويتهم الدولة والحكومة بالتقصير والفشل !! .. برغم إننا فنّدنا الشائعة ببساطة خالص وبأسلوب علمى ومنطقى .. ولو كان الإعلاميين وخصوصاً الإعلامى إياه ده ، كلفوا بس خاطرهم وشغّلوا المعدين بتوعهم صح ، كانوا هم اللى ردوا وفندوا الشائعة من أساسها .. لكن طبعا ماينفعش يعملوا كدة …. أومّال هنعمل تفاعل ونزوّد السبوبة والإعلانات إزاى !!؟
إحنا بننشر مقال النهاردة علشان نطلب منكم تعيدوا قراءة المقال القديم .. ونفكركم ، إحنا كنا فين وبقينا فين !!! .. ولما تبصوا شوية على السنتين اللى فاتوا … وتسترجعوا الأحداث .. هــ تكتشفوا إن الحرب على المصريين ، وعلى الوعى الجمعى للشعب المصرى كانت بلا هوادة وبلا رحمة .. حرب شائعات قذرة .. وضرب فى الروح المعنوية بأسلوب منحط ….. حرب فرضت نفسها ، ومواجهة كانت أقسى على الدولة وعلى المصريين من مواجهة الإرهاب نفسه اللى بيضرب بالرصاص .. لأن الحرب المعنوية هى اشد واقوى ادوات الإرهاب اللى بيستخدمها فى هدم الدول ..
ومازالت الحرب المعنوية مستمرة .. بس إحنا خلاص فهمناها .. ووعينا الدرس كويس .. ومابقاش فيه حد ممكن يستهتر بينا أو يضحك علينا .. وأكيد طبعا حضراتكم بتشوفوا وتسمعوا بيانتا النتحدث العسكرى .. والفيديوهات اللى بيتم نشرها عن إحباط قواتنا المسلحة لمحاولات إختراق متعددة لحدودنا الغربية فى الأيام اللى فاتت ، واخرهم النهاردة 9 سيارات دفع رباعى على حدود ليبيا تم تدميرهم باللى فيهم من إرهابيين ومتفجرات .. علشان بس تعرفوا إن المعركة مستمرة .. وإننا كجبهة داخلية هى هدفهم الرئيسى .. لأن لو الجبهة الداخلية إتهدت .. يبقى عليه العوض
بس على مين …
ده إحنا المصريين 😊😊😊
وخليكم فاكرين لما قولنالكم بعد تدشين الموقع الجديد لصفحتكم كلام فى الصميم ، إننا هــ نحتاج المقالات القديمة كتير أوى فى الفترة اللى جاية 😉😊