مصر المحروسه تحميها البحريه

 2 Jun 2016

 مصر المحروسه تحميها البحريه

مبروك علينا الميستيرال – النقله النوعيه

——————————————

 ده الشعار الرسمي للقوات البحريه المصريه ….. أقدم البحريات في التاريخ ….. قوات الخبره القتاليه …. و التي دائما و ابدا  يتغير العلم العسكرى البحري على يديها طوال التاريخ ….. فاليوم … تنتقل البحريه المصريه الى عهد جديد تماما ….. و يترقب العالم اجمع بأصدقاؤه و أعداؤه النقله النوعيه التى انتقلتها قواتنا البحريه  بتسلمها حاملة الطائرات الميستيرال اليوم .

و اليوم و طوال الايام الماضيه ….. الكل تكلم عن القدرات و الامكانيات العسكريه للقطعه البحريه الجديده المنضمه للبحريه المصريه … بكل تفاصيلها …. و لان التفاصيل العسكريه بتكون ممله للكثير من اصدقاؤنا ….. فإحنا حنتكلم بشكل مختلف شويه … 🙂   خلونا نتكلم بشكل مبسط جدا و برؤيه جديده شويه ….  🙂 🙂  ….. و ليه مصر تعاقدت على الميستيرال … و ايه الفايده اللى حتعود علينا منها … و ليه الصفقات التسليحيه البحريه بالذات اللى مصر مركزه عليها ..

شوف يا سيدي ….. في الاول خلونا نتكلم بصراحه شويه …..  البحريه المصريه مش واخده حقها اعلاميا خاااالص 🙂   …. فاللى ميعرفوش الكثير من الناس …. ان البحريه المصريه من زمااااان قادره و مفتريه و بيتعملها الف حساب  🙂 🙂  ….. و كانت واخده بحريات اسرائيل و دول عظمي ورا مصنع الكراسي طوال حرب الاستنزاف و حرب اكتوبر و ما بعدها و حتي اليوم .

فمثلا اسرائيل طول عمرها بتتفاخر بقواتها الجويه و تطلق عليها اليد الطولي …. و بتتفاخر بقواتها المدرعه …… لكن تيجي عند البحريه و متسمعش ليها غير صوت صرصور الغيط الحزين  🙂 🙂  …. لانها عارفه حجمها كويس جدا ….. و كل المعارك البحريه اللى خاضتها امام البحريه المصريه …. منيت فيها بخسائر فاااادحه سواء في القطع البحريه او الارواح البشريه ….. و ده بالرغم من التفوق التكنولوجي الدائم لصالحهم …. و مسانده الاسطول السادس الامريكي الدائم لهم …. الا انهم كانوا دائما بياخدوا الدرس اللى عمرهم ما بينسوه.

الحقيقه العلميه اللى محدش بياخد باله منها …. ان البحريه المصريه كانت و لا تزال اليد الطولي للدوله المصريه ….. فالدوله المصريه بسطت نفوذها على باب المندب و شرق البحر المتوسط بما فيها المواني الاسرائيليه بواسطه القوات البحريه المصريه .

فالغواصات المصريه كانت دائما و بشكل شهري مقيمه داخل المواني الاسرائيليه … و مفيش صندوق سلاح كان بيوصل اسرائيل الا و كانت غواصه مصريه واقفه داخل المينا و بتصور كل صندوق بينزل من مراكب الشحن …… و بالرغم من استعانت اسرائيل بالاسطول السادس الامريكي لحمايه المياه الاقليميه لاسرائيل … الا ان دائما و ابدا كانت المطاردات و مناورات التخفي و التسلل و الاذلال لقطع الاسطول الامريكي  لصالح الغواصات المصريه ….. و كنا نزلنا مقال مفصل عن بطولات الغواصات المصريه ممكن الرجوع اليه .

فالبحريه المصريه كانت السبب في تغيير مناهج القتال البحرى بالكامل و غيرت التاريخ العسكري البحرى تماما عندما اغرقت نصف القوات البحريه الاسرائيليه في اقل من ساعه واحده باغراق اكبر قطعتين بحريتين اسرائيليتين و هم المدمره ايلات و المدمره يافون باستخدام لنش صواريخ صغير….. طبعا ناس حتستغرب ايه موضوع يافو  دي  🙂 🙂  …. على العموم اللى حيشكك في المعلومه … يا ريت يدينا تفسير واحد …..  هي المدمره العملاقه الاسرائيليه يافو اللى اخر مره شوهدت و اترصدت كانت في نفس يوم غرق ايلات و كانت بالقرب من من خط مسارها … و من يومها محدش شافها و لا عرف راحت فين … و تم التعتيم تماما على الخبر  🙂 🙂  ؟

عامه الحدث ده كان السبب ان بحريات العالم اجمع تقوم بتغير تسليحها و تكهن و تستغني عن القطع البحريه العملاقه و تقوم بالتركيز على القطع البحريه ذات السرعات العاليه و القوه النيرانيه الصاروخيه ….. يعني العالم كله دفع دم قلبه بسبب العقول المصريه و البحريه المصريه  🙂 🙂 

و يوم ما اسرائيل ما حبت تشم نفسها و استلمت احدث غواصات المانيه تتفوق تقنيا عن الغواصات المصريه بكتييييير و يقودها امهر اطقم الغواصات الالمان في العالم ….. فالبحريه المصريه اغرقت اتنين منهم  …. واحده يوم ما تم استلامها و قبل ما توصل اسرائيل و هي الغواصه داكار …  فبعتوا واحده تانيه لاخذ الثأر … فتم اغراقها ايضا و هي الغواصه تانين …… ده غير الغواصه التالته اللى تم اسرها هي بالطاقم بتاعها على سواحل الاسكندريه ….. 🙂 🙂 

ده غير حاجه مهمه جدا …. ان العقيده البحريه المصريه تعتمد على خبرات قتاليه متراكمه في اعالي البحار …… و ده بيفرق كتيييييير جدا عن بحريات تانيه كتير ….. فالقدره البحريه المصريه تستطيع اداء مهامها بمنتهى الكفاءه سواء على السواحل الاقليميه المصريه او في أعالي البحار و المياه العميقه …. و بتكتيكات مصريه خاااالصه …. لا تستخدمها الا البحريه المصريه …. و بدون الخوض في تفاصيل ….. فحتي اليوم …. يتم تدريس العديد من التكتيكات البحريه المصريه في مختلف المجالات في مختلف المعاهد الاكاديميه العسكريه …. كما يوجد العديد من هذه التكتيكات مسجله حتي الان باسم البحريه المصريه … و لم تستطع اي بحريه اخرى القيام بها بالرغم من التفوق التكنولوجي الكبير اللى في صالح العديد من الدول الاخرى .

و ده اللى يبان في تصريحات قائد القوات البحرية الفرنسية  اليوم اللى قال :

لقد انبهرنا بالفعل بمدي كفاءة الاطقم للتعلم وسرعتهم للتعلم خلال الفترة التدريبية وايضاً استطيع ان اشير الي ان هذا التعاون بداية تعاون لمدي طويل بين فرنسا ومصر وانا مازلت منبهر لمدي كفاءة الأطقم بشكل خاص والقوات البحرية المصرية بشكل عام

نيجي بقي للميستيرال و الفريم و الجاويند و المولينيا و الامباسادور و التايب و غيرها من القطع البحريه اللى تم التعاقد عليها ….. ايه بقي القصه و اي الفايده اللى حتعود علينا ؟؟؟ ….

بص يا سيدي …. طبعا الجميع زهق من سرد الامكانيات العسكريه للميستيرال … طولها و عرضها و نظم التسليح و قدراتها … لكن احنا حنتكلم بشكل مختلف شويه …. ازاي ؟؟؟ ….. اولا الميستيرال مش مجرد حامله طائرات … و لكن دي سفينه انزال و سيطره و قياده …. يعني ايه ؟؟؟

الحروب الحاليه اتغيرت … و اصبح الحرب على الارهاب ليها تكتيكاتها المختلفه عن حروب القوات النظاميه …. فالقوات المسلحه كانت تمتلك القوه الرادعه الكافيه و الذراع الطولي لردع اي قوات نظاميه تفكر في الاقتراب من الحدود المصريه ….. و مع تطور شكل الحروب اللى بقت بالوكاله ….. و تخفي الميليشيات الارهابيه بين السكان المدنيين بعد استيلاؤهم على المدن و القرى و اتخاذهم دروع بشريه …. اضاف الجيش المصري تشكيلات جديده تماما علي التشكيلات النظاميه الموجوده بالفعل في اقل من سنه فقط … و ده في العلم العسكرى يعتبر اعجاااااز لم يحدث من قبل في اي جيش اخر ….. و تم انشاء قوات التدخل السريع … و التي تعتمد على قوات نظاميه تمتلك وسائل نقل سريعه جدا تستطيع نقل عدد هائل من القوات بكل اسلحتهم … التي تتميز بالكثافه النيرانيه العاليه …. و خفه الحركه و القدره على المناوره ….. و الاعتماد على الهليكوبتر القتالي للدعم النيراني للقوات ….. و ده كان تكتيك مصري خاااالص و جديد …..  فالقوات دي لما استكملت …. هي اللى غيرت المعادله في سيناء تماما و بتقوم بكنس سيناء و الحدود الغربيه  بالرغم من نجاح الارهابيين في كسر جيوش بكاملها و الاستيلاء على دول باكملها …. و ده لمجرد استخدام تشكيلات جديده و ليس بكل قدرات الجيش المصري … و ده اللى خاللي الرئيس السيسي يصرح قبل كده …. اننا لا نستخدم الا 1% فقط من قدرات الجيش المصرى في محاربة الارهاب  🙂 🙂  .

و لان المجال الحيوى المصري اكبر بكتيييير من حدودنا … و بيمتد من الخليج العربي الى المحيط الاطلنطي ….. فكنا لازم ادينا تطول و نطول الارهاب ده و نقدر نضربه بنفس التكتيك المصري ده سواء بقوات التدخل السريع او باستخدام الهليكوبتر القتالي اللى بقدر يغطي مساحه دائره نص قطرها 300 كيلو متر  في اي مكان من وجود الميستيرال….. عشان كده وقع الاختيار على الميستيرال  🙂 🙂 

فمثلا لو كان فيه تهديد على مصر في اي مكان على السواحل الافريقيه الشماليه بكاملها … او البحر الاحمر او حتي الخليج العربي ….. فنقدر نبعت القوات اللى تخلص لان الميستيرال تقدر تنقل 450 جندي بدباباتهم بمدرعاتهم بطياراتهم الى اي مكان حتي لو كانت تبعد عن حدودنا اكتر من 10 الاف ميل بحري  🙂 🙂  ….  و تقدر تسيطر تماما على سواحل دول تبعد عنك الالاف الكيلو مترات و تمتد عملياتك بعمق 300 كيلو متر داخل الاراضي دي بطول سواحلها و في نفس الوقت تعمل حظر ملاحي عليها لانك مسيطر على ال 300 كيلو متر داخل البحر بطول سواحلها ايضا  🙂 🙂  و دي رساله مرعبه ان ايدك طالت اكتر و تقدر تطول اي مكان في مجالك الحيوي الخارجي

و ده اللى يفسر النهاردة لما احد الصحفيين بيسأل قائد القوات البحرية إذا كان الميسترال تقدر تلعب دور خارج المياه الإقليمية المصرية .. فالراجل رد وقال بمنتهى البساطة إن الميسترال أصلا دورها خارج المياه الإقليمية .. يعني نعتقد ان الرساله وصلت لكل الاطراف  🙂 🙂 

ده غير ان الميستيرال دي مش بتمشي لوحدها ….. دي لازم تمشي حواليها قطع بحريه تحميها من اي تهديدات سواء من طائرات او صواريخ موجهه او غواصات او الغام …. فبتمشي بزفه و هيصه  🙂 🙂  … فبيكون معاها مدمره و فرقاطه و غواصه ….. او لما نشوف البحريه المصريه حتخترع لينا و للبحريات العالميه ايه في اسلوب حمايه حاملات الطائرات  🙂 🙂  …… فالميستيرال بامكانياتها تعتبر وحده توجيه و قياده عمليات و سيطره لاسطول حربي كامل داخل البحر

ده غير اننا شرحنا ان فيلم الدمار اللى عايشينه بقالنا 5 سنوات حتي الان …. و تفكيك و تدمير الدول اللى حوالينا …. كان بسبب ثروات الغاز و البترول اللى في المنطقه و بالذات في شرق البحر المتوسط و اللى مصر بتمتلك منه نصيب الاسد ….. فبدخول حامله طائرات و انزال بحري للمعادله …. بتدي لمصر ذراع طولي للردع لحمايه مصالحها الاقتصاديه المتمثله في ابار الغاز و النفط و حمايه استثماراتها…..

فلما نشوف في عام واحد تم دخول البحريه المصريه حامله الطائرات و الانزال البحري الميستيرال  ….. و الفرقاطه الفريم …. و الكورفيت الامباسادور …. و الكورفيت الجاويند ….. و لنش الصواريخ المولينيا …… و الغواصه التايب …. و ما خفي كان اعظم  🙂 🙂  ….. ده معناه ان العقد الحالي هو عقد البحريه المصريه …. و ان الحروب القادمه هي حروب بحريه على المقدرات الاقتصاديه

و ده معناه حاجه مهمه جدا …… أن ……  مصر المحروسه … تحميها البحريه

تحيا مصر …. تحيا مصر  …. تحيا مصر

تحياتنا .

لمتابعة تعليقاتكم