البحرية المصرية و حروب الغاز

12 Dec 2019

البحرية المصرية و حروب الغاز .. !!
————————————-

كل يوم بيزداد التصعيد في منطقة شرق المتوسط …. و الكل يسمع دوى طبول الحرب بين جيوش المنطقة …. كيف ستتحول الحرب القائمة بالوكالة في المنطقة منذ 8 سنوات الى حرب مباشرة بين الجيوش النظامية …. و مع التحذير المصري الحازم و الرسالة العسكرية المصرية الصارمة بالأمس بإطلاق صاروخ بحري من أحد الغواصات المصرية و تصوير هذه العملية لأول مرة في تاريخ الإعلام المصري العسكري …. للأسف البعض إعتقد إن تركيا خلاص حتحارب مصر …. و ده غلط كبير بيحاول إعلام الجماعة الإرهابية تثبيته في عقول المصريين بخلاف الواقع ….. لأن مشكلة تركيا السياسية هي مصر ….. لكن العسكرية مش مع مصر خااااالص 😊 😊

طب منين التهديدات التركية اللى بيتم تصعيدها كل شوية و توجيهها لمصر … و كمان الرد المصري العسكري العنيف …. و منين بنقول إن محدش يقلق خاااالص …. و دايما زي ما اتعودنا على تأصيل الأمور و تفكيك الصورة الملخبطة و إعادة تركيبها مرة أخرى بعيون مصرية و حسب المصالح المصرية …. حنتكلم بالتفصيل و في نقاط محددة …. و إستحملونا شوية لو المقال طلع طويل … و هات كوباية الشاي بتاعتنا و تعالى على نفسك و كمل المقال.

شوف يا سيدي و بإختصار شديد عشان مانعيدش الكلام اللى بنقوله و كررناه من 6 سنين فاتوا …. و عشان نربط الأمور ببعضها … حنتكلم في المقال بطريقة سين و جيم .

س/ ليه تركيا حتتجنن من مصر و ليه رجب أحمق بغبغان بيشد شعره من مصر و جيشها و مش بيفوت فرصة غير لما يغلط فيها و بيعمل المستحيل عشان يسقطها؟

ج/ لأن مصر هي من هدمت أحلام تركيا بأنها تكون محطة نقل الغاز لأوروبا عن طريق خط نابوكو اللى حيتلاقي فيه غاز وسط أسيا … مع غاز الخليج … مع غاز شرق المتوسط و اللى يتجمع كله على الأراضي التركية و ينقلها لأوروبا بديلا عن الغاز الروسي … في مقابل إنه يتوسع عسكريا و يعيد أحلام الخلافة العثمانية و يستولى مرة أخرى على الدول العربية و ثرواتها … و منها حقول الغاز … و ده بتمويل قطري و تنفيذ من كلاب الجماعة الإرهابية ( الإخوان) و بترتيب مع اسرائيل بتقسيم الثروات … و ده اللى أفشله تماما الشعب و الجيش المصري في 30 يونيو 2013 و التحرك الروسي في القرم و أوكرانيا و سوريا …. و ده اللى اتكلمنا عليه في مقالات كتير منها على سبيل المثال للى عايز يستزيد في المعلومات :-

(ما بين العدوان الثلاثي 1956 / و الحرب العالميه الثالثه )
(خط الغاز الروسي)

س/ طيب الكلام ده فهمناه و إتكلمنا عليه كتير إن تركيا أخدت الصابونة المحترمة في التمدد الجغرافي …. ليه بقي تركيا إتجننت من موضوع ترسيم الحدود البحرية ما بين مصر و قبرص …. و أطلقت كلابها الإعلامية و عملاؤها في الداخل و الخارج من حريم السلطان لمهاجمة مصر و نشر أكاذيب إنها تنازلت و باعت حقوقها في البحر المتوسط ؟

ج/ لو بصيتوا على الخريطة المنشورة …. حتعرفوا القصة كلها 😊 😊 …. فحسب قانون البحار اللى إعترفت بيه جميع دول العالم ماعدا تركيا …. و هو المرجع الوحيد لترسيم الحدود البحرية …. فحدود تركيا البحرية حتلاقوها في مربع رقم 7 فقط …. في حين قبرص في المربع رقم 2 … و اليونان في المربع رقم 1 …. يعني حسب القانون الدولى …. رجب أحمق بغبغان أخد تااااانى صابونة لوكس محترمة في شرق البحر المتوسط 😊 ….

س/ طب إية دخل مصر في القصة دي … و ليه بيهاجمها و بيقول إن مصر فرطت في حدودها البحرية ؟

ج/ هو بيتعامل بنفس جينات العثمانلي الحرامي ….. عايز يلغي قبرص تماما …. و كمان جزيرة كريت اليونانية …. و يعمل ترسيم حدود مباشرة بين تركيا و بين مصر …. في مقابل انه يزود لمصر حتة زيادة لحدودها البحرية و كأنها سريقة بين شوية حرامية 😊 …. يعني شغل بلطجة …. و لما مصر أعلنت أنها تحترم القانون الدولى و إن كل واحد ياخد حقه بما يرضي الله و رسِّمت حدودها مع قبرص … قفلت علية الباب ده تماما .

س/ طب ليه بتقولوا إن تركيا مشكلتها الرئيسية العسكرية مش مع مصر ؟

ج/ برضوا الإجابة في الخريطة …. هو طمعان في غاز قبرص و اليونان …. و هم أولي بحماية حدودهم البحرية و ثرواتهم …. إحنا مالنا 😊 …. هم شركاء إقتصاديين و مصلحتنا واحدة …. و بيننا تنسيق و تعاون عسكري و أمني و سياسي و إقتصادي …. لكن المعركة حتكون في مياههم الإقليمية …. و الإستنفار العسكري داخل مياهنا الإقليمية …. و الصاروخ اللى انضرب إمبارح بيقول إن اللى حيقرب من مياهنا الإقليمية … حيلاقي صاروخ شبه اللى انضرب ده لابس فيه …. احنا بنساعد اصدقائنا و بنثبت الأمن الإقتصادي في شرق المتوسط …. لكن حتستعبط و تبلطج و تعمل الهبل و شغل التحرش اللى بتعمله مع اليونان و قبرص …. انت بتلعب بالنار … و اللى يلعب بالنار يستحمل.

س/ طب و هو اية الهبل اللى بيعمله مع قبرص و اليونان ؟

ج/ بشكل شبه يومي …. بيحصل اختراقات جوية و بحرية و تحرشات بين الطرفين … فمثلا من يومين … اخترقت تشكيلات جوية من 20 طائرة تركية F16 لعمل اجتياح جوي فوق بعض الجزر اليونانية في البحر المتوسط لفرض السيطرة و استعراض للقوة …. ليقوم بصدهم 38 طائرة يونانية F16 و ميراج 2000 في تحرك فاجىء الأتراك اللى لقوا نفسهم في كمائن جوية محكمة و مرتبة ….لتقوم معارك جوية ضارية قامت فيها الطائرات اليونانية بالإغلاق على الطائرات التركية و اللى هربت فورا من سماء المعركة تحسباً لإسقاطهم ….. و دة بخلاف نشر القوات الجوية اليونانية لصورة إغلاق جوى قرب من مسافة 3 كيلو فقط قامت به طائرة يونانية من طراز ميراج 2000 لكورفيت بحري تركي اخترق المياه اليونانية …. لتقوم بطرده من داخل المياه الإقليمية اليونانية ….. و من هنا نعرف الرسالة اللى بعثتها البحرية المصرية بالأمس ….. لو حبيت تدخل عندنا و تعمل الشغل اللى بتعمله مع اليونان ….. إحنا مش بتوع إغلاق بالصاروخ و تهديد بالضرب إذا لم تنسحب …. فضلة خيرك كدة و من غير تهديد …. حتلاقي الصاروخ لابس فيك وش …. و على الناشف من غير فازلين.

س/ طب أوروبا حتقف تتفرج كده ؟…. و حلف الناتو اييه دوره في القصة دي ؟

ج/ شوف يا سيدي …. كل الدول دي أعضاء في حلف الناتو …. و اللى أصلا مش ناقص مشاكل …. فهم عندهم حاجات أهم من دي زي مشاكل التمويل و إعادة نشر القوات في مواجهة روسيا و مشكلة إعادة نشر الصواريخ … ده غير توجه بعض الدول للخروج من حلف الناتو و تكوين حلف أوروبي و غيرها من المشاكل …. بخلاف ان اليونان و قبرص أعضاء في الإتحاد الأوروبي في مواجهة تركيا …. فحلف الناتو مزنوق مع تركيا في ملفات …. و مصالحه تتعارض مع تركيا في ملفات اخرى ….. يعني من الأخر كده … المصالح هي اللى بتحكم …. فمثلا بالأمس ايطاليا دخلت على الخط و أعلنت أنها أرسلت فرقاطة الى المنطقة لمواجهة تركيا و دعما لليونان و حماية لشركة إيني … و هولندا و أسبانيا أعلنتا دعمهما الكامل لليونان بدون سقف … لان ليهم حصة كبيرة في محطات تسييل الغاز المصري … بخلاف ان فرنسا و ايطاليا و اليونان أعلنوا القيام اليوم بمناورات بحرية كبيرة في قبالة المياة التركية …. و ده اللى خاللى البحرية المصرية تكشر عن أنيابها …. (إلعبوا مع بعض بعيد عن هنا)

س/ طب وضعنا إحنا اييه في المفرمة اللى شغالة دي؟؟

ج/ الحقيقة ان مصر لعبت الدور بحرفية شديدة …. سابت الأحمق واقف على المايكروفون يقول خطب و يشتم براحته طوال السنين اللى فاتت …. و اشتغلت بهدوووووء عشان تحاصره …. رسمنا حدودنا مع قبرص و طلعنا الغاز في أقل من 18 شهر فقط …. و عملنا اتفاقيات أمنية و عسكرية و إقتصادية مع اليونان و قبرص …. و بعد كدة أنشأنا كيان إقتصادي إسمه “منتدي غاز شرق المتوسط” فيه كل الدول ما عدا تركيا اللى أصبحت طفل لقيط …. و اتفقنا ان مصر تستحوذ على الحصة الكبيرة من الغاز و تكون هي “HUB” تصدير الغاز لأوروبا بما فيهم غاز اسرائيل …. يعني مصالح الجميع ارتبطت بمصر …. و اللطمة الكبيرة اللى بتتحضر دلوقتي هي تسريع عمل لجان ترسيم الحدود البحرية مع اليونان و توقيع الإتفاقية و إيداعها بالأمم المتحدة …. عشان نقفل الموضوع عليه تماما 😊….. عشان كدة حتي الخطابات السياسية اللى بتطلع من تركيا بقت عاملة زي واحد بيكلم نفسه 😅

س/ طب هي مصر تحركت في شرق المتوسط فقط ؟

ج/ لا طبعا … دي مصر نطت لهم على حدودهم ذات نفسها …. و حتلاقوا فى الكام سنة اللى فاتت …. مصر وطدت علاقتها بشكل كبير مع بلغاريا و جورجيا و رومانيا و الجبل الاسود و أذربيجان و المجر و عملت معاهم اتفاقيات امنية و عسكرية و اقتصادية لمحاصرة تركيا اللى أصلا فيه عداوة تاريخية معاهم من الويل اللى شافوه على ايدين العثمانيين زمان …. و الناس دي بتخدم بقلب 😊

س/ طب موضوع ترسيم الحدود التركية مع ليبيا ده اييه و إييه تأثيره علينا ؟

ج/ ده كلام كوميدي لان أصلا مفيش حدود بحرية بين تركيا و ليبيا … و هو رسالة لليونان بعدم اعتراف تركيا بجزيرة كريت اليونانية … و رسالة لمصر انه حيدخل يدعم السراج رسمي ….. و عامة ده مش جديد …. لان تركيا بالفعل موجودة على الأرض في ليبيا بقالها شهور طويلة …. و الدواعش بتتحدف على ليبيا بقالها سنين …. و الطائرات التركية رايحة جاية هناك …. و مع ذلك السراج محاصر و مش عارف يفرفص …. و من الآخر كدة … تركيا بتداعب امريكا انها ممكن تدخل ليبيا عشان تواجه التمدد العسكري الروسي اللى بدأ يظهر في ليبيا …. و عشان مانفتحش في اكتر من موضوع …. حنتكلم عن القصة دي في مقال آخر 😊 …. لكن من الآخر …. مفيش حاجة تقلق …. الموضوع كله بين تركيا و اليونان .

و من الآخر برضوا …. إحنا جبنا جون من زمان و خلصنا …. و واقفين نتفرج على التصفيات و هي بتتلعب و بقية الفرق ماسكين في بعض …. و اللى حيقرب حيتكهرب …. و العفي محدش ياكل لقمته 💪🙂

ربنا يحفظ جيشنا و بحريتنا …. و ماتقلقوش …. البحرية المصرية قادرة و مفترية …. مصر المحروسة تحميها البحرية

تحياتنا للجميع .. وحفظ الله مصر

لمتابعة تعليقاتكم