25 Jun 2018
سُعار حرب الاستهداف بالهري ..
——————————–
بمعدل سرعة اشاعة كل 3 دقائق ….. 32 فريق مشارك في كأس العالم …. و لم نجد فريق واحد مستهدف بكم كبير من الاشاعات الممنهجة و المتزامنة و المرتبة للتسفيه و السخرية و الاستهزاء … إلا الفريق المصري …. فبعد انتقالنا من مرحلة تشجيع مصريين كـ الكلاب السعرانة اللى بتنهش في جسد منتخبها من قطيع الكولجية و الاخوان للمنتخبات المنافسة لينا في التصفيات بداية بتشجيع غانا و مرورا بالكونغو … و اعلانهم الدائم بالدعاء و تمني الهزيمة للمنتخب المصري و عدم وصول المنتخب لكأس العالم و انهم يستعدون بالشماتة في الشعب المصري .
إنتقلنا من بوستات الغضب لنجاح مصر للوصول لنهائيات كأس العالم … الى حملة ممنهجة و متزامنة تستهدف التشويش و التنكيل بالفريق … و بلاعبيه بكل الصور الممكنة.
بدأنا اول هرية بموضوع طيارة المنتخب و خلاف عادي بين الرعاه و شركات الاعلان …. و اللى حصل و بيحصل و لسه حيحصل مع لاعبين عالميين في كل مكان كـ بيزنس و فلوس بيحاول كل طرف انه يحصل على اكبر قدر من الاخر حسب العقود المبرمة … يعني خلاف قانوني بعقود مكتوبة و كل واحد حياخد حقه …. لكن لاننا لسه مستجدين على الموضوع لان لاول مرة يكون عندنا لاعب عالمي له عقود رعاية خاصة بيه … و اللى ماخدتش كام يوم و خلصت …. تلقف البهوات الخبر و حولوه الى ان الدولة المصرية بمؤسساتها بتحارب محمد صلاح … و هاتك يا هري و هبد من نفس الناس اللى كانت بتشجع غانا و بتشتم صلاح لانه بيتبرع لصندوق تحيا مصر.
و بعدها دخلنا مباشرة على اتوبيس المنتخب الفوشيا ابو ستاير بمبة مسخسخ … و نزلت الصور من نفس القطيع اللى كان بيحلف 100 يمين ان هي دي صور الاتوبيس … و هاتك يا تريقة و شتيمة … و يطلع ان كل الكلام ده هجص و الصور فوتوشوب و ملهاش علاقة بالمنتخب.
عشان نخش بعدها على طول على بدل اللاعبين … و ازاي حد يلبس كوتشي ابيض على بدله … و هاتك يا شتيمة و تريقة و تسفيه …. و لما لقوا باقي المنتخبات لابسه نفس الكوتشي الابيض … قاموا ناطين على طول في نوع خامة البدله و موديلها و هل ينفع تكون بصفين زراير و لا بزرار واحد … و لا كأن الواحد فيهم كان شغال مصمم ازياء و خبير في الموضة العالمية … الله يرحم الوالد 🙂
قوم نسكت ؟ … لا طبعا … ندخل بقي على الهرية الكبيرة بتاعة الفندق اللى مليان جماهير و فنانين و رقاصات و طبل و زمر و زغط و لغط رايحين هناك عشان يتصوروا مع اللاعيبة … و وصلت بيهم السفالة انهم يقولوا ان زوجات اللاعبين بيناموا معاهم في الغرف اللى هي اصلا غرف مزدوجة بينام فيها لاعبين اتنين في كل غرفة … بمبدأ ان “عماد مأكدلي” و قاموا نزلوا صور قديمه من معسكر قديم في اسكندرية لفنان متصور مع لاعبين … تيجي تسأله …. طب عماد صور صورة من روسيا …. لأ …. طب صاحب عماد اللى كان معدي صور صورة …. لأ … طب اي عابر سبيل كان معدي صور صورة … لأ …. طب جبت صورة واحده من مئات الناس اللى بتقول انهم كانوا هناك في الفندق عشان يتصوروا …. لأ …. بس المهم ان عماد مأكدله….. و دي اللى نزلنا عليها مقال اسمه “كأس العالم ….النفوس المريضة بمرض التفكير بالتمني“
و نوصل بقي للهرية الجديدة بتاعة الرئيس قاديروف …. فالمعلم عماد برده … بنفس ذات نفسه …. أكد ان الاتحاد الدولى دفع مصاريف الاقامة مليون و 800 الف دولار للاتحاد المصري اللى ضربهم في جيبه … و استرخص …. و راح عمل اتفاق سياسي مع رئيس الشيشان بناء على تعليمات سياسية عليا …. عشان يصيته على حس محمد صلاح و المنتخب المصري …. و ده اللى ادي الفرصة لصحف انجليزية انها تلاقي اول فرصه انها تضرب في محمد صلاح لاتهامه بدعم ديكتاتور سفاح … و ده اللقب اللى اخده عن جداره من مؤسسه بير السلم الاخوانية اللى اسمها “هيومن رايتس ووتش” اللى نزلت بيان بتستهجن فيه الفعل المشين اللى عمله صلاح على حد قولها.
طبعا الكلام الجاهل ده مايطلعش غير من مندوب مبيعات بيلف على محلات البقالة …. حرامي و بيضرب ايصالات و فواتير و بيحط الباقي في جيبه …. لكن بيستهدف كل واحد بيفكر بالتمني و بيدور على اي كلام او خبر بيتمنى حدوثه في خياله … عشان يقعد يعيط و يولول جنبه و “يزيط” و خلاص … ليه ؟؟؟ :-
• اي دورة عالمية او قارية في الدنيا …. بيكون الاستضافة سواء الفندق او تأجير ملاعب التدريب و صالة الجيم اللى بيكون ليها معايير صارمة على حساب الاتحاد الدولى او القاري للعبة بالتنسيق مع الدولة المنظمة … و اللى تكلفته بتغطيها شركات و عقود الرعاية بين الاتحاد و الدولة المنظمة … يعني المنتخب مش بيدفع اي فواتير و لا بياخد فلوس في ايده خاااالص.
• الدولة المنظمة و لانها بتتكفل بتأمين البعثات الرسمية …. هي اللى بتحدد اماكن الاقامة حسب المعطيات الامنية و مش بمزاج الفرق … و روسيا بتحدد 3 اماكن لكل فريق … بمدن و فنادق مختلفة بالتنسيق مع الجهات الامنية … و كل فريق بيختار براحته واحد من الاختيارات التلاته و مش مسموح ليه يختار على مزاجه.
• مافيش حاجة اسمها بالصلاة على النبي الاتحاد الدولى بيدينا فلوس في ادينا و يقولنا انزل انت و شوف عم ابراهيم السمسار و ابقي حاسب وقول لنا حتنزل فين عشان نأمنك …. و تقوم انت مسترخص و ضارب باقي الفلوس في جيبك بعد ما تضربلك كام فاتوره و موفر في العصير و السناكس عشان تضرب فلوس اكتر…. يعني مفيش حاجه اسمها مليون و 800 الف دولار و الكلام الاهبل ده…. بغض النظر ان عماد مأكدلك…. ابقي روح خدهم من عماد … خليك ماشي وراه و خليه ينفعك.
• قاديروف ليه تار بايت مع الغرب لانه قضي على الارهاب الاخواني المدعوم من الغرب في الشيشان بالقوة المسلحة و اللى كان موجه اساسا ضد روسيا على حدودها …. يعني كان بيحارب اباطرة الارهاب الشيشاني اللى افراده الان مبهدلين سوريا و العراق و هزمهم شر هزيمة … و اعاد الامن و الاستقرار لبلده المسلم …. فطبيعي انه يكون في نظرهم سفاح و قاتل و مش كيوت في نظر الغرب و في نظر قطيع الخرفان و اللى مش بيضيعوا فرصه انهم ينالوا منه في اي و كل مناسبة …. و ده على فكرة نفس اللى بيتقال على اللى بيعمله الجيش المصري في سيناء.
• الصحف البريطانية اللى بتقود الهجمه على صلاح هي نفس الصحف اللى دايما بتنشر اخبار سلبية عن مصر … و على سبيل المثال … هي اللى نشرت من سنتين بعد سقوط الطيارة الروسية فوق سيناء و اكدت ان طيارة ركاب بريطانيه تم استهدافها بصاروخ من الارهابيين و هي يادوبك طالعة من التيك اوف من المدرج … و لولا ان الطيار قام عامل “أمبليه” في الجو و مناورة حادة تفادي بيها الصاروخ كانت الطيارة وقعت … بس الطيار مقالش حاجه للركاب اللى محدش منهم اخد باله …. و لما انهالت تعليقات السخرية عليهم من الانجليز نفسهم … مسحوا الخبر من غير حتي اعتذار…. و غيرها كتييييير من اخبار الاستهداف المنهجي لاي حاجه تخص مصر.
• محدش من البهوات سواء منظمة بير السلم او القطيع اللى بيكتبوا قال كلمة لما قاديروف استضاف و اتصور مع عشرات الشخصيات العامة سواء الرسمية او غير الرسمية …. منهم شيخ الازهر بذات نفسه …. و دايما بيصيبهم الخرس مع اي زياره لرياضي للكيان الصهيوني … فمثلا “هيومن رايتس ووتش” مطلعتش بيان خاص بميسي او رونالدوا لما بيروحوا و يتصوروا مع رئيس وزراء اسرائيل في القدس المحتلة … و لا بتلاقي حد من دلاديل القطيع بيفتح بقه … و لا حتي عماد بيتكلم.
• حملة أدعم صلاح … الهدف منها تصوير الصوره التاليه و التأكيد عليها …. (سلطة مصر اللى بيديرهاغ ديكتاتور اسمه السيسي … استخدم صلاح عشان يبيض وش ديكتاتور تاني اسمه قاديروف … و ياحرام صلاح مغلوب على امره … انقذوه و ادعموه) …. فبلاش عيل صغير يلعب بيك و يستخدمك …. متبيعش نفسك لشوية قطيع …. صلاح عنصر في مجموعة … مش شخص لوحده … يعني المنتخب لو استضافه حد … بيروح مع المنتخب … زي كده لما سافر اسرائيل و لعب فريق اسرائيلي لان فريقه كان عنده ماتش رسمي هناك …. اعقلوا كده و بلاش ضغط عليه اكتر من كده.
• الخبر بتاع اعتزال صلاح اللعب دوليا …. مصدره وكيل اللاعب اللى بيتعامل بحرفيه و بسياسه و بيحاول يمتص الهجمه الشرسه على اللاعب بتاعه … فبلاش بغباء نكون عنصر مضاد ليه و نساعدهم.
• أياً كانت نتيجة ماتش النهاردة … احنا روحنا كاس العالم بعد 28 سنة غياب و مفيش في رصيدنا قبل البطوله غير نقتطين فقط و ثلاثة اهداف … يعني مش رايح تجيب الديب من ديله …. بلاش نخش في مهاترات بين شعبين و حد يستدرجك زي ما سحبك يوم ماتش الجزائر.
• انتقد المنتخب فنياً براحتك …. خطة اللعب … اختيار اللاعبين … الطريقة الدفاعية العقيمة …. لكن ماتروّجش اشاعات او تبني كلامك على اشاعة ….
تحياتنا