06 Mar 2017
الرأى والرأى الأخر
مع فرض إنه ينفع يبقى إسمه رأى أخر 🙂
—————————————-
من ثلاثة أيام نشرنا مقال بعنوان “الخلاصة فى زيارة المستشارة” .. واللى حللنا فيها زيارة المستشارة الألمانية أنجيلا ميركل وشرحنا أسبابها والهدف منها .. وطبعا كالعادة كان فيه تعليقات كتير ، وإحنا بذلنا قصارى جهدنا علشان نتفاعل أو نرد على كل التعليقات … لكن فى وسط التعليقات دى ، فيه تعليق إستوقفنا جداً .. مش علشان هو تعليق معارض .. أو لأنه تجاوز أداب الحوار .. بل بالعكس .. كان تعليق مهذب …. لكن التعليق إستوقفنا لأنه بــ يمثل شريحة من الناس موجودة فعلا ، وبنقابلها فى حياتنا كل يوم !!
الناس دى تمتلك كمّ من الطاقة السلبية والفكر المغلوط اللى خلت الصورة بالنسبة لهم أصبحت مشوهة تماماً ، ودماغهم بقت متركبة بالشقلوب .. وبــ يشوفوا عكس الواقع تماماً .. لأنهم ببساطة خالص أصبحوا بيشوفوا بقناعاتهم الفكرية وتمنياتهم الدفينة ، بغض النظر عن أى إعتبارات واقعية .. حتى لو العالم كله بيقول عكس اللى هم مؤمنين به 🙂 .. ده غير إن فيه ناس منهم بيتحركوا على الصفحات والمواقع ويتكلموا مع الناس .. وبيكون هدفهم خلق حالة من التشكيك طول الوقت .. و ده أخطر ما فى الموضوع
إحنا هــ نعرض لحضراتكم التعليق اللى إتقال بدون ذكر إسم صاحبه .. وكمان هــ نعرض ردنا على التعليق ده .. لأن الهدف من كدة مش إننا نهاجم أصحاب الرأى الأخر .. لكن الهدف هو إننا نقدم ببساطة الرأى و ((الرأى الأخر)) اللى هو كلنا بنسمعه كل يوم من ناس نعرفهم ، سواء كانوا أصدقاء أو أقارب أو زملاء مهنة ، أو حتى وإحنا قاعدين على القهوة .. من ناس نعرفهم أو مانعرفهمش تم تشويه أفكارهم أو اللعب على عقولهم .. وللأسف بعضنا مش بيعرف يرد عليهم .. بالرغم إن الرد على ((الرأى الأخر)) ده بسيط وسهل .. مع فرض إنه ينفع نطلق عليه ((رأى أخر)) .. و ده لأنه رأى قائم على لا شئ ، غير شوية معلومات مستقاه من قناة الجزيرة القطرية على قناة مقملين التركية على أخبار شبكة رصد .. بالإضافة لمواقع وصفحات وأكونتات الإخوان وشمامين الكلة وأيقونات الخريف العربى ..
التعليق ..
معلش يعني حاول تسمع الطرف الاخر
اولا قوي بمعني ايه و انت عملتك بتنهار و اقتصادك في الحضيض
قوي ازاي و انت ديونك الداخليه و الخارجيه بتزداد يوم بعد يوم
قوي ازاي و انت بتطحن و بتزيل الطبقه المتوسطه في البلد
الكلمه الوحيده اللي قلتها صح ان السياسه مصالح و مفيهاش خواطر
و ان مصر سوق مهم بالنسبه سوق استهلاكي مش استثمار يعني هو بيستفيد منك كزبون مش كشريك يعني مسمعتش عن اقامه مصنع لمنتجات المانيه في مصر مثلا !!! وزياره السيسي لاوروبا وراللي اشتري فيها الاسلحه من فرنسا و مضي عقود مع شركه سيمنز بملايين الدولارات تحت ظل البحث عن شرعيه زائفه يعني الزياره في مصلحتهم هما طبعا
موضوع الهجره مصر عمرها ما كانت مركز انطلاق للهجره دا حتي المصريين اللي بيهاجرو في المراكب بيطلعو عن طريق ليبيا !!!
معلش فهمني بس و اقنعني كشخص واقف علي الحياد
—————————
رد الصفحة على التعليق
————————–
معلش استاذ (……….) واستسمحك …. إنت مش شخص واقف على الحياد ..
إنت شخص مبسوط جدا بالكلام اللى انت بتقوله لأنه جاى على هواك .. أو بالأصح بتتمنى إنه يبقى صحيح .. بس معلش إسمحلى اصدمك واقولك إن كلامك كله مبنى على شوية هرى وشوية مغالطات ، لأن الكلام ده مش بيلاقى صدى غير عند البسطاء اللى مش فاهمين فى الإقتصاد .. برغم غن الكلام ده ممكن تفنيده ببساطة من اللى عندهم مجرد فكرة مبدئية عن الإقتصاد
أولا .. موضوع إن العملة بــ تنهار .. فــ ده كلام فارغ مبنى على المقارنة الرقمية فقط ، ومش بــ يتقال غير فى منتدى فتكات الإقتصادى .. لأن عملتك مش بتنهار .. إنت حررت سعر الصرف وخليتها فى قيمتها الحقيقية بدل ما الناس كانت عايشة فى كذبة ، وفرحانين بيها علشان بس كل واحد يجيب الموبايل واللابتوب وال LDC رخيصة وفارق العملة يبقى على حساب صاحب المحل .. يعنى تتحمله الدولة !
ثانيا .. مافيش ربط خالص بين سعر تحويل العملة ، وقوة الإقتصاد .. وإلا ده كان معناه إن إقتصاد مصر أقوى من إقتصاد اليابان وروسيا لأن الدولار يساوى 114 ين يابانى و 58 روبل روسى … واليابان نفسها كان الدولار فى سنة 2011 بــ يساوى 75 ين ، والنهاردة يساوى 114 ين ، فهل ده معناه إن اليابان إقتصادها بينهار !!؟؟ .. طبعا لأ … ولو بتتحسب كدة ، كان ده معناه إن إقتصاد دولة الكويت مثلا اقوى من إقتصاد أميريكا لأن الدينار الكويتى يساوى 3 دولار وربع 🙂
ثالثا .. بالنسبة لموضوع الديون فــ القصة مش بتتقاس كدة زى ما حضرتك بتقول .. إلّا فى منتدى فتكات الإقتصادى برضوا .. لأن الحسبة بتتحسب دايما على حجم الديون مقارنة بالناتج المحلى للدولة .. وإحنا الديون الخارجية لا تتعدى الــ 20% من حجم الناتج المحلى حتى بعد دفعة القرض الأخير و دى نسبة ممتازة جداً … طب عارف تركيا حبيبة قلبك بتاعة أردوغان صاحبك ديونها كام ؟؟ .. أكثر من 400 مليار دولار متخطية حاجز الـ 56% من الناتج المحلى بتاعها .. يعنى داخل مرحلة الخطر …. طب عارف أميريكا ديونها كام ؟؟ 19 تريليون دولار 🙂 .. مش باقول لحضرتك منتدى فتكات 🙂
رابعا .. موضوع إن مصر سوق إستهلاكى .. فأنا متفق معاك .. و ده راجع للنمط الإستهلاكى للشعب المصرى اللى تم زرع أبجدياته في نفوسنا ونفوس الأجيال الجديدة على مدى عقود طويلة …. لكن خلّينى أقولك إن الإستثمار فى السوق الإستهلاكى بيحرك الإنتاج .. عارف إزاى ؟ .. اقولك .. يعنى مثلا مول زى مول مصر ده اللى مش عاجب الناس ، وفر 42 الف فرصة عمل مباشرة وغير مباشرة .. وكل المحلات والمطاعم اللى فى المول دى مش هتستهلك ولا هتتعاقد مع موردين من برة مصر علشان توفر الإحتياجات الناتجة عن الإستهلاك .. يعنى بنسبة 75% من احتياجاتها هــ يتم تلبيتها من السوق المحلي وبالتالي بترفع حركة الانتاج والتصنيع بشكل غير مباشر ….. وطبعا ماينفعش نقول إن المستثمر كان من باب أولى يعمل مصنع بدل ما يعمل مول لسببين … الأول لأننا مش هــ نجبر المستثمر على شئ وخصوصا لو كان ده مش أول مشروع له فى مصر .. والثانى لان المول دة ماهو الا مكان بيجمع محلات جواه وكافيهات ومطاعم وخدمات ترفيهية .. والمحلات دى بتجيب انتاجها من مصانعها ومورديها المحليين .. وبما ان فيه مول جديد اتفتح يعني طلب اكبر واستهلاك اكبر وتوسعات اكبر للمحلات بفتح فروع جديدة فى المول .. والكلام ده هــ يعمل زيادة فى خطوط الانتاج وبالتالي افتتاح المول بييأثر بالايجاب علي المُصنع والمُنتج (ده مجرد مثال) .. وأحب أفكرك إن السياحة لما كانت شغالة ، كانت مصانع المياه المعدنية بتنتج 2 مليون زجاجة مياه فى الشهر .. يعنى مصانع شغالة مش بتقف علشان تغطى الإستهلاك (و ده كمان مثال)
خامساً … إقتصادك مش بينهار يا أستاذ .. إقتصادك بيكبر ..و مصر بتعمل مصانع .. مش مجرد مصانع .. دى بتنشئ مناطق صناعية متاكملة .. لأنها بتقلب منظومة الإقتصاد بتاعها من إقتصاد ريعى لإقتصاد إنتاجى .. ده إذا كنت عارف إييه الفرق بين الإقتصاد الريعى والإنتاجى … وكل مؤسسات العالم الإقتصادية بتتكلم عن الإقتصاد المصرى بصورة إيجابية ، وماحدش بيقول إن مصر هــ تفلس غير قناة الجزيرة وشبكة رصد ,, وشمامين الكلة اللى بيسمعوا لهم .. و هــ أجيبلك لينكات لحاجات تبقى تقراها وتتسلى عليها .. ده لو كنت عايز فعلا تعرف
سادساً … كلامك إن مصر عمرها ما كانت مركز انطلاق للهجره دا حتي المصريين اللي بيهاجرو في المراكب بيطلعو عن طريق ليبيا …. يا سلام .. ده بأمارة إييه !!؟؟ .. أومّال اللى ماتو فى مراكب الهجرة من كام شهر ، واللى الإعلام إتحزم ورقص على جثثهم دوول كانو طالعين منين !!؟؟ 😉 😉
سابعاً .. عجبتنى أوى كلمة إن السيسى بيشترى سلاح علشان يعمل شرعية زائفة =D =D .. لأ بجد حلوة 🙂
ده تقرير من برايس ووتر هاوس كوبرز واحدة من أكبر 3 مؤسسات إقتصادية فى العالم عن توقعاتها لأكبر 32 اقتصاد في العالم بحلول عام 2030، وتحتل مصر فيه المركز ال 19 بدخل قومي متوقع أن يناهز 2 تريليون دولار، وحتبقى أكبر اقتصاد في أفريقيا
ده تقرير رسمى مش أحد تقارير الجزيرة او منتدى فتكات الإقتصادى 🙂
و ده مقال نشرناه فى شهر يونيو الماضى .. وقلنا فيه إنه لازم يحصل تعويم
و ده مقال عن الديون نشرناه فى شهر يوليو الماضى
و ده لينك لخبر يوضح إن مصر يوم بعد يوم بتتحول لمصنع كبير ..
إحنا فعلا بنقلب منظومة الإقتصاد المصرى .. مش بمزاجنا لكن غصب عننا .. علشان مافيش قدّامنا حل تانى .. وعلشان مافيش شعب يقدر يعيش ويكمّل من غير ماينتج
————————————————————–
وإلى هنا ينتهى الرد المطول .. والكلام ده بنقوله لأن فى الإعادة إفادة .. وعلشان نفكر أصدقائنا بكلامنا القديم .. و بإن بلدنا بتتحرك وبتخطى بجد للأمام 🙂
وربنا يصبرنا ويحفظنا من أمراض ضغط الدم والسكر علشان خلاص بجد …
ده كتير يا ربى .. ده كتشيييرررر =D =D =D