06 Aug 2016
قناة السويس الجديدة بين الحقيقة والأكذوبة .. !!
———————————————
قناة السويس طلعت كذبة … فين الــ 100 مليار دولار اللى هــ تجيبهم قناة السويس !!؟؟ .. هأاااووو .. مش قولنالكم مشروع فنكوش والعسكر ضحكوا عليكم … ياحسرة على فلوس المصريين اللى ضاعت على الفاضى .. قولنالكم المشروع مالوش أى جدوى إقتصادية ماحدش صدّق .. ألخ ألخ ألخ … ده مجرد غيضٌ من فيض من التعليقات اللى مالية صفحات الكلة المصرى من الصبح ، وكل الكولجية بيجزّوا على سنانهم وبــ يعضوا فى صوابعهم من الغيظ ، وهم شايفين مشروع قناة السويس الجديدة مكمّل والمشروعات القائمة عليه بـ تظهر للنور 🙂
إحنا النهاردة مش عايزين نحلل ولا نغوص فى اعماق رؤية الدولة لمشروعاتها الإقتصادية ، لإننا إتكلمنا كتير عن الموضوعات دى فى مقالات سابقة كتيرة … وصدقت رؤيتنا وصدق حدسنا فى تاييدينا ودعمنا للدولة المصرية فى كل الإجراءات اللى كانت بتاخدها .. واللى كانت فى بعض الأحيان بتثير الجدل على الصفحة ، أحيانا بسبب عدم الفهم أو وضوح الرؤية .. أو بسبب الدوشة اللى كانت بتحصل وحملات التشكيك الواسعة .. والحرب النفسية الممنهجة اللى كان بــ يتم شنها على الوعى الجمعى للمصريين .. واللى كان فى مننا كتير بــ يصدقه بكل اسف …. ولنا كل العذر …. لكن الحمد لله إننا بنتعلم .. وشخصيات كتيرة بتتكشف قدامنا مع الوقت لحد ما اصبحت من غير قيمة ، وبدأت النهاردة محاولة إستبدالها بشخصيات أخرى .. وبرضوا الشعب المصرى كاشفها 😉
إفتكروا كدة معانا حملات التشكيك اللى بدأت بإن المشروع اصلا فنكوش فــ ماطلعش فنكوش .. وبعدين مصر مش هــ تعرف تموّل المشروع .. فالمصريين دفعوه من قوتهم وقوت عيالهم وجمعوا 64 مليار جنيه فى خلال 8 ايام فقط … وبعدين المشروع مش هــ يكمل وجدران القناة هــ تنهار ، والقناة الجديدة هــ تاثر على القناة القديمة وهــ ينهاروا الإثنين وهــ تبقى كارثة حسب أراء خبراء السباكة العالميين .. فــ محصلش .. وبعدين المشروع ضخم و مش ممكن المشروع يخلص فى خلال سنة فقط طبقاً لأراء الخبراء الدوليين “زيزو نتانة” و”عبدو جمبرى” .. فخلصت القناة فى اقل من سنة وتم إفتتاحها فى حفل عالمى مهيب … وبعدين يطلع الخبير الإستراتيجى “مدحت أربى جى” يقول إن دى قناة موازية ، وهــ تبقى عائق أمام الجيش المصرى لو تم إحتلال سيناء .. فالجيش المصرى أصبح موجود فى سيناء بشكل واضح وصريح وفج ، واصبح هو اللى متواجد على مشارف حدود إسرائيل .. وفيه النهاردة 6 انفاق ضخمة بيتم حفرها لتوصيل شرق القناة بغربها منهم نفقين على وشك الإنتهاء .. ولسة كمان خط السكة الحديد …. وبعدين يطلع الخبير المالى الدولى “حمادة فكة” ، يقول إن الدولة مش هــ تقدر تدفع فوائد شهادات القناة .. فــ الناس تصرف الفوائد ويطلع الفريق مميش يقول إن اللى تم صرفه على حفر القناة حوالى 30 مليار جنيه فقط من إجمالى الــ 64 مليار .. وإن الباقى بيتم إستخدامه لإستكمال بقية المشروعات المكملة .. ألخ ألخ ألخ …
شوفتوا اللعبة حلوة ومسلية إزاى !!؟؟
شوفتوا المصريين كان بــ يتلعب بيهم حلو أوى إزاى !؟؟
والنهاردة وبعد سنة كاملة إستغرقتها عملية حفر القناة .. وكمان سنة عدت على إفتتاحها ، كلنا بــ نبص للصورة ونقول .. إحنا إزاى كنا بــ نصدق الكلام ده !؟ 🙂
بس برضوا هم ما سابوناش فى حالنا .. ومن يوم إفتتاح القناة وإحنا فى حرب شائعات اخرى مكملة معانا .. من أول موضوع قناة بنما اللى هــ تاثر على عائدات قناة السويس .. إلى تحريف كلام الرئيس السيسى إن المشروع مالوش لازمة غير رفع الروح المعنوية للمصريين … و مروراً بموضوع الجدوى الإقتصادية وإنخفاض عائدات قناة السويس واللى أشرنا له فى مقالنا عن الدولار .. ووصولا إلى موضوع إنخفاض عدد السفن المارة فى قناة السويس وإن التجارة العالمية بتحول مسارتها لطريق راس الرجاء الصالح … وأخيراً … هى فين الــ 100 مليار دولار اللى قلتوا عليها اللى هــ تيجى من قناة السويس !!!
– اللى يقولك قناة بنما وإلا قناة شارع جامعة الدول هــ تاثر على قناة السويس ، قول له مع فرض إنه فيه طريق أو قناة بتخدم نفس مسارات خطوط التجارة العالمية اللى بتمر من قناة السويس ، مافيش حاجة فيهم ممكن توفر من 20% إلى 88% من مسار الرحلة زى ممر قناة السويس .. وروح خابطه اللينك ده
مع العلم إن قناة بنما موجودة من سنة 1914 يعنى من 102 سنة .. مش لسة مكتشفينها إمبارح … ومع ذالك ما اثّرتش على قناة السويس … يعنى ياريت اللى بيحب يهرى كتير كفاية هري بقى .. يعنى بلا قناة بنما ، بلا نفق العباسية .. 🙂
– اللى يقولك هى فين الــ 100 مليار دولار اللى هــ تدخلها قناة السويس .. قول له هو مين اصلا اللى قال الكلام ده ، وجبته منين !؟؟ …
الكلام على إن عائدات قناة السويس هــ يوصل بحد اقصى لــ 13 مليار دولار كرسم مرور والكلام ده هــ يحصل على مدار كذا سنة كنتيجة مباشرة للخدمات اللوجيستية وبناء المنطقة الإقصادية … أما موضوع الــ 100 مليار دى .. فــ ده توقع الإدارة المصرية بعد بناء على دراسات الجدوى كحد اقصى لإيرادات محور التنمية كمشروع متكامل بكل إمكانياته ومشروعاته الخدمية واللىوجيستية !
– اللى يقولك وهو فين محور التنمية … قول له أومال مشروعات شرق التفريعة دى إييه .. والمزارع السمكية دى إييه .. والمنطقة الإقتصادية دى إييه .. وورش الصيانة دى إييه .. والمنطقة الصناعية الروسية دى إييه .. والتمويل الصينى للمشروعات فى المنطقة الصينية كشريك إقتصادى ده إييه … والــ 6 أنفاق اللى بتوصل الشرق بالغرب دوول إييه .. وخط السكة الحديد الجديد ده إييه … والرصيف البحرى اللى طول 14 كيلومتر ده إييه .. ومدينة الإسماعيلية الجديدة دى إييه .. ومشروعات شرق بورسعيد دى إييه .. وشبكة الطرق الداخلية وربطها بالطريق الدولى البرى اللى هــ يربط القناة بخطوط التجارة البرية مع أفريقيا ده إييه .. وسحارة سيرابيوم دى إييه … وخطة تعمير سيناء وتحويلها لمنطقة لوجيستية بمجتمعات عمرانية متكاملة .. ده كله إييه … واللى مايشوفش من الغربال ….. يبقى إييييييه !!!!؟؟
– اللى يقولك عائدات قناة السويس إنخفضت .. قول له كلامك صحيح .. لكن ده كان فى الربع الأخير من سنة 2015 يعنى 3 شهور فقط .. ونتيجة اسباب معينة لها علاقة بتباطئ حركة التجارة العالمية .. لكن عائدات القناة فى إجمالى سنة 2015 كانت أعلى من سنة 2014 … والقناة حققت أعلى عائدات فى تاريخها فى الربع الأول من سنة 2016 .. يعنى (يناير-مارس) .. وأعلى كمان من عائدات نفس الفترة فى سنة 2015
– اللى يقولك إنتوا بتطبلوا لإييه .. ومشاريع تنمية إييه .. ده إحنا متأخرين أوى .. وشوف نماذج كتيرة من البلاد التانية وصلت لإييه .. قول له معاك حق .. لكن أدينا إبتدينا أهو .. بس لما جينا نبتدى سيادتك ماعملتش حاجة غير النواح والولولة والقعدة على القهوة والنقد على الفيسبوك فى الفاضية والمليانة من غير ما يكون لك أى دور إيجابى .. يبقى ياترى مين كان السبب الحقيقى فى تأخر البلد دى !؟؟ .. إنت واللى زيك وإلاّ حد تانى !؟
– اللى يقولك حفر قناة السويس ده مشروع فنكوش وماعملش أى حاجة لمصر .. قول له
إن مؤشر اَداء اللوجستيات الصادر عن مجموعة البنك الدولي بيقول إن تصنيف مصر قفز من المركز الــ 62 للمركز الــ 49 فى خلال اخر سنتين بمجرد الإنتهاء من حفر القناة وبمجرد ما ابتدت المشاريع تشتغل .. و ده أفضل ترتيب وصلت له مصر فى تاريخها بدخولنا فى قائمة أفضل 50 دولة .. زى ما قال الباحث الإقتصادى الأستاذ محمد نجم
– اللى يقولك فيه 100 سفينة فى سنة 2015 غيرت مساراتها التجارية إلى رأس الرجاء الصالح .. قول له ده صحيح .. بس الــ 100 سفينة دوول بيمروا فى قناة السويس فى اليوم الواحد يا أووووستاااااااااذ … وروح خابطه اللينك ده لمقال صفحتنا من 5 شهور عن موضوع القناة و راس الرجاء الصالح
والكلام فى الموضوع ده كان مالوش هدف غير إحداث عملية بلبلة للرأى العام المصرى كجزء من الحرب النفسية اللى بــ يتم ممارستها على المصريين
المشكلة إن النماذج الكرتونية من شباب الكلة والنووشاتاااء اللى صدعوا دماغنا من أيام مبارك .. وكلامهم إن اللى مضيّع الشباب و مبوّظ انتماؤهم للبلد إن مافيش مشروع قومي يتلموا حواليه .. و إن نفسهم ان المشروع ده يكون هو محور قناه السويس و كانوا بيروجوا أساطير ان ازاي الحكومات الفاسدة أجهضت مشروع الوزير حسب الله الكفراوى لمحور قناه السويس و ازاي طفشوا اليابانيين اللى عرضوا تنفيذ و تمويل المشروع من اكتر من ٤٠ سنة … و إنهم ممكن ينفذوه في اقل من عشر سنين و حيشتغلوا في بناؤه لانه ده مستقبل مصر …. و قد إييه حسرتهم ان الامارات و “جبل على” تفوقوا على مصر ….. و ان دولة زي سنغافورة اعتمدت على نهضتها الاقتصادية على الخدمات اللوجيستية ….. و إن قد ايه مصر بــ تتعمد اهدار فرص تقدمها لما بــ تركز على قناه السويس على انها ممر ملاحي و ليس محور لوجيستي …. و انه ممكن يضاعف مدخلات قناه السويس من مجرد كام مليار دولار الى اكتر من 100 مليار دولار ….. يعني رقم الــ 100 مليار دولار ده رقم قديم و كان بيتقال من نفس الناس اللى بيشكك فيه دلوقتي =D =D =D … وبعد ما كانوا بيحلفوا انهم مش حياكلوا و لا يشربوا و لا يناموا لو الحكومة و النظام الفاسد عطاهم الفرصة لانقاذ مصر و سابهم يشتغلوا و يبنوا المشروع ده ….. النهاردة مش قادرين يصبروا و لا عايزين المشروع يكمل و بــ يحاولوا بكل الطرق التشكيك فيه !!!! 🙂
أصدقائنا ..
إفرحوا ببلدكم .. وسيبكم من كلام الناس اللى ماوراهمش حاجة غير بث الروح السلبية ، والولولة واللطم والنواح على اللبن المسكوب .. وسيبكم من الزياطين وكل بتوع الحرب النفسية اللى مش فالحين بس غيريقولك بص البرازيل .. بص سنغافورة .. بص تايلاند .. بص اليابان … بص مشاريع النهضة فى الدول دى .. لكن عمرهم ما بيقولوا هى الدول دى قعدت كام سنة شعوبها تتعب و تشتغل لغاية لما وصلت للى هى فيه … زى ما بالضبط كانوا بيزيّطوا ويعيدوا ويزيدوا فى التجربة التركية والنمو الإقتصادى والديموقراطية .. ولما إنكشف النظام الأردوغانى على حقيقته وظهرت ديكتاتوريته ، وبدأ إقتصاده ينهار .. بدأ نفس الزياطين دول يقولوا “مالناش دعوة بحد .. خلينا نركز فى بلدنا” =D =D
مصر بدأت مسارها الجديد ونهضتها الإقتصادية من سنتين فقط .. وده كان بعد 4 سنوات من اسوأ السنوات اللى مرت على مصر فى تاريخها .. ولسة مكملين …
ونغنى ونقول من تانى:
بسم الله .. دى قناة السويس أوّلنا
أحلامنا .. دلوقتى بقت قدامنا ..