27 Aug 2018
من أقدم الشائعات … منجم السكرى – الجزء الثاني
————————————————–
بالامس اتكلمنا في الجزء الاول عن شائعات و اوهام استخراج الذهب من منجم السكرى …. و اتفقنا اننا نجاوب على بعض الاسئلة اللى كان بيستخدمها الناس إياهم في نشر الاكاذيب و اللعب على عقول الناس …. اللى هــ نبدأ فيها بدون اي مقدمات.
س / طب مين اللى بيحدد عدد الجرامات المستخرجه من الطن ؟ …. و مش ممكن يضحكوا علينا و يقولولنا ان الطن بيستخرج منه 1 جرام و هما بيطلعوا منه 2 جرام ؟
جـ / قبل ما نجاوب … لازم نتكلم بشىء من العلم عن التعدين …. اي دولة سواء في المناجم او حقول البترول او الغاز … بتقوم بعمل مسح جيولوجي و سيزمي و غيرها من الابحاث الاستكشافية الاولية في المكان المستهدف .. باستخدام شركات عالمية معتمدة ، وبالاشتراك مع كوادر شركات وطنية … و تقوم باستخلاص النتائج اللى بتحدد وجود المعادن في المكان ده و لا لأ … و إييه هي الكمية المبدئية المتوقع وجودها … و هل هي واعدة و مبشرة للاستخراج التجاري من عدمه.
و عن طريق النتائج دي بتقوم بعرضها على المستثمرين اللى لو لقوا النتايج دي جيدة و واعده حسب خبراتهم … بيجوا و ممكن يغامروا و يشتغلوا …. لان الابحاث دي مش بتقولك كل حاجه و مش بتعرف فيه قد إييه بالظبط في باطن الارض غير لما تفتح بنفسك و تجرب و تشوف … فهي فعلا مغامرة و مخاطرة لانك بــ تضخ استثمارات بالمليارات لاستخراج المعادن دي بناء على مؤشرات اولية و تكهنات ممكن تصيب او تخيب و ليس على حسابات دقيقة مؤكدة …..
و لما يبدأوا التنقيب في منجم الذهب …… بيكون في معامل متخصصة و كيميائيين و جيولوجيين مقيمين في المنجم و مهندسين مساحين …. بيقوموا بتقسيم مساحة المنجم المقدرة بالكيلومترات المربعة الى اقسام … و بيقوموا بعمل تحاليل يومية لكل قسم على حدة و ايضا عمل ما يسمي جسات استكشافية لكل طبقات الارض بأعماقها داخل كل قسم …. و من خلال التحاليل دي بيتعرف كويس جدا كل جزء من ارض المنجم بكل متر داخل عمق هذا القسم … بيحتوى كل طن صخور منه على ذهب قد إييه … و مدي نقاؤه … و إييه نوعيات المعادن و الشوائب المصاحبة ليه … و على أنهي عمق … و بيتم تسجيل البيانات دي و اعتمادها و تدقيقها باستمرار يوميا تحت اشراف جهات الدولة المعنية.
و بعدها بــ يتم ترتيب المناطق اللى هــ يبدأ بيها المنجم في الاستخراج سواء أفقيا … او راسيا داخل اعماق الجبل و الصخور …. عن طريق انفاق بــ يتم حفرها في عمق الجبل للوصول الى اعماق قد تصل الى 300 او 400 متر تحت سطح الارض …. و هنا بيتم حساب تكلفة استخراج الذهب من كل طبقة من كل مربع … و حساب هل التكنولوجيا المتوفرة الان باستخراج الذهب من المكان ده و على العمق ده هــ تخلينا نكسب و لا نخسر …. فــ ممكن جداً انه يوجد طبقات داخل الجبل على اعماق معينة و غنية جداً بالدهب … لكن بيتم تركها تماما لحين اكتشاف طرق اخرى اقل تكلفه لاستخراجها … يعني مثلا …. تركيز الذهب في الصخور بيزيد كل ما بتنزل تحفر تحت الارض … لكن برضوا تكلفة استخراجه بــ تبقي اكبر … فمثلا اذا كان تركيز الدهب اللى على عمق 250 متر اقل 3 جرام … بيتم اهماله و البحث في طبقات اخرى او اعمق للوصول الى صخور بها تركيز ذهب صالح للاستخراج تجارياً … يغطي تكلفة استخراجه بــ هامش مكسب معقول. .
فـ كل مكان في المنجم و كل مربع و كل طبقه من الجبل … و من قبل ما حد يضرب فيه ضربة شاكوش واحد … معروف كويس جدا كل طن صخور فيه دهب قد ايه و نوع المعادن و الشوائب الموجوده فيه … يعني كل حاجة محسوبة.
س / مين الرقيب على المنجم و على عمليات انتاجه ؟؟؟ … و هل فعلا فيه دهب بيستخرج و لا يتم تسجيله لتهريبه؟
جـ / كل منجم في الدنيا ليه طاقة استعيابية محددة و معروفة … فمثلا في منجم ما …. في مكان ما …. كسارة الصخور اللى فيه سعتها اليوميه 60 الف طن … و بــ يبقي معروف عدد الحفارات و طاقتها الانتاجية … و بيتم حساب كمية الديناميت و النترات المستخدمة يوميا و اللى بيتم توريدها من الدوله بحساب ….. و لها حسبة قياسية تقدر تعرف منها انت فجرت صخور قد إييه كل يوم …. و مهندسين المساحة بيعملوا مسح دورى لمناطق المنجم و بيقدروا يطلعوا المناطق اللى تم حفرها و تكسيرها بالمتر المكعب ….. و كذلك معروف عدد الدامبرز اللى بتنقل الصخور و اوزانها و سعتها و عدد الرحلات من اماكن التفجير الى مكان الكساره … كل ده له حسابات قياسية … و دفاتر تسجيل و كاميرات مراقبه و دنيا كبيرة جدا …. و كذلك سعة تانكات السيانيد و كمية السيانيد الموردة و فروقات الاستهلاك …. و تفاصيل كتييييييير سهل جدا تقدر تعرف منها بالظبط كمية الصخور اللى تم استخراجها في يوم محدد من مكان او قطاع محدد و بالتالي تقدر تحسب هو طلع منها دهب قد إييه…. ده مع وجود مندوبين من الوزارات و الجهات المعنية بشكل دائم و تفتيش دورى مستمر… بخلاف ان الشركات دي بتبقي مسجلة نفسها في البورصات العالمية او البورصه المحلية في دولتها الام بالخارج … و في الشركات الكبيرة اعمل أي حاجة الا انك تتلاعب بميزانية شركة مسجلة في البورصة او في رأس مالها او تتلاعب باموال المساهمين .
س/ طب مش ممكن كل يوم كام واحد يضربله سبيكة دهب في جيبه و يخرج بيها ؟
جـ / الكلام ده غير قابل للحدوث اطلاقاً … لان المنجم … او خلينا نوصفه بالتوصيف الادق … ان القرية دي متقسمة جغرافياً مناطق “Zones” في صورة دواير …. الدايرة الاكبر و الاعم و الاشمل اللى بيوجد فيها العمال … بعدها دايرة أصغر داخلها اللى فيها معامل تحاليل التربة … ثم دايرة اصغر داخلها للكسارة … ثم اصغر داخلها لمعامل السيانيد … و هكذا لغاية اصغر و اهم دايرة و هو المعمل النهائي اللى بيتم فيه استخلاص و صهر الذهب في سبايك اولية ….. كل “Zone” من دي ليها بوابات محكمة و عليها كاميرات و كروت ممغنطة لكل عامل … بــ يتبرمج على كل كارت منهم المناطق المسموح لهذا الشخص التواجد داخلها …. و لا تفتح البوابة لشخص غير مصرح ليه بالتواجد داخل اي منطقة اخرى … اما منطقة او معمل صهر الذهب …….. و كما هو متبع في كل مناجم العالم … ماحدش بيقدر يحط رجله فيها مهما كان غير للاشخاص المخول لهم دخول هذه المناطق … و دخول هذه المناطق و الخروج منها بــ يكون فيه تفتيش اصعب بكتيييير من التفتيش اللى بحصل ليك و انت داخل المطار … بيقلعوهم هدومهم بالمعني الحرفي للكلمة و بيتم فحصهم على اجهزة كشف المعادن سواء في كل مرة دخول او خروج او مع تغير اي وردية …. و الكلام ده بــ يتم تطبيقه على الجميع من أول مدير المنجم الى اقل عامل بدون هزار ….. ( و حصل معايا انا شخصيا اكتر من مرة اثناء تواجدي في احد مناجم دولة ما في افريقيا كنت عايش داخل احد مناجم الدهب هناك 😊 و هو نفس اللى بيحصل في منجم السكرى بالمللى) و فيه كاميرات مراقبه بتسجل الحركه دي … و في كل المناجم اللى في الدنيا بــ يجي تفتيش بيراقب الفيديوهات المسجلة من الجهات الحكومية المصرية المختصة للتأكد ان الاجراءات المتبعة مافيهاش اي تساهل …. و بشكل عام … شركات الامن اللى بتأمن المنجم من جوه على البوابات بتكون شركات خاصه مستقله و غالبا تابعه للدوله بشكل ما … يعني حتي شركات الامن بتكون متأمنه ….. يعني محدش يقدر يطلع بجرام واحد دهب … او حتي صخرة صغيرة ياخدها للذكرى مثلا 😊 … … و لو زودنا على ده التفاصيل الموجودة في اجابة السؤالين السابقين …. هــ تتأكد ان حتي لو فيه تواطؤ من اشخاص … هــ تتعرف على طول لان كل حاجة محسوبة بالجرام. و بيتم مراقبة العملية دي مراقبة دقيقة من اكتر من مستوى.
س / طب ليه الدهب بيسافر كندا ؟ و هو الدهب اللى بيسافر ده … بيرجع تاني و لا بيروح فين ؟
تداول الدهب في العالم بيكون داخل منظومة دقيقة جدا لها قوانينها المعترف بيها دوليا … و محدش يقدر يغرد خارج السرب لوحده …. و لا يعمل شركة كده مع نفسه و يقول انا هــ أعمل مصنع و أجيب اجهزة و أنقي الدهب بنفسي و أدمغه بنفسي ….. لان أماكن تنقية الدهب و عمل سبائك درجة نقاؤها 99.99% و كذلك دمغها … لازم تتعمل في اماكن معتمدة عالمياً … و من ضمن الاماكن دي شركه عالميه دولية في كندا …. و يجب بعدها ان يتم تسجيل السبائك دي في بورصة لندن للذهب اللى مش بــ تعترف بأي ذهب غير المدموغ في الشركات دي …. يعني ماينفعش دولة تطلع دهب من منجم عندها و تروح تحطة في خزنة البنك المركزي بتاعها منها لنفسها … لازم تسجله في بورصة لندن عشان يضاف للرصيد الدولي من الدهب و يتم الاعتراف بيه … ساعتها قدامك اختيارين … يا اما تبعت تاخده و تحطة في خزينة البنك المركزى …. او انك تبيعه في بورصة الدهب و تاخد حقك دولارات.
س / طب ليه مصر بتستني الشركات الاجنبيه تيجي تنقب عندنا ؟ و ليه مانجيبش احنا التكنولوجي دي و نطلع الدهب بنفسنا و عندنا الكوادر اللى بقي عندها خبرة او نفتح التراخيص لشركات مصرية خاصة للتنقيب ؟؟؟
ج/ الاجابه ممكن تتقال في كلمه واحده ” إيدي على كتفك 😊 ” … و الا كنا دخلنا كمان في مجال استكشاف الغاز و البترول بدل شركة ايني الايطاليه مثلا 😊 …. فـ الكلام و التنظير مفيش اسهل منه …. لكن على مستوى آخر …. الطموح شىء جميل و مطلوب ….. لكن الوصول الى المستوى ده ليه محددات كتيره …. اهمها 3 محددات ( سياسية – إقتصادية – تقنية ) …. و هــ نحاول نشرح كل محدد منهم … بس واحدة واحدة كده ، و ركزوا معانا الله يرضى عليكم 😊 .
اولا:- المحدد السياسي …. بإختصار شديد و بعيداً عن العنتريات و الكلام الحنجورى بتاع احنا جامدين قوى و الدهب بتاعنا و احنا نعمل اللى احنا عيزينه …. لازم نعرف كويس ان منظومة استخراج و تداول الذهب عالميا محكوم بشده و ليه قوانينها الضمنية … و تقدر تقول ان فيه مجموعه من الافراد او المؤسسات العالمية هي اللى بتدير هذه المنظومة و بتحدد قوانين العملية كلها و بــ يتبعها كل دول العالم … و اللى بــ يتشاف انه هــ يشّم نفسه و يطلع بره المنظومة دي بــ يتفرم بالمعني الحرفي للكلمة …. و فيه دول شفناها خلال الكام سنة اللى فاتت كان من اهم اسباب تدميرها انها اعلنت انها هــ تفك ارتباطها بمنظومة الدولار العالمية و هــ تربط عملتها بالذهب منها لنفسها و و تخزنه و تتاجر فيه لوحدها خارج إطار هذه المنظومه .
فكل ما حضرتك تكبر و ترسخ رجلك في الارض اقتصادياً و سياسياً و عسكرياً … بــ تقدر تخش تزاحم مع الكبار في هذه المنظومة و تاخد منها شير اكبر و تفرض نفسك عليهم و يقبلوك عضو فاعل في المنظومه دي …. زي بالظبط ما حصل معانا في موضوع الغاز …. بعد ما كانت مصر هــ تتدمر و تتفتت عشان يتاخد الغاز بتاعها …. فرضنا على الجميع ان محدش هــ يحط إيده على آبار الغاز بتاعتنا … ثم اجبرنا و فرضنا نفسنا على الجميع انه يقبل بوجود مصر كـ “HUB” لنقل الطاقة لاوروبا و افريقيا … سواء كانت طاقة غاز او كهرباء …. و بالتالي انت شوية شوية بتجبرهم انهم يحموك و يحموا استقرارك لما تبدأ عملياً تضخ ليهم غاز و كهرباء.
ثانيا :- المحدد الاقتصادي …. هنا لازم نعيد جزء مهم قلناه في المقال …. ان عملية التنقيب بتكون مخاطرها الاستثمارية عالية جداً … و بالذات انك بتشتغل بمليارات الدولات بتدفعهم فى البداية و مش بتاخد حاجة منهم لسنين طويلة ممكن توصل لعشرة او عشرين سنه لغاية ما يبدأ الانتاج التجاري و تبدأ تلم فلوسك بارباحها …. و ممكن جداً بعد ما تدفع الفلوس دي من دمك الحي …. ماتلاقيش الكميات اللى كنت متأمل تلاقيها في باطن الارض فتخسر الجلد و السقط زي ما بيقولوا …..
فشركة مثلا زي شركة إيني الايطاليه او روس نفط الروسية عندهم سيولة ماليه تقدر ب 30 او 40 مليار دولار يقدروا يضخوهم في اكتر من عقد استكشافات في اكتر من مكان او اكتر من دوله ….. عشان لما واحد او اتنين فيهم يضرب معاهم و يكسب … يقدر يغطي خساير و مصاريف مليارات الدولارات في عمليات استكشافية اخرى ماطلعش فيها كميات الغاز المأمولة و خسرت معاهم ….
و مثال تاني و على شركة سينتامين نفسها … فمن اكتر من 25 سنة كان فيه دراسات و ابحاث بتقول ان منطقة السكرى منطقه غنية جدا بالذهب … و ابحاث اخرى و آراء علمية مضادة بتقول ان فعلا كان فيها ذهب لكن نضب للاستخراج المتكرر طوال آلاف السنين و ان كميات الذهب اللى فيه قليلة و لا تصلح للاستخراج التجارى … يعني اللى هــ يجي يحط فلوسه هــ يخسر …. لكن جت شركة سينتامين و عملت دراساتها و غامرت و ضخت اكتر من 1.1 مليار دولار و طلعوا الذهب و كسبوا.
من الاخر … لما يجي اليوم و يكون عندنا شركة وطنية عندها راس مال و سيولة 10 او 15 مليار دولار و تقدر تستحمل خسارة نصهم او تلتينهم في استكشاف فاشل و تعوضهم في استكشاف اخر ناجح على مدار عشرة او 15 سنة عمل … يبقي كده احنا دخلنا المجال ده بقوة و عندنا الكوادر الفنية اللى تقدر تقوم بــ ده.
ثالثا :- المحدد التقني …. و ده كان عندنا فيه مشاكل … لكن النهاردة اصبح بالفعل عندنا كوادر محترمة جدا و بعدد وافر في هذا المجال اللى تقدر تستوعب التكنولوجيا المتقدمة الخاصة باستخراج الذهب …. لكن اكيد تنقصنا خبرات التشغيل لان المجال ده مش بالسهولة الدخول فيه بصدرك … لو حد منكم كان حظه كويس و دخل منجم بكل مناطقه و شاف حكم التفجيرات و المعدات و كيفية التعامل مع كميات هااائلة من السيانيد الكفيلة انها تقضي على مدينة بكاملها بالتسمم و غيرها من العمليات الخطرة جدا … هــ يعرف ان الموضوع مش سهل … لكن اكيد مش مستحيل.
آخر حاجة … و الفقرة دي من المقال حيفهما كويس جدا اصدقاؤنا اللى معانا من زمان 😊 …. و هي رساله ليكم زي الرسايل اللى كنا بنبعتها ليكم من خمس سنوات فاتت و على قد ما كنتوا بتستغربوها ساعتها لكن شوفتوها بعد كده بعنيكم 😊
بدون تفاصيل …. من حوالي عشرين سنة مصر صرفت مليارات الدولارات و عملت محطتين كبار لتسيل الغاز على البحر المتوسط … و كذلك عملت بنية تحتية قوية جدا من أنابيب نقل الغاز …. و بعدها اتقفلت … و ساعتها ناس كتير كانت بتتريق و تقول مصر بترمي فلوسها على الارض … و إييه لزمة المشاريع دي …. و يجي النهارده نقول لكل دول البحر المتوسط احنا جاهزين 😊 … ابعتوا الغاز بتاعكم عندنا و احنا اللى هــ نتصرف فيه….. و كأن البنيه التحتيه دي لما اتبنت كانت استعدادا للايام اللى احنا فيها دلوقتي.
و بنفس المنوال …. كل شوية بــ يتقال ان احنا بــ نعمل مشاريع و حاجات كتييييير محدش يعرف عنها حاجة عشان أهل الشر و اللى بيشغلوهم “المحدد السياسي” …. و انكم كل فترة هــ تلاقونا بفتح مشاريع و حاجات و تقولوا … هو ده اتعمل امتي و ازاي …… و ان احنا بنخطط نكون مركز عالمى معتمد لتنقية و دمغ و تداول الذهب في العالم …. يعني مصر مش بتشتغل انها تطلع دهبها بنفسها … الموضوع اكبر من كده بكتييييير …. 🙂
آخر حاجة … ياريت نراجع مقال ” في بئر الخيانه سقطوا “ … و اللى اتكلمنا فيه بالتفصيل عن الاستهداف الممنهج للوعي الجمعي للشعب المصري لضرب الاقتصاد المصري فى اللينك ده
و نربط بينه و بين مقالين منجم السكرى … و هــ تعرف قد إييه حجم استهدافنا و اللعب على عقولنا لسنين طويله من نخبة عرة و مخترقة.
تحياتنا