18 Dec 2018
تطوير التعليم قضية امن قومي – جزء 2
—————————————
من حوالي شهرين نشرنا مقال عن رؤية الدوله المصريه لتطوير التعليم في مصر … و ازاي ان تطوير التعليم من اهم ملفات الامن القومي المصري …. و ان مشروع تطوير التعليم الجارى تنفيذه حاليا مش اختيار و لا فيه مجادله …. لان تم تصميمه بعقول مصريه مخلصه متخصصه …. و ازاي عمالقة بيوت الخبره و مؤسسات دوليه متخصصه في تطوير التعليم في العالم دخلت في شراكه مع وزارة التربيه و التعليم لتقديم خبراتها و متابعة تنفيذ تطبيق خطة التطوير….. سواء في وضع معايير المناهج و طرق التدريس او في انشاء اكبر مركز في الشرق الاوسط متخصص في تطوير مناهج التعليم و التأكد من ان طريقة عمله تخضع للمعايير الدوليه …. زي مثلا فنلندا و سنغافورا و أمريكا و ألمانيا و ايطاليا و مؤسسة ديسكفرى و اليونيسيف الدوليه و مؤسسة جايكا اليابانيه و شركة ماثيماتك و جامعة كامبريدج الانجليزيه و غيرهم من المؤسسات الدوليه اللى استفدنا من خبراتهم في تطوير التعليم في بلادهم و في بلاد اخرى كتير…. و ان خطة تطوير التعليم اللى بدأت السنة الحاليه حتنتهي في خلال 12 عاما كاملا ….. و لان التفاصيل كتير … فبرجاء مراجعة المقال المفصل الخاص بالجزء الاول
و لان مشروع تطوير التعليم ليه تفاصيل كتييييير بيتم العمل عليها للقضاء على مشاكل و تراكمات عشرات السنين على التوازي … سواء في القضاء على كثافات الفصول او تطوير المدارس او الارتقاء بالمدرس و غيرها من مكونات العمليه التعليميه … الا اننا النهارده حنتكلم على جزء مهم جدا و هو المناهج التعليميه و طرق تدريسها و بالذات في موضوع الصرح المصري العملاق الذى تم تدشينه من شهور طويله و هو موقع “بنك المعرفه” الذي لا مثيل له على مستوى العالم … و الكلام حيكون في نقاط محدده :-
1- العمليه التعليميه سواء من اول KG1 و مرورا بكل المراحل التعليميه سواء التعليم الاساسي او التعليم العالى حتي شهادة الدكتوراه و الماجيستير ستعتمد اعتماد كلي على بنك المعرفه المصري
2- بنك المعرفه هو موقع الكتروني لفكره مصريه خالصه تختلف تماما عن اي بنك معلومات اخر او مكتبه الكترونيه … لان هدفها مختلف و لذلك مكوناتها و طريقة عملها مختلفه … فكل المكتبات الالكترونيه او بنوك المعلومات الاخرى موجهه الى فئه بعينها … اما بنك المعلومات فهدفه تعليمي لكل الفئات العمريه و لكل الاهداف سواء تعليميه او بحثيه … يعني الطالب في المدرسه او اللى بيحضر رساله دكتوراه او الباحث العلمي حيلاقي مراده فيه بكل سهوله و يسر.
3- خلافا لكل بنوك المعرفه الاخرى …. فمصر قررت ان يكون بنك المعرفه الخاص بها جامعا لكل مصادر المعرفه على مستوى العالم … و الاهم انها ستوفرها مجانا و بدون اي اشتراك …. فمثلا اي باحث او دارس في اي اكاديميه مصريه كان عشان يحصل على المعلومه من اي جامعه او اي دوريه علميه … كان لازم يدفع اشتراك بالدولار عشان يقدر يشترك في دوريه علميه واحده ….. لكن القرار انه كل الدوريات العلميه لكل جامعات العالم تم اتاحتها في بنك المعرفه مجانا لتسهيل عمل اي باحث في اي جامعه في اي مجال … و مش كده و بس … وزارة التربيه و التعليم بالاشتراك مع وزارة التعليم العالي اتفقت مع اكبر المكتبات و المؤسسات العلميه العالميه انها تضع محتواهم العلمي الرقمي سواء الكتب او الدوريات العلميه او الابحاث او الفيديوهات التعليميه و غيرها من المحتويات الرقميه داخل بنك المعرفه المصري …. مثل المؤسسات و الهيئات العالميه الاتيه … و اللى يعرف قيمة الكلام ده الذي لا يقدر بثمن و يعرف قيمة اسماء المؤسسات العلميه دي هم الباحثين و طلبة الجامعات و دارسي الماجيستير و الدكتوراه …. و على سبيل المثال و ليس الحصر …. مثل الهيئات الاتيه:-
- Discovery Education
- National Geographic
- Scientific American
- YORK
- Pro Quest
- Nano
- Human Anatomy
- Atomic Training
- Springer Nature
- SciVal
- WILEY
- Britannica digital learning
- Adis
- Sage
- Cambridge
- Cengage learning
- Butterfly Encyclopedia
- Clinical key
- CABI
- CelPress
- Design mate
- دار المنظومة السعوديه
- Emerald Publishing
- EBSCO host
- Doctrainal Plus
- Experiments
- ELSEVIER
- Egyptian Journals
- IOP Publishing
- IET
- IEEE
- مكتبة لبنان ناشرون
- J Store
- Incision
- MEDLINE
- Taylor & Francis Group
- Lexis Nexis
- OEB
- Obekan
- One Click Digital
- Springer Materials
- Clarivate Analytics
- WOLFRAM
- Wolters Kluwer
4- بنك المعرفه ايضا حيكون هو المصدر الرئيسي للتعلم و كل المناهج الدراسيه لكل السنوات الدراسيه حتكون عليه … يعني المدرس حيكون على الموقع نفسه …. و قام مركز تطوير التعليم المصري و مع الاشتراك مع اكبر الهيئات العالميه في مجال مناهج التعليم الحديثه بوضع المناهج الجديده باسلوب علمي حديث يتطابق مع احدث المعايير العالميه لكل مرحله عمريه ….. و بعد كده قامت وزارة التربيه و التعليم بالاتفاق مع مجموعه من عمالقة الناشرين المتخصصين في المجال ده بتحويل كل درس من الدروس دي الى عشرات من المواد الفيلميه اللى بتشرح الدرس الواحد سواء باللغتين العربيه و الانجليزيه …. و الناشرون على سبيل المثال و ليس الحصر :-
- Britannica Learning
- Design mate
- Discovery Education
- Wolfmar
- York Press
- وزارة التعليم العالي
5- مثال …. درس قانون نيوتن في الفيزيا او الخلايا الجزعيه في الاحياء ….. موجود فيه الكتاب الدرسي بنسخة PDF …. بخلاف محتوى اضافي كالاتي:-
- عشرات الفيديوهات القصيره التعليميه لشرح هذا الدرس باستفاضه.
- شرح نصي بالرسومات التوضيحيه و الامثله
- محاكاه تفاعليه للدرس
- امتحانات تجريبيه عن الدرس بنفس الطريقه و الاسلوب اللى حيجي بيها الاسئله في الامتحان بنفس المده الزمنيه و طريقة التصحيح الالكتروني عشان الطالب يجرب نفسه و يتأكد انه فهم كويس
- روابط مساعد تحتوى على مصادر خارجيه تتحدث باستفاضه عن موضوع الدرس من ختلف مكتبات العالم الرقميه السابق ذكرها …. سواء فيديوهات توضيحيه او كتب او دوريات علميه او ابحاث منشوره
6- هنا يظهر ان الطالب بيتعلم يعتمد على نفسه في التعلم عبر وسائل الكترونيه عشان يعرف لما يكبر انه يدور على المعلومه و يدرسها بنفسه …. و انه بيتعلم بطريقه البحث الحر عبر المصدر و الماده التعليميه اللى يراها مناسبه له و لطريقة فهمه …. و التقييم في الامتحان حختلف تماما …. لان الامتحانات كلها بما فيها امتحانات الثانويه العامه حتكون “Open Book” …. يعني حيسمح للطالب انه ياخد معاه الكتاب او اي وسيله الكترونيه مرتبطه بالانترنت ….. لان التقييم و الدرجات حتكون للتأكد من انه فهم موضوع الدرس و ليس لانه حفظ المعادله … يعني لو فاهم فعلا حتعرف تحل … لكن لو حافظ الدرس … لو اخدت معاك مستر جوجل بنفس ذات نفسه … و لا حتعرف تعمل حاجه و لا تجاوب صح على اي سؤال.
7- المصدر الاساسي للتعلم هو بنك المعرفه …. و ده يمكن الوصول له عن طريق اي كمبيوتر شخصي … و التابلت ما هو الا هديه مجانيه من وزارة التربيه و التعليم لجميع الطلبه عشان يكون هناك تكافؤ فرص … عشان اللى ظروفه الماديه لا تتيح له شراء كومبيوتر …. يقدر يصل الى بنك المعرفه عن طريق التابلت.
8- بيتم الان ربط جميع المدارس بشبكات من الفايبر للانترنت فائق السرعه عشان الطلبه تقدر تدخل على بنك المعرفه بسهوله و يسر … اما التابلت حيكون فيه شريحة 4G للانترنت مجانيه عشان الطلبه تقدر توصل لبنك المعرفه لدراسة دروسها في البيت او اي مكان.
9- اللى موجود على الموقع دلوقتي منهج سنة اولى ثانوي … و اللى تباعا حيتحط عليه باقي مناهج السنوات الدراسيه من ابتدائي الى ثانوي.
10- دور المدرس حيتغير تماما …. و حيتحول من واحد بيشرح الدرس الى مدير للانشطه … و اللى كلها حتدور حول المناقشة النقديه للدرس و اخراج الافكار و كيفية استخدام تطبيق النظريه العلميه الموجوده بالدرس في المجتمع و البيئه المحيطه.
11- حتي اللغه الانجليزيه و طريقة النطق الصحيح …. فالطلاب من اول اولي ابتدائي حيتعلموها عن طريق الافلام التعليميه و برامج المحاكاه اللى موجوده على موقع بنك المعرفه و اللى حتركز على تعلم النطق الصحيح لمخارج الحروف…. اما موضوع المستوى الرفيع و التخين و الطويل … و ازاي الدراسه تبقي بالعربي اول 6 سنين و بعدها تبقي انجليزي ….. فكل مناهج التعليم في كل دول العالم المتقدم بتكون بنفس الشكل … يعني الابتدائي بتكون الدراسه باللغه الام … و من اول اعدادي بيتم التحول الى اللغه الاجنبيه …. و ده موجود في اليابان و فلندا و فرنسا و كل الدول المتقدمه … و عشان كده هم اتقدموا و اولادهم مرتبطين بوطنهم و هويتهم … مش بيطلعوا يشتموا فيها و لا يعرفوا تاريخهم …. و لاننا مش حنخترع العجله من جديد … الدوله بكل اجهزتها درست تجارب الدول اللى طورت تعليمها …. اتشرك معاها خبراء تطوير التعليم في دول و مؤسسات دوليه في شراكه كامله لتنفيذ المشروع في كل مراحله …. زي …. فنلندا و سنغافورا و أمريكا و ألمانيا و ايطاليا و مؤسسة ديسكفرى و اليونيسيف الدوليه و مؤسسة جايكا اليابانيه و شركة ماثيماتك و جامعة كامبريدج الانجليزيه …. فأكيد خبراء المؤسسات العملاقه دي بيفهموا في المناهج و تطوير التعليم اكتر من خبراء الفيسبوك و التوك شو و الاهالي …. و كل المؤسسات دي بتوصي بتدريس العلوم و الرياضيات باللغه الام في الابتدائي مع دراسة الانجليزي كلغه ثانيه … ثم التحول الى الدراسه باللغه الانجليزي من اول اعدادي كلغه اولي.
12- موضوع كثافات الفصول مشكلة مزمنه لم يتم العمل لحلها على مدار عقود و بالذات في ظل الزياده السكانيه الغير مبرره و اللى بتحتاج مدارس سنوية جديده لـ 2.5 مليون تلميذ سنويا زياده على العجز الكبير في المدارس اللى متراكم من عشرات السنين و هو متركز في مناطق محدوده في مصر و هي المناطق ذات الكثافه السكانيه العاليه …. و اللى مفيهاش اماكن اصلا او مساحات لبناء مدارس جديده … و دي حتتحل بالمضى في اتجاهين على التوازي … الاول ببعض المسكنات ببناء مدارس على المتاح من الاراضي داخل هذه المحافظات و ده حيتلف لوحده 130 مليار جنيه …. يعني حوالي 7.3 مليار دولار في اقل من سنتين قادمتين … و حل جذري لما تخلص الـ 7 مدن المليونيه خارج وادي النيل اللى الدوله بتسابق الليل و النهار للانتهاء منها و اللى حتسحب اكتر من 40 مليون مواطن ليها.
13- المناهج الجديده اللى الوزاره اقرتها و طرق تدريسها لما الطلبه حتشوفها و تحتك بيها و تقارنها باللى كانوا بيشوفوه و اللى كان المدرسين و الاهالي بيعملوه فيهم …. هم اللى حيتمسكوه بيها و حيحاربوا اي حد يقف في طريقهم او يحاول يعطل او يوقف المنظومه دي و حيطالبوا الجميع برفع الوصايه عليهم سواء المدرسين او الاهالي … و ده حنشوفوا مع بعض و الايام بيننا 😊
14- منظومة التعليم الحاليه اللى افرزت بيزنس المدارس الخاصه اللى بياخد من جيوب المصريين عشرات المليارات كل سنه …. و كذلك الدروس الخصوصيه و السناتر اللى بتاخد من جيوب المصريين اكتر من 30 مليار جنيه في السنه … طبيعي انهم يقاتلوا بشراسه ضد المنظومه الجديده اللى حتنهي تماما على البيزنس بتاعهم …. فالعويل و الصريخ و الصفحات الالكترونيه و نشر الشائعات و تخويف الاهالي و الطلبه و نشر المعلومات المغلوطه و الاكاذيب … كل دي ظواهر طبيعيه … و اللى حتتقتل و تنتهي تماما …. و من الطلبه انفسهم لما يبدأوا يتعاملوا بانفسهم في المنظومه الجديده.
15- معظم الاهالي اتعلمت تعليم قديم … من ايام امل و عمر … و نرجس في الجرن …. فالله يرضي عليكم اقتنعوا ان فيه فرق اجيال و تكنولوجي و سيبوا اولادكم يتعلموا باسلوب يتناسب مع متطلبات المستقبل …. فعشرات الوظائف الحاليه حتختفي من الوجود و حيظهر غيرها مكنش حد يسمع عنه كمان عشر سنوات …. و التعليم الجديد هو اللى حيأهل ولادنا انهم يدخلوا سوق العمل الجديد و هم مؤهلين له و منافسين فيه.
16- الغاء الدعم و الاصلاح الاقتصادي اللى كل الناس زعلانه منه … تم توجيه ثماره الى الاتجاه الصحيح … و هو الاستثمار في التعليم و الصحه …. فبدأنا نشوف تطوير حقيقي و جذري في مجال التعليم و كذلك في مجال الصحه العامه زي مبادرة فيرس سي و 100 مليون صحه …. و اللى حتزيد مع زيادة دخل الدوله بزيادة الانتاج.
17- عشان نبقي عارفين … فـ الدوله المصريه دفعت عشرات المليارات عشان تكون المحتوي العلمي لبنك المعرفه و تقدر تتيح فيه كل المحتوى العلمي الرقمي لكل المؤسسات العلميه العالميه و كذلك تأليف و تكوين محتوى رقمي بمستوى عالمي لدروس المراحل التعليميه المختلفه عن طريق عمالقة الناشرين المتخصصين بالعالم …. و لسه عايزين حوالي 130 مليار عشان العجز في المدارس.
18- دول كثيره من العالم بتراقب عن كثب التجربه المصريه لاصلاح التعليم …. فمثلا السعوديه و الامارات وقعوا مع مصر بروتوكول دمج المكتبات الالكترونيه الخاصه بهم داخل بنك المعرفه المصري و طالبوا باتاحة محتوى بنك المعرفه المصري داخل الدولتين … و كذلك تأجير المحتوى العلمى الرقمي للمناهج المصريه لتطبيقه لطلاب الدولتين في المراحل التعليميه المختلفه …. يعني المنهج المصري تم اعتماده في اكبر دولتين في الخليج و الطلاب حيدرسوا نفس المناهج …. و على فكره … حيدفعوا مبلغ محترم قيمة حقوق التأليف و الملكيه الفكريه للمالك و هو وزارة التربيه و التعليم المصريه …. و الكلام ده حيتبعه دول اخرى عديده و منها دول اوروبيه كمان …. و ده اللى حنشوفه خلال الكام سنة القادمه.
19- النظام ده مستهدف كمرحلة اولي اكثر من 85% من طلابنا في المدارس اللى هم ولاد الشعب الحقيقي و اللى بيتم المتاجره بيهم و باحوالهم و المزايده عليهم …. و اللى للاسف فيه ناس عشان تمشي البيزنس بتاعها عايزه تضحي بيهم و بتطويرهم عشان يفضلوا يشفطوا من جيوب الناس الـ 30 مليار جنيه في السنه …. و تم تأجيل المدارس الخاصه عشان الصداع و مقاومة اصحاب بيزنس المدارس الخاصه اللى اوهموا الاهالي بكلام و اشاعات مش صحيحه … لغاية بس لما ننطلق و الناس تجرب و تشوف بعنيها … و بعد كده كل الناس اللى كانت بتصرخ و بتقول انقذوا عيالنا و فين المستوى التخين و الرفيع و الكلام الخايب ده و عايزين عيالنا تدرس انجليزي … لما يشوفوا المناهج و طرق التدريس بعنيهم … هم اللى حيصرخوا تاني و يقولوا عايزين زي المدارس الحكوميه … معلش … مكناش فاهمين …. كان مضحوك علينا.
20- وزارة التعليم العالى بتقوم بعمل تطوير شاااامل سواء في طرق التدريس في الجامعات او طرق التقييم حتي تتوائم مع الطلبه اللى حيخلصوا ثانويه عامه كمان سنتين … و اللى حيرفع تصنيف الجامعات المصريه مئات المراكز دفعه واحده في التصنيف العالمي لجودة التعليم …. و كلها سنتين و حنشوف ده و الايام بيننا.
21- اللى عايز يجرب بنفسه ممكن يدخل على موقع بنك المعرفه المصري و ينشىء لنفسه حساب مجاني و يدخل على الموقع مجانا … فهو متاح لكل مصري ….
22- اللى عايز يشوف شرح للموقع ممكن يتابع شرح السيد الوزير له عبر الفيديو التالي
تحياتنا لحضراتكم