حدوتة الإيغور .. إضطهاد أم إعادة إستنساخ القديم

23 Dec 2019

حدوتة الإيغور .. إضطهاد أم إعادة إستنساخ القديم !!؟
—————————————————-

علشان اللى بيسألونا عن موضوع الإيغور ، وبيستفسروا إييه اللى بيحصل هناك
الرد ببساطة خالص بصوت الفنان سعيد صالح فى مسرحية العيال كبرت:
“طبق الأصل العلقة اللى فاتت .. لا قلم زاد ، ولا قلم نقص” 🙃🙂

أيوة … اللى عايز يفهم القصة دى أولها من أخرها إييه … ياريت يرجع للمقال اللى فى اللينك التالى .. واللى نشرناه أيام عمليات الشحن الإعلامى ، والهاشتاجات المكثفة اللى سخنت فجأة وإتعملت على قبائل الروهينجا فى بورما … فاكرين !!؟

كوريا .. بورما .. الروهينجا .. البريكس .. القصة ومافيها

واللى وضحنا وقولنا وقتها إنها مشكلة بقالها عشرات السنين .. ومالهاش علاقة بالإسلام والمسلمين خالص .. برغم إن معظم الروهينجا فعلا مسلمين … لكن اللى بيحصل معاهم مش علشان مسلمين .. لكن علشان حاجات تانية

شيل بقى قبائل الروهينجا فى بورما .. و حط مكانها الإيغور فى إقليم شينج يانج فى الصين .. وقول زى ما إنت عايز تقول .. عايز تقول علشان الإقليم ده يمتلك إحتياطى يمثل 20% من الغاز الطبيعى و 40% من إحتياطى الفحم فى الصين ..، قول … عايز تقول إن ده لعب من بعيد لتشجيع الحركات الإنفصالية فى الصين واللى فيها أكثر من 150 عرق وديانة و لو الباب ده إتفتح مش هــ يتقفل …، قول …. عايز تقول إن أميريكا من خلال أدواتها وكلابها سواء تركيا أو غيرها ، بتحاول تضغط على الصين علشان يبقى معاهم كروت يقدروا يلعبوا بيها فى مواجهة الملف الإقتصادى الصينى ..، قول … لكن تدّخل الإسلام والمسلمين علشان تلملم بخمسة صاغ تعاطف ، وتجيّش مجاذيب الإضطهاد والكربلائيات لصالحك .. لأ .. معلش .. خلاص .. ماعدناش بناكل من الكلام ده …. مع الوضع فى الإعتبار إن الإيغور فيه منهم مسلمين ومسيحيين وديانات أخرى ، وحتى ملحدين !! 😉🤔

شربناها زمان ايام تجييش المسلمين فى أفغانستان لمحاربة الكفار الروس !! .. وشربناها برضوا أيام الشيشان ومقاتلى الشيشان ، والدولة الروسية الكافرة اللى بتضطهد المسلمين ، رغم إنه كان فيه العديد من الجمهوريات والاقاليم الروسية المسلمة التى بــ تعيش فى سلام بدون أى إضطهاد زى مثلا جمهوريات داغستان وتتارستان !! … وشربناها زمان أيام بورما ، والصور المتفبركة اللى كانت بتتنشر بكثافة ، عن المحارق الجماعية .. وإكتشفنا فى الأخر إن معظم الصور كانت لرهبان التبت فى طقوس حرق موتاهم !! .. وشربناها زمان أيام حلب تحترق ، برغم إن نفس التجييش الإعلامى ده ماتكلمش عن اللى بيعمله العثمانلى من تطهير عرقى فى الشمال السورى !!

واللذيذ بقى إن الأكشن اللى هم عايزين ياخدوه ، هو اللى بيفضحهم … و على طول تلاقى الكلام يقولك إعمل مقاطهة للمنتجات الصينى .. ياسلاااام … مفضوحين أوى إنتم للدرجة دى !؟ 😁 .. طب مافيش حد يتكلم فى الأمم المتحدة !؟ .. طب فين ماليزيا وتركيا وإيران وقطر بتوع المؤتمرات الإسلامية ، يتجمعوا كدة ويضغطوا من خلال الأمم المتحدة !!؟ .. وإلا ما أخدتوهاش دى فى الكيلاس !!؟ 😎😁

طب لييه ماسمعناش مثلا حد بيقول إن إسبانيا بتقتل المسيحيين أو بتضطهدهم فى مقاطعة كتالونيا لما حاولت المقاطعة الإستقلال عن أسبانيا والسلطات الأسبانية نزلت فرمتهم … لكن طبيعى إننا نسمع كدة فى إقليم شينج يانج ، وبورما والشيشان .. وسمعناها حتى بالنسبة للأكراد العراقيين .. لما طلعت منظمات حقوق البتنجان تقولك .. وإييه يعنى يا كماحة .. ماتسيبوهم ينفصلوا … ده حقهم و دى حريتهم … لكن نفس المنظمات دى مافتحتش بقها لما دخل الجربان العثمانلى فرمهم فى الشمال السورى !!

مرة تانية .. و من الأخر … بلاش يتلعب بيك ، ويتلعب على عواطفك .. لأن اللى صفّر بالصفارة علشان تتملى الدنيا عواء وعويل على الإيغور … هو اللى صفر قبل كدة على قصة بورما ، و خلّى الكل ينشر في نفس الوقت نفس الصور المضروبة إياها بتاعة القتل والتعذيب وخلافه …. و هو نفسه اللى صفر بنفس الصفارة قبل كدة وأشعل شعار “حلب تحترق” لما الدواعش هناك بدأو ينهزموا …. و هو هو نفسه عراب ثورات الخراب العربي …. بس إحنا مابنتعلمش ….

طب مافيش مرة كدة نسمع إنقذوا مسلمى الصومال مثلا !! .. 😉🙃

وبنقولها تانى وثالث وعاشر .. حيثما كانت المصلحة الإقتصادية … هتلاقى التجييش الإعلامى بإستغلال أحداث معينة للتشويش وإغماض عيوننا عن حقيقة الهدف المطلوب الوصول إليه ….

و زى ما قولنا فى مقال بورما … لازم تبقوا فاهمين .. إن خطوط الغاز اللى كانت سبب حروب الخريف العربي و السبب الرئيسى اللى خلف ملايين المشردين والقتلي والمغتصبات .. هو هو نفسه كنز الغاز والبترول في بورما ، والصراع الصيني الغربي عليه … وهو نفس المحرك الرئيسي لنفس الناس اللى بــ تدير الامور و بتسوق القطيع بنفس الادوات .. وخصوصا إنكم لو بصيتم لخريطة ما يسمى بالمجاهدين فى العالم .. هــ تلاقو مثلا جماعة ابو سياف فى الفلبين ، و دى تعتبر موجهة لليابان والصين .. وضم عليهم بقى بورما بالجيش الحر بتاع أركان اللى بيسعى للإنفصال عن بورما علشان يتم إستخدامهم لضرب الصين والهند .. وهــ تلاقوا القاعدة فى أفغانستان والشيشان لمحاصرة اسيا الصغرى وروسيا .. و هــ تلاقوا جماعة بوكو حرام فى غرب أفريقيا حيث البترول والذهب واليورانيوم .. وطبعا تشكيلة المجاهدين وجماعات التأسلم السياسى اللى ظهرت فجأة فى الشرق الأوسط مع زيادة التدفقات البترولية والغاز فى الدول الغير خليجية .. وتوقعات إكتشافات الغاز فى مصر … و دلوقتى الإيجور وإقليم شينج يانج فى الصين … حلوة أوى الصدف دى .. بجد ملعوبة 😁😎

زمان كانت الدول بتحتل دول تانية بالقوة العسكرية علشان يسيطروا على ثروات الدول دى ، ويسرقوها لحسابهم .. دلوقتى الحروب المباشرة بقت مكلفة … يبقى نستخدم حروب الجيل الرابع والخامس .. ونهدم الدول من الداخل بإيدين شعوبها .. وبإستخدام إعلام داخلى وخارجى .. ومليشيات مسلحة بترفع شعار الدين .. وخونة فى الداخل والخارج .. وبدعم منظمات توجهاتها مشبوهة .. أو حتى معروفة التوجه . وتحت مسميات شعبوية ، من اللى الناس كدة بتحبها وبتتفاعل معاها .. وأهو يا ننجح فى هدم الدول ، وبعدين نخش نسيطر عليها بسهولة ونسيطر على مقدرات الشعوب لحسابنا .. ونسيب الشعوب تطحن فى بعضها لحد ما يخلصوا … يا إما الدول دى تحس بالخطر على نفسها ، فالحكومات ترضخ وتقبل باللى نفرضه عليهم فيما يتماشى مع مصالحنا .. وكل ما يرفعوا راسهم أو يعندوا .. أهو اللجام موجود فى إيدينا !!

وأخيراً … مش عايزين نكون بنكررنفس الكلام .. لكن الكلام والأحداث هى اللى بتكرر نفسها بكل أسف .. و زى ما قولنا قبل كدة برضوا فى موضوع بورما … هل فيه ظلم واقع على الإيغور !؟…… جايز ….. هل فيه ابرياء بتروح فى الرجلين … أيوة جايز برضوا … لكن الشيئ الأكيد أن مافيش أى دولة فى الدنيا هــ تسمح إن جزء منها أو إقليم فيها يسعى للإنفصال عنها بكيانه ومقدراته الإقتصادية .. والدولة دى هــ تقف تتفرج عليه … عامل كدة زى ما نلاقى إقليم الدلتا فى مصر بكل مقدراته الزراعية والبترولية .. وياخد معاه كمان حقل ظهر .. ويطلع يقولك .. إحنا عايزين ننفصل عن مصر …. ياترى هــ يكون رد فعل الدولة المصرية إييه !!؟

إنتبهوا يرحمكم الله

تحياتنا للجميع .. و حفظ الله مصر

لمتابعة تعليقاتكم