كوريا .. بورما .. الروهينجا .. البريكس .. القصة ومافيها

09 Sep 2017

كوريا .. بورما .. الروهينجا .. البريكس .. القصة ومافيها .. !!!!

——————————————————————-

شوفوا بقى ..

بعد كل اللت والعجن فى موضوع بورما .. ومين بيعمل إييه .. وكل الخبراء اللى بيحللوا ويفسروا اللى بيحصل .. إحنا بس فى البداية عايزين نشارككم مقال “اللعبه و الهدف و المشروع القديم” …المقال اللى نشرناه فى إبريل 2017 .. يعنى من أكثر من 5 شهور 😊😊

وهــ تلاقو إن اللى مكتوب فى المقال ده بيتكلم عن اللى بيحصل النهاردة بالحرف !!؟؟ 😉😊

ولأن اللى هــ نقوله النهاردة كلام كتير .. وشائك جداً .. وفاضح جداً .. لكنه بكل المعانى ، خلاصة اللعبة .. وفك طلاسم ولوغاريتمات المرحلة القادمة من خطة الإحلال والتجديد للصراع الدولى الدائر بين النظام العالمى القديم ، والنظام العالمى الجديد اللى مصر فى القلب منه .. أو إن شئنا الدقة .. مصر أحد أقطابه المحركة للأحداث فيه .. فــ علشان كدة ، إحنا بــ نفكركم بقى بــ كوباية الشاى المتينة بتاعة زمان اللى انتم متعودين عليها .. لأن الخيوط فعلا متشابكة لأبعد حد ..

وإحنا كنا نوهنا فى أخر مقالين نشرناهم عن قمة البريكس وزيارة الرئيس المصرى لفيتنام .. إن تفعيل إتفاقيات الشراكة الإقتصادية والتجارة الحرة والعسكرية بين دول بعينها ، بالإضافة للتنامى الحاصل لتأثير مجموعة دول البريكس سواء على المستوى الإقتصادى أو السياسى والبدأ الفعلى فى مخطط حصار الدولار .. وفى المقابل  .. نشوف الإضرابات اللى بتحصل فى البرازيل والهند .. وتشديد الحصار الإقتصادى على روسيا .. وتمرير قرار من الكونجرس بتقليص المعونات لمصر .. واللى هى كلها محاولات من جانب النظام العالمى القديم لضرب أى تقدم على الصعيد الإقتصادى والعسكرى فى النظام الموازى الجديد .. كل ده جزء من صراع البقاء ومعارك طحن العظام مابيين القديم والجديد .. وكل طرف وله ادواته اللى بيلعب بيها …… وعلشان كدة ، إوعى حد يفتكر إن ظهور كوريا الشمالية فجأة بموضوع التفجيرات النووية .. وإطلاق الصواريخ الباليستة العابرة للقارات فوق بحر اليابان ، بالتزامن مع إنعقاد قمة مجموعة بريكس كان بمحض الصدفة … ولا التصاعد المفاجئ فى الإعلام الغربى والعربى ، والإعلام الممول زى الجزيرة وشركاه .. وكل الدعوات اللى على السوشيال ميديا والترويج ، لنغمة التطهير العرقى والإضطهاد الدينى اللى بيحصل فى بورما كان برضوا وليد اللحظة وسلامة النية ، والتعاطف مع البشرية المعذبة !!! .. لأ طبعا … دى كلها أدوات الحرب اللى بيتسخدمها كل طرف لتهديد الطرف الأخر .. سواء كانت اللعب بالملف النووى وإستعراض القوة ، أو حروب الجيل الرابع ومخطط تقسم الدول بإستخدم النعرة الدينية والطائفية

خلينا فى الأول نفكركم بكلامنا اللى قولناه زمان فى سلسلة المقالات الإستراتيجية وغيرها من المقالات اللى إتكلمنا فيها عن الصراع العالمى على الغاز ، واللعبة الكبيرة اللى إتلعبت للسيطرة على مصادره ، عن طريق مخططات هدم دول وكيانات وتشريد شعوب كاملة .. واللى كان جزء منها مخطط التقسيم والخراب العربى .. وحصار روسيا إقتصادياً ولعبة أوكرانيا ، تمهيداً لتطويق الشرق الأقصى .. واللى جائت إنتفاضة الشعب المصرى فى 30 يونيو .. وصمود الجيش ضد منتخب العالم للإرهاب وصمود مصر بالكامل ضد الحصار الإقتصادى وكل محاولات إسقاط الدولة ، علشان تقضى على المخطط ده تماماً ((مرحلياً)) .. وتدمّر تخطيط سنين طويلة ، وتضيّع على المخططين مليارات ، أو تريليونات من الدولارات اللى إتصرفت لتنفيذ المخطط ده

طب هو المخطط كان إييه …

خلّوا بالكم ، إن المخطط اللى إحنا اللى هــ نقوله ده ، كان زمان يعتبر خيال علمى ، وأى حد كان ممكن يفكر فيه من قبل 2011 ، كان هــ يتقال عليه معتوه فهمى نظمى رسمى .. زى موجة السخرية اللى حصلت لما طلعت كونداليزا رايس  وإتكلمت بمنتهى الصفاقة والتبجح وبشكل علنى ، عن الفوضى الخلاقة ومشروع الشرق الأوسط الجديد ، وهى واثقة تماماً إنه ماحدش هــ يستوعب ولا هــ يقدر يخمن من الشعوب مدى بشاعة ما يتم التخطيط له .. بسبب حالة التغييب اللى تم السيطرة بيها على العقول عن طريق الإعلام ، ودكاكين حقوق الإنسان ، ومؤسسات المجتمع المدنى ، وعملاء السبوبة اللى تم نشرهم فى كل الدول المستهدفة  .. وعلشان نقول بالمختصر المفيد .. كان المخطط هــ يتم تنفيذه على 3 مراحل:

المرحلة الأولى .. هى السيطرة على الشرق الأوسط بالكامل عن طريق جماعات التأسلم السياسى ، وهدم جميع الدول وإغراق المنطقة كلها فى الفوضى ، وبالتالى يتم التدخل للسيطرة على كل الثروات ومصادر الغاز والبترول وكل الثروات المعدنية والذهب وخلافه .. بغض النظر عن حجم الضحايا وكمية الدماء والأرواح اللى سيتم إزهاقها وبإيدين الشعوب نفسها فى حروب أهلية طائفية ودينية تفضى إلى فوضى مدمرة .. وخليكوا فاكرين إن كلاب داعش والمتاسلمين أول حاجة كانوا بيعملوها فى الدول اللى دخلوها غنهم يسيطروا على أبار البترول والغاز .. لأنهم مطلوب منهم يعملوا كدة …  وإوعوا تفتكروا إن إكتشافات الغاز اللى تمت ، واللى لسة هــ تتم فى مصر ماكانتش معروفة للغرب حسب التقديرات البحثية اللى تمت بالفعل .. وعلشان كدة مصر كانت هدف إستراتيجى للفوضى الخلاقة ، والهدف السمى كان تفتيت الجيش المصرى ..

المرحلة الثانية .. واللى هــ تبدأ بعد السيطرة التامة على الشرق الأوسط ، ومد خط الغاز من قطر لأوروبا مروراً بالعراق سوريا تركيا .. وبالتالى ضرب الإقتصاد الروسى فى مقتل .. علشان تبدأ بعدها عملية تمرير الإرهابيين لروسيا عن طريق الجنوب ، واللى هــ ينضم له مجاهدين الشيشان ، وكل التيارات وكوادر التأسلم السياسى والتطرف فى كل أوروبا الشرقية اللى كانوا جزء من الإتحاد السوفيتى السابق .. وتبدأ عملية إستنزاف عسكرى أمنى لروسيا الكافرة بالتوازى مع الإستنزاف الإقتصادى تنتهى بإسقاط الدب الروسى تماماً ، وإغراق روسيا فى الفوضى ضمن مسلسل الفوضى الخلاقة !

المرحلة الثالثة .. بعد إسقاط روسيا والسيطرة على الشرق الأوسط اللى اصبح فى خبر كان ، وتمكن تيارات الإسلام السياسى من السلطة فى كل دول المنطقة .. واللى بــ يحركهم الغرب اللى عملهم .. تبدأ عملية حصار الشرق الأقصى ، وبالذات الصين والهند بنفس أسلوب أسقاط الشرق الأوسط ، وهو إثارة وإشعال الطائفية وتوجيه المجاهدين لمحاربة التنين الصينى الكافر ..، والحجة طبعا جاهزة وهو رفع الظلم عن المضطهدين .. وبالمرة نلعب على وتيرة إعادة أمجاد الخلافة الإسلامية مرة تانية .. وماننساش إن تعداد المسلمين فى الصين والهند بالملايين .. وبالتالى تبدأ عملية تأكل الدول دى من الداخل عن طريق تغييب وعى الشعوب من منطلق طائفى زى ما حصل فى مصر 

وسوريا والعراق واليمن .. وتسقط الصين والهند فى فوضى مدمرة برضوا .. وخصوصا إننا بنتكلم عن دولتين فيهم ربع سكان العالم تقريبا .. يعنى موجات الفوضى هــ تكون لا نهائية ، وتخرج عن نطاق إمكانية السيطرة عليها بأى شكل من الأشكال لمدة سنين ويمكن قرون لأنها هــ تمتد كمان لكل الدول المجاورة .. فى الوقت اللى يكون الغرب فيه بيتمتع بثروات العالم.

لكن لما جت 30 يونيو ، و أوقفت المشروع الشيطانى ده ، وأنقذت على إيدين الجيش والشعب المصرى ، المنطقة كلها من الدمار .. ومش المنطقة بس لكن كمان روسيا .. وبدأت الشعوب تتضامن وتستوعب اللى بيحصل .. ومش كدة وبس .. لكن كمان بدأت كرة الثلج تتحرك فى تسارع نحو تشكيل النظام العالمى الجديد علشان تقدر الدول المستهدفة تنقذ نفسها من المخطط الشيطانى ده ، وبدأ تظهر تكتلات سياسية وإقتصادية وتقوم بتفعيل دورها عالميا فى مواجهة النظام العالمى القديم .. وفى نفس الوقت بدأ يتم الضغط على كلاب السكك اللى تم جمعهم من كل أقطاب الأرض وتسميتهم داعش لتدمير دول المنطقة .. فكان لازم يتم إنقاذهم وإعادة تدويرهم تانى قبل ما يبدأوا يخرجوا عن السيطرة ويسرحوا على أوروبا …..

ولاحظوا إن مصر قدرت تفرض إرادتها على المجتمع الدولى .. وقدر الجيش المصرى يتصدى لمنتخب العالم للإرهاب ، ويقف كحائط صد أمام موجات الإرهاب اللى بتحصل فى سيناء ، واللى بتهاجم من الغرب عن طريق الحدود الليبية .. ومش كدة وبس .. لكن كمان بدأت ذراع الجيش المصرى تطول معسكراتهم وأماكن تجمعاتهم فى ليبيا بعد تنامى قدرات الجيش المصرى بشكل مرعب ، كمان تنامى خبرة المقاتل المصرى فى التعامل مع النوع ده من حروب الشوارع وقتال المليشيات .. وبدأت السياسة المصرية تنجح فى حصار الممولين للتنظيمات الإرهابية سياسياً سواءً بالعلاقات الدولية ، أو من خلال المنظمات الدولية زى مجلس الأمن الدولى ، ولجنة الأمن الأفريقية وغيرهم …. وده غير اللى عملته مصر من ضرب معظم مصادر التمويل الداخلى للتنظيم الدولى فى مصر ، واللى اصبح بيعانى على مستوى العالم ، وخصوصاً بعد الوضعية السيئة اللى أصبح عليها قطر وتركيا ، الإخوانيتين .. وبالتنسيق مع دول عديدة من المجتمع الدولى وبالذات روسيا ومجموعة الشرق القصى وبعض الدول الأوربية .. أصبح أى حد  بيدعم الإرهابيين ، بيتم فضحه عالمياً ، حتى ولو بأسلوب غير مباشر ، لأن الحرب أصبحت معلنة ومافيهاش هوادة وخصوصا بعد خسارة حزب أوباما/كلينتون للإنتخابات الأميريكية واللى الحرب كانت فى عهدهم هــ تكون بشعة …… وبالتالى بعد ما كان بيتم التخطيط لنقل مقاتلى داعش بأسلحتهم وكلابهم وقططهم لسيناء وليبيا وتشاد .. أصبح المخطط دلوقتى نقلهم لأماكن تانية اكثر إفادة مرحلياً .. وتعتبر كانها عملية إسقاط مظلات خلف خطوط العدو .. قبل ما يبدأوا يخرجوا عن السيطرة وينتشروا فى أوروبا !

ياترى حد عارف فين مقاتلى داعش اللى إختفوا فجأة

 وبدأت عمليات تراجعهم بشكل سريع جدا فى العراق وسوريا وليبيا !!؟؟ .. ياترى لييه ماشوفناش جثثهم واشلائهم والإعلان عن أسمائهم ، زى ما الجيش المصرى بيعمل فى سيناء والحدود الغربية وليبيا !؟ .. ياترى إييه سر دعوة بريطانيا لدول المقاطعة لعقد جلسات حوار مع قطر ، وحل الخلاف سياسياً ومحاولة إخراج مصر من الصورة بجعل الخلاف خليجى خليجى .. يا ترى غييه هو سر تمسّك بريطانيا والولايات المتحدة الأميريكية .. أو اعضاء الكونجرس بالذات بعدم إعلان جماعة الإخوان جماعة إرهابية لحد النهاردة !!؟؟ .. هل أصبحوا فجأة مؤمنين بالإسلام !!؟؟ .. طبعا لأ … لكن لأن الإخوان لسة لهم دور فى تجييش الجيوش الفكرية والإعلامية والطائفية ، وتغييب الوعى الجمعى للشعوب ، وكمان فلترة الأفراد ودفعهم دفعاً للترويج لنفس الفكرة مرة اخرى … كلمة السر للكنز الاستراتيجي بتاعهم وهى .. مبدأ نصرة الاسلام .. نفس المبدأ اللى تم إستخدامه كذباً لهدم دول منطقة الشرق الأوسط .. لولا وعى الشعب المصرى .. وعلشان كدة لما قولنا فى احد تعليقاتنا رداً على أحد اصدقائنا المتدينين على الصفحة إن الدين هو أفيون الشعوب ، والكلام ده أغضبه وزعله جداً .. لكن المبدأ فعلا حقيقى ، ومافيهوش أى إهانة للدين .. لأن الدين أو العقيدة هى الشئ الوحيد ، اللى بمجرد ما تقرب منها عند شخص ، يتحول إلى مخلوق اخر مغلق العقل والفكر والعين والأذن ورافض لأى نوع من الحديث غير التعاطف مع عقيدته وكل من ينتمون إليها .. و ده ينطبق على الإسلام والمسيحية واليهودية وحتى البوذية والهندوسية ، أو أى عقيدة شركية أو وثنية .. وهو ده اللى بيتم اللعب عليه بمنتهى الإحترافية .. و ده هــ يكون له معانا حديث اخر فى مقال قادم بإذن الله

والسؤال اللى بيطرح نفسه .. فين التعاطف ده من مسلمى فلسطين واللى بيحصل فيهم من اليهود .. وفين المجاهدين دول اللى هدموا دول كاملة لكن ماقربوش من إسرائيل لتحرير القدس !؟ …

اللى بيحصل دلوقتى هو إعدة تدوير تجربة افغانستان من جديد بس بشكل أخر .. والهدف جمع التعاطف من أول وجديد …. ولأن الجيل الحالى فى مجتمعات دول الشرق الأوسط اللى إتربى على مأسى ومظلومية افغانستان والبوسنة الشيشان ، جزء كبير منه بدأ يفوق ويفهم .. ويعرف  إن التعاطف مع مسلمي الشيشان وأفغانستان والبوسنة قبل كده كان الهدف منه إسقاط يوغوسلافيا والاتحاد السوفيتي لمصلحة عالم القطب الأوحد اللي احنا عايشين فيه دلوقتى وبنحاول نخرج منه .. فلازم يتم اللعب على أجيال جديدة وتغييبها بمسميات جدية علشان تتعاطف مع ناس جديدة بدون ما يفهموا الهدف من دعاوى التعطف دى إييه .. يعنى التاريخ بيعيد نفسه وبنفس النغمة الدينية .. وباب التبرعات بــ يتفتح من جديد .. ومليارات الدولارات هــ يتم تحويلها على حسابات مجهولة لدعم ناس ، عمر الدعم ده ما هــ يوصل لهم .. لكن هــ يروح لدعم التنظيمات المسلحة ، زى ما جمعية رسالة كانت بتدعم اللى بيسموهم المجاهدين فى سوريا .. وزى ما عمرو خالد كان بيبعث قوافل صناع الحياة لليبيا ، واللى إتحوا أفرادها بعد كدة لصفوف داعش وإتقال عليهم إختفوا قصريا

بورما هى مسمار جحا اللى فى خاصرة الدولة الصينية .. وبعد التأكد من تمدد التنين الصينى اللى خرج خلاص من عقاله .. وإستعادة الدب الروسى لقوته بعد ما قدر يهرب بفعل 30 يونيو من الفخ الإقتصادى والسياسى اللى كان منصوب له .. فكان لازم يتم ضرب التم

دد ده … وأميريكا عايزة تنشر صواريخ على حدود الصين لتهديد الصين وروسيا .. ونشرت بالفعل بطريات صواريخ THAAD فى كوريا الجنوبية .. وكان الرد الصينى عن طريق التفجير النووى من كوريا الشمالية والصاروخ الباليستى العابر للقارات اللى عبر فوق بحر الصين .. وسيبكم من بيانات الإدانة الروسية الصينية للتجربة النووية لكويرا الشمالية .. لأن ده لزوم الديكور السياسى .. والصين وأميريكا وروسيا وكل دول العالم عارفين إن أى صراع نووى مباشر بين القوى العظمى معناه دمار البشرية كلها .. وعمر ما حد فيهم ممكن يفكر ياخد القرار ده .. حتى المجنون اللى فى كوريا الشمالية ، واللى الزمبلك بتاعه فى غيدين الروس والصينين .. وعلشان كد لازم يبدأ دور جديد من حرب الوكالة .. والدور ده لازم يكون فى بورما .. اللى المناخ فيها مؤهل لبذر بذرة الحرب دى .. وبقينا بنسمع دلوقتى دعاوى “لبيك يا بورما” .. وبقينا بنسمع حاجة عن حاجة إسمها “جيش أركان الروهينجا الحر” .. بتقولوا إييييييه !!؟؟؟؟ … أممممممممم .. ياترى سمعنا الكلام ده فين قبل كدة  😊

مشكلة بورما بقالها عشرات السنين …. واللى صفر النهاردة بالصفارة عشان الكل ينشر في نفس الوقت نفس الصور المضروبة إياها بتاعة القتل والتعذيب وخلافه …. هو نفسه اللى صفر بنفس الصفارة قبل كدة وأشعل شعار “حلب تحترق” لما الدواعش هناك بدأو ينهزموا …. و هو هو نفسه عراب ثورات الخراب العربي ….  بس إحنا مابنتعلمش …. ولازم تبقوا فاهمين .. إن خطوط الغاز اللى كانت سبب حروب الخريف العربي و السبب الرئيسى اللى خلف ملايين المشردين والقتلي والمغتصبات .. هو هو نفسه كنز الغاز والبترول في بورما ، والصراع الصيني الغربي عليه … وهو نفس المحرك الرئيسي لنفس الناس اللى بــ تدير الامور و بتسوق القطيع بنفس الادوات .. وخصوصا إنكم لو بصيتم لخريطة ما يمى بالمجاهدين فى العالم .. هــ تلاقو مثلا جماعة ابو سياف فى الفلبين ، و دى تعتبر موجهة لليابان والصين .. وضم عليهم بقى بورما بالجيش الحر بتاع أركان اللى بيسعى للإنفصال عن بورما علشان يتم إستخدامهم لضرب الصين والهند .. وهــ تلاقوا القاعدة فى أفغانستان والشيشان لمحاصرة اسا الصغرى وروسيا .. و هــ تلاقوا جماعة بوكو حرام فى غرب أفريقيا حيث البترول والذهب واليورانيوم .. وطبعا تشكيلة المجاهدين وجماعات التأسلم السياسى اللى ظهرت فجأ فى الشرق الأوسط مع زيادة التدفقات البترولية والغاز فى الدول الغير خليجية .. وتوقعات إكتشافات الغاز فى مصر … حلوة أوى الصدف دى .. بجد ملعوبة

وأخيراً … هل فيه ظلم واقع فى بورما …… أكيد ….. أو جايز ….. هل فيه ابرياء بتروح فى الرجلين … أيوة … لكن الأكيد أن اللى بدأ ده بإيعاز من اللى بيحرك عرايس الماريونيت هم المسلحين اللى بيدعموا حركات الإنفصال  داخل مجتمع مينامار من الوافيدين الروهينجا القادمين فى الأصل من بنجلاديش … وأى دول فى الدنيا مش هــ تسمح ابداً بإن حد يهاجم القوات النظامية لجيش الدولة ويعمل عمليات مسلحة ، ويدعوا للإنفصال عن الدولة … وبعدين ييجى بقى الدور على الألة الإعلامية واللى بيخدموا عليها .ز واللى بيشتغلوا بالصفارة علشان يتم نشر المظلومية الدينية .. والبقية تأتى … !

إلا بالمناسبة صحيح … الصومال بيحصل فيها ابشع من اللى بيحصل فى بورما بكتير .. ياترى ماسمعناش لييه عن لبّيكى يا صومال !!؟؟ 😊😊

إنتبهوا يرحمكم الله

لمتابعة تعليقاتكم