02 Jan 2021
إعرف قيمة بلدك .. !!
——————–
فى مقالنا السابق بعنوان “كيف فشلت مصر فى التعامل مع أزمة كورونا” .. واللى هتلاقوه فى اللينك التالى:
إتكلمنا عن مصر فى زمن الكورونا ، وإتكلمنا عن الإجراءات اللى أخدتها مصر .. والنتائج اللى شوفناها على الأرض وحسينا بيها كلنا .. واللى إتكلم عنها العالم وأشادوا بيها لدرجة إن مؤسسة بلومبرج وضعت مصر ضمن أفضل 25 دولة على مستوى العالم ، فى التعامل مع أزمة كورونا وتداعياتها الإقتصادية والصحية.
و ده كان رداً على الحملة اللى بنشوفها مؤخراً ضد الدولة المصرية .. ومحاولة تشويهها .. والسعى لإحداث بلبلة بين الناس بتمرير فكرة الفشل العابر للمجرات اللى وقعت فيه الدولة المصرية .. واللى للأسف لاقت صدى عند البعض لمجرد إنهم بــ ينسوا .. أو بيستسلموا للتريند ، ولنغمة الإحباط اللى بتلعب على وتر المظلومية !!
والحقيقة إن مجمل التعليقات على المقال كانت بجد تفرح .. و خلتنا نشعر إن مستوى الوعى والإدراك للحقائق عند أصدقائنا _اللى بنعتبرهم بالفعل نخبة الفيسبوك_ مرتفعة للغاية ، وحاجة تشرف بجد وتطمن 🙂
لكن كان من بين التعليقات كلها 3 تعليقات قمنا بإستئذان أصحابها إننا ننشرهم ، وهم مشكورين تفضلوا بالموافقة على النشر .. وكان الهدف من نشر التعليقات دى هو الأتى:
أولا: إن التعليقات لأصدقاء عايشين بالفعل فى المجتمعات الغربية (فرنسا وإنجلترا) ..
ثانيا: إن التعليقات بتأكد كلامنا من خلال تجربة شخصية لأصحابها بدون أى أغراض وبكائيات ولطميات على حالنا ، أو تغزّل فى المجتمع الغربى ، ومحاولة تزيين الواقع !
ثالثا: إن التعليقات بتقول اللى إحنا بنقوله .. ومش إحنا لواحدنا لكن كل العقلاء اللى بيشوفوا الصورة بدون أى إفراط أو تفريط .. بعيدا عن فكرة إن مصر أسوء بلد فى الكون .. وإننا عايشين فى مأساة إنسانية .. و إن مصر محتاجة قنبلة ذرية تقضى عليها .. واللهم هجرة .. و يارب أخرجنا من القرية الظالم أهلها .. وكل اللطميات دى اللى خلاص زهقنا منها ، وإكتشفنا مع الوقت كذبها و زيفها .. وفهمنا إن الهدف منها طول الوقت كان إنها تقرف المصريين فى عيشتهم ، وتكرههم فى حياتهم ، وتحسسهم بالضياع .. وإننا فى مصر عايشين حياة أقرب للبهائمية .. وشوفوا الدول التانية عايشين إزاى .. وكل حاجة ببلاش .. والحكومات بــ تأكّل الشعوب فى بقها .. وبتفطرهم كافيار .. و تغديهم بوفتيك .. و تعشيهم لحم ضانى و ديوك رومى .. ألخ ألخ ألخ !
رابعا واخيرا: أيوة طبعا إحنا عندنا مشاكل وسلبيات .. لكن إوعى تسمح لحد إنه يضحك عليك أو يحسسك إنك عايش فى صفيحة زبالة .. بالعكس إنت وضعك معقول جدا بين دول العالم .. بل وأحياناً .. بتتفوق فى بعض الأشياء على دول تانية كتيرة .. ومنهم دول عظمى .. وأزمة كورونا اثبتت ده .. وماحدش بيعرف الحقيقة دى غير اللى جرب بالفعل … لكن جرّب من غير مايكون عنده ايديولوجية فكرية يتكلم من خلالها ويبث سمومه بيها فى عقول اللى يعرفهم لأنهم ماجربوش بنفسهم .. أو لأنهم شايفين الصورة من جانب واحد بس !
التعليقات موجودة فى صورة مقال النهاردة لأصدقائنا واصدقاء صفحتكم:
أستاذ Pierre Farid وأستاذ Khaled Shawky وأستاذ Yassin Chahin
وياريت اللى ماقرأش المقال السابق ، ممكن يقراه فى اللينك اللى فوق علشان يقدر يربط بين التعليقات والمقال
بلدنا حلوة .. فــ ماتسمحش لحد إنه يضحك عليك 🙂
حفظ الله مصر وشعبها من كل سوء