29 Jan 2021
أميريكا .. عودا حميداً .. !!
—————————
لو حبينا نجيب مقال نوصفه بالبنورة السحرية اللى بتشوف أحداث مستقبلية فيما يخص السياسة الأميريكية ، مش هــ نلاقى افضل من المقال اللى فى اللينك التالى ، واللى نشرناه فى 15 نوفمبر الماضى 2020 بعنوان “الإنتخابات الأميريكية ، ونظرة مستقبلية للأحداث“:
و علشان نترجم القصة .. نقدر نقول بمنتهى الثقة .. إنه بمجرد ما الأخ “بايجون” قعد على الكرسى ومسك الدريكسيون ، تحس كدة إنه زى مايكون ضغط على زرار تفعيل العودة لماقبل نقطة 20 يناير 2016 .. وهى اللحظة اللى إستلم فيها الحاج أبو حنان الحكم … و ده بس مجرد فلاش بــ ننوره للى ماكانش عاجبهم “أبو حنان” .. بعد ما سقطوا فى فخ التوجيه الإعلامى على مدار 4 سنوات كاملة .. واللى خلاص بقينا فاهمين هو إييه ..وبــ يتعمل إزاى .. وبــ يتوجه لمين .. وبــ يصب فى مصلحة مين !!
و علشان مانطولش عليكم فى المقدمة .. فــ إحنا هــ نقول لكم بصوت الفنان إبراهيم نصر “ماتيجو نشوف” :😁
⭕️ مبدئيا كدة .. بمجرد ما الأخ “بايجون” إستلم الدفة ، و على طول كدة يامؤمن وبقدرة قادر تحصل عملية إرهابية ضخمة فى العراق وتعلن داعش مسئوليتها عنها .. وكمان تحصل عملية إستهداف فى سيناء ، وبرضوا تعلن داعش مسئوليتها عنها .. و ده غير عملية كمان فى سوريا من يومين …. تحس كدة إن بابا بعت فلوس .. وإن الأومر صدرت تانى لبعث من فى القبور … لكن طبعا بلاش سوء نية .. وأكيد ده كله صدفة !
⭕️ الصدفة الثانية بقى كانت تصاعد حدة التصريحات ، بل والتحركات الأثيوبية فى الجنوب مع دولة السودان ، وتبادل القصف المدفعى بين البلدين .. وبدل ما أثيوبيا تشوف مصيبتها إييه وتحاول تحلها ، تقوم إييه بقى .. تقولك إن مصر بتعمل تضخيم لموضوع السد وملف المياه علشان تغطى على مشاكلها الداخلية ، وملف حقوق الإنسان .. وحالة الإنهيار الداخلى فى العديد من الملفات … مش عارف إحنا سمعنا الكلااااام ده فييييين و من مييييين قبل كدة !!؟؟ 😉😁 .. وكمان بــ توجه الإتهام لمصر بإنها هى اللى بتحرك السودان وبتحرضها على أثيوبيا …. “أيوة إحنا كدة … و يرضينا .. و هــ تتضرب” 🙂
⭕️ الصدفة الثالثة بقى والأهم .. وهو إندلاع المظاهرات فى روسيا .. والدعوة لتظاهرات حاشدة فى 31 يناير القادم … حاجة كدة زى جمعة الغضب عندنا .. ما إحنا خلاص بقينا خبرة فى الحاجات دى … ويلا بقى ننزل ونثور على الفساد وعلى سوء الأوضاع المعيشية .. و “علّى و علّى و علّى و علّى ، خلى الثورة تشيل ماتخلّى” ….. واللى بــ يحرك الثورة دى ، واحد معارض كدة ، يعتبر النسخة الروسية للواد “محمّا على” بتاعنا ، بتاع الفساد والقصور الرئاسية وكدزة …. وشوف الصدف يا مؤمن لما تلاقى الأخ المعارض “محمّدوف عليّيوف” الروسى ده بيتكلم برضوا عن القصور ، وبيجيب صور لقصر “قال إييه” سرّى ماحدش يعرف عنه حاجة ، وإنه بتاع بوتين .. وإنه فيه 500 ألف غرفة .. وقيمته بتاع عشروميت دشيليون دولار ، ومصور القصر من جواه غرفة غرفة (طبعا ماعرفش إزاى) ، وبيقول للشعب الروسى .. شوفوا الفساد يامصريين .. إحم .. قصدى ياروسيين .. وشوفوا بوتين عايش فى بذخ وسايبكم تموتوا من الجوع !
و طبعا الرئيس الروسى بوتين سخر من الموضوع ده ، وأدلى بحديث متلفز بيقول فيه إنه مايعرفش حاجة عن الموضوع ده ، وإن القصر ده مش بتاعه ولا بتاع أى حد من عيلته أو اقاربه … لكن الغريب إن دعاوى التحريض دى ، جائت بالتزامن مع تصريحات أميريكية بــ تطالب فيها روسيا بالكف عن دس أنفها فى الملف الليبى ..، وكمان وجوب تخفيف تواجدها العسكرى فى سوريا !! … صدفة دى وإلا مش صدفة يا متعلمين يابتوع المدارس !!
⭕️ الصدفة الأكثر إضحاكا .. هو إن بعض اعضاء الكونجرس (من الحزب الديموقراطى طبعا) .. سايبين أميريكا والكورونا و الألاف اللى بيموتوا كل يوم ، وسايبين موضوع جورج فلويد وملف السود ، وسايبين الــ 22 تريليون دولار ديون أميريكية ، وسايبين سجن ابوغريب ، وسايبين اللى بيعمله اردوغان فى سوريا وليبيا واذربيجان .. وسايبين الإنتهاكات اللى بتحصل فى تونس ، وسايبين داعش وملف الجماعات الإرهابية .. وسايبين التطهير العرقى فى اثيوبيا .. وماشافوش غير إن مصر فيها إنتهاكات لحقوق الإنسان .. ويالا بينا نعمل تكتل ، ونشوف فين المعارضين للنظام ، وندعمهم .. ونشوف الكهر والزولم والكمع اللى فى مصر ده موضوعه إييه .. علشان ربنا هــ يحاسبنا على كدة ! 😁
⭕️ والأنكت بقى .. واللى برضوا بالصدفة البحتة .. بدأنا نسمع منظمة الع.. العفو الدولية .. ودكاكين حقوق البتنجان ، ومن وراهم على طول نشطاء السبوبة ومراكيب الإخوان ، والإخوان بإعلامهم بسلاطاتهم بــ بابا غنوجهم .. فجأة كدة بدأوا يتكلموا عن الحريات وحقوق الإنسان ، والمعتقلين .. وشوية يقولك مصر فيها 60 ألف معتقل ، لأ 80 ألف .. طب يمين على يمينك هم 100 ألف .. و اكيد كل ده صدفة .. صدفة صدفة يعنى …. طبعا ماعرفتكش أنا كدة ! 🙃 … و طبعا غير عودة البرادعى للتغريد بكثافة على تويتر كجزء من الظهير الليبرالي للمؤامرة .. وخالد يوسف بيقول انه راجع مصر تانى .. وغيرهم وغيرهم … وكل واحد فيهم طمعان انه يتصدر المشهد .. اما بتكليف رسمى .. او طمعا فى الحصول على جزء من كعكة التمويل 😉🙂
مافيش شك ان الصدف دى كلها مجرد بداية .. تحس كدة إن زمن المُلّا حسين أوباما بيرجع من جديد .. بنفس الآليات والأدوات .. بس فاتهم حاجة مهمة جداً .. إن مصر من 8 سنين غير مصر دلوقتى خالص
طبعا مصر علشان خايفة ، قامت الحكومة المصرية مصادرة أموال الشاطر وبديع ، و ورثة مرسي و86 آخرين من قيادات الإخوان بعد تحفظ دام 7 سنوات … وبشكل قانونى .. يعنى لا تأميم ولا بلطجة ..
و على صعيد السياسة الدولية .. مصر فاتحة صدرها وبتتحرك بقوة … صحيح مش بشكل تصادمى .. لكنه تحرك قوى .. تحرك سياسى .. شيئ كدة اشبه بصراع الثعالب .. وفى صراع الثعالب ولعبة الشطرنج ، والصبر الإستراتيجى .. تتفوق مصر بلا منازع …
أما فيما يخص باقى الملفات الدولية .. زى كيفية التعامل الأميريكى مع إيران والصين وغيرها .. فــ تقدروا حضراتكم ترجعوا للينك اللى فى أول المقال .. لأن هو ده اللى هــ نشوفه فى الأيام القادمة …
طب هل اللى بيحصل ده ممكن يتغير !؟ …. طبعا .. وارد جدا .. لأن السياسة مافيهاش ثوابت .. وممكن اللعب خلف الكواليس يخليك تشوف حاجات جديدة إنت مش فاهم هى بتحصل لييه !؟ .. المهم حجم الكروت اللى إنت بتلعب بيها وبتأثر فى مصالح الأخرين !
وإلى اللقاء مع مزيد من الصدف فى الأيام الجاية 🙂
حفظ الله مصر وشعبها من كل سوء