حادث السواح المكسيكيين .. فوقوا يا مصريين 2

7 Jan 2016

حادث السواح المكسيكيين .. فوقوا يا مصريين 2

———————————————

  • فضيحة دولية لمصر
  • الجيش المصرى ورّط مصر عالمياً
  • الجيش المصرى أخطأ ولازم يطلّع بيان إعتذار
  • أدى جيش المكرونة اللى بيضرب المدنيين بدون ما يتأكد
  • السياحة كدة خلاص ماتت طالما جيش الدولة بيضرب السيّاح المدنيين
  • مصر هــ تدفع شوخروميت مليار دولار تعويض لأسر الضحايا
  • مصر لازم تطلع بيان إعتذار ، ولازم نعترف إننا عندنا قصور

الكلام اللى فات ده كله وأكثر منه كمان من مذكرات إعلام الغبرة ، و كولجية مجيدة العمشة ، اللى بيستقوا معلوماتهم وافكارهم من صفحات الإخوان ، وماشيين على نفس خطاهم ، وبيتعاطوا نفس نوع الكلة ، وبيأكلوا من نفس قصعة التبن ، وبعدين يرجعوا يقولوا أصلهم ركبوا الثورة !!! .. والكلام ده كله كان فى أعقاب حادثة مقتل 8 سائحين مكسيكيين على خلفية دخولهم منطقة محظورة فى الواحات وقيام الجيش بقصف سيارات الدفع الرباعى اللى كان بيستقلها الضحايا بالطيران !

صفحة كلام فى الصميم إتكلمت عن الموضوع ده فى وقته في مقال حادث السواح المكسيكيين .. فوقوا يا مصريين 1 ، ونشرنا مقال نوضح فيه وجهة نظرنا و رأينا فى الحادث ، واللى حقق نسبة تفاعل عالية ، و أثار وقتها عاصفة من الجدل والإنتقادات وتباين فى الأراء مابين مؤيد ومعارض ، مش بس بين اصدقاء الصفحة ولكن بين كثير من الأشخاص اللى دخلوا وتفاعلوا سواء بالتعليق أو بالمشاركة ، والكلام ده كان نتيجة تأثر الكثيرين باللى بيتم تداوله فى الإعلام المغرض ، اللى كالعادة إستبق التحقيقات .. والبيانات الرسمية … نقلاً عن وكلات الأنباء الغربية .. لا لشئ غير إن الإعلاميين بتوعنا مالهمش همّ غير تسخين الدنيا ، علشان السبوبة !! 

رأينا وقتها سواء ما ذكرناه فى المقال ، أو ما تم الرد به على الكثير من التعليقات ، إن اللى حصل مش صدفة و إنه فى مقدرات الدول وصراع البقاء مافيش حاجة إسمها صدف أبداً .. ولما تتجمع مجموعة من الصدف فى شئ يترتب عليه إحراج مصر وجيش مصر دوليا .. يبقى اكيد فيه حاجة غلط  .. لأنه بالمنطق وبالعقل ، مستحيل تتجمع الصدف دى مع بعضها بالشكل التكاملى ده ، وخصوصاً إننا خلاص بقالنا 5 سنين ، إتعلمنا من كتر اللى شوفناه ، إنه مافيش حاجة إسمها صدفة فى كل الأحداث اللى بتحصل سواء فى مصر أو فى المنطقة كلها !!

والصدف دى كانت من عينة

تصريح يطلع بأتوبيس رغم إن السفارى لازم لها عربيات دفع رباعى

نوع عربيات الدفع الرباعى دوبل كابينة مش نفس النوع المستخدم فى المنطقة دى

سيارات الدفع الرباعى بدون تراخيص أصلا

سائحة تجيلها كومة سكر .. فنتوغل فى الصحراء علشان ندور على مساعدة بدل مانرجع للطريق الرئيسى

المنطقة بتاعة السفارى مش نفس المناطق المعتاد عمل رحلات السفارى فيها

موقع الحادث على مقربة من 3 مخازن اسلحة للإرهابيين يتم إكتشافهم بعدها

تزامن الحادث مع إعلان تنظيم الدولة عن إشتباكات مع قوات الأمن المصرى فى الصحراء الغربية

نشر الإعلام الغربى معلومات عن الحادث بمجرد حدوثه ووضع إتهامات وإستنتاجات بالرغم من إن الحادث حصل فى الصحراء فى منطقة نائية !! (يعنى عرفوا المعلومات دى .. لكن ماعرفوش إن داعش بتضرب فى الصحراء غير لما داعش نفسها اعلنت على مواقعها) ..

وغير ده كله ، إن السواح المكسيكيين سابوا صحراء نيفادا ، اللى هى فى أول شارع على إيدهم اليمين ، وركبو طيارة لمدة 18 ساعة ، وبعدين ركبوا وسيلة نقل برية لمدة 4 ساعات علشان يروحوا فندق بتلاتة تعريفة ، علشان يطلعوا يعملوا سفارى فى الواحات … يا سلااااااام !! =D

كلام صفحتنا وقتها برضوا ماكانش إستباق للأحداث لكنه كان قراءة للواقع السياسى بأسلوب عقلانى ، وكانت دعوتنا لكل من يخالفنا الرأى إننا ننتظر التحقيقات الرسمية ، بالرغم من إن ناس كتيرة كانت أصدرت أحكام إستباقية وحكمت على مصر وعلى الجيش المصرى بكل ما يشين ، لمجرد إرضاء وجهات نظرهم ، الــ….. وإلا بلاش أحسن 🙂 .. وبرضوا و مع وصول وزيرة الخارجية المكسيكية ، وقيامها بعمل مؤتمر صحفى مع الوزير سامح شكرى ومطالبتها لمصر بالتحقيق العاجل فيما حدث .. نفس الناس دول قعدوا يزيّطوا وكأنهم شمتانين فى مصر وحطوا رجل على رجل وهم بيطالبوا بتبرير مصر لما حدث أمام السلطات المكسيكية … وعجبى !!

النائب العام اصدر قرار بمنع النشر لحين إنتهاء التحقيقات .. وامبارح بس قالت وزيرة الخارجية المكسيكية كلوديا رويز ماسيو ممثلةً لبلادها ، إن نتائج التحقيقات أكدت اللى قالته السلطات المصرية ، وهى أن السياح المكسيكيين هم اللى دخلوا منطقة محظورة ، و إن وكالة السفر اللى استأجرتها السياح المكسيكيين هى المسئولة عن مقتلهم ، حيث إنها لم تبلغهم أن هذه المنطقة محظورة.. 🙂 🙂

وقالت الصحف المكسيكية اللى غطت المؤتمر الصحفى السنوى لوزيرة الخارجية المكسيكية أمام جميع سفراء دولة المكسيك إن الوزيرة قالت إن التحقيقات أكدت أن وكالة السفر كان ينبغى أن تكون أكثر وضوحا من البداية ، وإن نتائج التحقيقات ، بتنفى تورط القوات الأمنية فى أى هجمات ضد المكسيكيين ، وخصوصاً إن الأوضاع الأمنية الحالية تختلف عن الأعوام السابقة .. وأكدت إن التحقيقات خلاص أصبحت على وشك الإنتهاء !!

فى الحقيقة بــ أستغرب من كل الزياطين اللى بيدعوا حب مصر ، ومش بيسيبوا حادثة أو اى مناسبة غير لما بيهاجموا الدولة والحكومة والجيش والشرطة ، واحياناً بيهاجموا الشعب بحجة إنه شعب جاهل ومتخلف .. وبصراحة مش عارف هل اللى عايز يسقط الدولة ، أو اللى بيقبض فلوس علشان يهاجم مصر ، ياترى ممكن يعمل إييه أكثر من اللى الناس دى بتعمله !!؟؟ … وعلشان كدة ماعنديش حاجة اقولها لهم غير جملة واحدة من كلمتين وبس …. “جاتكم نيلة” !!!

لمتابعة تعليقاتكم