05 Nov 2016
وأخيــــراً مصـــــر علــــى الطـــريــــــق الصحيــــح
ما بين المتاجرة بالفقراء … والإصلاح الإقتصادى الحقيقى
——————————————————-
الجنيه اتعوّم …. الغلابة …. البنزين زاد ….. الغلابة …. الاسعار ذادت …. انتوا مش حاسين بالغلابة …. المفروض يتعمل مش عارف اييه …. الغلابة ….. احنا فين من كوريا و ألمانيا و ماليزيا و تركيا و البرازيل ….. و احنا مش مهم …. انا بتكلم عشان الغلابة …
بدون مقدمات …. و بعد الاتهامات الجاهزة بالتطبيل و العماله للدوله و الخيانه لأننا للاسف مع الوطن …. و عشان وقت الجد ابتدى و خلاص مافيش وقت للطبطبة …. و لان زي ما قلنا قبل كدة ان في اوقات كتير … الواحد بيحتاج لقلم جامد عشان يفوق من الحالات الهستيرية عشان يفوق من عيشة الاوهام اللى هو عايش فيها و يعيش على أرض الواقع ويعيش الحقيقه حتي و لو كانت مُرّه …. فـ كلامنا النهارده مش جديد لكن ممكن يكون حاد و صادم للبعض ….
للاسف مفهومنا للفقر و الفقراء اختلف …. و الرسول الكريم اللى داق مرارة الفقر و كان ايام كتير ماكانش في بيته من اوله لاخره غير تمرة واحدة ، و ايام كتير كان بــ ينام من غير اكل …. قالّنا ان أصدق السؤال هو سؤال الطعام …. يعني اللى مش لاقي ياكل بجد هو الفقير اللى ضاقت به السبل و مش لاقي لقمة يسد بيها جوعه …
و زمان و لغاية أوائل الخمسينات و بالذات بعد 1915 و حتي آواخر الاربيعينات بعد الكساد العالمي و بسبب الحروب العالمية الاولي و التانية و اللى أثرت على الاقتصاد المصري بشكل كبير جداً …. كان الفقير هو اللى مش لاقي ياكل بمعني الكلمة … و كان فيه ناس بالفعل بتقضى يومها بطوله من غير لقمة عيش واحدة ….. و اتطور المفهوم ده بعد كده على مر الايام حتي وصلنا للايام دي ….. و مع ان في اوروبا و امريكا و حتي اليوم في 2016 يوجد فقراء بهذا المعني … انهم مش لاقيين اللقمه بحق ربنا … و فيه مئات الالاف اللى ممكن يموتوا من البرد و الجوع في الشوارع … الا ان الفقر في مصر بقي ليه مفاهيم تانيه غير اللى موجود في العالم. (صورة المقال فيها صور لفقراء أوروبا)
و ده لان المتاجرة بالفقراء و الغلابة بقي في بعض الاحيان بتكون إما سبوبة .. او للدفاع عن مصلحة أو منفعه للى بيتكلم باسمهم …. فمثلا البعض يقول ما دام انا معنديش عربية … فــ أنا فقير !!! … و لو عيالي مش في مدرسه خاصة … فــ أنا فقير … أو لو مش ساكن في شقه تمليك فــ أنا فقير …. أو لو مش باخد مرتب زي اللى بسمع عنهم و بتفرج عليهم في التليفزيون … فــ أنا فقير …. و ده لأن مجتمعنا و لظروف و اسباب كتيييير تم تشويه افكاره لسنين طويلة … فأصبح الكل مشغول بغيره … يبص على الاغني منه من وجهه نظره … و يتكلم بإسم الافقر منه …. لكن هل بــ يبص لنفسه و يشتغل على نفسه ؟؟؟؟ …. أكيد لأ …. و ده كان المطلوب …. انك تفضل تدور في دايره مفرغه من الكلام … مجرد الكلام و التنظير و المشاورة من بعيد …. و ده في كل المجالات …. فــ للاسف كلنا اصبحنا نستدعي النظريات الاقتصادية و السياسية و العسكرية و الامنية و الرياضية في اي حدث …. فالكلام و الجدل جاهز و بدون حد اقصي … المهم …. اني اتكلم …. لكن اخر حاجة ممكن اعملها اني اشتغل على اصل مشكلتي و احلها … لاني دائما و أبداً مشغول بغيرى ….
فـ يا اما مشغول بالدول الاغني …. او بضحك و بــ أتريق على الدول الافقر اللى دايما بتكون بلده …… و بنفس المنطق …. فــ برضوا الناس مشغولة و بــ تبص على الناس الاغني منها … و بتتكلم باسم الناس الأفقر منها …. وتلاقى الواحد من دول حالف ميت يمين انه لولا انهم مش واخدين بكفائته و رأيه … كان اشتغل ، و نجح ، و أخد المجتمع كله معاهم في النجاح … لكن هو مش هــ ينجح و لا هــ يشتغل لانه نفسه مسدودة من الفساد و السرقه اللى معطلاه عن الشغل و النجاح … و لولا سدة النفس كان كسّر الدنيا ……… لأنه اتربي واتعود على الوضع ده …. و بيحارب و بيتاجر بغيره عشان يفضل كده ….. و لما تقول له السوريين نجحوا في طول مصر و عرضها و بدأوا من تحت الصفر … يقولك دول اصلا مليونيرات و اشتغلوا بفلوسهم … و كأنهم ماكانوش عايشين وسطنا و كلنا شوفنا بداياتهم و ازاي بداوا من تحت تحت تحت الصفر …. يعني كانوا يصنفوا فقرا و لاجئين اجانب في بلد غريب عنهم … و وصلوا لاييييه النهارده !!!
و دايما و ابدا كان بيكلمنا عن حاجة مصر للمشاريع القومية الكبرى اللى توحد الناس حواليها و اللى لو مصر بدأت فيها …. ممكن يجوع و يشتغل ليل نهار لان مستقبل مصر مرتبط بيها …. و اللى لما بدأنا فعلا في تنفيذها …. قعد يتريق عليها و يتفلسف و يسفسط في جدواها الاقتصادية !!!!!
و دايما و ابداً كان قاعد يقارن و يتغني بفشل مصر لما بــ يقارنها بتجارب كوريا و ألمانيا و ماليزيا و اندونيسيا و سنغافوره و البرازيل …. و يقولك شوف الناس دي عملت ايه و بقت فين و احنا محلك سر …. و لما مصر جت امبارح تعمل نفس اللى عملته الدول دي … و لكن بشكل مخفف و على مدار شهور طويلة و مستنيين دورك انك تموت نفسك و تضحى و تغير من نفسك و تشتغل و تقوم بنفس الدور اللى عملته الشعوب دى لاجيالها القادمة …. قعد يصرخ ويرفّس برجليه و يقولك انا مش عايز ده … انا مطلبتوش أصلا. 🙂
حضرتك الدول دي كلها لما بدأت كانت العملة المحلية في الارض و ملهاش تمن … و جهازها المصرفي منهار تماما …. و الناس فيها مكانتش عارفه تاكل بالمعني الحرفي للكلمه … و بالرغم من كده ….. اول حاجه عملتها … و بشكل حاد و عنيف و مفاجىء و في اقل من ٢٤ ساعه ….. الناس صحت الصبح لقت ان الدعم قد اُلغي تماماً …. و اسعار الطاقه بقت بالسعر العالمي …. و اسعار الاكل و الشرب و اي سلعه اتضرب في عشر اضعاف ….. و كمان مفيش تامين صحي لان مكانش فيه ميزانيات تغطيه …. و تم اغلاق الجرايد و في دول تانيه تم الغاء الصحافه و الاحزاب او تقيدها عشان يمنعوا الكلام و السفسطه …. و الدوله قالت للشعب اللى مش حيشتغل حيموت من الجوع و ملناش دعوه بيه ….. و لما الجوع اكل الناس …. تقبلوا الوضع و اشتغلوا …. محدش كان بيشتغل بمهنته او بتخصصه …. لكن الكل بالمعني الحرفي للكلمه نزل اشتغل بايده في المصانع و المزارع …. لانه لو معملش كده … عياله حتموت من الجوع …. و بعد عشر سنين على الاقل من العمل المتواصل …. بدأت الامور تتعدل … و اقتصاديات الدول دي وصلت للي شايفينه النهارده من تقدم و رخاء اقتصادى.
و يا ريت تراجعوا الرساله اللى بعتناها ليكم في مقال تم نشره من اكتر من شهر و نص …. عن التجربة الكورية ، و ازاي كوريا نهضت و ياريت ترجعوا للمقال عشان نعرف النعمة اللى عايشين فيها …. و عشان تعرفوا ان التجربة المصرية هــ تكون تجربه رائدة ، العالم كله هــ يتكلم عليها و الدول الناشئه هــ تحاول تكررها … و هي ازاي تصلح اقتصادك بأقل الاضرار الاجتماعيه و بأقل تكلفه يدفعها.
و عشان نجيب من الاخر ….. مفيش دوله عايزه اقتصادها يتصلح بجد ( و حط تحت بجد دي 100 خط ) و ينصلح حال شعبها و يزيد مستوى معيشة شعبها و تبقي متقدمه غير لما تبدأ اول خطوه و هي تعويم عملتها و رفع الدعم نهائي … غير كده يبقي احنا بنضحك على نفسنا او اننا اخدنا على اللى يضحك علينا و يمشينا بالمسكنات زي ما كان بيحصل معانا من عشرات السنين اللى فاتت.
للاسف و لسنين طويله جدا كنا ماشين بالمسكنات …. بمبدأ … مش عايزين مشاكل …. و لبس لده طاقيه ده … و ادي باليمين و خد بالشمال … لكن الكل كان بيخاف يصلح بجد …. و النتيجه اننا اصبحنا شعب عايز اللى يطبطب علينا و ياكلنا و يشربنا و يدينا مواصلات و علاج و تعليم بالمجان …. و النتيجه الان …. اننا وصلنا ان عندنا بالفعل ارخص علاج و ارخص تعليم و ارخص مواصلات و اقل تكلفة معيشيه على مستوى العالم …. لكن معندناش جَوده لا في تعليم و لا في صحه و لا في اي حاجه … و وصلنا لمرحله اننا كمان شويه مش هــ نلاقي حتي لا الصحه و لا التعليم و المواصلات و لا ايه حاجه و اللى هى اصلا مش جيده .
و بعد هوجة يناير …. أخدنا اسوا قرار اقتصادي في تاريخنا … اننا زودنا المرتبات في قطاعات كتيييير و رفعنا المرتبات من 90 مليار في السنه الى 210 مليار بدون غطاء انتاجي يقابله …. في الوقت اللى كمان كان معظم المصانع بتقفل …. و النتيجه هي التضخم و زياده الاسعار المنفلته و اللى كانت حتبقي بلا نهايه .
و عشان منضحكش على نفسنا ….. لازم نرفع القبعه للبنك المركزي اللى لعبها بمنتهي الذكاء … و عمل اسهل تعويم عمله حصل في التاريخ و بآثار تدريجيه على مدار شهور عشان الناس متحسش بيه بشكل حاد زي ما بيحصل في اي دوله بتعوم عملتها …… فأصلا الجنيه متعوم بقاله شهور فاتت 😊😊 …. و انا و حضرتك و اللى قاعد جنبك عارف ده …. لكن عاملين نفسنا اننا مش واخدين بالنا 😊😊 …. لان كل السلع المستورده و من شهور مُقومه بسعر السوق السوداء و اللى كان بيحددها شوية تجار صيع و رجال اعمال و مضاربين و بيرفعوا قيمته زي ما هما عايزين … فالسلعه المستورده اللى حضرتك بتشتريها من شهور أصلا سعرها مقوم حسب السعر السوقي و ليس الرسمي …. يعني التعويم ده تحصيل حاصل و بالعكس … ده حينزل الاسعار … ازاي ؟؟؟
اللى عمله البنك المركزي انه نفذ خطه اعمل نفسك ميت 😊😊 …. و ساب المضاربين يلعبوا كام شهر عشان اسعار السلع تطلع بالتدريج …. و ساب السوق السوداء تنتشر و يبقي فيها سيوله دولاريه كبيره لما طمّع الكل انه ميطلعش دولاره برا البلد و يستثمر فيه في السوق الداخلي ….. و لما اتأكد ان الاسعار كلها ارتفعت و المجتمع امتص آثارها …. و السيوله الدولاريه موجوده في السوق السودا ….. استني لغايه بداية تطبيق اتفاقيه اليوان الصيني الدولية اللى فُعّلت في 1 نوفمبر …. و قام قافل الحنفية …. و سحب كل السيولة اللى في السوق السودا داخل الجهاز المصرفي و تحت رقابته ….. و قالهم كفايه كده عليكم ….. و الي اللقاء في عمليات اخرى ناجحه 😊😊
و عشان نتكلم بوضوح …. فالقطاع المصرفي المصري من اقوى القطاعات المصرفيه في العالم … و يكفي اننا نفكركم اننا يمكن نكون الدوله الوحيده في العالم التي لم تتأثر بكارثة انهيار الاقتصاد العالمي في 2008 لقوة القطاع المصرفي المصري ….. و افتكروا برضوا ان لما افلس بنك الاعتماد و التجاره العالمي و كل مودعيه على مستوى العالم صحوا الصبح لقوا رصيدهم بقي صفر ….. الفرع الوحيد في العالم اللى رجع فلوس عملاؤه …. كان فرع البنك في مصر و ده بسبب قوة القطاع المصرفي المصري و بنكه المركزى😊😊 …
و هو برضوا اللى كان شايل مصر الخمس سنين السوداء اللى فاتت …. و اللى اي دوله تانيه لو واجهت اللى واجهناه اقتصاديا كانت انهارت ….. و برضوا القطاع المصرفي المصري هــ يعرف يسيطر على سوق العمله الفتره اللى جايه …. و حيقدر يمتص هلع السوق الصدمه اللى حصلت ليه …. السعر بدأ ب 14.40 و انتهي في حدود ال 16 …. و في خلال كام اسبوع السعر هــ يستقر و هــ يرجع ينخفض للسعر العادل بتاعه …. و اللى هــ يكون في حدود المصلحه الاقتصاديه و اللى محددها البنك المركزي
اما اللى بيتكلم و يقولك دى شروط البنك الدولي …. فده ساذج جداً …. لان ببساطة خالص ، خطه الاصلاح الاقتصادى دي مصريه خاااالصه …. و اتاخرت كتيييييير من سبعينيات القرن الماضي …. و الكل كان خايف يمد ايده فيها زي ما محدش مد ايده في مشروع تنمية سيناء و محور قناه السويس و مشروع الوادى الموازى لوادى النيل ….. و الخطه دى اعلنت بعد تولي الرئيس السيسي و قالها صراحه …. الدعم المفتوح هــ يتلغي …. و عامةً بحسبة بسيطة …. فرق ميزان المدفوعات ما بين التصدير و الاستيراد حوالي ٧٠ مليار دولار …. يعني ٢١٠ مليار دولار في الثلاث سنوات …. و قرض البنك الدولي يا دوبك ١٢ مليار دولار على ثلاث سنوات …. يعني المبلغ ده نسلك بيه سنانا في بلد كبير بحجم مصر ….. لكن القصة هي الشهادة الدولية ….. و اللى رفعت تصنيف مصر العالمى في اقل من ٣ ساعات بعد الاعلان عن خطوه التعويم ….. و ده كان بالتوازى مع بيان ال ١٧ قرار لتنشيط الاستثمار ….. و اللى ليه في القراية يقدر يخش على المواقع المعتبره الاقتصاديه العالميه و يشوف بيقولوا ايه على مصر ….. و حمله تشجيع الاستثمار المباشر اللى هــ تخش البلد الفتره اللى جايه.
اما اسعار البنزين …. فزيادته طبيعيه و بنفس نسبة تعويم الجنيه …. و ده اتقال من سنتين فاتوا اننا لازم هــ نشيل الدعم تماما عن الطاقه و المحروقات …. و ان ده حيحصل على مراحل …. يعني مش جديد ….
طب تأثير الكلام ده على الناس اييه !؟ ….. و طبعا الكلام اللى هــ نقوله ده حيكون صادم للبعض …. لكن دي رساله تانيه مننا ليكم و يا رب توصل …. لان مفيش وقت نزوق الكلام و يا رب تركزوا معانا و تستوعبوا كلامنا …..
في كلمة و رد غطاها و بالمختصر المفيد و في خلال فتره الاصلاح اللى داخلين عليها …. اللى هــ يشتغل بإيده …. و اللى هــ يتعلم صنعه و يشتغل بيها هــ ياكل الشهد ….. و اللى هــ يفضل عايش في قوقعه البدله او لقب الباشا و الباش مهندس و شغل المكتب … ربنا يتولاه ….. يعني ايه !!!!!؟؟
الطبقة الغنية و دي مش هــ يفرق معاها حاجه …. و الطبقة الفقيرة …. و دي مش هــ تتأثر بشكل كبير لانها بتتغطي بمنظومات دعم سواء حالية او قادمة للى مش بيقدروا بالفعل يشتغلوا بسبب السن او بسبب عاهه تمنعه عن الشغل زي منظومات تكافل و كرامه اللى بالفعل بتغطي مليون و نصف اسره و غيرها من المنظومات اللى حيتم تفعيلها و ده ماحصلش في اي تجربه من تجارب النهوض اللى عملتها اي دوله قبل كده …. و ده يحسب للدولة المصرية في تجربتها الفريدة ….. و اللى قادر على الشغل فـ ماعندهومش مشكله انه يشتغل شغل مهني او حرفي و مفيش مشكله عنده انه يلبس عفريته و يشتغل بايده….. و بينزل يشتغل في المزارع بيوميه من الساعه 8 الصبح الى الساعه 12 الضهر بيوميه 200 جنيه و لو كمل بيطلب يوميه جديده ب 200 جنيه تانيين ….. او بينزل يشتغل في المدن و بيشتغل و يجوع لغايه لما يبني نفسه لمده سنتين تلاته و بعدين يفتح ( السبوبه بتاعته) زي ما بيحبوا يطلقوا عليها و بينجح
اللى هــ يدفع الفاتورة الفعلية للاصلاح هم الطبقي الوسطي …. فعلا الطبقة الوسطى اللى لازم تغير تفكيرها و ثقافتها شويه …. و متزعلوش من كلامنا لكن دي الحقيقه ….. فـ الطبقه الوسطى اللى هي مش غنية … لكن عايشة و متشعلقة في اسلوب حياة الطبقات الغنية …. و هي اكتر طبقة مستهلكة …. و معظمهم عايش عيشة استهلاكية مش بتاعته …. و ابسط مثال على كده …. ممكن واحد مرتبه 5 الاف جنيه و ماسك موبايل ب 9 الاف جنيه و يتسرق منه و يجيب واحد بداله …. و مش ممكن يفكر انه يشتغل شغله حرفيه او يفتح مشروع حرفي لانه و من سنين طويلة له وضع اجتماعي مينفعش يبوظه .
و عامه الموضوع ده بالذات احنا هــ نركز عليه الفتره اللى جاية …. و يا ريت يوصّل لكم رساله تانيه … امهاتنا و كل بيوتنا اللى اتربينا فيها كان فيها مكنة خياطه … و اللى مكانتش بتخيط و تبيع انتاجها … كانت على الاقل بتخيط لبيتها و توفر بند الملابس من ميزانيه البيت ……… وصلت ؟؟
مصر بدات مشوارها …. و بتبني نفسها … و الناس كلها بمختلف طبقاتهم حتبدأ تحس بالفرق الحقيقي و التحسن من اوائل ٢٠١٨ و لان اللى جاي ما يخطرش على بال حد …. احنا عمرنا ما سرحنا بيكم و لا قلنالكم كلام و محصلش …. لكن الكورة الان في ملعبكم …. في ملعب الطبقة المتوسطة …. هــ تشتغلوا و تقللوا استهلاكم و تغيروا من نمط المعيشة … هــ نكون اول شعب في العالم ينهض بدولتة بدون جوع و لا مجاعات و لا ناس بتموت من الفقر زي ما حصل في كل التجارب اللى حصلت مع البلاد اللى كانت زينا …
الخير قادم … و اكتر مما تتخيلوا …. مصر بدات الطريق الصح لاول مرة … و مهما اتكلموا و مهما حاولوا يسودوا الصوره في وشكم ….. و مهما عملوا …. لقد سبق السيف العزل … و المركب اتحركت …. و محدش لا هــ يعرف يرجعها مكانها و لا يغرقها .
تحياتنا