حرب الاشاعات ما بين المواطن الزومبي و الانتحار القومي – (الجزء السابع)

05 Apr 2019

حرب الاشاعات ما بين المواطن الزومبي و الانتحار القومي – (الجزء السابع)

إشاعة صفقة القرن – بمبدأ كلم الجماعة تلهيك و اللى فيها تجيبه فيك

===========================================

نكمل حديثنا عن حروب الاشاعات و الحرب النفسية التي يقوم بها اعداء الوطن على الشعوب لتدمير نفسها بنفسها …. و كيف ان هدفها ان تُدخِل المواطن في حلقة مغلقة من الشك و الجدل و العقيم …. حتي تخلق حالة للمواطن انه يستعر من وطنه ، و تؤدي بيه “للإحباط” …. اللى بــ يؤدي الى الشعور بالحزن الشديد ، و أن مفيش حاجة في حياته لها قيمة او أمل ، فــ يتحول الى مواطن منغلق على نفسه دائماً وغير قادر على استقبال أية أفكار إيجابية و الإحساس الدائم بالفشل في الحياة العملية والأسرية … ثم يتحول الى مواطن فاشل مدمر لكل شىء حوله … “كائن زومبي” …. عشان يوصلوا الى الهدف الرئيسي ليهم و هو “الانتحار القومي” ….. فــ يتم تدمير الدولة المصرية بــ إيد المواطن المصري بنفس ذات نفسه … زي انتحار الحيتان في البحر لما بــ يقرروا ينتحروا جميعاً.

إشاعة صفقة القرن المزعومة – مصر بتقنع العرب انها هــ تتنازل عن سيناء للفلسطينيين لصالح اسرائيل

——————————————————————————————————

مصر باعت القضية خلاص و بتنفذ اوامر امريكا …. و هي اللى بتحاول تقنع العرب بصفقة اسمها صفقة القرن عشان ترضي ترامب … و باعت ارض سيناء لاسرائيل اللى هــ يهجروا فيها اهل غزة عشان اسرائيل تاخد أرض فلسطين مشفيَّه و اسرائيل هــ تدّي مصر حتة أرض بديلة في صحراء النقب … و اهل الضفة هــ يروحوا الاردن و بكدة يخلص الموضوع … و كله بمباركة مصر.

  • طب جبت الكلام اللى بالتفصيل ده منين …. يعني مصر اعلنت رسميا او فيه بيانات طلعت بكدة ؟؟؟
  • يقولك انت مسمعتش الرئيس السيسي لما كان في امريكا مع ترامب و هو اللى قال بنفسه و على الهواء مباشرة انه بيدعوا امريكا انها تقبل و تدعم صفقة القرن.
  • طب ايه عرفك ان هدف مصر من الحل النهائي ” اللى اطلق عليه صفقة القرن ” هو الهبل اللى حضرتك بتقوله ده ؟
  • يا عم ده منشور في كل حته … انت مسمعتش الجزيرة و قناة الشرق و مكملين … و حتي كل قيادات الاخوان و النوووشتااااء و كل المعارضين بيقولوا الكلام ده … بلدك بتتباع و احنا رافضين الكلام ده و خايفين على ترابنا الوطني
  • يا رااااجل 😊 😊 … انت اللى بتخاف على التراب الوطني !!!!!! ….. ماعرفتكش أنا كده 😊 😊

اللى فات ده هي الاسطوانة المشروخة اللى بيكررها بعض الناس زي البغبغانات … و بــ يرددوا نفس كلام الجماعة الارهابية اللى بتستخدم من سنين اسلوبها في رمي البلاء على مصر منذ سبعينيات القرن الماضي بمبدأ “كلم الجماعة تلهيك و اللى فيها تجيبه فيك” …. و عشان يكون الكلام محدد …. و من غير لت و عجن و مزايدات فارغة بتاعة ، الناس دي اللى بــ تحاول تشوشر على مواقف مصر المعلنة و الواضحة و التي لا تقبل التأويل بأي حال من الاحوال :-

– موقف مصر من القضية الفلسطينية واحد و لم يتغير منذ اتفاقية السلام مع اسرائيل عام 1979 و حتي اليوم …. و هو كالاتي …. اتفاق سلام شامل عادل على اساس دولتين كاملتي السيادة طبقا لحدود 4 يونيو 1967… اي قبل حرب 5 يونيو …. و دولة فلسطينية عاصمتها القدس الشرقية …. و مرجعيته قرار الامم المتحدة رقم 242 …. و المفاوضات هي اللى هــ تحدد مواضيع اقتسام المياه و موضوع اللاجئين المستوطنات الحالية و الاشراف على المقدسات الدينية في القدس الشريفة …. و ان اساس العلاقات العربية الاسرائيلية هي المبادرة العربية التي اطلقت عام 2002 و المبنية على ماسبق و زائد عليها ارجاع الجولان المحتل .. و في المقابل ستطبع الدول العربية تطبيعا كاملا مع اسرائيل و اطلاق المشاريع الاقتصادية و التنموية المشتركة.

– الكلام ده و طوال السنين اللى فاتت و حتي اللحظة اللى بـ نكلمكم فيها …. مش بيعدي اسبوع إلا و بتعلنه مصر رسميا على لسان مؤسساتها الرسمية … و بشكل سنوى مصر بتعلنه بشكل رسمي في كلمتها الى العالم في كلمتها في الامم المتحده …. و رئيس الدولة المصرية مش بــ يسيب مناسبة … او لقاء … او مؤتمر صحفي … او في اي زيارة ليه مع اي رئيس دولة خارجية الا و يطلع و يكرر موقف الدولة المصرية الثابت و اللى متغيرش خالص … لدرجة انه اكتر من مرة يرسل رسايل مباشرة للشعب الاسرائيلي مباشرة عشان يضغطوا على حكومتهم للبدء في اجراء المفاوضات.

– كل رئيس امريكي بـ يجي …. يقول انه هو اللى هــ يخلص القضية الفلسطينية … و بعدها مايحصلش حاجة و المنطقة تنزلق اكتر في العنف …. فـ لما الرئيس يكون مع ترامب بعد توليه ولايته الجديدة و يقول انه لو دعمت امريكا خطة السلام و قام الرئيس الجديد اللى هو كان ترامب باللى فشل السابقون في تحقيقه … دي هــ تبقي صفقة القرن … يبقي اكيد الكلام عن حل القضية نفسها …. لانها لو اتحلت يبقي هــ تنقل المنطقة فعلا الى مكان جديد و هــ تقضي على العنف و الارهاب اللى بيستخدموا القضية دي في تغذية تجنيد الارهابيين …. و هــ يبقي فيه تعاون اقتصادي غير مسبوق هــ يعم على اهل المنطقة بالخير … و بالفعل هــ تكون صفقة القرن …. و من هنا جه الاسم لانها فعلا هــ تبقي للشعوب صفقة القرن .

– موضوع تبادل الاراضي بين مصر و اسرائيل ( ياخدوا العريش و رفح و يدونا قطعة من صحراء النقب ) ده مش جديد و لكن اسرائيل اعلنته اكتر من مرة من عشرات السنين عن طريق مراكز ابحاثها … و حتي امريكا حاولت اكتر من مره تطرحه علينا و احنا رفضنا مجرد طرحه للنقاش … و يمكن نفتكر الحديث بتاع احمد ابو الغيط في قناة القاهرة اليوم عام 2008 لما صرح علانية ان اسرائيل بتحاول تفرض الحل ده علينا بمساعدة نهايات طرفية لقوى اقليمية في منطقة الشرق الاوسط … و كان الانقسام الفلسطيني اول الخطوات الفعلية لترسيخ تصفية القضية الفلسطينية باقامة دولتين مستقلتين لفلسطين تمهيدا لنقل الاولي الى سيناء و الثانية الى الاردن … و كان بداية الضغط على مصر لقبول هذا الحل و كلنا نفتكر مئات الالاف من الفلسطينين اللى اقتحموا الحدود المصرية بعد ما فجروا الجدار الحدودي الفاصل بترتيب من اخوان غزة اللى هي حماس.

– و كلنا شوفنا ازاي كان بيتم الضغط على مصر بكل السبل الممكنة لانتزاع اعتراف مصر بدولة غزه عن طريق القبول بفتح معبر رفح بجوازات حمساوية و ليست فلسطينية … و شوفنا كمية المزايدات ان مصر محاصرة الشعب الفلسطيني لصالح اسرائيل و انها خاينة و عميلة و كلام كتير ملوش لزمة مع ان كانت قصة الانفاق مصر متساهلة فيها لابعد حد ممكن.

– و مع تفجر الوضع في المنطقة و نجاح الاخوان في الانقضاض على السلطة في مصر و تدمير سوريا و ليبيا … شوفنا ازاي اول جاسوس مدني منتخب كان عايز يمرر الاعلان الدستوري بتاع اقليم قناة السويس اللى كان حيرسخ فصل سيناء و قناة السويس عن مصر دستورياً …. و ده اللى رفضه الجيش تماما و قرر اطلاق قانون عدم تمليك اي اجنبي لارض سيناء إلا لمصري الجنسية …. و بعدها شوفنا ازاي انهم سابوا مصر كلها و بدأ الجهاد المسلح في المنطقة بتاعة العريش و رفح بالذات و دونا عن باقي مناطق الجمهورية … بمبدأ اللى معرفناش ناخده بالسياسة .. يبقي ناخده بالسلاح … و كل الكلام ده شرحناه بالتفصيل في مقال سابق اسمه “كلم الجماعه تلهيك و اللى فيها تجيبه فيك” .

– و لما بدأنا نظبط حدودنا و نشيل الانفاق و البيوت اللى كانت بتدير الانفاق … و بدأت مصر تبني و تعمر في سيناء و تعمل انفاق تحت القناة لربط سيناء فعليا بمصر و اقامة مدينة بئر العبد الجديده و رفح الجديدة و العريش الجديدة لنقل سكان الحدود اليهم و العديد من التجمعات البدوية الحديثة بخلاف تحديث شبكة الطرق تماما داخل سيناء و اقامة اكبر ميناء في الشرق الاوسط شمال سناء بخلاف امتدا عمراني لمدن القناه داخل سيناء …. و ايضا اقامة العديد من المطارات و القواعد العسكرية … و ده بعد دخول فرقتين عسكريتين كاملتين الى سيناء لاول مرة … و تطهيرها من الارهاب …. لقيناهم بيقولوا دول بيعملوا كده في سيناء عشان يفضوا سيناء و يدوها لاسرائيل على المفتاح 😊

الخلاصة … ان كل اللى بيزايدوا يقولون ما لا يفعلون و يفعلون ما لا يقولون … افعالهم على الارض بترسخ تنفيذ الآمال الاسرائيلية في الاستيلاء على كامل الاراضي الفلسطينية و على حساب الاراضي المصرية … و عاملين زي العثمانلي بغبغان تركيا … يشتم اسرائيل و هو الحليف العسكري و الاقتصادي و السياسي الاكبر ليها … يقول انا حامي الاسلام و خليفت المسلمين و هو اكبر واحد بيحارب الاسلام و المسلمين و بيقنن الدعارة و الكذب الممنهج و الشذوذ و بيدمر البلاد و العباد … بيقول انا حامي فلسطين و الطيارين الصهاينة بــ يتدربوا على ضرب غزة على ارضه و في اجواؤه … و غيرها كتيييير من المزايدات الفارغة …. زي كده لما بــ يتهموا مصر انها هي اللى بتسعي لتنفيذ مخططات اسرائيل مع ان العكس هو اللى صحيح و هم اللى نفسهم ان مخططات اسرائيل هي اللى تنجح.

في حين مصر هي الدولة الوحيدة اللى دايما و ابدا بتطلع ان هي اللى دولة شريفة في وقت عز فيه الشرف … و ان دائما رؤيتها هي اللى صحيحة و وطنية … و انها هي اللى بتدفع التمن … و بعد مواقفها بعشرات السنين … الكل بيرجع و يقول كنا احنا اللى غلط … و ربنا يرحم الرئيس السادات .

و اذا كانت اسرائيل و امريكا بيخططوا من زمااااان لتصفية القضية الفلسطينية اما بـ إبادة الشعب الفلسطيني تماما او بتبادل اراضي علي حساب الدول العربية او بأي خطة شيطانية اخرى … و لاقيين ناس وسطنها باعوا ضميرهم و بيقوموا بكل الافعال على الارض اللى تؤدي الى نجاح خططهم … فـ حقهم يفكروا و يخططوا زي ما هم عايزين لان اسرائيل اصلا اقيمت على مبدأ من النيل الى الفرات … و في وقت من الاوقات احتلت بالفعل سيناء …. و لو قدرت كانت كملت لغاية النيل بالفعل…. لكن الحقيقة اللى على الارض …. اننا الدولة الوحيدة اللى حررت ارضها بأيديها و حافظت على ترابها الوطني … و هي اللى موقفها السياسي واضح و لم يتغير ابداً …. و هي اللى واقفه امامهم جميعا و مانعه تنفيذ مخططاتهم للنيل من ترابها الوطني … و بتعمل المستحيل للحفاظ على القضية الفلسطينية رغما عن انف بعض الفلسطينيين انفسهم …. و في الاخر …. اللى بيشيل قربة بتخر على دماغه .

تحياتنا لحضرتكم

لمتابعة تعليقاتكم