مصر على الطريق فى قمة العشرين 2

5 Sep 2016

مصر على الطريق فى قمة العشرين 2

————————————-

طبعاً كان شئ مؤسف لكنه مضحك فى نفس الوقت ، كمية القلش وحملة التسفيه اللى تم شنها على مصر بعد تواجد الرئيس المصرى فى واحد من أهم المحافل الدولية بعد إجتماعات الأمم المتحدة وهو إجتماع قمة العشرين … و ده شئ عامل لكل المتشدقين ((المتشدقين كذباً فقط)) بحب مصر حرقان كبير أوى ، .. سواء كانوا من النشطاء أو من المغيّبين أو من المتثورجين على روحهم اللى عايشين فى دور جيفارا الشرق وهم للأسف بيتلعب بيهم حلو أوى أوى .. لأن أى حد فيهم ببساطة جداً كان لازم يبقى فخور ببلده وهى بتمثله فى تجمع دولى مهم زى ده … وحتى ياسيدى لو انت مختلف مع النظام ، لكن أكيد مش مختلف مع الوطن .. والمفروض لو انت إنسان طبيعى عندك إحساس وعندك الإختراع ده اللى انت ماتعرفوش اللى إسمه ((دم)) .. كان لازم تبقى فرحان ببلدك وعلم بلدك اللى بيترفع وسط اعلام أكبر 20 دولة إقتصادياً فى العالم !! .. لكن نقول إييه بقى … أصل الغرض مرض 🙂

الأهم من ده كله هو محاولة بعض من يحملون الجنسية المصرية خطأً إنهم يقللوا من حجم بلدهم ، وكأنهم فرحانين بكدة .. وبيحاولوا يوصلوا للناس إنطباع إن مصر من الدول الهامشية زيها زى تشاد والسنغال اللى حضروا الإجتماع برضوا … و ده قمة التدليس والسفه والظراط الفكرى والسياسى (ومش أسف على التعبير ده على فكرة) .. لأنهم إما جهله جهل بيّن ، أو إنهم بيستغلوا جهل الناس المحيطين بيهم وبيلعبوا عليه …. لأ يا حبيبى .. مصر حاجة تانية .. أو على رأى كابتن ميمى الشربينى المعلق الكروى المشهور .. (قماشة تانية خالص يا جماعة) .. =D

شوف يا حبيبى …

مصر زى ما قولنا فى المقال الماضى هى صاحبة الترتيب الــ 32 على العالم كأعلى ناتج محلى .. يعنى بينها وبين دول العشرين 12 مركز فقط .. وهــ تبقى الــ 31 فى نهاية العام بس نقول يا مسهل .. وإتكلمنا إمبارح فى النقطة دى وشرحناها كويس … أما السنغال وتشاد فــ واحدة مركزها الــ 116 والتانية غير مصنفة على ما أعتقد .. وتوجيه الدعوة لهم كان بصفة إعتبارية .. لأن السنغال رئيسة الشراكة الجديدة لتنمية افريقيا .. وتشاد ترأس الإتحاد الأفريقى فى دورته الحالية .. لكن مصر تم توجيه الدعوة لها بصفتها كدولة.

مصر دولة محورية فى الشرق الأوسط وخصوصاً إنها الدولة التى تمثل أفريقيا فى مجلس الأمن بمقعد غير دائم لمدة سنتين .. ورئيس اللجنة الأمنية بالمجلس .. ورئيس مجلس السلم والأمن فى الإتحاد الأفريقى وصاحبة أكبر جيش فى المنطقة ومن أقوى 10 جيوش على مستوى العالم .. الجيش اللى انت بكل هبل بتنادى بإسقاطه !

مصر صاحبة المركز الــ 15 على العالم من حيث التعداد السكانى .. يعنى كثافة بشرية وسوق مستهلك ، وكمان صاحبة أعلى ربحية من عوائد الإستثمار بالنسبة للمستثمرين اللى بتصل بعض ارباحهم إلى 150% .. وبالتالى هى دولة مهمة جدا للتجارة العالمية

مصر من الدول المتوقع لها نسبة نمو فى العشر سنوات القادمة فى متوسط 5% فى حين إن بعض دول العشرين ، متوقع نسبة نموهم تكون من 0% إلى 0.5% .. والبعض الأخر متوقع له إنكماش .. يعنى نمو بالسالب نتيجة تباطؤ الإقتصاد العالمى

مصر صاحبة اهم إكتشافات للغاز على مستوى العالم وهــ تبدأ ضخ الغاز فى النصف الثانى من 2017 .. ده غير الإكتشافات البترولية .. ومتوقع لمصر إنها تكون من أهم الدول المصدرة للغاز خلال العقد القادم .. يعنى قوة إقتصادية بتضاف للمنطقة وللعالم كله … أومّال إحنا بنتسلح ونقوى جيشنا لييه !!؟؟ 😉

مصر هى مدخل التجارة لأفريقيا واللى بتعتبر قاطرة النمو العالمى فى خلال الــ 40 سنة القادمين .. و ده غير إن مصر بتعمل عاصمة إدارية جديدة ، و محور التنمية فى القناة ومناطق لوجيستية .. وكل الدول الكبرى يهمها إنها تكون متواجدة فيهم وتاخد حتة من الكيكة لأن ده هــ يفيد إقتصادهم بشدة زى ما هــ يفيد الإقتصاد المصرى فى ظل التباطؤ اللى بيشهده الإقتصاد العالمى زى ما الرئيس الصينى قال فى كلمته .. وتلاقى حتة عيل كاتب على صفحته .. أو صحفى بيكتب مقال .. أو إعلامى طالع فى برنامج يقوللك الإقتصاد المصرى بينهار .. وفين الأزمة اللى فى العالم دى !!؟؟ .. زى بالضبط اللى شايف دول حوالينا بتنهار بفعل فاعل ويقوللك هى فين المؤامرة !!

مصر مرشحة إنها تنضم لمجموعة البريكس كعضو مراقب بترشيح من روسيا .. ده إذا ماكانش بعضوية كاملة .. و ده لو حصل ، هــ يبقى له مردود كبير علينا كدولة نامية وصاحبة إقتصاد واعد .. والموضوع ده هــ نتكلم عنه فى مقال منفصل قريب بإذن الله 🙂

مصر بالفعل وبعد السنتين اللى فاتوا والصراعات السياسية والعسكرية والتحول اللى بيشهده العالم من خلال لعبة تبادل مراكز القوى وعمليات وتأكيد مناطق النفوذ اصبحت فعلا قلب النظام العالمى الجديد اللى إحنا دايما بنعمله هاشتاج للصفحة .. لأن بلدنا فعلا دولة محورية ، واللى بتكون فى صفه يبقى إمتلك أو على الأقل حط رجله فى الإقليم بالكامل .. ولاحظوا إن اللى وجه الدعوة لمصر هى دولة الصين .. والإستقبالات الحميمية الرائعة والترحيب برئيس مصر بغض النظر عن الأسماء .. ووضع الرئيس المصرى على العشاء بين الرئيس بوتين والمستشارة الألمانية ميركيل ولقائات الرئيس السيسى بيهم فى إجتماعات مغلقة على هامش القمة واللى ماحدش عارف إييه اللى إتقال فى الإجتماعات دى .. وعلى الطرف الأخر المعاملة المزرية اللى تم التعامل بيها مع الرئيس الأميريكى .. والتجاهل سواء كان فى الإستقبال فى المطار أو حتى داخل القاعة واثناء التجمعات البروتوكولية .. هو رسالة بتقول إن ده هــ يكون شكل الأقطاب الجديدة للعالم واللى عايز يعض فى صوابعه ، يعض بس يحاسب احسن يتعور =D

مصر مش دولة هفأ زى ما الـ…… (مش عايز اشتم) بيحاولوا يصوروا لينا .. والرئيس السيسى والوفد المرافق إنتهزوا القمة كأفضل ما يكون .. وتم عقد لقاءات ثنائية مع الرئيس الصينى ورئيسة كوريا والرئيس الروسى  والرئيس الأرجنتينى والمستشارة الألمانية وولى ولى العهد السعودى ورئيس وزراء اليابان وسكرتير عام الأمم المتحدة ومديرة صندوق النقد الدولى .. وكلها كانت لقاءات إيجابية وحققت الغرض منها بدون الدخول فى التفاصيل علشان بس ما نطولش عليكم .. وفيه كمان اخبار لم يتم التأكد منها وهى قيام الرئيس الأرجنتينى بتوجيه الدعوة للرئيس السيسى لحضور قمة العشرين فى سنة 2018 اللى هــ تعقد فى الأرجنتين (واخد بالك إنت من 2018 دى) 🙂 🙂

كلمة الرئيس السيسى كمان فى القمة كانت تعبر عن دولة قائدة ورائدة فى المنطقة .. إتكلم فيها الرئيس عن موضوعات متعددة زى الشراكة المصرية الصينية و مكافحة الفساد وما يمثله من أولوية لمصر، وإستعادة الأموال المصرية المنهوبة والشراكة التجارية .. وموضوعات إقتصادية ومالية تهم الدول النامية بشكل كبير وحيوي … يعنى مصر ما كانتش رايحة سد خانة .. لكن لها رأى ولها دور معتبر ومهم ، واللى مش عايز يشوف كدة هو حر .. بس والنبى ماتبقاش تقهر نفسك وتهاجم مصر وتسفه منها … طب هو فيه فاشل بيتهاجم بالشكل ده =D

وأخيرا إحنا بس حبينا نوضح فى إننا كنا يمكن الصفحة الوحيدة اللى نوهنا فى مقالنا الزيارة الصينيه ضبة في مقتل  فى يناير الماضى وأثناء زيارة الرئيس الصينى لمصر عن دعوة الصين لمصر لحضور قمة مجموعة العشرين ..

وناس كتير أخدت الموضوع بشكل عادى ولم تعره أى إهتمام برغم إننا كنا عارفين مدى أهمية مشاركة مصر فى الحدث ده وفى دولة زى الصين .. وخصوصاً بعد الرسالة القوية اللى وجهتها الصين للعالم كله ، إنه فيه قطب بيولد النهاردة ومش بيعمل إعتبار للقوى العظمى الموجودة حاليا ، وإن التنسيق فى المرحلة القادمة على المستوى الإقتصادى والسياسى هــ يكون مع دول محددة .. واحدة منهه بالتأكيد هى مصر 🙂

مصر ياللى ماتعرفش يعنى إييه (((-مــــصـــر-)))

لمتابعة تعليقاتكم