25 Jun 2016
الخروج الكبير للإنجليز من الإتحاد الأوروبى ..
المردود الإيجابى والسلبى .. (الجزء الأول) .. !!
———————————————
شوفو بقى …
خلينا نتفق فى الاول على حاجة مهمة جداً .. وهى ان أى خبير من خبراء الهريولوجى هايتكلم ويفتى ويقول هو عارف اللى حصل ده حصل إزاى .. يبقى ده أو خطوة على طريق الهرى الفيسبوكى والاعلامى .. لأنه ببساطة خالص كل الاشخاص والجهات والمؤسسات الامنية اللى فاهمين حقيقة اللى حصل عمرهم ما هايتكلموا ولا هايقولوا الحقائق .. لا فى الاعلام ولا على الفيسبوك 😉
احنا بقى هنا بما ان صفحتنا كانت توقعت اللى حصل .. ومن فترة طويلة .. وقولنا الكلام ده تلميحاً وتصريحاً فى اكثر من مقال … زى مقال تحالفات المعسكر الشرقي …
واللى قولنا عليه بدأت بوادره تبان دلوقتى .. فــ إحنا برضوا مش هــ نناقش اللى حصل ده حصل إزاى .. ولكن هــ نحلل الواقع .. وهــ نقول كمان توقعاتنا المستقبلية من واقع البنورة السحرية برضوا … 🙂 … مع الوضع فى الإعتبار إن فك الإرتباط بين إنجلترا والإتحاد الأوروبى مش هــ يحصل بين يوم وليلة .. لكن هــ ياخد فترة طويلة .. لأن ده له علاقة بمؤسسات إقتصادية ، وإلتزامات مادية وسياسية وتعاملات حكومية .. وتوجهات عامة على مستوى الدول ماينفعش تخلص كدة فجأة .. وبالتالى فــ إحنا لازم نفهم أبعاد الموضوع من كل جوانبه ..
أولا .. بريطانيا هى ثاني أقوى اقتصاد في أوروبا بعد الاقتصاد الألمانى وثانى اقوى بورصة فى العالم … وبحسب موسوعة ويكيبيديا الشهيرة .. تعتبر عملة انجلترا وهى الجنيه الإسترليني ثالث أكبر احتياطي للعملة في العالم بعد الدولار الأمريكي واليورو .. ومش كدة وبس .. لكنه كمان يعتبر رابع عملة الأكثر تداولا في سوق الصرف الأجنبي المسمى فوركس بعد الدولار الأمريكي واليورو والين الياباني …. يعنى ببساطة خالص .. خروج إقتصاد بهذه القوة من دائرة الإتحاد يعتبر خروج كارثى بالنسبة لدول الإتحاد الأوروبى .. وضربة إقتصادية قوية ومؤثرة على إستمرار قيام هذا الإتحاد !!
ثانياً .. داخل الإتحاد الأوروبى طول الوقت كان فيه شد وجذب بين إنجلترا صاحبة المؤسسات العريقة والإقتصاد القوى والقرار السياسى المنفرد والتوجهات اللى بتخلى إنجلترا دايما هى رأس الشر المدبر لأحداث كتيرة من اللى بتحصل على ستوى العالم وخصوصاً فى منطقتنا العربية .. وبين ألمانيا صاحبة القاطرة الإقتصادية العملاقة ، وتاريخ الجنس الأرى المعروف .. وأصحاب الكلمة العليا فى معظم قرارات الإتحاد الأوروبى .. واللى بيحاولوا بشتى الطرق يخرجوا من عباءة الهيمنة الأنجلوأميريكية … و ده بيخلى إنجلترا طول الوقت فى حالة تحفز سياسى داخلى ، وإن لم تكن ظاهرة !!
ثالثا .. و ده اللى إتكلمنا فيه بس ماحدش صدقه .. إن دول كتيرة داخل الإتحاد الأوروبى بتعانى بشدة على المستوى الإقتصادى زى إيطاليا وفرنسا وأسبانيا واليونان .. وعندهم حالة من إرتفاع البطالة .. واللى بيدفع المواطنين فى الدول دى للهجرة إلى إنجلترا بحثا عن فرص عمل .. و ده عامل لإنجلترا مشكلة كبيرة نتيجة التدفقات الغير محسوبة .. وخصوصاً من مواطنى أوروبا من الدرجة الثانية واللى هم المواطنين الغير أوروبيى الأصل ، ولكنهم حاملين لجنسية الدول دى !! .. و ده بالإضافة إن الإقتصاد الإنجليزى تأثر بحالة الركود الإقتصادى اللى بيعانى منها الإتحاد الأوروبى لدرجة إن نسبة النمو فى الإقتصاد الإنجليزى كانت بتتراوح بين 0% إلى 0.5% ووصلت فى أقصى حلات إنتعاشها إلى 1.5% .. و ده بيوضح مدى تراجع مستوى النمو للإقتصاد الإنجليزى فى السنوات الأخيرة.
رابعاً .. لاحظوا إن إنجلترا إنضمت للإتحاد الأوروبى متأخرة عن باقى دول الإتحاد .. ورفضت بشكل قاطع تغير عملتها ، والدخول فى منظومة اليورو … طب هل ده معناه إن الدخول والخروج كان مخطط له !!؟؟ .. وهل دور الإتحاد الأوروبى إنتهى !!؟؟ .. وإلا التأثير السياسى أصبح محدود بعد خروج كثير من الدول فيه عن السياق زى فرنسا وإيطاليا والمجر واليونان وقبرص .. واللى شرحناه فى العديد من مقالاتنا .. وبالتالى أصبح إستمراره مالوش معنى دلوقتى !!؟؟؟ ……. مالناش دعوة ياموهى 😃😃
النقطة الاهم و الخاصة بينا اننا لازم نفهم ان اليمين السياسي البريطاني كان واخد انجلترا و ساحل وراه اوروبا كلها و فارض ارادته على العالم كله باستخدام نفوذه الخفي و البلطجي بتاعه اللى هو امريكا …. و بدأ بالفعل بجني نتيجة استعباده للشعوب الاوروبيه اللى كان الاتحاد الاوروبي و اليورو عبئ اقتصادى رهييب على معظم الدول.
و كمان تحت مطرقة النفوذ و سندان الضغط الاقتصادى …. قبلت دول زي فرنسا و إيطاليا و اسبانيا انها تنصاع للمخطط الانجليزي الشيطاني لتفتيت الشرق الاوسط و الاستيلاء على ثرواته الجديدة و تفتيت مصالح و مناطق نفوذ الدول دى …. فكنا بنلاقي دوله زي فرنسا بيتلعب ليها في مناطق نفوذها في غرب و شمال افريقيا و لو حاولت تقول لأ …. كان العقاب فورى و باستخدام كلابهم السعرانة اللى منتشرين في كل حتة 🙂 … وأظن صفحتنا كانت صاحبة السبق فى الحديث عن الموضوع ده 🙂
و لما حصل زلزال 30 يونيو و تم ايقاف المخطط …. و تم قلبه عليهم …. أصبحت اوروبا في خطر ….. لان بعد ما كان بــ يعد العدة ان المنطقة هــ يتم تجميع كل المجانين فيها للقضاء على اقدم شعوب و حضارات الارض ….. جت مصر و قلبت الترابيزة …. و كلابهم السعرانة بدأت تطفش من مصر و من ليبيا و من العراق …. و طبعا اصبح الامر خارج عن السيطرة …. و طبعا الكلاب دول هــ يروحوا فين !!!! … هــ يردوا لاوروبا اللى حرية التنقل فيها مكفولة بسبب الاتفاقية.
انجلترا بقى بعد فشل مشروعها و عشان تحمي نفسها ….. خرجت نفسها من القصة و قالت لأوروبا …. دبروا حالكم و معاكم ربنا …. و انا دلوقتي هــ ألعب على المكشوف .. و لوحدى …. و كلابي السعرانة هــ تنهش فيكم و هــ تأدب اللى يخرج عليا.
و لكل اللى بيتريأ و يقول ان _قال اييه_ خروج انجلترا من الاتحاد الاوروبي من ترتيبات محسن ممتاز …. و بيستخف دمه .. نحب نقوله ان حضرتك ايام ما كنت ماشي في الشارع بتحرق بكل حريه و تجعر و تطالب بتمكين التنظيم الارهابي اللى دايما راكب حضرتك …. و انت بتحتفل و تقول الشعب خلاص “أسكط النيييزاااام” .. كان اللواء عمر سليمان بيقول إنه في خلال سنوات معدودة .. ستكون مصر اكثر دول المنطقة أمانا … و إن الرد هــ يكون في عمقهم …. و بنفس الطريقه و الاسلوب .. و إن في الوقت اللى هــ نقوم فيه بالتوحد …. هــ يسعوا هم لتفتيت انفسهم !!! … عرفتوا بقى مين اللى معاه البنورة السحرية بجد .. وشايف وعارف اللى هــ يحصل و بيجبر العالم علي السير في الطريق المخطط ليه !!؟؟
نحب نقول للاخ بتاع الصاورة …. إزيك النهاردة !!؟؟ 🙂 …. و إزيك كمان لما تخرج هولندا و اسبانيا و اليونان !!؟؟ …. و إزيك لما تنفصل إسكتلندا عن انجلترا !!؟؟ …. هااااانت خلاص .. و كله بوقته 😉 🙂
طيب تداعيات الموضوع ده إقتصادياً إييه !؟؟
هل ده هــ يكون له تأثير سلبى على العالم وعلى مصر !!؟؟
أيوة طبعا ..
التأثير على إنجلترا بدأ بالفعل .. والبورصة الإنجليزية صاحبة المستوى الأعلى والأثبت فى العالم خسرت من إمبارح للنهاردة قرابة الــ 100 مليار جنيه إسترلينى … ولسة التأثير ده هــ يزيد وهــ يكون له مردود على البنوك والمنظومة الإقتصادية ككل .. لكن ده هــ يبقى تاثير مؤقت .. ومرحلى
التأثير على الإتحاد الأوروبى وتداعياته هــ تظهر لسة .. وهــ تكون كارثية .. ويمكن تؤدى إلى إنهيارات وإفلاسات .. وتباطئ فى حركة الإقتصاد لكل الدول .. و ده غير إن الإتحاد الأوروبى طبعا هــ يخسر الدعم المادى اللى كانت بتدفعه إنجلترا زيها زى أى دولة داخل الإتحاد .. و ده هــ يكون له تأثير إقتصادى وسياسى كبير
التأثير على مصر هــ يكون إيجابى برغم بعض المؤشرات السلبية زى إرتفاع سعر الذهب مثلا بشكل مؤقت .. والتأثر ده شئ طبيعى لأن العالم كله اصبح مرتبط ببعضه دلوقتى .. وإفتكروا إن إنهيار البورصة المصرية فى 2011 فى إطار أحداث الربيع العبرى ، كان له تداعيات كبيرة جداً على البورصات العالمية زى بورصة نيويورك وطوكيو … وطبعاً .. لما نتكلم عن الإقتصادى ، يبقى لازم نتكلم عن السياحة الأوروبية والإنجليزية ، و اللى لازم تتأثر نتيجة تأثر إقتصاديات المواطن الأوروبى والشركات السياحية ، كإنعكاس مباشر لتأثر أقتصاديات دول أوروبا بشكل عام .. لكن اللى يخفف من حدة التأثير السياحى ، إن الدولة المصرية مش واضعة السياحة من ضمن أولوياتها ورافضة سياسة لوي الذراع اللى بيتم الضغط بيها على مصر ، .. بالإضافة لأن الدولة المصرية بتغير إقتصادها من إقتصاد ريعى وخدمى ، لإقتصاد إنتاجى زى ما شرحنا فى مقال سابق .. وبالتالى فــ التأثير هــ يكون مش مختلف عن الوضع الراهن اللى إحنا فيه دلوقتى .. وكل ما هنالك إن فترة الركود السياحى الحالية ممكن تزيد شوية … ممكن .. إحتمال .. ماحدش عارف لسة !!
لكن اللى بيخلينا نقول إن التأثير السلبى على مصر هــ يبقى تأثير محدود .. هو إن التداعيات السياسية هــ يكون لها مردودها الإيجابى على الجوانب الإقتصادية .. و ده يرجعنا للمربع الأول تانى ، وهو التحركات فى الملف السياسى والإقتصادى اللى كانت بتعملها الإدارة المصرية على مدار السنتين اللى فاتوا وناس كتير ماكانتش فاهماها .. واللى هــ يأثروا بشكل كبير على تداعيات الموقف على المستوى السياسى والإقتصادى سواء بالنسبة لمصر أو بالنسبة للعالم كله ..
وعلشان كدة .. لسة للحديث بقية 🙂