02 Dec 2018
فرنسا والإتحاد الإوروبى .. ثم ماذا بعد !
—————————————
طبعا كلنا متابعين بشغف وترقب كل اللى بيحصل فى فرنسا ، وإمتداد ما يحدث من تظاهرات ممن يطلق عليهم إتحاد اصحاب السترات الصفراء ، علشان يشمل العديد من الدول الأوروبية ، زى بلجيكا وهولندا وإيطاليا .. وأكيد البقية تأتى … وإحنا كنا إتكلمنا من كام يوم فى مقال مركز مع بعض المقالات التوضيحية المرفقة عن اسباب اللى بيحصل ده وإنها مش ممكن تكون مجرد مظاهرات عفوية .. وقولنا إن الكلام ده مش ممكن يكون صدفة لعدة أسباب ذكرناها فى لينك المقال ده بعنوان:
فرنسا ومظاهرات أصحاب السترات الصفراء
لكن إحنا النهاردة مش هــ نعيد تحليل اللى بيحصل ، ولا هنتكلم عن علاقة اللى بيحصل بخروج إنجلترا من الإتحاد الأوروبى ، وسياسة أميريكا الإنكماشية فيما يخص التواجد فى الشرق الوسط ، و سعى أوروبا لتكوين جيش أوروبى موحد خارج منظومة حلف الناتو ، و رفض فرنسا والمانيا طلب الإنجليز والأميريكان فرض مزيد من العقوبات على روسيا ، وإشمعنى اللون الأصفر للسترات مش أى لون تانى …. يعنى من الأخر هــ نستبعد نظرية المؤامرة تماماً ، وهــ نتكلم عن حاجة تانية خالص ..
الفيديو ده ، ومعاه العديد من الفيديوهات المنتشرة على مواقع السوشيال ميديا ، واللى أكيد حضراتكم شوفتوها ، بتفضح ببساطة خالص ، اكذوبة التحضر الأوروبى ، واسطورة الحريات المزعومة وإحترام الرأى والديموقراطية ، وكل أكاذيب البتنجان بالمهلبية اللى إعلام السبوبة والسوشيال ميديا الإخوانية وكتائبهم الأليكترونية وكل القنوات والمواقع الإخبارية الرسمية اللى بتتحدث باسم اجهزة مخابرات دولهم فى توجيه معنوى لشعوب بعينها أصبحت بــ تنام وتقوم على حلم الديموقراطية الغربية والتحضر اللى عند المواطنين !
والأهم إن اللى بيحصل ده بــ يحطم ويهدم عقدة الدونية اللى تم زرعها عندنا فى نفوس وعقول أجيال متعاقبة .. أيوة .. عقدة الخواجة اللى قرفونا بيها ، وإن الشعوب الغربية شعوب متحضرة وإن الحكومات هناك بتحترم رغباتهم علشان هم كويسين ومحترمين وكيوت .. لكن إحنا اللى وحشين وبدائيين وهمجيين و مش مثقفين وماعندناش ادنى مبادئ التحضر .. وتلاقى الواد من دول لازم يتكلم بــ “الإغ” و يتابع مصادر الأخبار والمعلومات الغربية ، ومايصدقش غيرها حتى لو كانت بتقول أكاذيب ، علشان بس يحس إنه أحسن من صندوق الزبالة اللى هو عايش فيه من وجهة نظره طبعا .. هم اقنعوه بكدة … و ده واقع بنشوفه بعنينا مش محتاج اى مجهود للتدليل عليه
مش كدة وبس .. لكن أنا هــ أمشى معاك ياسيدى إن اللى بيحصل فى فرنسا ده كله مظاهرات غاضبة للتعبير عن الرفض التام لحالة الغلاء ، وزيادة الضرائب ، ورفع اسعار المحروقات .. وكل الكلام ده … طب بذمتك كدة مش ده يرد عليك فى أكذوبة إن الناس برة عايشين فى بغددة ، وبيقبضوا بالألاف ، و كدة يوروهات وكدة دولارات ، واللى مش لاقى شغل الحكومة بتصرف عليه وتأكله وتعالجه وتجوزه وتخلف بداله كمان علشان سيادته ما يتعبش !! …. طب هو اللى عايش فى نعيم كدة ، يفرق معاه بقى شوية زيادة فى الأسعار ، ينزل بسببها الشارع ويحرق بلده ويكسرها ويهاجم المحلات والبنوك ويسرقها ، ويكسر ويحرق ويخلع بلاط وارصفة شارع الشانزيليزيه وقوس النصر الأثرى !!؟؟ … ياراجل طب قول كلام غير ده … ده حتى عماد مأكدلى .. وكارت الفيزا مليان فلوس .. والعربية فوور باااااى فوور يا جاااادع =D
ياترى إنت بقى شايف إن هى دى الديموقراطية !!؟؟ …. والأغرب بقى .. إن نفس المصطلحات اللى كان الإعلام الغربى بيلومنا على إستخدامها ايام “25 خساير” ومابعدها .. وكان بــ يتم إتهام الحكومات والناس الوطنيين فى دول الربيع العبرى بالتضليل والكذب وسب الثوار وتخوينهم والوقوف فى وجه حرية التعبير عن الرأى .. نفس الأبواق الإعلامية دى ، هى اللى بتقول النهاردة إن اللى بيعمل كدة شوية بلطجية ومجرمييييين ، ومتأمريييين ، وقلة مندسيييين ، وجبنة نستوا يا معفنيييين .. !!! ياترى فاكرين !!؟؟ … لأ وكمان تلاقى وزير الداخلية طالع يقول إن مهاجمة رجال الأمن وحرق سيارات الشرطة ، هو إهانة للجمهورية !!! .. شوف إزااااى 🙂
ماحدش بقى طلع يقول إن الإعلام الفرنسى إعلام غير مهنى علشان مش بيجيب متابعة مكثفة لأحداث التظاهر ، وإنه جايب مشاهد لنهر النيل .. أسف .. لنهر السين 🙂 .. وجايب شوية برامج حوارية ماسخة على إعلانات وفاضل يعرض حلقات توم و جيرى .. وسايب الدنيا والعة … ولا سمعنا عن إن الداخلية بلطجية وخونة علشان لابسين ملكى ومندسين وسط المظاهرات علشان يقبضوا على قادة الثورة .. وماحدش طلع من قادة الدول فى خطابات علنية يقولك إن النظام لازم يسقط ونعمل حكومة إئتلافية من الميدان …. و يااااااه يالميدااااان .. و …. و كدزة 🙂
اساطير الكلة بــ يتم هدمها تباعاً ، واللى لسة عايز يفضل مستمر فى التعايش مع الخزعبلات دى ، هو حر .. لأنك هــ تلاقى نفسك امام أحد إختيارين ، وهما إما إنك تصدق إن اللى بيحصل ده مؤامرة .. أو تقتنع إن الناس برة مش عايشين فى نعيم .. وفى الحالتين سيادتك هــ تثبت لنفسك إنك كنت (حــ….) .. وإلا بلاش 🙂 .. وعلى فكرة .. الإقتصاد الفرنسى سادس اقوى أقتصاد فى العالم ، ومع ذلك فــ ده مامنعش الحكومة إنها ترفع الضرائب واسعار المحروقات لما دعت الحاجة لذلك .. واللى هــ يقوللى طب شوف هو بيقبض كام ، ياريت يعيد قراءة الفقرة الخامسة تانى !
وأخيراً .. وبرغم إن اللى بيحصل فى اوروبا ، ده شئ توقعناه من كذا سنة .. وبرغم إنهم بيشربوا من نفس الكاس اللى سقوه لنا ، لكن احنا ما نتمناش ابداً تطور الموضوع للأسوء .. لأن ده مش فى مصلحة مصر .. على الأقل مرحليا فى الوقت الراهن … وإحنا دايما مش بــ نبص لتحت رجلينا ، لكن بــ نبص لبعيد .. على النتائج النهائية .. ودايما بــ نكون مع مصلحة بلدنا ، لأن مافيش حاجة تهمنا غير مصر ، حتى لو كان اللى هــ يحصل عكس رغباتنا الشخصية .. لأن مصر هى الأهم
و زى ما دايما بنقول لكم .. حضروا الفشار .. لأن المشاهدة فى الشهور القادمة هــ تبقى ممتعة