فرنسا ومظاهرات أصحاب السترات الصفراء !!

25 Nov 2018

فرنسا ومظاهرات أصحاب السترات الصفراء !!

——————————————–

طبعا كلنا شايفين وسامعين ومتابعين اللى بيحصل فى فرنسا ، وحجم المظاهرات الكبير وحجم التخريب اللى بيحصل … لكن الأهم من إنك تكون شايف وسامع ومتابع .. إنك تكون فاهم اللى بيحصل …. ومقولتنا اللى دايما بنقولها إننا لازم نحضر الفشار ونتفرج على اللى بيحصل و هــ يحصل فى العالم فى خلال الكام سنة اللى جايين ، دى مش مجرد مقولة كنا بنقولها على سبيل الهزار والتريقة .. لكنها مقولة حقيقية وواقعية !!

لو كنت فاكر إن اللى بيحصل فى فرنسا ده مجرد صدفة ومظاهرات تلقائية تبقى غلطان … مافيش حاجة إسمها مظاهرات بالشكل ده تبقى تلقائية .. واللى بيقولك إن اللى بيحصل ده نتيجة للأوضاع الإقتصادية الصعبة اللى بيعيشها المواطن الفرنسى .. فلازم تبقى فاهم إن ده شيئ مش جديد .. لأن الوضع الإقتصادى صعب من 2012 … والمواطن الفرنسى بيعانى فعلا .. لكن إسمحلى اقولك إن الوضع الإقتصادى لأوروبا بشكل عام ، بإستثناء المانيا والدول الإسكندنافية ، هو اصعب بكثير من فرنسا … يعنى المواطن فى إيطاليا والبرتغال واسبانيا وغيرهم ، بيعانى فعلا .. و ده عكس كل اللى بيتقال للمصريين إن الدنيا برة فلة ومزهزهة وشمعة منورة … و مع ذلك ماحصلش فى الدول دى مظاهرات بالشكل الفج اللى حصل به فى فرنسا ده

لو كنت فاكر إن تصاعد وتيرة المظاهرات بالتزامن مع تصريحات ماكرون عن تكوين جيش اوروبى موحد ، هو مجرد صدفة تبقى غلطان !

لو كنت فاكر إن السترات الصفراء اللى لابسها المتظاهرين واللى تشبه نفس الشكل اللى كان بيلبسه الإخوان فى مصر ايام 2011 ده من قبيل الصدفة تبقى غلطان (طبعا علشان اللى حابب يستظرف ، أكيد إحنا مش قصدنا إن اللى بيعمل كدة فى فرنسا إخوان .. لكن نقصد إن الفكر واحد زى بالضبط التشابه بين ملابس اسرى جوانتاناموا وأسرى داعش) ..

لو كنت فاكر إن الثورات والمظاهرات اللى من النوع ده ممكن تكون مظاهرات تلقائية تبقى غلطان … الموضوع كله بــ يبقى على طريقة قول حق يراد به باطل .. وإستغلال واقع موجود بالفعل من اجل إشعال الموقف !

و معلش .. نرجع بس حبة صغيرين للخلف وكلام قولناه قبل كدة … لو كنت فاكر خروج إنجلترا من الإتحاد الأوروبى ، وتحملها تكاليف ده ، وموافقتها على دفع كل المليارات دى علشان تسرّع من عملية التخارج … كل ده مجرد صدفة ، تبقى غلطان !

طب ياترى اخبار جمعيات حموم الإنسان والحيوان والجرذان .. وبيانات الإستهجان ، ووقف العنف مع المتظاهرين ، وضمان حرية التظاهر والتخريب ، والحض على دعم حرية التعبير والسفالة والسرقة والضرب والحرق .. كل ده راح فين !!؟؟ .. وفين الجزيرة مباشر وتركيا مباشر وفرنسا مباشر وإنجلترا مباشر وكل عائلة مباشر اللى بتتابع أول بأول مستجدات الأحداث ، وتشجب وتستنكر تعامل الشرطة الكمعية مع المتزااااهرين ، والسوّار الأتهار 😉

وعموما .. علشان ما نطولش عليكم .. ولأن الصورة أوضح بكتير من إننا نعيد الكلام فيها تانى .. ياريت فقط تراجعوا لينكات المقالات القديمة دى .. علشان بس تعرفوا .. ليه دايما فرنسا … وليه البداية ، إن عاجلا أو اجلا هتبقى من هناك … بداية النهاية …

تحياتنا

لمتابعة تعليقاتكم