03 Feb 2019
تظاهرات السترات الصفراء (الفائدة والضرر) .. !!
————————————————
تتواصل تظاهرات السترات الصفراء فى فرنسا للأسبوع الــ 11 على التوالى .. و مش فرنسا وبس .. لكن كمان إمتدت التظاهرات فى الأسبوع الأخير لتشمل هولندا ، وألمانيا و … و السويد … أيوان .. السويد كمان … يعنى الإتحاد الأوربى بيتدحرج واحدة واحدة يا رمّان ، وتعالى على حجرى يا رمّان 🙂 … لكن إييه الجديد !!؟؟؟
الجديد بقى إن القضاء الفرنسى وافق للشرطة الفرنسية على إستخدام الرصاص المطاطى والقنابل المسيلة للدموع و قاذفات الكرات الإسفنجية وقنابل الصوت ، لكبح جماح المتظاهرين .. وإرتفعت حالات الإصابات بين المتظاهرين بشكل كبير ، ووصلت حالات الوفيات إلى 11 حالة بعد ما كانوا 9 حالات فقط لحد ديسمبر الماضى … والمتظاهرين إمبارح تظاهروا ضد مجلس الدولة أعلي سلطة قضائية في فرنسا ، إحتجاجاً على قرارات القضاء فيما يعرف بتظاهرات يوم الجرحى …
الجميل بقى إن دول الإتحاد الأوروبى وإنجلترا واميريكا ، اصدروا قرارات فى 2011 بمنع تزويد مصر بأى اسلحة للشرطة لإستخدامها فى فض أى تظاهرات تحت دعاوى حماية حقوق الإنسان .. وفضلت القرارات دى سارية حتى 2015 … فــ ياترى يا هل ترى .. اخبار اوروبا مع حقوق الإنسان إييه دلوقتى !!؟؟ … ماعلينا .. مالناش دعوى إحنا يا موهى 😉😊
لكن عندنا ملحوظة مهمة جداً … فيه جملة قالوها العرب زمان ايام الجاهلية مشتقة من بيئتهم الصحراوية .. الجملة دى بتقول “البعرة تدل على البعير .. والأثَرَة تدل على المسير” .. يعنى أعزكم الله لو حد ماشى فى الصحراء وشاف براز جمل ، أو ظهرت خطوات جمل على الرمال ، فــ ده معناه إن فيه قافلة مرت من هنا .. يعنى من الأخر مافيش حاجة بتتولد من العدم .. ومافيش صدفة .. وكل حاجة بتحصل تدل على أصلها …. فلما نيجى نتفرج على التسلسل اللى ماشية به تظاهرات اصحاب السترات الصفراء .. هــ نلاقيها ماشية على نفس الكتالوج بتاع مظاهرات الربيع العربى ، وبالذات اللى حصلت فى مصر … 😉 .. و ده يخلينا نقول إن “البعرة تدل على البعير” .. يعنى صاحب الكتالوج واحد 😊
نفس الدعاوى السلمية .. وبعدين السلمية تتطور لعنف .. ناس تتصاب وناس تموت .. تصاعد حدة المظاهرات .. ظهور الناس اللى لابسة وجه الأناركية .. رفع البعض لعلم القاعدة ، دلوقتى بقى إسمها داعش .. تسمية المظاهرات الكبرى باسماء ، زى جمعة الغضب وجمعة التحرير وجمعة رد الجميل وجمعة قندهار .. ألخ الخ .. و فى فرنسا عندهم سبت التصعيد وسبت الجرحى ألخ ألخ … و ده مش ممكن ابداً يكون صدفة .. ولا توارد خواطر … العالم مش بيعيش بالصدف خالص 😊… عموماً برضوا مالناش دعوة يا موهى ..
المهم إحنا عايزين نقول حاجتين مهمين جداً:
أولا .. إن الأوضاع الإقتصادية فى العالم كله أصبحت صعبة ، وبتطحن فى الناس كلها ، حتى فى الدول الكبرى المتينة الإقتصاد ، لأن تكلفة المنتجات والمواد الخام وتشغيل الخدمات إرتفعت بشكل كبير .. مع ملاحظة إن مصر ، مؤشراتها الإقتصادية فى تصاعد ، لكن فى كثير من دول العالم مؤشراتهم الإقتصادية فى هبوط مستمر منهم فرنسا وأسبانيا مثلا على سبيل المثال لا الحصر … والكلام ده ليس على سبيل المقارنة ، علشان إحنا عارفين شلة المزايدين اللى هــ يدخلوا يتفذلكوا ويقولوا “يعنى إنت عايز تقول إن إقتصاد مصر أحسن من إقتصاد اوروبا” .. برغم إن مش ده معنى كلامنا خالص .. لكن المعنى واضح و مش محتاج اى شرح !
ثانياً … اللى بيحصل فى أوروبا ده ، تداعياته الإقتصادية خطيرة جداً على مستقبل الإقتصاد الأوروبى فى المستقبل القريب والبعيد … و كرة الثلج لما بتبدأ تتحرك ، بتكبر مع الوقت ، وماحدش بيقدر يوقفها … ولأن رأس المال جبان … فــ حركة الإستثمار فى اوروبا بشكل عام هــ تتأثر بسبب حالة عدم الإستقارار الجزئية دى فى دول الإتحاد الأوروبى .. ولو أضفنا إلى الكلام ده ، التوقعات السياسية المعلنة لكثير من الخبراء بتفكك الإتحاد الأوروبى فيما لا يتجاوز 7 سنوات من الأن .. و ده كلام إتكلمنا فيه وشرحناه من أكثر من سنتين فى وقت إعلان خروج إنجلترا من الإتحاد الأوروبى:
مقال الخروج الكبير للإنجليز من الإتحاد الأوروبى .. المردود الإيجابى والسلبى .. (الجزء الثانى) .. !!
ومقال الإتحاد الأوروبى والطريق إلى المجهول .. فى فيديو تم نشره على قناة BBC لرجل الأعمال والسياسى تيد مالوك..
هــ نلاقى إن رؤوس الأموال والتدفقات الإستثمارية ، مش هــ تلاقى أفضل من القارة الأفريقية علشان تتوجه لها بإستثماراتها .. وعلى راسها طبعا مصر ، بكل مشروعات البنية الأساسة اللى اللى بــ تتنفذ فيها ، وحجم المشروعات المهول اللى جعل مصر بالفعل “Mega project” العالم دلوقتى .. و ضيف على كدة الموارد الطبيعية اللى فى مصر واكتشافات الغاز والطاقة ومشروعات الطاقة المذهلة ، والمدن الجديدة … و حط على كل ده كمان الكثافة البشرية اللى بتنتج وتستهلك فى نفس الوقت … و مع حالة الإستقرار السياسى والإقتصادى ، كل ده بــ يجعل مصر الوجهة الأولى والمثالية لرؤوس الأموال اللى هــ تهرب من اوروبا فى خلال السنوات القليلة القادمة.
و مش كدة وبس .. لكن الإستقرار السياسى والنمو الإقتصادى ، هــ يجبر دول أوروبا سواء كإتحاد اوروبى او كدول منفردة ، إنها تقف معاك وتساندك سياسياً علشان تأمّن إستثماراتها ومصادر تمويل الطاقة ليها بعد ما اصبحت مصر هى الــ “Hub” بالنسبة للطاقة فى الشرق الأوسط.
و علشان إنت كمان تحافظ على كدة .. يبقى لازم تحافظ على قوتك العسكرية والسياسية ، و تنمّى قدراتك الإقتصادية بشكل متسارع ومستمر .. لأن الدولة اللى بــ تضعف أو بــ تقع ، بــ يتم الإجهاز عليها بدون إنتظار … وأدينا شايفين اللى بيحصل فى فنزويلا .. ومن قبلها اللى حصل فى سوريا 😕
مصر جاية جاية … بس إحنا نبقى قد حلمنا ، ونأمن بيه علشان نقدر نحققه … كلنا نحققه .. مش واحد لواحده 😊
والقادم افضل بإذن الله