التفجيرات الداعشية فرنسا-تونس-الكويت … مسلسل حمضان

27 Jun 2015

التفجيرات الداعشية فرنسا-تونس-الكويت … مسلسل حمضان .. !!

—————————————————————-

شوفو بقى ..

على طول كدة ، و قولاً واحداً .. اللى مايشوفش من الغربال يبقى أعمى .. واللى مش فاهم لييه فرنسا بشكل أو بأخر ، هى الدولة الوحيدة فى أوروبا اللى بتحصل على أراضيها أحداث إرهابية بشكل فج وفى مناسبات محددة ، فــ أنصحه إنه يراجع مفاهيمه السياسية وفهمه للأحداث العالمية من أول وجديد !

من كام شهر .. وتحديداً فى شهرى يناير وفبراير اللى فاتوا ، قامت صفحتنا بنشر مقالين أثاروا لغط كبير ومناقشات كتيرة جداً .. لكنهم كانو بــ يوضّحوا إشمعنى فرنسا .. وإييه هو دور فرنسا فى الخريطة العالمية .. ومعظم النقاط والعناصر اللى اتناقشت فى المقالين إما إنها بدأت تظهر ملامحها دلوقتى ، أو إنها إتحققت فعلياً على أرض الواقع .. وكأن صفحة كلام فى الصميم كانت بتستشرف المستقبل ، وبتوصّف الأحداث قبل ما تحصل !! 🙂  

المقال الأول ..

لمـاذا فرنسـا – عملية تأديب فرنسا ” شارل إيبدو “

المقال الثانى ..

مصر – فرنسا . والتحالف الدولى .. !!

 

و علشان ما نعيدش الكلام تانى .. هــ نقول إن التفجيرات اللى حصلت إمبارح فى الكويت وتونس وفرنسا ، كانت كدة كدة لازم تحصل لأنها نتاج طبيعى للمواقف الفرنسية مؤخراً ، وبالتالى كان لازم يتم إطلاق الكلاب السعرانة صنيعة الأميريكان على فرنسا .. وضرب كل الكروت والملفات فى بعضها ، وأهو كله بــ يصب فى مصلحة مخطط الفوضى .. 🙂

طب إزاى !!؟؟

بعد أحداث كشف تجسس أميريكا على تليفونات الرئيس الفرنسى أولاند ، وقبل منه كمان 2 رؤساء لفرنسا .. يقوووووم إييييه .. يطلع تصريح من الخارجية الفرنسية ، بإن أميريكا ليست دولة صديقة !! .. وفى نفس الوقت فرنسا بــ تتمم صفقات السلاح بتاعتها مع مصر فيما يخص الفرقاطة “فرام” والكوفيرتات وصفقة الرافال .. ومش كدة وبس لكن فرنسا بتزوّد دلوقتى السعودية كمان بأحدث الأسلحة ، وبتفاوض الكويت لتزويدها بالسلاح ..

وطبعاً ما يعديش يومين ، إلا ونلاقى داعش الكلب الوفى والمنفذ للسياسة التخريبية فى المنطقة ، يقوموا بعمليات إرهابية تضرب مصالح فرنسا في تونس و الكويت و يتمسك خلايا في السعودية .. و طبعا ده غير وثائق ويكيليكس .. وتطلع داعش تعلن مسؤوليتها عن التفجيرات

اللعبة كدة لها ثلاثة محاور ..

أولاً .. الإستمرار فى معاقبة فرنسا على إستمرارها فى تحدى أميريكا ، و شقها للتحالف الدولى القديم اللى أصبح بالفعل شبه ميت إكلينيكيا ، عن طريق ضرب الإستقرار فى الداخل الفرنسى ، وكمان ضرب الدولة اللى بتمثل الشريك الأهم و التوأم الفرنسى اللى بــ يرسخ تواجدها فى الشمال الأفريقى وهى تونس ..

ثانياً .. ضرب الدول اللى بدأ يبقى فيه تواصل بينها وبين فرنسا على مستوى التسليح زى السعودية وتونس ومن قبلهم مصر .. وإفتكروا ضربة معبد الكرنك واللى كان الضالع الرئيسى فيها تونسى الجنسية من المنتمين لداعش .. و ده طبعا كارت تهديد للدول دى على أساس إن فرنسا مش هــ تنفعكم ، و إنكم هــ تدفعوا الثمن لو تعاملتم مع فرنسا .. وخصوصاً إن توجه دول الخليج “السعودية ، الكويت ، الإمارات” للسلاح الفرنسى ومن بعده الروسى يعتبر ضربة موجعة للإقتصاد الأميريكى بخسارة مليارات الدولارات فى تجارة السلاح .. وعلشان كدة ، أنا متوقع عملية قريبة فى الإمارات !!.

ثالثاً .. اللعب على وتيرة الفتنة الطائفية (سنة/شيعة) واللى بدأت بالسعودية مابين عمليات إتنفذّت وعمليات تم إحباطها .. وأدى الكويت النهاردة ، وخصوصاً لو عرفنا مدى قوة تواجد الإخوان وتأثيرهم فى الكويت .. ومش عارف هــ يحصل إييه تانى بكرة ، وفين !؟ .. و ده يدّينا إنطباع ويرسم لنا ملامح صورة ، إن اللعبة فى الفترة اللى جاية فى منطقة الخليج هــ تكون اللعب على الوتر الطائفى ده ، واللى هــ يطول كل دول المنطقة .. لأن الفشل الأميريكى فى مخططها بالنسبة للمنطقة بسبب مصر ، وعدم قدرتها على شق التحالف الخليجى المصرى ، واللى بــ ينضم له دلوقتى فرنسا وروسيا ، .. هــ يخليها تقلب الترابيزة فى وش الكل وتلعب بأخر كارت فى إيديها ممكن يتلعب بيه .. واللى مالوش خط دفاع ومواجهة غير وعى الشعوب وقدرتهم على إستيعاب المخطط ده !! 🙂 🙂

بيتهيألى الصورة كدة أصبح واضحة جداً .. و برغم كل اللى بيحصل ده ، وبرغم صعوبة الموقف على دول الخليج فى الفترة القادمة .. لكن المعركة بجد ماشية فى الإتجاه اللى بيصب فى مصلحة النظام العالمى الجديد اللى مصر جزء منه ، أو زى ما قولنا قبل كدة .. فى القلب منه 🙂 🙂 .. ولما ييجى يوم 6 أغسطس بإذن الله ، هــ تعرفوا بجد إييه هو حجم مصر فى العالم الجديد ..

لمتابعة تعليقاتكم