05 Jul 2019
ايران و الحرب على الخليج
—————————
هو ايه اللى حـ يحصل في الخليج …. و هل حتقوم فعلا حرب بين ايران و السعوديه ……. و ليه الحشد العسكري الامريكي هناك …. و ليه السعوديه ساكته و مش بتاخد رد فعل على ضرب مطاراتها و اهدافها المدنيه كل يوم ….. و هل فعلا دول الخليج و امريكا مش قادرين على ايران و خايفين منها …. و هل ايران اتجننت عشان تحارب جيوش دول حديثه التسليح و فارقين عنهم كما و كيفا ….. و التصعيد ده حينتهي على ايه ؟
الاسئله دي و أكتر منها أصدقاء الصفحه بيبعتولنا رسايل و طالبين مقال عن الموضوع ده …. و مع اننا اتكلمنا كتيييييرعن الموضوع ده في مقالات مفصله …. خلونا نكرر كلامنا تاني و باختصار و تعالي على نفسك و هات كوباية الشاي بتاعتنا و كمل قراية للآخر و للمره الـ 1000 عشان المزايدات بنأكد اننا بنتكلم سياسه فقط و ملناش دعوه بالأديان و لا بالمذاهب الدينيه اللى بنكن لها كل الاحترام.
شوف يا سيدي … لأن تأصيل الأمور مهم جدا … فـ عشان تريح و تستريح … دائما و أبدا لما تحب تفهم موضوع …. ركز على الهدف الاستراتيجي و ليس الهدف التكتيكى …. يعني ايه الكلام ده !!! … أقولك …. مثلا ….. لما حصلت الثوره الملونه في روسيا …. حضرتك انشغلت مع ما يبثه الاعلام من ثورة الشباب و احلام الديمقراطيه و الحريه … ( ده التكتيك ) … في حين ان النتائج كانت تدمير الكتله الشيوعيه و تفكيكها …. ( ده الهدف الاستراتيجي ).
مثال تاني ….. ظهور القاعده الفجائي ثم اختفائها … أو طالبان ثم إختفائها … أو داعش ثم إختفائها …. حضرتك ركزت في الارهاب و القتل الوحشي للمدنيين و الحروب و التدمير و كيفية مواجة التنظيمات دي …. ( ده التكتيك ) … في حين الهدف كان بسط سيطرة امريكا على مصادر الطاقه في افغانستان و منطقة الشرق الأوسط و تفكيك دولها …. و مد خطوط الغاز هذه الدول الى اوروبا لصالح امريكا….. ( ده الهدف الاستراتيجي ).
مثال ثالث …. انفجار ما يسمي بالربيع العربي في دول الشرق الأوسط في نفس الوقت و بنفس الشعارات و الآليات و النداءات و المطالبه بالحريه و الديمقراطيه … حضرتك تفاعلت و تعاطفت و ركزت على طهارة الحركات دي و رومانسيتها… في حين ان قادة كل الحركات دي من الشباب تم تدريبهم و إغداق الاموال عليهم بملايين الدولارات لتفكيك دول الشرق الاوسط من الداخل و بإيد أبناؤها لخدمة مشروع ما يسمي الاسلام السياسي الابن غير الشرعي للغرب للمساعده في تحقيق المثال السابق للسيطره على الطاقه … ( ده الهدف الاستراتيجي ).
فعشان كده … لما تيجي تسقط ده على موضوع الخليج و ايران … سيبك من الاهداف التكتيكيه بتاعتهم زي مطار انضرب بـ طيارات مسيره و ناقلات تم ضربها و الكلام الخايب ده …. و شوف ايه الهدف الاستراتيجي لكل طرف و مين اللى حققه على الارض بالفعل …. يعني ايه الكلام ده !!!!!
أقولك …. في الأول لازم تعرف انك لو صدقت إن الإشكاليه هي إشكاليه مذهبيه ما بين سنة و شيعة … تبقي غلطان و إنضحك عليك …. لان اللى بيدير العالم بالفعل هي إنجلترا …. فـ إنجلترا هي المخ و الامريكان هم العضلات …. لأن الخواجه الانجليزي اللى زرع اسرائيل كدولة على اساس ديني يهودي هو نفسه اللى زرع نظام ملالي إيران كدوله دينية على اساس شيعي و هو نفسه الخواجه اللى زرع جماعة الإخوان اللى بتحاول لسنين انها تقيم دوله على اساس ديني سني في المنطقه بحجة الخلافة المزعومة … و ان امريكا ما هي إلا البلطجي اللى بينفذ على الارض او بيضبط الايقاع ما بين الكلاب السعرانه اللى بيزرعوها في منطقتنا في حالة لوحد فيهم شم نفسه شويه و حب يلعب بديله …. و عشان منعيدش الكلام تاني … حتلاقوا امثلة لمقالات اتكلمنا عن تأصيل الموضوع ده على صفحتنا منها على سبيل المثال المقالات التاليه :-
طب بما إن ايران صنيعة الغرب و كلنا شوفنا إن في الوقت اللى كانت ايران كعادتها بتتوعد اسرائيل و أمريكا بالموت و الحرب أيام الخوميني … كانت اسرائيل بتبعت سلاح أمريكي لايران أيام فضيحة “ايران جيت” ….. بما يعني إن لا اسرائيل و لا امريكا حيجوا يوم يضربوا ايران فعليا ……. طب هو السعودية متقدرش تضرب ايران عسكريا و تخلص من القصه البايخه دي المفروضه عليها ؟؟؟ … نظريا تقدر طبعا ….. طب ليه ساكته على الاستفزاز الايراني .؟؟؟ … شوف يا سيدي و واحده واحده كده و بهدوء …. نسأل نفسنا هو ايه عناصر قوة ايران و ايه عناصر ضعفها ؟؟.
اولا عناصر الضعف :- لو بصينا على الجيش الايراني حنلاقي جيش متخلف تكنولوجيا و لا يمتلك اي عنصر من عناصر القوه لان العمود الفقرى للاسلحة الايرانيه عباره عن ميراث شاه ايران محمد رضا بهلوى … لان من عام 1979 تم ايقاف تصدير الاسلحه و قطع الغيار لايران و جميع تكنولوجيا التسليح الان هناك تخطت الـ 40 عاما …. فعلى سبيل المثال … طائرات الصف الاول المقاتلة في ايران تعتمد على تشكيلات من بعض الطائرات الامريكيه القديمه من الفانتوم F4 و تشكيلات من F14 و بعض طائرات الميج ٢٣ و الميج ٢٩ القديمة ….. و كل الطائرات دى نسخ قديمه جدا و متهالكه ….. و لم يحدث لها اي تحديث حقيقي من ايام الثمانينات الا بعض المحاولات المحليه لمجرد اطالة عمرها الافتراضي ….. و لا تمتلك هذه الطائرات اي نظم تسليح حديثة او نظم ادارة نيران متقدمة …. ده غير المعاناه المزمنه في توفير قطع الغيار ….. يعنى من الاخر كدة ….. القوة الضاربه الرئيسية للطيران الايرانى …. يتاكل في اول خمس دقائق من اي حرب عسكرية شاملة.
بالنسبه للقوات البحرية …. فلا تختلف عن القوات الجوية ….. فلا تمتلك ايران اي قطع بحرية حديثة ….. و معظم القطع البحرية الثقيلة عبارة عن مدمرات و فرقاطات من ايام الستينات و السبعينات ….. و لا تمتلك اي نظم تسليح او ادارة نيران حديثة …. و بالاصح ….. البحرية الايرانية لا يوجد بها قطع بحرية حالية قادرة على العمل في اعالي البحار ….. و حتي الغواصات التى تمتلكها ….. فهى اما غواصات قديمه جدا ….. او غواصات محلية قزمية صغيرة ….. تعمل بتكنولوجيا عفي عليها الزمن ….. و سهل جدا على اي بحرية حديثة مثل البحرية الإماراتية مثلا ، التعامل مع البحرية الايرانية و تحييدها تماما ….. و ده سبب ان كل المناورات الايرانية و تكتيكاتها بتعتمد على العمليات الانتحارية بواسطة زوارق صغيرة سريعة ….. يعنى لا تستطيع الدخول في عمليات فعلية الا بالقرب من السواحل ….. يعني لا تستطيع حسم معركة بحرية او فرض سيطرتها البحرية على اى مكان اطلاقا .. و كل اللى بيحصل في الخليج من ضرب ناقلات بترول … مجرد شو اعلامي و ضغط سياسي …. مش عمل عسكري يعول عليه..
بالنسبة للقوات البرية و المدرعات ….. فلا تختلف عما ذكرناه ….. فالمدرعات الايرانية هي من أجيال قديمة جدا ….. و تعتمد على الكم و ليس الكيف ….. و في اي حرب شاملة مفتوحة ….. سهل جدا التعامل معها ….. و لان ايران عارفه الكلام ده كويس ….. فهى بتعتمد اساسا على تكتيكات العمليات الانتحارية الاقرب لحروب المليشيات المسلحة اعتمادا على الكم و ليس الكيف لتعويض نقص السلاح و قطع الغيار في المعدات …
اما الدفاع الجوى …. فحدث و لا حرج ….. و حتى و ان حدث استلام منظومة دفاع جوى حديثة نسبيا يمكن استخدامها في عمل بعض الكمائن الجويه ….. فسلاسل الجبال على طول خط المواجهه مع الخليج …. هى نقطة ضعف كبييييرة لسهولة تسلل اى عدد من الطائرات المهاجمة من خلالها بمنتهى السهولة بدون اي رصد من اي منظومه دفاع جوى مهما بلغت حداثتها….. و حتي اسقاط ايران للطائره الامريكيه المسيره …. فلا يعول عليه لان العمليه مفاجئه و عباره عن سوكسيه امريكي لإيران عشان الساسبنس يزيد في المنطقه للضغط على السعوديه عشان تغلط و تحارب … و ده اللى حنتكلم عليه لاحقا.
الصواريخ الباليستيه ممكن البعض يصنفها على إنها مصدر قوه لو تم استعمالها بكثافه كبيره “الاغراق” لانه أكيد حيسبب بعض الخساير .. لكن الكلام ده مـ يحسمش حرب … لان لو تم استخدامها … فالسعوديه و الامارات و بدون مساعدة أمريكية عندهم القدره العسكريه على الرد السريع الحاسم اللى ممكن يرجع ايران تكنولوجيا قرون للخلف لو تم ضرب ايران ضربه كاسحه.
ثانيا نقاط القوه :- القوه الحقيقيه لإيران مش في قوتها العسكريه … و لكن في أنها دوله دينية قامت على أيدولوجيه فارسية قديمه قدرت من خلالها السيطره على عقول الملايين من شعبها و بعض قطاعات شعوب المنطقه داخل الدول العربية …. و دي بالفعل هم نجحوا فيها نجاح باهر …. لان اسهل حاجه للتحكم في عقول الناس و نشرافكارك …غلفها بغلاف الدين … حتنجح على طول … لانك حتقدر على طول ان تتحكم في ملايين البشر و تحول قطاع كبير منهم الى كائنات زومبي ممكن يموتوا نفسهم في سبيل تحقيق نشر ايدولوجيتهم و محو أي ثقافه اخرى في المنطقه من غير ما يفكروا … و دي هي بالفعل مصدر قوة ايران … لانهم متغلغلين داخل دول عربية بإجتذاب الملايين منهم في العراق و لبنان و سوريا و اليمن و السعوديه و البحرين … و جزء كبير منهم ولاؤهم التام لإيران و ليس لدولتهم التي يحملون جنسياتها.
طب يجي هنا السؤال … طب ايه الحل الامثل للتعامل مع الوضع ده ؟؟؟؟ … الاجابه ببساطه هو نفس اللى عملة الغرب زمان مع الشيوعية … إزاي …. حقولك .
زمان كان فيه ايدولوجيه الرأس ماليه اللى كانت بتتصارع مع الايدولوجيه الشيوعيه اللى كان بيعتنقها حوالى ربع سكان الكره الارضيه في وقتها … و مع سباق التسليح و الصواريخ النووية اللى كانت متاحة لدول الفريقين … لكن محصلش حرب و لا الإتنين ضربوا في بعض … ليه .؟؟؟؟ … لانك مهما حاربت … الشعوب دي حتتمسك في ايدولوجيتها اكتر و حتقوي افكارهم اكتر …. أمال الغرب عمل ايه ؟؟؟ …. حاصر الكتله الشيوعية إقتصاديا … و لعب لعبة حروب الجيل الرابع من جوه البلاد دي … و تحت ضغط العَوَز الإقتصادي و بث الفتن و النفاذ الى شباب المجتمعات دي بالافكار الغربيه …. تفككت الكتله الشيوعية … و تفككت أيدلوجيتها الشيوعية و انتهت تماما بعد ما كفر بها نفس الشعوب اللى في السابق كانت ممكن تحارب العالم كله في سبيل الدفاع عن افكارها.
و ده اللى بيحصل دلوقتي …. و لأن إيران عارفه الكلام ده كويس و عارفه ان الخنق الاقتصادي حيفككها من الداخل و ان خلاصها هو ان الحرب تقوم عشان الناس تتمسك بـ قياداتها … فهي مش بتسيب فرصه الا و تستغلها عشان تصعد بأقصي ما يمكنها عشان تضغط على الخليج انهم يضربوها و تقوم حرب … و بتضرب كل يوم بطائرات مسيره مطارات و اهداف سعوديه عشان تحرج دول الخليج انهم لازم يردوا عليها عسكريا و تقوم الحرب…. و السعودية و الخليج صابرين جدا….. لانهم ممكن يحسموا الحرب عسكريا لكن مش حيتحركوا لان الحرب مش من مصلحتهم على المدي البعيد و كمان اتعلموا الدرس كويس جدا من غلطة العراق السابقه لما تم استدراجها و وقعت في الفخ الدولى اللى اتنصب لها لما دخلت الكويت … فالحرب حتطلع منها ايران اقوي من السابق و كده يبقي معملناش حاجه … و دي سياسة جديده على دول الخليج اللى أول مره نشوفهم ينتهجوا النهج المصري و هو “الصبر الإستراتيجي” في التعامل مع امور مماثله 😊 😊 … بركاتك يا مصر 😊 😊 …. بس الكلام لازم يتواكب معه نفاذ الى المجتمع الايراني بالداخل زي ما كان الغرب بيعمل مع الكتله الشيوعيه …
طب أمريكا ايه دورها … و ليه الحشد العسكري الكبير اللى عاملاه في الخليج … مش ده استنزاف لموارد الخليج اللى كل شويه يدفعوا مليارات لامريكا و كأنهم مأجرين بلطجي يدافع عنهم ؟؟؟
اولا للاسف ناس كتير متخيله ان تكلفة الحرب سهلة … فمثلا صاروخ الباتريوت الواحد اللى بيعترض هدف جوي بيصل تمنه من 1 مليون الى 3 ملايين دولار … و الطياره اليوروتايفون لو طلعت لفت في الجو ساعه واحده و نزلت … بتتكلف 45 الف دولار … اما لو ضربت صاروخ او قنبله … ففيه قنابل بتتكلف اكتر من مليون دولار للصاروخ الواحد. …. فممكن جدا تكلفة الحرب تتكلف عشرات التريليونات من الدولارات بمنتهي البساطه (التريليون ألف مليار) … فمهما كانت تكلفة تهدئة الاوضاع … ما دامت في صالح هدفك الاستراتيجي … بتعتبر ملاليم لو قارنتها بتكلفة حرب حقيقية.
ثانيا الموضوع ده جاي على هوى ترامب رجل الاعمال و اللى بيستغل اي فرصه لكسب مزيد من الاموال … و هو قالها بمنتهي الصراحه … احنا اللى يهمنا هو ان ايران متوصلش للسلاح النووي … اما موضوع البترول … فامريكا انتاجها اكبر من انتاج السعوديه … و البترول الخليجي ميخصناش لانه بيروح معظمه للصين و اليابان و اوروبا … و اللى عايزنا نحمي البترول بتاعه يدفع … و وجودنا في الخليج بيهدي الاوضاع و بيخاللى الكل يفكر قبل ما ياخد قرار مجنون بالحرب.
طب مهو كل شوية ايران تضرب السعوديه بالـ “الدرونز” عن طريق الحوثيين و السعوديه مش عارفه تعمل حاجه ؟؟؟ …. الرد بسيط جدا ان مفيش حرب بيتم حسمها بالدرونز … ده ضغط على المجتمع السعودي عشان يضغط على قياداته انهم يفجروا المنطقه بالحرب …. مع الوضع في الاعتبار ان التسليح الجيد حاجه و الخبره في كيفية استخدام التسليح حاجه تانيه خالص … و لان الموضوع جديد على اخواتنا في السعوديه … فالخبرات اللى بيكتسبوها اخواتنا في السعودية الان لا تقدر بتمن …. و احنا واثقين انهم حيقدروا مع الوقت استكمال معداتهم و سد الثغرات اللى بينفذ منها الطائرات دي.
و اخيرا …. دايما و ابدا … ركز على الاستراتيجيات و سيبك من التكتيك و التفاصيل …. تحياتنا