04 Dec 2016
(ان لم نتغير نحن لن تتغير كوريا )
( يمكننا البكاء و السخط على احوالنا و يمكننا ايضا العمل على تغيير هذه الاحوال )
——————————————————————————-
جملتين إستهل بهما ” باراك تشونغ هي ” زعيم كوريا الجنوبيه و باني الدوله الكوريه الحديثه حكمه … و الذى نقل كوريا الجنوبيه من تحت الصفر الى مصاف الدول المتقدمه …. و اللى أجبر شعبه على العمل و البعد عن التواكل و الكسل و العطاله بالحديد و النار … بعد أن اعتقل جميع المعارضين و الاعلاميين و الصحفيين و الغي الاحزاب و أعدم حوالي 100 الف مواطن هم حصيله كل من عارضه او تكاسل او امتنع عن العمل اللى فرضه على الجميع ….. و دي التجربه اللى تكررت احداثها باختلاف تفاصيلها في المانيا و اوروبا في عصر الثوره الصناعيه و دول امريكا الجنوبيه ……. و اللى اتكلمنا عن تجربته بالتفصيل في مقال مفصل
و من حوالي الشهر بعتنا ليكم رساله عن توجه الدوله المصريه لتصحيح حاله العطاله و التواكل و مفهوم السبوبه … و وجوب محو فكره ” محمد افندي المهم ” اللى عايز يشتغل على مكتب عشان هو درس في الجامعه و عايش و متشعبط في عيشه مش بتاعته … و رافض تماما فكره انه يلبس عفريته او يشتغل بايده ….. الى ان وصلنا اليوم ان فيه مئات الالاف من فرص العمل و اللى بيتعدي اقل دخل فيها الى 6000 جنيه شهريا لا تجد من يعمل بها بحجه انها فرص عمل مهنيه و ليست مكتبيه …. و ان فكره انا مش حشتغل الا لما البلد تنضف .. و مش حشتغل الا لما اتأكد ان مفيش فساد … و مش حشتغل الا لما يجيبولي مدرب محترف من الدوري البرازيلي … و كل حجج البليد دي .. …. و ده اللينك بتاعه :-
بالامس نشر الاستاذ محمد نجم الباحث الاقتصادي مقال يؤكد وجهة نظرنا من باحث اقتصادي مرموق ….. يا ريت تراجع مقالاتنا السابقه و هات كوباية الشاي و اقرأ مقال الاستاذ محمد نجم …. و ياريت تقف قدام المرايه … و تصارح نفسك … و تجاوب على الاسئله دي …. إنت عايز ايه … انت قيمتك ايه … انت تقدر تعمل ايه ..
————————————————————————————-
هو كلام طويل بس مهم وعشان كدة هتكلم بالبلدي عشان فيه ناس بتتخنق من الكلام المتخصص والارقام والمنحنيات
اكتر حاجة تخليني ادعم الحكومة دى وهتخليني ادعم اي حكومة ايا كانت هى مين طالما هتمشي علي نفس الخط انها حكومة مركزة علي اعادة هيكلة تفكير الناس وتطويره للجيل التالي من التفكير اللازم لتحقيق اي تنمية وتطوير للبلد
التفكير دة لو كان هو المنتشر من السبعينات مكنش زماننا النهاردة بنتحسر ان كوريا وسنغافورة والهند وتركيا سبقونا رغم اننا بدأنا مع بعض … ومنه لله اللى كان السبب ورضخ لرغبات الناس وكسلهم وعجزهم ومبدأش الاصلاحات دى من زمان
حكاية انك تشتغل فى الحكومة , انساها
انك تخلف 2 و3 و4 , انساها
انك تشتكي وتحمل الحكومة كل مشاكلك , انساها
انك تنتظر التدخل الحكومي فى كل حياتك , انساها
انك تزوغ من الشغل عشان تطلع علي شغلانة تانية , انساها
انك تشتغل قطاع خاص وبتاخد مرتب قليل وعايز تعترض , انساها
انك عايز البلد تتحول لدولة نضيفة اولا وبعد كدة انت تشغتل , دة مستحيل انساها
اللى هيحصل انك هتشتغل وبس , الحكومة باللي بتعمله دة بتعيد هيكلة فكر المجتمع من مجتمع متكاسل وفاشل وفاسد وعبء علي نفسه وعالاقتصاد وعالموازنة (اللى تضررت بشدة اخر 5 سنين بسبب اللى حصل فى البلد ولو فقدنا السيطرة عليها كلنا هنضيع) لمجتمع نشيط ومنتج ومتقن لعمله
والحكومة لوحدها مش هتعمل حاجة ومش هنبقة دولة نضيفة غير مع بعض
مش استغماية هى , مش هنقول للحكومة ابتدي انتي بس واحنا هنحصلك ! دة هبل
احنا اللى هنخليها نضيفة مع الحكومة وهنستحمل الظروف والمشاكل الحالية عشان نعيش فى بلد افضل واحسن لنفسنا وللاجيال الجاية
ثقافة الفهلوة , انساها
ثقافة الفتي فى اي شيء , انساها
انت مش هيبقة عندك وقت اصلا تفتي فى اي حاجة
احنا تدريجيا هنبقة عاملين زي المواطن الامريكي او الالماني او الياباني , ماكينة شغل وانتاج وفقط , يوم الاجازة هنضطر نشتغل فيه
لانك لا تملك خيار اخر
المواطن الالماني او الياباني اللى بلده كانت متدمرة بعد الحرب العالمية التانية مقالش “هو فين الخدمات وفين البلد النضيفة دى والمرافق وووو عشان اشتغل واتعب واتقن عملي , خلو البلد زي امريكا مثلا وانا اشتغل زي الفل”
طبعا دة تفكير المعاتيه والشعوب المحترمة مقالتش كدة فى بداية اي تنمية
حكاية بقة الثورات والتظاهر اتنين وخميس واسقاط الداخلية وحالة الفوضي والعته الثوري دى , انساها
الالمان بيتاخد اكتر من تلت مرتبهم ضرايب علي الدخل مباشرة , غير ضرايب تانية
دول تانية اوروبية بتقتطع نص المرتب ضرايب رغم انها دول بتصدر وبتنتج وغنية !
هنا فى مصر لحد 6500 جنیه في السنة معفاة من الضریبة , دى فئة محدودي الدخل سيبك منهم
لكن أكثر من 6500 جنیه حتى 30,000 جنیه تفرض ضريبة بنسبة 10% ودي اغلبية المجتمع فى الشريحة دى
الكلام دة النهاردة , بكرة هيتاخد منك بقة 50% ضرايب ومش هتتكلم
بس عالناحية التانية وبالتدريج هتشوف بالفلوس دي خدمة حقيقية وتأمين شامل ومرافق نضيفة
لكن دة مش هيتحقق فى يوم وليلة ولازم ندفع التمن الاول قبل ما ناخد البلد النضيفة والخدمة النضيفة والمرافق النضيفة
ولازم تبقة انت مواطن ذكي وبتفهم , مرتبك عشان يكفيك لازم تكون مخطط لحياتك صح
متبقاش شايل تليفون بخمستلاف جنيه وجايب عربية قسطها الشهري الفين جنيه وفى نفس الوقت بتشتكي من الحكومة والاسعار , اللى زي الاخ دة ملايين موجودين وسطنا بدرجة او باخري
مش عاجبك الاسعار , اشتغل بضمير , اشتغل اكتر
مش عاجبك ارتفاع اسعار الاجهزة الكهربية ونفسك تتجوز , يبقة كون نفسك وحوش اكتر وخطط صح لحياتك بدل ما تزود طابور الفشلة اللى اتسرعو علي الجواز بدون اي تخطيط او تفكير وزودو فشلنا كلنا كمجتمع
مش عاجبك اسعار المدارس , متخلفش اطفال غير لما تبقي اد مصاريف مدرسة خاصة
مش عاجبك التعليم الحكومي , متخلفش اصلا وتبقة قمت بعمل وطني جليل اقسم بالله
مش عاجبك مرتبات القطاع الخاص او الحكومة , شغل دماغك واعمل بيزنس علي قدك
مفيش حد احسن منك وانت مش اقل ذكاءا من اي حد نجح فى البلد دى وبالظروف الصعبة دي
لو مش عاجبنا ان المستورد بيغلي بالضعف والضعفين , يبقة ننتج جوة بلدنا علي الاقل السلع الهامة
احنا مش اقل ولا اضعف من اي دولة بتنتج
مش عاجبك الحكومة , ركز فى نفسك وحياتك وشغلك ونجاحك وملكش دعوة بالسياسة
مفيش مواطن فى العالم الاول او التاني او التالت بيضيع وقته فى الجدالات السياسية زي المواطن المصري
وبردو مشوفتش شاب فى العالم عنده حجج لفشله زي الشاب المصري
طبعا عندنا نماذج ناجحة ومشرفة كتير جدا بس انا بتكلم فى ان التفكير دة لو انتشر هيودينا فى داهية
ازاي الشعب الهندي نجح رغم ان عندهم يوميا ناس بتموت مالجوع ومع ذلك متفوقين فى البرمجيات ! ازاي الشعب الصيني نجح وبلده كان مستوي الخدمات فيها اسوأ بكتير من مصر من 30 سنة , ازاي ناس جوة مصر نجحو عادي جدا رغم ان ظروفهم اسوا منك بمراحل !
وكانوا لا يملكوا ورث ولا اسم ولا منصب ولا فلوس , فقط دماغهم وبس
مش عاجباك البلد كلها , بردو مش هتعرف تسافر , حتي لو موافق تغسل صحون وتنضف حمامات فى كافتريا فى اوروبا او امريكا بردو مش هتعرف تسافر لانك الحقيقة العالم مصنفك انك ملكش عازة , انت مش مهاجر بناءا علي عقد جالك من شركة ابل للعمل لديها
دة انت هتسافر سياحة وهتكسر وتعيش غير قانوني وتبقة مواطن درجة تالتة ملكش قيمة
الخليج وقفل خلاص , شطبنا والدنيا بايظة هناك معلش بقة
انت معندكش اختيار غير انك تصنع نجاحك وحياتك هنا فى مصر تحت اي ظروف ياما الحل التاني انك تفضل تشتكي وتعيش عالة علي نفسك واللى حواليك وتفضل فى البؤس دة لنهاية حياتط
ورغم انها مئات الاف الامثلة , بس من غير ما اديك اي مثال … لو انت مش مقتنع ان فى ظروف اسوأ من مصر بمراحل فيه قصص نجاح عظيمة جدا خرجت للنور واثبتت نفسها , ولو انت مش مقتنع انك تقدر تنجح وانك تملك امكانيات وقدرات جبارة فى مجال ما فى الحياة بس لو امتلكت ارادتك وامنت بنفسك … لو مش مقتنع بكدة يبقة خليك زي مانتا فى فشلك دة ومفيش امل منك وههتعيش وهتموت ملكش قيمة ولا اهمية
احنا كتير اوي بصراحة ولازم نعمل زي الصين طفل واحد لكل اسرة وشكرا علي كدة , احنا بقينا عبء علي بلدنا
وانتاجنا وصادراتنا مقارنة بامكانياتنا واحتياجاتنا , شيء لا يذكر وصفر عالشمال
انا شايف ان الحكومة الحالية بتحاول تعمل حاجة كويسة غير كل الحكومات السابقة علي مدار ال60 سنة كلهم
لكن الناس لازم يكونو علي قدر التغيير دة
اللى مش هيفكر تفكير جديد وهيحفر فى الصخر ويجتهد هيداس عليه الفترة الجاية حرفيا
الكلام دة لا ينطبق علي كل المجتمع
يعني الدولة لازم تقوم باستغلال امثل لمواردها عشان تقدر تساند فئة من المجتمع زي العاجزين او الارامل او كبار السن ومحدودي الدخل والعشوائيات والمناطق النائية زي الصعيد وسينا والسلوم
لكن كل من هو قادر علي العمل خاصة من الطبقة المتوسطة وهى الاغلبية , سنه بين ال22 – 45 لازم يخش المطحنة دى ويتأقلم معاها , دى الطريقة الوحيدة عشان نقول ان فيه امل نبقة دولة محترمة وهنبقة ان شاءالله
وكل دة علي اعتبار ان الحكومة هتقوم بدورها بشكل جيد وكفء
وهتستمر فى سياستها دى ومش هتتوقف عنها لاي سبب
وعلي امل انها تكون قادرة علي التنفيذ ومخططة كويس للتنفيذ
وكمان علي امل انها مترضخش فى لحظة من اللحظات لغضب الناس من اعادة الهيكلة دى
نثق فى انفسنا بس وفى قدرتنا علي النجاح … وانا عارف ان بكرة هيكون افضل واحلي
– الباحث الاقتصادي محمد نجم
————————————————————————————————