26 Mar 2019
ندعم الدكتور طارق شوقى وزير التربية والتعليم !!
————————————————
- طارق عامر محافظ البنك المركزى خريج أداب ، وهــ يودى البلد فى داهية
- السيسى بيضرب فى ليبيا ، و هــ يدخلنا فى حرب و هــ يودى البلد فى داهية
- الحكومة بتعمل مشروعات فنكوش ، والدولة هــ تنهار إقتصادياً وتفلس
- الإرهاب بيحاصر مصر من كل جهة والجيش بيعمل مكرونة ومش فاضى للحرب ، و مش قادر يقف أمام العمليات الإرهابية اللى بتحصل فى مصر ، والأمن منهار
- الإرهاب ده فزاعة ، ومافيش حاجة إسمها حرب .. دى كذبة لتبرير مزيد من القمع وتمرير التعديلات الدستورية
- وزير الكهرباء ده اخواني و بيخرب منظومة الكهربا في مصر
- محطات سيمنس دي فنكوش و عمرنا ما حنتقدم و الكهربا بتقطع كل ساعة و السبب الوزير و الحكومة
- الدول لا تبنى إلا بالتعليم ، ولازم نعمل نظام جديد زى برة .. الناس بتتعلم على تابلت وإحنا بقينا فى ذيل الأمم … شوفوا الهند عملت ايه و اتعلموا منها.
- لازم نجيب خبراء يبنوا المنظومة التعليمية فى مصر
- طارق شوقى مش فاهم حاجة ، وهــ يودى أبنائنا فى داهية
- مؤامرة إييه اللى انتوا بتتكلموا عليها .. ماتبطلوا بقى مبررات !!
- تابلت إييه اللى انتوا بتقولوا عليه … إحنا وضعنا مختلف فى مصر !!
دى بعض الأمثلة للى بيتقال دايما فى مصر عن بعض الأشخاص فى بعض المناسبات
في كلمة و رد غطاها …
الدولة بتعمل الصح حتى لو كان المواطن مش مدرك لده … لكنه هــ يعرف بعدين … زي مواضيع كتيييير كانوا بيصرخوا عليها و يشتموا و يتيريقوا …. و في الاخر ماتسمعش صوته لانه بــ يدوّر على حاجة تانية يلحق يفتي فيها.
الدولة لو خافت من تعويم الجنيه علشان رد الفعل الشعبى ما كانتش مصر وصلت لمرحلة تعافى الإقتصاد المصرى بشهادة كل المؤسسات الإقتصادية الدولية
الدولة لو خافت من رد فعل الجماعات الإرهابية و رد الفعل الدولى من اللى مشغلينهم برة ، ما كانتش مصر قدرت تسيطر على الوضع الأمنى الداخلى لحد دلوقتى برغم كل التحديات
الدولة لو إستجابت لسلسلة التباكى والصراخ والعويل والهجوم على طارق عامر محافظ البنك المركزى ، ما كانتش مصر أخدت شهادة إن البنك المركزى واحد من اكثر البنوك المركزية على مستوى العالم نجاحاً ، وإستقراراً ، وقدرة على إصلاح السياسة النقدية.
الدولة لو خافت من الناس و كلامهم و فتاويهم و سمعت كلامهم ان وزير الكهرباء اخواني و اننا ماينفعش ناخد 6 مليار يورو قروض عشان نقضي على مشكلة الطاقة … ماكنّاش نجحنا في انتاج طاقة تكفينا لمدة 100 سنة قدام و اصبحنا مثال يحتذي بيه فى العالم كله … و لا كنا جيبنا قيمة القروض من تصدير الكهرباء لدول حوالينا
وبرضوا الدولة مش هــ تستجيب للصراخ والعويل فيما يخص الوزير طارق شوقى وزير التربية والتعليم.
الهند لا تمتلك حتي اليوم بنية تحتية محترمة و لا حتي مدارس و لا فصول مجهزة … و لكن استثمرت في منظومة التعليم و غيرت منظومة تعليمها الى التعليم الالكتروني الذي يعتمد على الفهم و التفكير و ليس التلقين …. باستخدام الوسائل الحديثة منها التابلت …. و لم تلتفت الى الصريخ و النواح اللى كان موجود عندهم لما بدأوا التطوير … و لا سمعوا الى كلام من عينة .. إعملوا فصول الاول .. و لا عيالنا مش متعودة على الفهم و التفكير .. و لا مستقبل عيالنا ضاع .. و لا كل الهري اللى كان بيتقال عندهم ساعتها … و اليوم الهند هي اكبر منتج للتكنولوجيا و البرمجيات و الصناعات الثقيلة و هي ثاني اكبر دولة دخلا في العالم بعد الصين .
و مصر اليوم أعادت بناء بنيتها التحتية و الصناعية و تستثمر في التعليم ببناء أحدث منظومة تعليمية رقمية حديثة و أكبر محتوي ألكتروني يضم كبريات المكتبات العلمية العالمية في وقت قياسي تحت اشراف اكبر المؤسسات التعليمية العالمية …. و هــ تكمل للنهاية فى منظومة إصلاح التعليم المصرى ، حتى لو العالم كله وقف قصادنا … وحتى لو كل أجهزة المخابرات العالمية جندت كل قواها و عملوا كل مرة 40 مليون مش 4 مليون محاولة لإفشال المنظومة وإسقاط السيرفر و حتي لو تحالفت كل مافيا السناتر و الدروس الخصوصية اللى بتاخد من جيوب المصريين 40 مليار جنيه في السنة و دفعوا دم قلبهم للحفاظ على السبوبة المليارية بتاعتهم و قاموا بـ دفع وسائل التواصل الاجتماعي للهجوم على الدولة المصرية لإيقاف مشروعها اللى هــ يغير وجه مصر تماماً في السنوات المقبلة … و يخلق جيل متعلم متفتح بيفكر و يناقش و يبتكر و عنده حصانة ضد الافكار الارهابية و الهدامة … بدلا من جيل يحفظ و يصم و لا يفهم و لا يستعمل عقله و يكون مادة خصبة لمشروع السمع و الطاعة للهدم و التخريب.
و بالنسبه للماميز 🙂 …
لو مدرس ابن او بنت حضرتك مش على المستوى انه يشرح … او مش متدرب انه يشرح .. او مش عايز يشرح … أو مقموص انه يشرح … او ظروفه المادية او النفسية منعاه انه يشرح ….. او هو فعلا بيشرح بس ابن او بنت حضرتك مش فاهمة منه حاجة.
- ابن او بنت حضرتك ممكن يفتح المحتوى الالكتروني و حيلاقي أحسن مدرس بريطاني من مؤسسة Britannica Learning عملاق التعليم في العالم بيشرحله بفيلم توضيحي على أعلى مستوى
- و لو برضوا مافهمش منه حاجة …. هيلاقي مدرس تاني من الهند من عملاق التعليم الالكتروني Design mate بيشرحله بفيدوهات 3D بالتفصيل الدرس بتاعه
- و لو برضوا مافهمش …. هيلاقي نفس الدرس بيشرحه احسن مدرس أمريكي من مؤسسة Discovery Education بيشرحله بفيديوهات توضيحية مفصلة و بالامثلة.
- و لو دماغه قفلت و برضوا مافهمش … هيلاقي نفس الدرس بيشرحه احسن مدرس انجليزي من مؤسسه Wolfram بيشرحله خطوة خطوة الدرس بتاعه.
- و لو مافيش فايدة و معاند انه يفهم … هيلاقي برضوا نفس الدرس بيشرحه احسن مدرس من مؤسسة York Press برضوا بيشرحله الدرس بالتفصيل
- لو كل دول جم لابنك و هو قاعد في البيت على الفوتيه و مانفعوش انهم يفهموه و مجانا و من غير ولا مليم… و فضلتم انتى و ابن حضرتك مصِّرين على الحفظ من السناتر و الاجابات النموذجية … و رافضين تماما مبدأ التعلم و الفهم … يبقي مكان ابن حضرتك مش في المدرسة … حاولى تعلميه ازاي يفهم و ازاي يتعلم صنعة تنفعه و ينفع بيها مجتمعه
اللى بــ يدير منظومة تطوير التعليم فى مصر هى الدولة المصرية بكل أجهزتها ممثلة فى الوزير طارق شوقى … مش جروبات الماميز و لا مافيا السناتر و الدروس الخصوصية و لا حتي قطيع السمع و الطاعة.
نحن ندعم طارق شوقى