اللعبة قذرة … والشعوب هى الثمن !!!

12 Oct 2019

اللعبة قذرة … والشعوب هى الثمن !!!
————————————

قبل ما ندخل فى موضوع النهاردة … كنا بس عايزين نسأل سؤال مهم جداً … هم الإخوة بتوع شعار “حلب تحترق” لما الجيش السورى حب يدخل مدينة حلب علشان يحررها من الدواعش .. ياترى راحوا فين !!؟؟ … حالة الصعبانيات والكربلائيات على المدنيين والأطفال اللى مالهمش ذنب فين !!؟؟ … الحملات اللى تم شنها على لسوشيال ميديا .. وكل واحد كان بــ يشيّر على قد ما ربنا يقدره من صفحات وأكونتات مشبوهة وغير معروفة المصدر بتطالب بوقف الزحف على حلب .. راحت فين !!؟؟ . الناس اللى غيروا صور بروفايلاتهم ، وخلوها لونها أحمر بلون الدم تضامنا ياعينى مع أهل حلب … كل ده راح فين !!؟؟ … 🤔

المصيبة إن كل ده حصل علشان الجيش السورى كان هــ يحرر حلب من الدواعش … لكن لما بهلول المثليين ، وسلطان المدمنين ، و حامى حمى الدين .. يدخل يعتدى على حدود الدولة السورية ، ويستقطع جزء من أرضها وجيوشه تقتل وتذبح .. وقذائف مدافعه تريق دماء الكبار والأطفال ، فى مشاهد بشعة يلين لها قلب الصخر .. ماتسمعش غير صوت صرصور الحقل الحزين … و ده إن دل على شئ .. فإنما يدل على قوة الإعلام القذر ، والسوشيال ميديا التابعة له .. واللجان الأليكترونية النشطة .. اللى بتستغل بعض الناس من خلال الأيديولوجيا الدينية والسياسية بتاعتهم … وتسخرهم لخدمة أهدافها ومصالحها .. وبتلعب بيهم وتسيّرهم من غير ما ياخدوا حتى بالهم .. و هم فاكرين كدة إنهم ثوريين ومناضلين ، وبيعبروا عن أرائهم الثورية المتحررة .. و هم بيتلعب بيهم زى عرائس الماريونيت على طريقة “حــمـــار رغــــم أنــفــــه” !!! 😏 .. والمصيبة إنك لما تيجى تقول لواحد منهم كدة .. يرد يقولك .. مالناش دعوة بسوريا .. خلينا فى مصر !!! .. لا ياشيخ .. بجد !؟ .. ماعرفتكش أنا كدة !! 😬🙄

وياريتها جت على المغيبين دوول وبس .. و اللى كل واحد فيهم عايش دور الزعيم الثورى داخل نطاق العالم الإفتراضى … لكن بما إن سويا دى دولة عربية وإسلامية .. و من يتم ضربهم هم من الأكراد الى بــ يحملوا الجنسية السورية ويدين أغلبهم بالإسلام على المذهب السنى … فــ للأسف .. مافيش ولا منظمة إسلامية _فى حدود علمنا_ طلعت بيان يدين أعمال العنف والقصف المدفعى والإجتياح اللى قام به خليفة الإرهابيين على أرض سوريا … حتى مؤسسة الأزهر الشريف ماعملتش كدة .. فى الوقت اللى كان لها بيان صريح وواضح بشأن عملية تحرير حلب من كام سنة … وياريت بتوع المزايدات بلاش مزايدة الله يكرمكم .. لأننا من أكثر المدافعين عن الأزهر ضد منتقديه .. والصفحة دى تشهد بكدة

و طبعا مافيش داعى نتكلم عن المواقف المايعة وبيانات الإدانة الضعيفة من المنظمات الدولية ، والأمم المتحدة ، و مكاتب حكوك البتنجان … لأننا كلنا عارفين إن المنظمات دى كلها سواء الدولية الرسمية أو الأهلية الغير رسمية ، كلها منظمات مسيسة ، وبتشتغل بأجندات مموليها !! …. ما علينا … هم بس كلمتين كنا مزنوقين فيهم ومحتاجين نقولهم علشان المواقف أصبحت كاشفة… 😕

نيجى بقى لموضوعنا النهاردة .. وهو عملية الإجتياح التركى لسوريا بهدف خلق منطقة أمنة على الشريط الحودى السورى بعمق 30 كيلومتر … و هنا اللعبة سياسية بالدرجة الأولى .. و بكل أسف إن الألعاب السياسية فى الزمن ده والقائمة على تحقيق المصالح … أصبحت الشعوب هى اللى بتدفع ثمنها من دمائها .. والمؤسف اكثر .. إنه بيكون بإيدين الشعوب نفسها .. بعد ما دمروا أوطانهم بــ إيديهم .. وضيعوها .. وضيعوا جيوشهم الوطنية اللى كانت بتحميهم من كلاب السكك اللى عايزين ينهشوهم .. وعلشان مانطولش عليكم … خلينا نلخص لحضراتكم الموضوع فى نقاط سريعة ومختصرة:

أولا … الأكراد المسيطرين على الشمال السورى طول عمرهم قومية عرقية ، متواجدين فى سوريا والعراق وتركيا .. و طول عمرهم لهم أحلام إنفصالية بهدف تكوين دولة مستقلة خاصة بيهم … وبسبب حساسية موقع تواجدهم .. كان بيتم إستغلالهم دائما واللعب بيهم للضغط على الحكومات .. زى ما طول الوقت بيحصل مع سويا وتركيا ، وكان دايما بيحصل مع العراق أيام صدام حسين ، واالى ماكانش بيهمه أى ضغوط أميريكية … و طبعا لأن الأكراد مجرد كارت بيتم اللعب بيه .. فــ من الطبيعى إنهم يتباعوا عند أول ملف .. بمجرد ما يشكلوا خطورة على أهداف اللى بيلعب بيهم .. أو إنهم يستنفذوا الهدف من إستخدامهم ..

ثانيا … أمريكا وروسيا و دول أوروبا ماكانش ممكن يوافقوا على قيام دولة كردية .. والأكراد بدأت شوكتهم تقوى … وسجون الجيش السورى الديموقراطى (الكردى) تحتوى على حوالى 11 ألف داعشى تم السيطرة عليهم بمساعدة القوات الدولية .. والسيطرة على عائلاتهم وقططهم و كلابهم فى مخيمات … و نصف الدواعش دوول منتمين لدول أوروبية .. و دولهم رافضة تستلمهم لأنهم مش عايزين قنابل موقوتة عندهم

ثالثا … أردوغان بيعانى من مشاكل أقتصادية صارخة .. وإقتصاد فى طريقه للإنهيار .. مع الوضع فى الإعتبار إنه له أحلام توسعية على حساب سوريا والعراق ، عايز يعيد بيها حشد الرأى العام الداخلى عنده وكل بهاليله مرة تانية لمصلحته .. بالإضافة الى إن جزء كبير من الدواعش أصلا من رجالته اللى كان بيدعهمهم ويمولهم ، وكان بيشترى منهم البترول المسروق بخمسة دولا للبرميل .. وكمان أصابه الخبل والخلل العقلى بسبب خروجه من معادلة غاز شرق المتوسط .. وأصبح بيهدد مصالح أوروبا وبعض الدول الأخرى .. و مع أستنفاذ الهدف من وجود البهلول بعد ما اصبح عبئ على اللى مشغلينه ..فكان لازم يتشاف حل معاه … طب نعمل معاه إييه … نلعب على جنون العظمة ونغض الطرف عن دخوله سوريا .. و أهو نخلص من الأكراد .. ونعيد تفعيل تنظيم داعش ، وتشغيله فى دول أخرى زى ليبيا واليمن و دول الحزام المحيط بدول الشمال الأفريقى .. وطبعا أكيد سيناء و الحدود الغربية لمصر ..

رابعا … النظام التركى رجله هــ تغرز فى حرب إستنزاف مالهاش أول من أخر … وإقتصاده لن يتحمل تكاليف الحرب وإستنزاف قدراته المادية والإقتصادية .. و فى نفس الوقت ، الأكراد مش هــ يسكتوا … و بعد ما هــ يستوعبوا الصدمة ، هــ نبدأ نشوف رود الأفعال اللى هــ ترد فى صدر قواته .. و يمكن كمان ترد فى الداخل التركى .. ماحدش عارف .. و مع إستمرار النزيف الإقتصادى والعسكرى … يبدأ التصعيد السياسى فى مرحلة لاحقة

الجامعة العربية بدأت إجراءات تصعيدية بقيادة مصر مع صدور البيان الختامى لإجتماع الجامعة العربية على مستوى وزراء الخارجية .. بإدانة العدوان التركى على سوريا والمطالبة بالإنسحاب الفورى الغير مشروط من الأراضى السورية .. مع النظر في اتخاذ إجراءات عاجلة لمواجهة العدوان التركي، بما في ذلك خفض العلاقات الدبلوماسية، ووقف التعاون العسكري، ومراجعة مستوى العلاقات الاقتصادية والثقافية والسياحية مع تركيا .. بالإضافة لمطالبة مجلس الأمن الدولي باتخاذ ما يلزم من تدابير لوقف العدوان التركي والانسحاب من الأراضي السورية بشكل فوري، وحث كافة أعضاء المجتمع الدولي على التحرك في هذا السياق، مع العمل على منع تركيا من الحصول على أي دعم عسكري أو معلوماتي يساعدها في عدوانها على الأراضي السورية ..

و لسة قمة (روسيا – أفريقيا) المقرر عقدها في سوتشي يوم 24 أكتوبر المقبل برئاسة الرئيس عبد الفتاح السيسى ، والرئيس الروسى فلاديمير بوتين … وبعدهم القمة الاقتصادية الأوروبية – العربية فى يوميى 29 و 30 أكتوبر القادمين .. واللى أكيد سيتم فيها مناقشة ملف غاز شرق المتوسط ..

الأيام القادمة حبلى بالأحداث … مع الوضع فى الإعتبار إن السياسة هى فن الممكن .. وكل شئ خاضع لمستجدات كتيرة .. و كل السيناريوهات واردة ومطروحة .. فى ظل منطقة تعج بالتطورات ، و تموج بالتحركات و … والتحديات !!

أدينا بنتفرج .. لكن الأهم .. إننا نكون فى ظهر بلدنا .. و أدينا شايفين بعنينا … الدول اللى شعوبها ما إستوعبتش اللى بيحصل حواليهم وفيهم .. حصل لهم إييه !!

مواضيع سابقة و ذات صلة ، من موقعنا الأرشيفى لصفحة كلام فى الصميم:

لمتابعة تعليقاتكم