08 Dec 2019
البرمجة العصبية من خلال السوشيال ميديا .. !!
———————————————–
من 4 أيام نشرنا مقال بعنوان “النصر بالخيانة .. و الثمن وطن” .. إتكلمنا فيه عن الخيانة والعمالة .. و شرحنا فيه الفرق بين زمان ودلوقتى سواء من خلال الشكل أو التطبيق أو حتى أسلوب التعاطى لكل من سقط فى هذا المستنقع القذر … لدرجة إنه المقارنة اصبحت حتى غير منصفة للخاين أو الجاسوس بتاع زمان … لأنه على الأقل كان بــ يتدارى ويستخبى خوفا من المجتمع ، وخوفا من عقاب الدولة .. فى حين إن الشخص اللى سقط فى بئر العمالة فى عصرنا الحاضر أصبح يتصف بقدر لا متناهى من البجاحة والوش المكشوف اللى بــ يبرر بيه عمالته لأطراف دولية و لمصلحة دول أخرى .. دون خجل أو إحساس بالندم …. و يمكن هو اصلا مطلوب منه يبقى كدة .. لأن زى ما قولنا قواعد اللعبة نفسها إتغيرت … بعد ما أصبحت عمليات التجنيد علنية و تحت مسميات أخرى ، وليست سرية زى زمان !!! .. ياريت تعيدوا قراءة المقال .
النهاردة .. و زى ما وعدناكم فى أخر المقال السابق .. إننا هــ نتكلم عن حملات التشكيك وإثارة البلبلة وأساليب التغييب اللى بــ تتعمل علشان يتم بيها خلخلة وتفكيك الجبهة الداخلية وبالذات على السوشيال ميديا … بس قبل ما نتكلم عايزين نفكركم بحاجة … فاكرين المقالات اللى نشرناها مع وفات أو جاسوس مدنى منتخب … و قولنا لكم إنكم هــ تتفاجئوا إن الصفحات والجروبات الغير سياسية .. و اللى انتم متابعينها ، هتلاقوا معظمها صفحات وجروبات خرفانية بإمتياز !!! … وطلع كلامنا صح وقتها .. وحضراتكم بنفسكم إكتشفتم ده .. وخرجتم من معظم الحاجات دى أو عملتوا لها بلوك …
فقط للتذكير .. مقال “كهن السيد محن“
أهو هى دى العبة اللى بــ تتم دلوقتى تانى .. و بــ يعاد تدويرها … لكن مش بس على مستوى الصفحات والجروبات … لكن على مستوى الأكونتات الشخصية … والمستهدف من كدة هو عقول المصريين .. بطريقة البرمجة العصبية بأسلوب تشتيت الإنتباه والتشكيك والبلبلة … و هنضرب لكم عدة أمثلة .. بتحصل معانا كلنا و مش بناخد بالنا منها … لكنها بتتعمل بشكل شديد الإحترافية .. سواء على المدى البعيد ، أو القريب !
أولاً … الصفحات والجروبات الغير سياسية الكامنة:
ا==========
و دى الصفحات اللى مش بتظهر غير فى أوقات محددة .. وأحداث بعينها علشان تشتغل عليها .. لكن غير كدة .. هى كلها صفحات كيوت وجميلة وبوستاتها إما كوميكسات أو عن الكورة والفن والمسلسلات والطبيخ والأغانى والشعر وغيره وغيره … وشغلتها فى فترات الكمون إنها تجمع اكبر عدد من المتابعين .. وتشتغل على دس السم فى العسل …
ثانياً … بوستات الإختبار والتشكيك:
ا============
كل فترة تشوف بوست غريب نازل على صفحة من الصفحات اللى ذكرناها فوق دى .. و تلاقيه بــ يختلف عن قناعاتك الشخصية وعن أهداف الصفحة أو الجروب .. ويعمل حالة من الجدل العنيف … وتلاقى سيل من اللجان الأليكترونية داخلة تتفاعل وتشكك وتشتم .. وبعدها .. فسسسسسسس … وترجع الصفحة تانى لحالة الكمون … لكن لحد ما يظهر حدث تانى له طابع معين يقدروا يشتغلوا عليه .. بتلاقى الصفحات دى شغالة بطريقة دس السم فى العسل .. و … و دمتم !
ثالثاً … اللجان الأليكترونية:
ا===========
أو زى ما بنسميهم الذباب الأليكترونى .. اللى شغلته عمل تريندات معينة على موضوع معين .. زى موضوع الإنتحار مثلا .. أو يستغلوا حدث أمنى معين أو حتى هزيمة فى ماتش كورة .. فتلاقى سيل من الفتاوى الأمنية والتشكيك فى الدولة إستغلالا لحالة الحزن أو الغضب اللى حاصلة … وأى حد يمشى عكس الموجة .. يتم إغتيالة معنويا على طول بسيل من الشتيمة وقلة الأدب والبذاءات اللى خارج قاموس اللغة … والهدف بــ يكون إن إنا ، وانت ، وإنتى ، نسكت و ما نتكلمش تجنباً للشتايم والبذاءات … و علشان يفضل التريند شغال … وتفضل حضرتك متابع الموضوع و هو ماشى فى إتجاه واحد فقط .. فــ يترسخ عندك قناعة إن ده التوجه العام .. وخصوصاً إن الصوت العقلانى إختفى خلاص نتيجة الهجوم عليه !
رابعاً … الخروف الندمان:
ا==========
فيه بقى نوع أخطر من اللى فوق .. والنوع ده كلنا بــ نقابله .. بالذات فى الصفحات والجروبات والمواقع المؤيدة …. النوع اللى يدخل يقولك … أنا كنت من أشد المؤيدين للنظام .. ونزلت فى 30 يونيو … وإنتخبت السيسى … و خسرت ناس كثيرة علشان وقفت مع البلد … لكن بمرور الوقت إكتشفت إنى كنت غلطان .. و تييييت تييييت تييييت تييييت .. من طقطوقة الكربلائيات والصعبانيات ، وتحابيش الغلابة والإنهيار الإقتصادى … و طبعا كلامه مصدق .. بأمارة إن الراجل نزل فى 30 يونيو … ويبدأ يشدك ناحيته .. ويشكك فى كل حاجة بتحصل فى البلد .. ويقلل من كل إنجاز إتعمل … و مع الوقت … و مع تعرضك لأكثر من شخص بيقول نفس الكلام .. تلاقى نفسك بيتلعب بيك الكورة …. و هم مش عايزين أكثر من كدة !
خامساً … الفايروس الكامن:
ا============
و ده أخطر نوع فى كل الأنواع اللى فاتت …. إزاى !!؟؟
مين فينا مش بــ يجيله طلبات صداقة من حسابات بأسماء مايعرفهاش … و هتلاقوا الموضوع ده زايد أوى الفترة اللى فاتت .. وبالذات مع الأصدقاء اللى لهم نشاط واضح على الفيسبوك … المهم إنك هتلاقى إن الظاهر من الحسابات دى إنها مؤيدة للدولة .. وفيه منها حاطين صورة السيسى صور بروفايل … و هتلاقى أكثر من 50% من الحسابات دى باسماء نسائية .. وبالذات لما يكون الشخص المرسل له طلب الصداقة رجل 😉🙃 ..
لما تدخل على أى حساب من دوول .. تلاقيه بــ ينزل بوستات وبيعمل شير على صفحته بمعدل 50 بوست فى الفيمتو ثانية … و كلها بوستات مؤيدة للدولة 😁 … و تفضل بقى تنزل تحت علشان تجيب أخر الأكونت ده … وبعد نص ساعة .. تكتشف إن كل اللى انت إتفرجت عليه وانت عمال تعمل “Scroll Down” .. ماكملش حتى ساعتين …. والمشكلة إنك لما تشوف حجم التفاعل على البوستات دى … مش هتلاقى أكثر من 2 لايك بالكثير على كل بوست
المهم إن بعضنا بيقبل طلبات الصداقة دى … و أول ما الشخص الجديد ده يبقى فى قائمة الأصدقاء .. خلاص .. بــ يتوه فى دهاليز النسيان … و عمرك ماتشوف له تعليق واحد عندك أو حتى لايك … لأن هدفه إنه يبقى فايروس كامن بين قائمة أصدقائك .. و مش بعيد تلاقيه بيبعث طلبات صداقة لأصدقاء عندك علشان يبقى فيه بينك وبينه اصدقاء مشتركين … يعنى امان يعنى 🙂
الشخص ده بيفضل كامن كدة … وبرغم إنه فى الظاهر مؤيد للدولة .. لكنك تبتدى تظهر لك بما إنه فى قائمة اصدقائك .. التفاعل بتاعه على صفحات وجروبات مشبوهة .. هتلاقى معظمها هو اللى عمل لك دعوة ليها وإنت قبلتها …
طب التشكيك بييجى منين .. بــ ييجى من إنك تلاقى معظم تفاعل الشخص ده وتعليقاته على أخبار سلبية أو مفبركة … و ده فى حد ذاته بيعمل حالة من التشتيت والبلبلة عندك وعند الأصدقاء المشتركين … و ده اللى بيعمل برمجة عصبية للشخص المستهدف مع الوقت .. و يتم شده للمنطقة الرمادية بتاعة الشك وعدم الثقة .. ويلاقى نفسه عايش فى إطار من السلبية …. و خصوصا إن التوجيه هنا تم بشكل غير مباشر .. و من بعيد لبيعيد .. بنفس طريقة التلاعب بعروسة الماريونيت … بتبقى شايفها قدامك بتتحرك .. لكنك مش شايف اللى بيحركها !!!
راجعوا قوائم اصدقائكم .. و الصفحات والجروبات اللى انتم مشتركين فيها .. و صدقونى هــ تكتشفوا العجب … 🙂🙂 .. وياريت تطهروا حساباتكم من كل شيئ مريب !
سادساً وأخيراً .. إعادة الإنتاج:
ا==============
و طبعا مش محتاجين نتكلم عن أسلوب بث الشائعات والكذب والتدليس وقلب الحقائق اللى بيحصل بشكل دورى ومستمر على كل مواقع السوشيال ميديا … لكن الأهم والأخطر هو اللى بيتعمل دلوقتى .. ومجندين له كل طاقتهم … و هو إعادة إنتاج نفسهم من أول وجديد
هم دلوقتى بيعيدوا نفس اللى عملوه في السبعينات و التسعينات و الالفينات …. و لرابع مرة بينفذوا اللى نجحوا فيه قبل كده بكل أسف إعتماداً على ضعف ذاكرة المصريين .. أو طيبتهم …. و هو محاولة إعادة تدوير القمامة بإنكار كل العنف اللى عملوه .. و انهم المظلومون في الارض ..و اصحاب رسالة انسانية .. و ان كل اللى الناس عاشته و شافته اشاعات و افتراءات …. فــ تلاقي الواحد منهم يحط عينه فى عينك ، و يقولك بمنتهى الصفاقة .. مين قال ان الاخوان بتوع عنف !!؟؟ … قريت ده فين !!؟؟ … إحنا مظلومين .. و محتاجين اللى يحتضنا !! .. والدولة بتفترى علينا علشان يخلقوا عدو وهمى يغطى على فشل الدولة … حتى شوف كدة الشباب الوطنى الطاهر بينتحر من اليأس …. انت صعبان عليا عشان غرقان في الجهل و الاعلام المغرض …. و تيييت تييت تراباتاتيييت .. لأخر الإسطوانة المشروخة وشغل الكربلائيات … عشان تبدأ تتعاطف معاه .. و يُعاد تقبل فكر الاخوان مره تانية … و طبعا مش الإخوان بس .. لكن الإخوان بكل مراكيبهم من التيارات المدنية اللى بيشكلوا بكل فرقهم وتوجهاتهم ورموز النخبة العرة بتاعتهم .. الغطاء المدني لجماعة الشر .. اللى بيدعموهم وقت اللزوم ، وبيتكلموا بإسمهم .. زى ما حصل فى الأليفينات بالذات ، من قبل 2011 … و لحد النهاردة ! 🤔
الموضوع زى ما قولنا مش سهل .. و بجد مش هايف .. ماتستهونوش بيه ولا بتأثيره … لأن اللى بــ يقوموا بوضع خطط الإختطاف الذهنى دى ، بيكونوا ناس على اعلى مستوى من الحرفية … و لو أخدتم بالكم .. هتلاقوا إن فيه نشاط محموم اليومين دول على كل السوشيال ميديا .. فيسبوك وتويتر ويوتيوب … وبتتكمل بالمنصات الإعلامية المشبوهة والمعروفة لينا كلنا ….. و صولا لنقطة معينة … و لو النشاط ده مانجحش و جاب نتيجة على المدى القريب .. فــ على الأقل هــ يكون له فائدة فى المدى البعيد
خلوا بالكم
و تستمر اللعبة .. ونتكلم عن الخلايا النائمة فى مقال قادم .. و قريب بإذن الله
تحياتنا للجميع …. وحفظ الله مصر .. و شعب مصر