06 Jun 2020
هى ليبيا بتضيع وإلا إييه يا وديع !!؟
المنبطحون يمتنعون
——————————–
فى البداية ، إحنا نشرنا مقال من حوالى 3 أسابيع ، وكتبنا فيه بالحرف الواحد إن الوضع الليبى هو ملف دولى .. وفيه أطراف كتيرة داخلة فيه .. تتلاقى فيه مصالح دول كبرى أحيانا .. وتتعارض فى معظم الأحيان .. صراع دولى يضم أميريكا وروسيا وإيطاليا و تركيا وفرنسا ومصر والإمارات وألمانيا .. وفى الخلفية قبرص واليونان وتونس والجزائر والسعودية وإنجلترا .. بالإضافة للجيش الليبى صاحب القضية ، والمليشيات المسلحة المدعومة من حرامى الغسيل “جرب أحمق بغبغان … وممكن ترجعوا للمقال فى اللينك التالى:
و من حوالى أسبوع نشرنا مقال و قولنا فيه ، إن مصر حاضرة بقوة مش بس فى الملف الليبى ، ولكن فى كل الملفات التى تدخل ضمن نطاق حدود الأمن القومى المصرى .. وأشرنا بمنتهى الوضوح فى البراجراف قبل الأخير من المقال ، إلى إنه صحيح مصر مش اللاعب الوحيد .. ولا هى الدولة العظمى اللى ماسكة بدفة الأحداث .. لكن مصر عندها من القوة والحكمة والذكاء ، ما يمكنها من إدارة الأمور .. وتوجيه الدفة لما يتوافق مع مصلحة أمنها القومى لأقصى درجة ممكنة .. و حطوا مليون خط تحت كلمة اقصى درجة ممكنة دى .. وممكن ترجعوا للمقال فى اللينك التالى:
والنهاردة شوفنا رئيس البرلمان الليبى السيد عقيلة صالح ، و معاه المشير خليفة حفتر القائد الأعلى للقوات المسلحة مع الرئيس السيسى فى مؤتمر صحفى من قلب القاهرة بيخاطبوا فيه العالم كله بمبادرة سياسية كاملة متكاملة ، ودعوة لكل الأطراف للإضطلاع بمسئوليتها لإنهاء الأزمة الليبية .. فى حضور ممثلى الإتحاد الأوروبى وأمريكا وروسيا والإمارات وفرنسا وغيرهم
اللى كان غريب أوى بالنسبة لنا ، هو حالة الذعر والسعار اللى إنتابت البعض على السوشيال ميديا من إمبارح بعد قرار الجيش الليبى بالخروج من ضواحى طرابلس والخروج من ترهونة بدون قتال !!! .. هو خلاص للدرجة دى إحنا بنتهز !؟ .. للدرجة دى إحنا ماعندناش ثقة فى بلدنا .. وجالنا ذعر إن خلاص المليشيات والأتراك داخلين علينا !!؟؟ .. والله عيب علينا بجد !! 😏
نحب بس نفكركم إن ليبيا كانت بالكامل فى إيدين المليشيات المسلحة ، فى الوقت اللى كانت مصر فى اضعف حالاتها ، وكانت ملخومة فى الإقتصاد وتطهير سيناء وتأمين حدودها الجنوبية ، وعمل تحالفات دولية وإقليمية .. ياترى بقى كانوا قدرولنا على حاجة !؟ .. فما بالك دلوقتى … هو إحنا بننسى ليييييه !!!؟؟
أومّال لو بقينا فى مواجهة شاملة مباشرة مع العدو ، هــ نعمل إييه ساعتها !؟ .. هو إحنا للدرجة دى هننا على نفسنا وهانت علينا بلدنا فى عنينا !!؟ …
إنتم يظهر نسيتوا إن القرد فى يوم من الأيام .. قاللك مافيش إتفاق فى شرق المتوسط ، ويجب إعادة توزيع الثروات ومشاركة تركيا .. فــ مصر قالتله إلعب بعيد يا بابا .. وإنت برة منتدى غاز شرق المتوسط .. ولما بعدها بفترة طلعت تركيا و قالت إنها مش معترفة بإتفاقية ترسيم الحدود البحرية ، وإنها هــ تاخد حقها بإيدها ، وإنهم لهم حق فى حقل ظهر وغيره .. فــ مصر طلعت بيان واحد بس قالت فيه بما معناه .. لو عايز تجرب ، قرّب .. والنتيجة صمت تام بصوت صرصور الحقل الحزين
مش كدة وبس لكن لما تركيا قعدت ترفص فى الأرض وتقول هــ ننقب على الغاز فى شرق المتوسط ، وقامت لمت رجالتها من على القهاوى ، وبعتت سفن لمياه قبرص الإقليمية .. وقبرص تصرخ ، والإتحاد الأوروبى يشجب … وبعدين طلع القرد وقالك ترسيم حدود بحرية مع ليبيا ، واللى هم اصلا مافيش بينهم وبين بعض أى حدود بحرية .. و هــ ننقب على الغاز .. قامت مصر طلعت ببيان صوغنطوط قالت فيه فيما معناه “بلاش تلعب فى عداد عمرك ، وإلعب بعيد ياشاطر” .. وبعدين عملت مناورة بحرية ضربت فيها صاروخ هاربون فى الهواء من غواصة مصرية ثمنه 3 مليون دولار .. أاه والله كدة بس فى الهواء .. خلّى شرق المتوسط كله وقف على أظفاره .. و النتيجة إن السفن التركية قعدت كدة كام اسبوع تصطاد سمك .. وبعدين القرد حط ديله بين رجليه ورجع تانى على بلده
ده معناه إييه !؟ .. معناه إن مصر تمتلك قوة الردع الكافية ، اللى تقدر تحافظ بيها على أمن مصر وإستقرارها ضد أى فار يحاول يفكر مجرد التفكير إنه يقرب من مصر .. والرئيس السيسى قالها بكل صراحة ووضوح “اللى هيقرب هيشوف”.
نرجع بقى لموضوعنا .. فــ مصر من بداية الأزمة الليبية .. أعلنت إن مالهاش قوات فى ليبيا .. ولا بتقاتل خارج حدودها .. و يوم ما بتعمل كده ، بتعمله فى العلن وبدون أى مواربة .. وبغض النظر عن مين اللى قام من البداية بــ لملمة شتات الجيش الليبى ، وتدريب قواته ، وتنظيم خطوطه ، وتدعيم قدراته ، وتطوير إمكانيته الخططية والعسكرية لحد ما قدر يزحف من بنغازى حتى وصوله إلى مشارف طرابلس .. لكن كل ده وكانت مصر بــ تقول إن الحل للأزمة الليبية لازم يبقى حل سياسي … و ده معناه إن كل اللى كان بيحصل ده ، من أجل الوصول لحل سياسى .. لأن بالرجوع لبداية مقال النهاردة عن أطراف الأزمة ، هــ نلاقى إن مصر كانت أكيد شايفة وعارفة برغم كل شيئ .. إن اللعبة فى ظل الأوضاع العالمية الراهنة مش ممكن تنتهى إلا بحل سياسى ! .. و ده اللى وصلنا له و نفس اللى إتقال فى المؤتمر الصحفى النهاردة مع رئيس البرلمان الليبى وقائد القوات الليبية ..
و الرئيس السيسى النهاردة فى المؤتمر الصحفى قال بالحرف الواحد وكررها مرتين:
“نحذر من إصرار أى طرف من الإستمرار فى البحث عن حل عسكرى فى الأزمة الليبية كما نؤكد على متابعة مصر عن كثب وبالتنسيق مع الإخوة الليبيين لكافة التطورات الميدانية التى تحدث على الأراضى الليبية ورفضها الكامل لكافة أشكال التصعيد التى من شأنها زيادة تعقيد المشهد الليبى ، وتنذر بعواقب وخيمة بكامل المنطقة” ……. و لما نربط الكلام ده بــ بيان اللواء المسمارى ، المتحدث بإسم الجيش الليبى فى المؤتمر الصحفى بتاع إمبارح … نفهم إن كل ما قام به الجيش الليبى من تحركات و إنسحابات تكتيكية كان بالتنسيق مع مصر .. فــ ياريت بقى السادة الخبراء يهدوا ويتبطوا وينقطونا بسكاتهم .. لأن ماحدش يعرف حقيقة اللى بيحصل على الأرض ، وما يدور فى الغرف المغلقة غير أطراف اللعبة .. و أهل مكة بالفعل أدرى بشعابها
و تأكيدا للكلام ده .. فــ النهاردة بعد مؤتمر القاهره حاولت مرتزقة اردوغان إحتلال مدينة سرت عبر قصف بالطائرات المسيرة والدفع بالمدرعات و العديد من كتائب المليشيات .. إستغلالا لأن الهدنة هــ تبدأ لسة يوم 8 يونيو .. فكانت النتيجة إنهم أخدوا علقة سخنة ، وتم مطاردة المليشيات إلى مابعد سرت وإعادة تموضع القوات الليبية غرب سرت على مسافة 30 كيلومتر .. و ده بيوضح إن خروج الجيش الليبى من مناطق بعينها كان بناء على إتفاق .. وبضغوط من الأطراف الدولية الكبرى تمهيداً للحل السياسى ومؤتمر برلين 5+5 .. عكس ما بــ يروج السراج و من خلفه تركيا ، إن اللى حصل ده كان إنتصار … إنتصار إييه ده اللى فيه جيش ينسحب من مواقع متمركز فيها ، ويسلم مدن بدون قتال .. إلا لو كان ده بإتفاق مسبق !!
الرئيس السيسى أكد النهاردة كمان فى مبادرة الحل السياسى ، على ضمان توزيع عادل للثروة الليبية على المواطنين الليبيين ، والحيلولة دون تسربها إلى أيدى من يستخدمونها ضد الدولة اليبية .. كما أكد على إلزام كافة الجهات الأجنبية بإخراج المرتزقة الأجانب من كافة الأراضى الليبية وتفكيك المليشيات وتسليم أسلحتها للجيش الليبى لضمان أمن وإستقرار ليبيا
طب هل الإشتباكات ممكن تتجدد !؟ .. وارد جداً .. هل الجيش الليبى جاهز لها !؟ .. أيوة جداً .. والدليل هو اللى حصل النهاردة فى سرت … لكن فى النهاية ، الحل السياسى هو اللى هــ يحكم ، وهــ نشوف المفاوضات هتوصل لفين .. وإييه هى أليات تشكيل المجلس الرئاسى المزمع تشكيله !
أما بقى بالنسبة للإخوة الخووبراااء والمحلليييين ، واللى إشى داااكتور إييه ، و إشى إووستاذ إييه ، و إشي خبير سياسات إييه ، و إشى أووستاذ علوم سياسية منين .. من الباحثين عن اللايكات والشير .. و اللى شغالين تسخين بقالهم كام يوم .. وعنتريات مالهاش أى معنى .. وكلام من نوعية إحنا لازم يبقى لينا موقف .. ومصر مستنية إييييه … ويلا بينا نطلع كلنا نهجم هجمة نجيب بيها جون ونرجع … الكلام ده مش بيأكل عيش .. الكلام ده بــ يبسط الناس صحيح .. وبيجيب تفاعل .. لكنه مالوش علاقة بإدارة دولة بحجم مصر .. وسيادتك وسيادته وسيادتها مش هــ تقرروا على الفيسبوك من خلف شاشة الإسمارت فون بتاعكم إييه اللى لازم يتعمل ، وإييه اللى مايتعملش 🤔🙄
النهاردة السعودية والاردن والامارات والبحرين وفرنسا وامريكا وجامعة الدول العربية وروسيا وايطاليا طلعوا بيانات تاييد للمبادرة المصرية .. و علشان كدة ، مادام اقدر احل بالسياسة ما يدور خارج حدودى …. يبقي العب سياسة الف يوم …. و لا احارب بجيشي بره حدودى يوم واحد .. و عند اللزوم .. جيشى جاهز .. وقادر .. 😉🙂
و علشان كدة إحنا مع بلدنا ، و واثقين فيها ، ومؤيدين بشكل تام لكل القرارات المصيرية اللى بتاخدها القيادة السياسية .. و بــ نجدد دعمنا للرئيس وحكومته فى إتخاذ كل ما يرونه صحيحاً ومناسباً من موقعهم اللى هم فيه
حفظ الله مصر وشعب مصر