حرب الاشاعات ما بين المواطن الزومبي و الانتحار القومي – (الجزء الخامس)

20 Mar 2019

حرب الاشاعات ما بين المواطن الزومبي و الانتحار القومي – (الجزء الخامس)
إشاعة مصر باعت الغاز لاسرائيل بسعر اقل من تكلفته – مصر اشترت غاز اسرائيل بسعر اضعاف قيمته
==========================================================

نكمل حديثنا عن حروب الاشاعات و الحرب النفسية التي يقوم بها اعداء الوطن على الشعوب لتدمير نفسها بنفسها …. و كيف ان هدفها ان تدخل المواطن في حلقة مغلقة من الشك و الجدل و العقيم …. حتي تخلق حالة للمواطن انه يستعر من وطنه ، و تؤدي بيه “للإحباط” …. اللى بــ يؤدي الى الشعور بالحزن الشديد ، و أن مفيش حاجة في حياته لها قيمة او أمل ، فــ يتحول الى مواطن منغلق على نفسه دائماً وغير قادر على استقبال أية أفكار إيجابية و الإحساس الدائم بالفشل في الحياة العملية والأسرية … ثم يتحول الى مواطن فاشل مدمر لكل شىء حوله … “كائن زومبي” …. عشان يوصلوا الى الهدف الرئيسي ليهم و هو “الانتحار القومي” ….. فــ يتم تدمير الدولة المصرية بــ إيد المواطن المصري بنفس ذات نفسه … زي انتحار الحيتان في البحر لما بــ يقرروا ينتحروا جميعاً.

إشاعة مصر باعت الغاز لاسرائيل بسعر اقل من تكلفته :-
—————————————————–

في عام 2005 نجحت مصر في توقيع اتفاقية تصدير الغاز لاسرائيل …. و الاتفاقية دي كانت من اهم المواضيع اللى كانت بتستخدمها احزاب المعارضة و الحركات السياسية و النخبة المصرية المخترقة ، ذريعة لها للهجوم على الدولة المصرية و المتاجرة و المزايدة على الدولة المصرية لكسب المزيد من المؤيدين حولهم و ضرب الثقه بين أفراد الشعب و دولته و تكريس كذبة أن الدولة المصرية دولة عميلة خائنة للقضية المصرية و القضية العربية و الكلام الحنجوري اللى من العينة دي؟.

و مع ان بنود الاتفاقية دي مكانتش متاحة لعوام الناس و محدش منهم اطلع عليها لان مفيش دولة في العالم بنتشر اتفاقياتها الاقتصادية على عوام الناس و بالذات في منطقة زي بتاعتنا لأن الإتفاقيات لها طابع سياسي إستراتيجي و كمان مع العدو الاستراتيجي للدولة المصرية .… و في الوقت ده شوفنا عشرات النكرات اللى لبسوا ثوب الخبراء الكذابين المدلسين اللى كانوا بيطلعوا في الفضائيات و بيكتبوا في الجرايد و هم بيحلفوا طلاق تلاتة ان مصر بتبيع معظم الغاز لاسرائيل مجانا و الجزء التاني بسعر 0.75 دولار للوحدة الحرارية الواحدة و اللى هو سعر أقل من تكلفته دعما للاقتصاد و المواطن الاسرائيلي و اللى في نفس الوقت المواطن المصري الغلبان مش لاقي اللى يدعمه …. خيانة بقي و كدهون 😊

و كعادتهم في خلط الاوراق و استخدام معلومات مش في محلها ….. كانوا بيستشهدوا بالباطل باتفاقية روسيا مع بعض الدول الاوروبية انها بتبيع الوحدة الحرارية ب أكتر من 8 دولار … و شوفنا ازاي كان الاخوان و النوشتاء بيعملوا فاعلياتهم و ينزلوا الشوارع يهيجوا الناس و يقنعوهم ان مصر داعمة للكيان الاسرائيلي و ان ازاي الكهرباء بتقطع عن قري الصعيد بتاعة الغلابة عشان بيوت المواطنين الاسرائيليين تنور بالغاز المصري …. و ان الدولة المصرية خائنة و عميلة ….. و كان ده من احد اهم ادوات تحضير الشارع لاحداث يناير 2011 اللى كان من اهم مطالب الشارع ساعتها ايقاف اتفاقية الغاز مع اسرائيل …. و بعد كده ظهر الاخ الملثم بتاع سيناء و كان بيقوم يوميا بتفجير خط الغاز المصري الذاهب الى الاردن عبر سيناء عشان يتم ايقاف تصدير الغز المصري الى الاردن … في الوقت اللى بالفعل كان من اول قرارات محكمة القضاء الادارى و تحت الضغط الشعبي وقتها بإيقاف اتفاقية نقل الغاز الى اسرائيل … و ده طبعا بعد نجاح وقف تصدير الغاز للاردن بعد تفجيرات خطوط الانابيب …. مما ادي الى هروب شركات التنقيب و البحث عن الغاز و تطوير الابار لتراكم مديونيات مصر لديهم اللى وصلت الى ارقام فلكية وصلت الى 8 مليار دولار …. و ده ضغط علينا و كاد يركع مصر اقتصاديا وقتها مع ايقاف السياحة و اضرابات المصانع و هروب باقي المستثمرين الاجانب من مصر …. بخلاف قضايا تحكيم لصالح اسرائيل بقيمة 2 مليار دولار واجبة السداد بسبب حكم محكمة القضاء الادارى بإلغاء الاتفاقية من جانب واحد.

و بعد 2011 تتضح الحقيقة …. ان كل الرموز السياسية و النخب و الخبراء النصابين اللى كانوا بتتكلموا بقالهم سنين …. طلعوا كدابين و مدلسين … و ظهر بالوثائق الرسمية اللى راحت في المحكمه ان مصر كانت بتبيع الغاز لاسرائيل بـ 2.75 دولار … و ان تكلفة الخط و الانشاءات كانت على حسابهم مش حسابنا …. و ان مصر في الوقت ده كانت بتتحكم في 60% من الطاقه بتاعة اسرائيل و هو ما يضع مصر في مركز قوة استراتيجي كبير داخل الاقتصاد الاسرائيلي و مراكز صنع القرار هناك …. زي ما هو حاصل ما بين روسيا و اوروبا …. و يتضح ايضا ان مفيش حاجة اسمها سعر الغاز النهارده بكام … لان مفيش نظام تسعير عالمي للغاز من اصله ممكن يديك سعر استرشادي زي بورصة تسعير البترول مثلا … و ان كل عقد له ظروفه و نظام التسعير الخاص به بيعتمد على مكان بير الغاز و هل حيتم تصديره مسال و لا عن طريق انابيب … و طول الانابيب دي قد ايه .. و هل هي في البحر و لا على البر … و عدد الدول المار بيها … و ايجار الارض اللى ماشي عليها الانبوب … و قصه كبيييييره تفاصيلها معقده جدا جدا …. و ان مثلا الغاز الروسي لو كان فعلا بيتباع بـ 11 دولار لدوله ما في اوروبا … الا ان اللى بتاخده روسيا في اديها لا يتجاوز 2 دولار … لان الفرق بيروح في ايجار الارض اللى بيعدي عليه الانابيب بين الدول الاوروبية لطول المسافة و هو عكس الوضع ما بين مصر و اسرائيل. … و الأهم من ده … بعد حكم المحكمة النهائي و البات في براءة الدولة المصرية و ان كل اللى كان بيقوله النصابين اللى عندنا كان كذب و تدليس … مسمعناش حد منهم طلع بكلمة و لا قال احنا كنا غلطانين … لكن بكل بجاحة نقلوا على الاشاعة التانية العكسية …. ان مصر بتستورد الغاز من اسرائيل بضعف سعره دعما للاقتصاد الاسرائيلي …. مفيش بجاحه اكتر من كده 😊

إشاعة مصر بتشتري الغاز الاسرائيلى بسعر مضاعف عن سعره الحقيقي :-
————————————————————————

بنفس الطريقة و الآليات و بنفس الاشخاص … و اعتماداً على ان الناس بتنسي …. اطلقت نفس الشخصيات و بمنتهي البجاحة إشاعة تانية ان مصر بقت بتستورد الغاز من اسرائيل دعما للاقتصاد الاسرائيلي و على حساب المواطن المصري الغلبان المطحون …. لكن مع تصاعد نسبة الوعي بين الناس … و بمبدأ ان المؤمن لا يلدغ من جحر مرتين … لم تلق الاشاعة دي صدي كبير و ما كانش ليها تأثير لان سرعة حركة الدولة المصرية و سرعة الانجاز التاريخي اللى بيتعمل على الارض دلوقتي … خلتهم مش ملاحقين علينا …. و عشان كده … احنا مش هــ نشرح كتير في تفنيد الكذبة دي لاننا شرحناها كتييير و كمان كان فيه معلومات و ايضاحات اما عن طريق الرئيس او عن طريق وزير البترول في البرامج التليفزيونية …

و نعيد باختصار كرؤوس عناوين ان المعركة اللى شغالة في المنطقة بتاعتنا من 2011 و تدمير دول المنطقة كان من اهم اسبابها هو الثروات الهاااائلة من الغاز سواء في شرق البحر المتوسط او في البحر الاحمر …. و ان المفروض ان الوكيل الحصري للارهاب في المنطقة و هو العثمانلي كان هــ ياخد توكيل السبوبة دي ، مشاركة مع اسرائيل لصالح المعلم الكبير اللى هو الدول الغربية …. و اللى عملته مصر انها افشلت المخطط ده تماما …. و حولت نفسها من مجرد فريسة الى صياد مفترى …. و انها لم تكتفي بالحفاظ على ثرواتها … الا انها كمان حيدت دول المنطقة كلها بما فيها تركيا و اسرائيل … و فرضت ارادتها على الجميع لتصبح هي الـ HUB اللى هــ يتم توزيع مصادر الطاقة الخاصة بالمنطقة كلها من خلالها الى الدول الغربية …. و فرضت ان محدش حيصدر متر واحد غاز الا من خلالها هي … عشان تكون حنفية الماسورة الام بتاعة الغاز عندنا احنا … و ان استيراد الغاز من مصر هــ يكون سعره ارخص اقتصاديا لاوروبا من سعره لو اشتروه من اسرائيل لان البنية التحتيه في مجال الغاز في مصر هــ يرخص تكلفته و بالتالي هــ يخاللي سعر الغاز المصري ارخص من الغاز الاسرائيلي او القبرصي او اليوناني لاوروبا …. و في نفس الوقت حتكون ارباحه لينا اكثر ….. و ده اجبر اسرائيل انها تلغي اتفاقية عمل خط غاز لتركيا لتصدير الغاز بتاعها من خلالها …. و تيجي تبيعه لمصر بسعر تفضيلي زيها زي اليونان و قبرص … و تتحول مصر الى المصَّدر الاوحد للغاز و الوكيل الحصري له في منطقة الشرق الاوسط …. و بكده انت ربطت اقتصاديات الدول دي و مصالحها باستقرارك اللى بقي خيار استراتيجي لدول المنطقة … و بعدها للدول المستورده للغاز بتاعك و اللى حتكون دول اوروبا…. و ده مثلا اللى خاللي اسرائيل تسوى و تتنازل عن الغرامه الـ 2 مليار دولار اللى حكمت بيه علينا المحكمة الاقتصادية الدولية بسبب الغاء الاتفاقية الاولي اللى اتكلمنا عليها في الاشاعة الاولي…. و زي مثلا ان مصر اجبرت دول شرق حوض البحر المتوسط في الدخول في تحالف دولي سمي “منتدى غاز شرق المتوسط” و اللى بيتكون من 7 دول هم :- مصر وقبرص واليونان وإيطاليا والأردن وفلسطين و اسرائيل و اللى الكل فيه مضي على اتفاقيات مصالح ملزمة للجميع.

و عشان مانعيدش الكلام كتير …. دي بعض لينكات مقالات و لقاءات بتشرح الموضوع ده

تحياتنا

لمتابعة تعليقاتكم